نحن لا عرب ولا أفارقه فمن نحن???

لا يعتبرنا العرب عربا

ولا يعتبرناالافارقه افارقه

ويتخانق بعضنا ليثبت انه عربى

بينما يتخانق البعض الاخر ليثبت انه افريقى

عنصريه بغيضه أشترك فيها الشمالى والجنوبى

الشرقى والغربى

من اراد ان يكن عربيافليكن

ومن اراد ان يكون افريقيا فليكن

ومن اراد ان يكون الاثنان معا فليكن

ومن اراد الا يكون لا عربيا ولا افريقيا فليكن

لكننا مللنامن هذه العنصريه البغيضه

مللنا من سماع هذا عبد وهذا سيد

هذا جلابى وغيرها

نحن جميعا يجمعنا ارض واحده وتاريخ واحد ونشرب من نيل واحد

لماذا يصر البعض على انتزاع هويتنا عنوه???

ما المانع ان اكون عربيه افريقيه وافريقيه عربيه, هذا ماتعلمناه منذ ان كنا صغارا فأفخر كونى عربيه كفخرى لكونى افريقيه

ان ما يجمعنا اكثر مما يفرقنا فلماذا نقضى جل الوقت لنزع فتيل العنصريه البغيضه

يا آباءنا واخواننا وزملاءنا وزميلاتنا فى هذا المنبر, نحن نود وطنا يسع الجميع بكل طوائفه, نريد جيلا مشربا بالحب والسلام والاخوه وليس مشربا بالحقدوالكراهيه والعنصريه والاستعلاء

فأرحمونا يرحمكم الله




وفى امان الله

لا اله الا الله

بنت الأحفاد
مالك زعلانة...خفف عنك الروع!

بت الاحفاد

طبعا انا دائما بتخيلك انتي بتزعلي سريع وكضومك يتنفخن يبقن حمر , عشان بتي روضة برضو كده

بس روضة بتي اكعب عليك في حب السودان شايفه السودان ده مافي زيو بلد والسودانيين احسن ناس

وناس طابت برضو احسن ناس في السودان

سلام بت الاحفاد

و حمدلله على السلامة

يسوئني هرج الهوية و سخف التناول..
لا استطيع التحدث بلسان الجميع

لكني برغم الفجيعة
سوداني و كفى!

خوفي نكون ديناصورات ونحنا ما عارفين

دقيقة خليني أقيف قدام المراية وأشوف ضهري

بت الاحفاد.

حمدلله على السلامة.

كلمة نحن دي بتشمل الناس كلهم. وزي ما عارفة مشكلة الهوية ما موجودة في الجنوب أصلا.
دي مشكلة شمالية بحتة. بعدين الصراع الدائر الان بالبورد عن أسرائيل والعرب . ده شهر ما عندي فيهوا نفقة.

دينق.

عرب ولا أفارقة

البيضة أم الدجاجة


من نحن ؟؟؟؟؟


المهم هو


ماذا فعلنا .. لكي نقول من نحن !!!!!

لانو يا بت الأحفاد حتي قريب دا (يعني أقل من 70 سنة كدا) كان في البلد الجميلة الأسمها السودان دي حاجة قبيحة إسمها تجارة الرقيق. والرقيق ديل بشر زي وري أي بشر في العالم الواحد يكون في أمان ربه بيزرع يلمو فيهو ناس كدا إسمهم تجار الرقيق يكتفوهم بسلاسل وشعب وحاجات مؤلمة كدا ويسوقوهم ويبيعوهم كالأنعام ويظلوا باقي عمرهم يكدحون الليل والنهار وحاتك ولا حتي أسمهم بيكتبو في كشف المرتبات, ويسمونهم بأسماء تحقيرية ويدفنون أحيانا في مقابر خاصة بهم, ولا يجوز الزواج بهم الأ نادرا جدا, لكن ممكن يكونو من ما ملكت أيمانكم.
المؤسف أنو في الغالب الأعم كان هؤلاء الرقيق من السكان المحليين من جنوب البلاد وغربها وجبال النوبة والإنقسنا وهؤلا هم الذين يعتزون بأصلهم الأفريقي.
لكن المؤسف برضو أنو الذين تورطوا في هذه العملية القذرة ناس من السودان الأوسط والشمالي والذين أستوعبو الثقافة العربية والأسلامية حتي صار بعضهم يتفاخر بأصله العربي (طبعا عارفة انو في شويه هجرات سكانية عربية للسودان واشهرها الرشايدة وبعض هؤلاء تعايش وتزاوج مع السكان المحليين وبعضهم أصر علي الأحتفاظ لنفسه بما لديه من جينات وراثية). العملية دي زائدا التورط المتفاوت (يعني تكون في مناطق مبحبحة شوية وفي مناطق مفلسة) أدت ألي يؤول امر السياسة والأقتصاد للنخبة من الوسط والشمال. هذه النخبة (بعلمها وبدون علمها) أتخذت من الأستعلاء العرقي (أولاد بلد أولاد عرب يقعدوا ويقوموا علي كيفهم) وسيلة تحكم ومن ثم مراكمة ثروات. بحيث أنها تضمن أن الوارد من العمالة الرخيصة متوفر دائما ودائما قانعا وراضو بالفتات. وكمان (والموضوع هنا بيهمك أكثر) بعض هؤلاء يريد أن يورط الأسلام في هذا الأستعلاء العرقي والعنصري. ولكنني وكثيرون مثلي نعتقد أن الأسلام بريء من ذلك وأحسب أن الرسول الكريم محمد المصطفي (ص) منع من التفاخر بالنسب ومن العنصرية وكان "كونوا عباد الله إخوانا" مبدأ إسلامي أصيل وخالد.

