نداء للأخ نصر الدين البشير

الاخ العزيز نصر الدين
تحية طيبة وبعد،،
ـ كنت بحاول أتصل بيك خلال اليومين الفاتوا ولكن بدون فائدة.
الموبايل مغلق، مافي حد بيرد على تلفون البيت، الإيميل بتاعك
لا يمكن الوصول إليه حالياً. حاولت أجيك في البيت لكن للأسف ما كنت
عارفك ساكن وين. أخيراً قلت مافي طريقة غير أمشي ليهو في سودانيز
أونلاين، رغم إني في الأول كنت متردد خوفاً من الشلاليت والشوت الضفاري
بتاع اليومين ديل، وأتمنى أن يكون المانع خير والأمور كلها على ما يرام.
مشكور يا أبو الرجال ، مافقدتك شينة يا أخي، والله فعلاً موبايلي
كان خارج الخدمة لأنو وقع في شوربة عدس وكان الملح بتاعها كتير
حبتين،عشان كدي الموبايل باظ نهائياً وبقى غير صالحة للخدمة..
آها ما قلت لي كنت عاوزني في شنو؟ إن شاء الله خير
ـ خير تب ، كنت عاوز أعمل معاك اجتماع فيس تو فيس عشان نبحث
العلاقات الثنائية بيني وبينك. ما أغش عليك أنا حارقاني قوالة،
يا اخي صاحبك أبو الناس قال إنت مرتك بتخوّفك.
هو من ناحية بتخوفني دي بتخوفني لكين ما للدرجة التخليني ونسة
بين الرجال. أبو الناس أنا عارفو بكبر المواضيع عشان مخو صغيّر.
ـ معليش يا اخي أنا ما عاوز أحرجك لكين إنت انسان ظريف وأنا
ما بقدر أغيب عليك ، عشان كده قلت أجيك، يعني أنا Topic less
والله أنا ذاتي اليومين ديل مشتاق لي لانسان أتكلم معاهو، الناس
كلها مشغولة بالفارغة وعاملين فيها عندهم موضوع. وبيني وبينك
لما أدردش معاك برتاح خالص، وأهو الدردشة الطالعة أحسن تستفيد
منها إنت وما يستفيدوا منها الأغراب. وتانياً لما أتونس معاك ما
ممكن أغلط عليك ولا تغلط عليْ. يا اخي تمشي البورد تلقى الناس كلها
هايجة والكاسوري ضارب، الموضوع لو كان عن مدحة أو غنية أو رياضة
تلقاهو إنتهى بسياسة وجبهة وجلابة وجناح أمجكو، عشان كدي قلت
يا راجل اختصر في بيتك إنت مالك ومال القراية أم دق.
ـ والله كلامك صاح يا أخي، تصدق مرة كان الموضوع عن الخفاض الفرعوني
قام إنتهى بالترابي ما عارف العلاقة بين الاتنين شنو!
تعرف كلامك ده ذكرني موضوع طريف، مرة عباس كورينا عندو طهور أولادو،
لما الطهار جاء ، عباس قال لحسين أخوهو أمش جيب عصام ولدك عشان نطهرو
مع أولاد عمو. كلام ما فيهو حاجة، لكن حسين زعل من عباس أخوهو وقال ليهو
كتر خيرك لكين أنا ولدي ما بطهرو طهور فرعوني. شفت المحن دي كيف؟
والله أنا طرت من الضحك. في ناس كدي يمسكوا في الشيء بدون معرفة ودراية
لما يكرهوك حياتك ذاتها. وأظن حسين من العينة البتسمع الكلام وما بتفهمو.
ـ الله يلعنك يا إبليس، يا اخ اعفى لي، أنا أمس لما ما رديت عليْ قلت الراجل
أظنو سكران طينة.
يا راجل أنا عافي ليك لوجه الله، وتانياً أنا ما قاعد أسكر، المريسة دي
ما سكر، المريسة عبارة عن غذاء شعبي بنتقوّى بيها وبنقاوم بيها نوائب الدهر،
وكان حرام ربك غفور رحيم، يا اخي أنت عارف أنا غير المريسة دي ما بسوي
حاجة غلط. ما أكلت حق زول ولا اختلست أموال الدولة، من البيت للشغل ومن
الشغل للبيت.
ـ يا صاحبي أنا قارصة معاي ما عندك حاجة ياكلوها؟
عندي حلة القطر قام في النار ولكن منتظر ابو خليل يفتح الفرن وأجيب
لي رغيف منو عشان نتعشى مع بعض.
ـ لا لا والله ما بقدر أنتظر ولو دقيقة، بمش بتعشى في البيت، المهم بقول ليك جاو
جاو الله والرسول، عليك الله تعال بكرة عشان تاخد نصيبك من الحلة.

