Post: #1
Title: أمسك الخشب :اختطاف مواطن سوداني بالجزيرة !!!
Author: ebrahim_ali
Date: 07-18-2006, 04:05 AM
Parent: #0
شرطة المعيلق تحقق في إختطاف مواطن منذ 13 يوماً
يواصل قسم المعيلق بولاية الجزيرة البحث عن مواطن بالمنطقة اختطفته مجموعة مكونة من عدة أفراد منذ ثلاثة عشر يوماً فيما يحقق مع أحد المشتبه فيهم في البلاغ عقب ادلائه بافادة كاذبة عن مكان الشخص المختطف وابلغت مصادر بالقسم (الايام) امس ان اجراءات البلاغ المفتوح تحت المادة (162) من قانون الاجراءات الجنائية ما زالت مستمرة للعثور على المواطن والقبض على الجناة تمهيداً لاحالتهم للمحاكمة.
*نقلاً عن صحيفة الأيام الصادرة اليوم تاريخ 18/7/2006م
وصلت لدرجة اختطاف مواطنين داخل بيوتهم ربك يستر من الجاي
|
Post: #2
Title: Re: أمسك الخشب :اختطاف مواطن سوداني بالجزيرة !!!
Author: ابوحراز
Date: 07-18-2006, 04:39 AM
Parent: #1
لكن صاحبك دا يا ابراهيم جايز يكون سكران
عندنا ناس في مناطقنا دي مرات السكرة بتعمل فيهم عمايل بطالة جدا
والواحد بدل مايمشي المعيلق
يقوم يمشي ابوعشر
بعدين لزومه شنو الاختطاف
هل هو رجل أعمال يعني ؟؟
وحتى رجال الأعمال عندنا الواحد راس ماله كله لوري وبقرتين
دا ذكرني واحد صاحبنا
كان كل يوم بعد الساعة 12 بالليل والناس تهجس وتنوم
بيقوم يتحاوم بالفريق
غريبة مايمشي الا البيوت المافيها رجال
يعني عارف انو صاحب البيت شغال
واللذيذة لما يكون صاحب البيت ميت
اها يوم جاء ماشي ودخل ليهو حوش
قامت ست البيت كانت نايمة برة وصحت
قالت دا منو : قام قال ليها
دا أنا عامر شايلني حمار النوم !!!!
اها صاحبك مايكون شاله حمار النوم وطفشو في الهلالية ؟؟
قال اختطاف مواطن قال !!
{ الكسرة بتاعتكم مانجضت لسه !!!! }
|
Post: #3
Title: Re: أمسك الخشب :اختطاف مواطن سوداني بالجزيرة !!!
Author: ebrahim_ali
Date: 07-18-2006, 04:52 AM
Parent: #2
تفاحة البورد ابوحراز تحياتي وسلامي وشكري
قلت لي يكون شالو حمار النوم دي بالغت فيها عدييييل
يعني صاحبك عامر البمشي يتحاوم في انصاص الليالي دي ما لقي غير بيوت الناس الميتين ورجالهم مسافرين صاحبك عندك مرض حامد ساكت
الحمد لله ما قلت لي شالو حمار النوم وداوه بهناك على رفاعة والله البلد بعد الساعة السابعة ما تشوف في الخلاء إلا لمبات ماشة لا هي عربات ولا قري بس نور كده يشع من بعيد وعندنا هناك مسمنو ود ابوذهانة تعرف دا مرة مدور ليك حفلة وقام شيخ الحلة شالو ليك حمار النوم والحفلة رابة لرب السماء شيء زغاريد وشيء شبال وشي تجدع وشيء القرد اها صاحبنا شيخ الحلة ما صحي ليك إلا وهو بالقرب من مدني (والعهدة على الراوي صحيحة مائة المائة)
(كسرتنا مستنياك تجيب لينا الملاح ولا نقرضها حافة كده)
قال كسرة قال
|
Post: #4
Title: Re: أمسك الخشب :اختطاف مواطن سوداني بالجزيرة !!!
Author: ebrahim_ali
Date: 07-18-2006, 10:02 AM
Parent: #3
اختطاف مواطن بولاية الجزيرة وليس قناة الجزيرة لكل من دخل وراودته نفسه بان المختطف موظف في قناة الجزيرة نعتذر له فالمخطوف مواطن مغلوب على أمره من ولاية الجزيرة في محافظة الكاملين محلية المعليق
|
|