ولم تقف العنصرية والأستعلاء عند ذلك ولكنها أدت إلي حرمان السكان المحليين من الأفارقة من حقوق كثيرة في التعليم والصحة والتوظيف وحتي الهجرة لبلاد الله. بكلمة أن موارد البلاد لم يتم تقاسمها بالعدل. صحيح أنو حتي في الوسط والشمال لم تك هناك عدالة كاملة في توزيع هذه الموارد. ودونك إحصائيات المدارس والمستشفيات في أقاليم السودان المختلفة وشوفي كيف كان المسألة ظالمة.

أها في ناس من هؤلاء الأفارقة ما رضو بالحقارة دي وما قبلوا بالظلم البائن. وهكذا كلفنا الأستعلاء العرقي والقومي أطول حرب أهلية في التاريخ الحديث وملايين من القتلي وأكثر من المشوهين.

نحن ناس السودان الواحد والناس عندنا كلهم متساوين في الحقوق والواجبات. ولو في أي واحد عايز بعد دا يتفاخر بأي أصل خليه اليتفاخر. بس ما يحتقر خلق الله الما زيو

نحن ننتمي لأرض الله الواسعة خُلقنالإعمار الأرض وليس إفسادها والإستعلاء فيها..وما أهلك الأقوام من قبلنا إلا استكبارهم واستعلاءهم على غيرهم ..كلكم لآدم وآدم من تراب .

خلق آدم من طين الأرض كلها أحمره واسوده ...الخ فلايعيب أن نكون من أي الأطيان كنا ولكنا من آدم الطين الخليط..

الغريب أن الإستعلاء صادر من الجميع دون استثناء..

لا أنتمي لقبلية ولا لقطعة أرض فأنا انتمي للأرض كلها..

دمتي بخير بنت الأحفاد

الأخ / نصر
تحية طيبة

يا أخي الحقيقة واضحة زي الشمس وكل ناس السودان شماله وجنوبه
يعرفونها, انت ليه بتروج لي انو الشماليين استعبدوا الجنوبيين وناس
جبال النوبة؟؟؟؟؟؟؟؟؟
المستعمر يا سيد نصر هو من فعل بنا هذا كما فعلها في جميع الدول التي
استعمرها؟ استعمل الشماليين عشان يمشوا يقبضوا الجنوبيين وهم (المستعمرين)
يشيلوا الرقيق ويسفروهم أمريكا. انت مالك ما شايف العنصرية في جنوب أفريقيا
الدولة انتهت متين؟؟؟ وما شفت نلسون مانديلا حارب كم سنة عشان يحرر الأفريقي
الأسود من ظلم التفرقة العنصرية. الكلام دا كان وين عندنا في السودان, العرب
عندهم محلات براهم والزنوج عندهم محلات براهم.
وبعدين ياخي الحرب في أمريكا بين الزنوج والبيض كانت شغالة كم سنة وبعدين
الأفارقة ديل الوداهم لحدي أمريكا منو؟ مشوا براهم يعني ولا شنو (ماتصحى معانا شوية)
لو كانو الشماليين بتاعين السودان ديل داخلين في الموضوع بتاعك دا بتاع الرقيق
وما أدراك ما الرقيق يبقى الخلاهم يدخلوا هم الأوروبيين الذين هم سبب دمار هذا
العالم بحبهم لما يملكه الغير والتاريخ واضح --- لو عدتم عدنا ولو سكتم لن نسكت
عن ما يروج أن الشماليين هم تجار الرقيق.