نصر الدين
عليك الله أعفي لي

كيكفك يا عادل
عساك والاسرة بخير

إنت يا عادل مرحب بك في أي وقت وأوان
لأنك ما غريب والبيت بيتك
تعرف اليومين ديل عامل صداقة حمييمة مع نفسي
وخايف من مآلات هذه الصداقة لأن النفس أمارة بالسوء
لكن اطمئن خالص ما حايكون فيها انقلاب وبيان رقم (1)
تابع معاي لو قدرت

....

Quote: أنا Topic less

أنا برضو والله..
لي درجة إني
قريت كلامك ده كلو..
تصدّق؟!

من ناحية تانية مشتاقين ياعادل..
والتحايا موصولة لنصر الدين
....

....

Quote: أنا Topic less

أنا برضو والله..
لي درجة إني
قريت كلامك ده كلو..
تصدّق؟!

من ناحية تانية مشتاقين ياعادل..
والتحايا موصولة لنصر الدين
....

الأخ العزيز الفاتح وديدي
سلام بلا حدود
أحييك تحية خاصة لتجشمك الدخول إلى عش الدبابير هذا
وهذا يدل على شجاعتك وذوقك.
تحياتك إلى الأخ نصر الدين حأتصل إن شاء الله
ومعك أحيي صديقنا عادل فضل المولى

نصر الدين الحلبي الشنقيطي ود التبخ
تحيات بعرض العرض وطول الطول وشوق ما عندو وش
ياخ والله قاطعنها في حشانا
اسكت ساكت
والله يوم داك الفاتح دا جا لحدي المكتب
ماقدرت أقول ليهو اقعد اشرب معانا ان شاء الله كباية موية
مع انو المكاتب كلها هيلو والشباب كلهم اصدقاء ومعارف الا بس شينة والله
يعني زول زمن ما تلاقيهو وما تقدر تقعد معاهو ولو دقايق..السبب شنو
يعني الشغل ماخد كل الوقت
واحيانا يجيني خاطر ولىّ اقولك قناعة انو نحنا شغالين (سخرية) عشان حاجات وهمية
شنو يعني من صباح الرحمن ولي بعد الأذان (أذان العشاء) مصاقرين الترابيز والشاشات ونصوت ونصوت ونصوت عشان نرجع آخر الليل تعبانين ومرهقين وعايزين ننوم بس ،إجهاد ذهني وبدني والنتيجة شنو..؟
يعني اهلنا زمان من الحواشة ولي البيت والحلة، تحس انو عندهم وجود ، كائنات لها قيمة، تشارك في الحياة بصورة اساسية،تلقاهم في الحارة والباردة..
يعرفو ليك الحاصل في الحلة كلو وكمان خبارات الدنيا برضو عارفنها
هسي تمرق من المكتب وهمك حاجة واحدة تمسح شريط احداث كلها عشان تعرف تنوم
واليوم التاني تجهز شريط جديد عشان تكبسو
اها لا حياة نعيشها بالمعنى العادي
آي العادي دا دي فيها شنو
يعني من حقي اشرب الشاي بي رواقة في البيت
ومن حقي اتونس الصباح مع ناس البيت
ومن حقي امشي السوق الصباح عشان اجيب الخضار
ومن حقي اشوف جارنا هناي مع الصباح واقول ليهو امبارح البرازيل غلبوها وايطاليا شالت الكاس وزين الدين طردوه
ومن حقي ...أها ذكرني تاني شنو..؟
عليك الله شفت حقوقي الصباحية وحدها مهدرة كيف..؟
وخليها باقي حقوق النهار وباقي اليوم..
دقيق نحن في طاحونة وبرضو مارقين دراش..؟
عاين
معاذ خبرو شنو؟
شفت بقينا كيف...
داير اقول ليك قول للبشاري لو لاقي معاذ يقول ليهو البدوي بخير..
وانا امكن اجي تاني راجع..

فوق الى حين عودة
صاحبه برفقة معاذ

Quote: فوق الى حين عودة صاحبه برفقة معاذ

الأخ عادل سلام
مشكور يا سيدي على الاهتمام بأن يظل البوست عالياً
معاذ بالمناسبة وصل صباح اليوم إلى الخرطوم فاهنأ به
لكن ما عارف الاستقبلو منو من المسؤولين في المطار
على العموم ترقب نشرة أخبار العاشرة مساء اليوم لمزيد من التفاصيل
من ناحية أخرى، كان النداء في هذه المساحة مني إلى
الاخ والصديق نصر الدين البشير ولكن لانشاغلي الشديد تحول
النداء من عادل إلى نصر الدين..
آمنت بالقسمة والنصيب يا عادل؟..
راجع ليك برواقة للموضوع إن شاء الله، بس بفتش للبنزين
تحياتي عبرك للصديقين معاذ ونصر الدين
ولا نامت أعين الجبناء

