Post: #1 Title: استقاله من سودانيز اون لاين Author: هشام كمال Date: 07-12-2006, 06:44 AM Parent: #0
Quote: والله دي ..بالغت فوكها جنس بولاغ ؟؟ خلي ساكت بس.. قطعت مصارينى لكن من الضحك .. قال نوعية مشتركين قال .. يا ابنى دة كاااان زماااان .. حسع البورد بقي (ادبخانة)
الساده اعضاء المنبر المحترمين وردت هذه الكلمات فى بوست بعنوان (عضو جديد رحبو بى) وكان التوقيع بأسم samo وهو يعلق على حديث العضو الجديد. عليه المكان الذى يمكن ان يصفه عضو بهذا الوصف حقيقى بيبقى مكان موتر وما مريح بالرغم من الكم الهائل من اروع الناس الاعضاء والذى كان لى شرف معرفتهم فى هذا المنبر. عليه دى استقالتى من المنبر ودعتكم الله هشام كمال
Post: #2 Title: Re: استقاله من سودانيز اون لاين Author: الصادق صديق سلمان Date: 07-12-2006, 06:48 AM Parent: #1
الأخ / هشام كمال
تحية طيبة
كل واحد في الدنيا عندو رأي وعلى الرغم من انك ما رحبت بي البورد رغم انك قرأت الموضوع - أطلب منك عدم مغادرة عشان ما يقولو (كراعي حارة)
الصادق أبوفتحية
Post: #4 Title: Re: استقاله من سودانيز اون لاين Author: حيدر حسن ميرغني Date: 07-12-2006, 06:53 AM Parent: #2
تريث اخي هشام
فإن في نهاية النفق .... ضوء
Post: #5 Title: Re: استقاله من سودانيز اون لاين Author: هشام كمال Date: 07-12-2006, 09:40 AM Parent: #2
Post: #3 Title: Re: استقاله من سودانيز اون لاين Author: Murtada Gafar Date: 07-12-2006, 06:52 AM Parent: #1
الأخ العزيز هشام كمال
لا تغادر هذا المكان للتصدي معنا لأمثال كاتب التعليق أعلاه و هم كثر. الإستقالة هي الإنهزام بعينو و هو قمة ما يتمناه أمثال هؤلاء
هشام ألتقينا في منزلنا ببري اللاماب بمعية جلال الجميل و نفر كريم من ساورا. لا تغادر فأنت أولى بالبقاء هنا من هؤلاء المعوزيين الذين ليس لديهم شئ يقولونه أو يقدمونه لنا.
مرتضى جعفر
Post: #6 Title: Re: استقاله من سودانيز اون لاين Author: garjah Date: 07-12-2006, 10:22 AM Parent: #3
الابن
هشام
اخد ليك لفة كده في الساحة دي
والضل البترتاح فيهو ارمي عكازك واقعد مع ناسو
والمكان الما بريحك
اعمل زينا
عدي منو ....وخليك كايس الجميل
واديك قائمة صغيرة بالناس الجميلين الممكن تقعد معاهم وتستمتع
أبا ذر بابكر _ الشعر
عزاز الشامي _ كتابة شديد اسال منها الود دكين
يازول يازول _ ذكريات الناس العجائز وحقيبة الفن
بدرالدين شنا _ احسن من يسخر
الملا عمر _ ملك التعقيب
قرشو _ سياحة في كلو
سجيمان ود/ محمد عبدالله الريح _ تضحك لامن تقع على صنقوعك
اسمامة الخواض / د/ بشرى الفاضل _ أدب أصيل
تماضر بنت شيخ الدين _ وهذه بحر لا ينضب
وكثيرين
كثيرين لا يمكن حصرهم
ابحث عنهم وسيطيب لك المقام
Post: #7 Title: Re: استقاله من سودانيز اون لاين Author: النسر Date: 07-12-2006, 10:35 AM Parent: #6
العزيز هشام تحية طيبة ان يكون لك موقف تجاة ما كتبة العضوء المذكور اعلاة هذا من حقك ولكن ان تتركك المنبر بسبب ذلك هذا هو الخطاء وهذا المنبر بة كل الوان الطيف وايصا يوجد الكثير من يقرا لك ويستمع اليك ولانك فنان بتعرف كيف تقيم الجمال جيدا وهذا المنبر يربطنا بة المستوى الجمالى فية ويربطنا بة مستوى العلاقات الجيدة التى اكتسبناها منذ ولوجنا الية كن معنا فنحن نحتاجك ضد التشوة نحتاجك حتى يرتفع المستوى الجمالى فى هذا المنبر ,,, و كن بخير
Post: #8 Title: Re: استقاله من سودانيز اون لاين Author: دينا خالد Date: 07-12-2006, 10:53 AM Parent: #1
ويعنى اى زول يقول حاجة تبقى خلاص صاح ؟؟؟؟
لازم تحدد اهدافك الجايي عشانها يا هشام وتصمد تجاها
كلنا جديدين ،،، لكن ما مدلعيين زيك كدا ،،، يعنى
انا هسه لو قلت ليك السودان دا ذاتو ادبخانة تقوم تحردو لى ؟؟؟
اصلو انا من الله خلقنى ما شفت لى ود مدلع ذى دا !!!