أبوفتحية

درسنا في المدارس عن حكاية الرقيق دي وقرينا كتب في تاريخ السودان ولاقينا ناس كانو رقيق ولاقينا ناس كان أهلمهم تجار رقيق وملاك رقيق, وشفنا أحياء كاملة في كبريات المدن للرقيق السابقين ولحدي هسع في بلدنا بالذات في أحفاد رقيق سابقين. قرينا شعر وسمعنا شعر عن الرقيق وكان داير بقول ليك شعر ود الفراش في الدون لحق حبيبته التي لم يستطع منها زواجا فقال في "خدوميتها" ما قال
الزبير باشا قبل الأستعمار تاجر في الرقيق وكون منهم جيوش واحتل بيهم دول واسس بيهم دول. درسنا في كتب التاريخ عن انو عثمان دقنة كان تاجرا للرقيق ومنعه الأنجلير من ذلك فشارك في الثورة المهدية. وتحرير الرقيق جاء بعد الحكم الثنائي. وأول مرة يتفق زعماء السودان (ناس السيد عبد الرحمن والسيد علي الميرغني والشريف الهندي) كان حين أرسلو رسالة للحاكم العام عشان ينسي حكاية تحرير الرقيق دي. (ممكن أورد ليك نص الرسالة لو عايز)
ولو عاوز أديك أسماء كتب ممكن تفيدك

لا

Quote: يعتبرنا العرب عربا ولا يعتبرناالافارقه افارقه

بت الاحفاد سلامي،

رغم كل التسميع بتاع قال الله قال الرسول، زيك اوزي غيرك شايفك جاكة من افريقيتك!

سودان لغة معناها شنو لمن تقولي احنا ماافارقة؟

الافارقة مادام ناكرنهم، متبرين متعرين منهم، دايراهام يسو ليكي شنو؟

رغم ده كلو، الافارقة يجلون السوداني رغم جحوده ويقدرونه رغم تنكره لهم.

اماالعرب فمعاهم مليون حق يدو زنوجة السودان بالجزمة القديمة!

كاره ذاتو، مين حابيهو؟

في الختام مكوناتنا الجينية عمرها ماكانت موضوع اختيار اومزاج، عمرها!

لمان العلم ده نستخدمو في السودان، فمافاهم، مواهيم العروبة حيقبلو علي وين؟

ياربي النيل، ولاحيمشو البحر المالح، عشان مايقعو فيهو من طولم!

بنت الأحفاد

عرب أو أفارقه
هذه دعوات عنصرية
و قد كتبت في هذه الأمور و نعن الدعوة إلى القومية العربية بأنها دعوة عنصريه

أما إن كان بعض السودانيون لن يهدأ لهم بال إلا بمعرفة أصولهم فعليهم البحث في المراجع العلمية
و بما أن العلم تطور و يمكن الكشف عن الأصول بواسطة الخرائط الجينيه فأرجوا من الذين يرغبون دعم بناء معمل لحليل جيني لمعرفة من أين أتوا

أما إن كنت ترغبين في البحث في المراجع فالإنترنت كفيله بمدك بأغلب المعلومات و مثال لذلك هذه المعلومة أدناه
(
مهما تتبعنا مخلفات التاريخ، وجدنا تاريخ السود والسودان غامضا، وغاية ما علم أن سكانه الأصليين، كانوا عدة فرق، فمنهم من هاجر من أسيا، فصبغتهم حرارة الشمس بلونهم الأسود، وتبعهم بنو كوش من أولاد حام من أرض الحجاز بعد الطوفان، ومن عواصمها القديمة مروي بقرب مدينة شندي الحالية، ونباته عند جبل البرقل في آخر حدود نقله وكلتا العاصمتين الآن خراب، وكانت تسمى بلاد السودان في عهد اليونان أثيربيا ثم خلفهم النوبة والبجة، واشتهرت النوبة على عهد البطالسة، وكان أول ملوكهم سيلكو وكانت عاصمته تلمس، الواقعة بجوار كلابشة، والبجة، من بقية أولاد حام)

http://www.kashifalgetaa.com/moalefat/057/05.htm#3

و عليك أن تعملي تفكيرك حتى تصلي ألى النتيجة الحقيقية و ليس النتيجه المرغوبه