شفت الناس بقو يتعاملو معاك كيف ؟؟؟ يقولو ليك الكلام وانت تعمل بى ..
طيب انت اشتركت لى شنو؟؟ عشان تقول شنو ؟؟ لو ما بتقدر تدافع عن كلاماتك
وترد على الناس البتتكلم فارغ ببقى انا بحييك على قرارك الصائب
Post: #9 Title: Re: استقاله من سودانيز اون لاين Author: Elkhawad Date: 07-12-2006, 11:09 AM Parent: #8
هشام كدي اسمع ده وروق ... وتعال لومني كان مشيت مننا تاني ....
Post: #10 Title: Re: استقاله من سودانيز اون لاين Author: hatim ibrahim Date: 07-12-2006, 07:04 PM Parent: #1
. أخي وقريبي الفنان هشام ســـــــــــــــلام .. المنتدى ده زي ما مكتوب في شعارو ( وطن )..... والوطن بتلقى فيهو ( الصالح ) و ( الطالح ).. ياخي انت في الحلة القاعد فيها بس ممكن تلقي ليك واحد او اتنين ينغصوا ليك حياتك لو بقيت تحتك بيهم فما بالك بمنتدى يضم في عضويته اكتر من أربعة آلاف عضو.. احسن حاجة تعملها انك تتحاشى هؤلاء الذين ( يوترون ) الأعصاب .. وحتلقى مئات الناس الرائعين .. يا ريت تتبع السياسة دي .. وخليك هنا خليك ..بلاش تفارق زي ما قالت وردة تحياتي .. .
Post: #11 Title: Re: استقاله من سودانيز اون لاين Author: عصام أحمد Date: 07-12-2006, 07:23 PM Parent: #10
الرائع الأستاذ هشام
أنا عاوز أقول ليك إني مــريت بنفس تجربتك وفي أول 10 يوم في المنبر
وقلت تاني ده طرفي من المنابر ..لكن تعرف إني في اللحظة ديك
كنت بعاين للجانب المظلم وبس في المنبر.. ونسيت (كمية الناس الحلوة) و(الآراء) و(المعرفة القيمة) والعلاقات الحا أكتسبها بوجودي بجانبهم الناس النسيت وجودهم واللي هم بيخوضوا حرب ضد مــا تراه أنت فعلا قبيح .
أضف لذلك أنني كنت سأخرج مهزوما من أشخاص ينبغي أن أساهم مع غيري في تصويبهم إذا كنت أنا علي صواب ..هذه الأقوال قيلت لي وآمنت بها تماما
ونفس هذه الأسماء التي تترجاك بعدم الذهاب هي التي ترجتني بالأمس..وإستجبت لها بدافع أنني
يا دوبك جديد وما بعرف حاجة
لكن تأكد أنه أول الطريق..
وطويل جدا ..فتحمل
مش إنت القلت (أدونا رأيكم)! في أول بوست ليك؟
رأينا تقعد معانا وما تمشي
وطول بالك وصلح المعووج مع الناس دي.
Post: #12 Title: Re: استقاله من سودانيز اون لاين Author: هشام كمال Date: 07-13-2006, 03:28 AM Parent: #11
Quote: كنت بعاين للجانب المظلم وبس في المنبر.. ونسيت (كمية الناس الحلوة) و(الآراء) و(المعرفة القيمة) والعلاقات الحا أكتسبها بوجودي بجانبهم الناس النسيت وجودهم واللي هم بيخوضوا حرب ضد مــا تراه أنت فعلا قبيح .
أضف لذلك أنني كنت سأخرج مهزوما من أشخاص ينبغي أن أساهم مع غيري في تصويبهم إذا كنت أنا علي صواب ..هذه الأقوال قيلت لي وآمنت بها تماما
الاخ عصام وكل الا خوه المتداخلين كثيرا ما تدفعك اشياء للتصرف بشكل خالى من الحكمه ولكن السعيد هو الذى يجد من يسلط له الضوء فى الطريق و اعتقد انى قد وجدت كثيرين اناروا لى مساحات العتمه .الاخت دينا المسأله ما دلع وحياتك لكن المسأله خوف على آخر صاموله مربوطه انها تتفك شكرا لكم جميعا .[/B]
Post: #13 Title: Re: استقاله من سودانيز اون لاين Author: النسر Date: 07-13-2006, 04:22 AM Parent: #12