الحبيب نصر الدين
احاويلك جت
معاذ في الخرطوم..؟
خبر والله وكبير كمان
بس ان شاء الله اجازة مشبعة..
لأنو البشاري لما جا في اجازتو
محّقا بي المشاوير الجانبية
وكمان قبل الاجازة ما تنتهي قام سافر راجع قال عايز ياخد اجازة من الاجازة
تتخيل...
ان شاء الله معاذ يختنا في بالو
والتلفون اليومين ديل معطل واخوك برة الشبكة

Quote: آمنت بالقسمة والنصيب يا عادل؟..

القسمة والنصيب دي الطيرت فرنسا وأدت الكأس لي ايطاليا
مع انو البيجو اقوى من الفيات..
اها خليك مواصل
وما تغيب عشان ارسل ليك في الماسنجر وأسألك من العيال
سمعت..؟

لنصر الدين
ولبورداب الأمارات
تحية

الحبيب عادل
كيفك يا راجل وعساك مبسوط ومروّق
معليش غبت عنك وخليتك في الهولد
في واحد أخونا رجع السودان قبل فترة وتعرض لعملية نشل
في أول يوم يطلع فيهو من البيت بعد وصوله إلى الخرطوم،
وبذلك يكون قد تم استقباله استقبال الفاتحين من قبل شريحة
مهمة جداً من المجتمع السوداني . وطبعاً أخونا بسبب أنه
رجل مفكر فهو دائم السرحان وكان في ذلك الأثناء ينظر إلى
مستقبل السودان بعيون مغترب، فانتهز النشالون هذه الفرصة
ووضعوا تذكار عزيز في جيبه، والراجل عشان جعلي أكلها في
حنانو ولم يتهم أي جهة بهذا العمل الاستهدافي، ولم يقم أي
أحد من سودانيز أون لاين بجمع توقيعات لإدانة الحادثة وإعادة
المبلغ إلى مكانه، وأخونا بعد عودته من السودان ظل مكسوف لهذا
الأمر وخجلان يدخل النت رغم أنو هو المعتدى عليه، وقد حاولت أن
أخفف عنه وأوضح ليهو إنو الموضوع ده ليس له فيه ذنب، وطلبت منه
أن يتعامل عادي مع الأمر فهو ليس أول واحد يتم نشله، وضربت له مثل
بعبد الرحيم محمد حسين فقلت ليهو يا اخي عاين لعبد الرحيم ده رغم
إنو موضوعو عكس موضوعك لكن بتعامل عادي جداً وبيظهر في التلفزيون
وتمت ترقيته إلى فريق، وكذلك عاين لعلي الحاج الراجل عينو قوية
وأسبوعياً قاعد يتكلم لقناة الجزيرة والمناقل، وكمان ما تنسى الصافي
جعفر برضو قاعد يبكي الناس في التلفزيون وفي خطبة الجمعة بعد أن بكى
المغتربين في سندس، وطبّق فيهم نظرية نكتة إمام المسجد بتاع الكوتشينة
هناك نبكيكم وهنا نبكيكم)
لكن صاحبي ما سمع كلامي لأنو صدروا ضيق للنصح وجيبو واسع للنشل.
أما أخونا المشى قريب ده فلا خوف عليه من النشالين بل العكس، لأنو
راجل تفتيحة وواقع من السماء عشرة مرات، بالإضافة إلى إنو شايل تزكية
مني أنا لشيخ النشالين ببانت وشارع الأربعين بحكم نشاطاتي السابقة المشبوهة
معهم وأخص منهم كمال نظرية وآدم جكس، عشان يسمحوا للراجل ده لو إتضايق في
الضرائب يخلوهوا يطرح ليهو فردتين تلاتة والمسألة ما فيها حرج لأنها من الشعب وإلى الشعب. تعرف أنا العاجبني في الشعب السوداني ده شنو؟
إنو شعب فاهم، يعني لو قبضوا نشال، السوق كلو يتلم ويظل يضرب في النشال، ولكن بعد أسبوع واحد لو جاء النشال ده إترشح للانتخابات حايفوز وربما بالإجماع السكوتي كمان، يعني شعب أصلو ما معقد، ودي قمة الوعي بتاعو، الله يخلي لينا الشعب ده لشعبنا الغلبان.
وللحديث بقية
وهو ذو شجون

تم التعديل لأخطاء مطبعية

ود العين والفؤاد نصر الدين
ياخ كيفنك عديل كدا
تعرف انا بقرأ في الحكاية ومتوقع اسم البشاري يرد في النهاية
لكن ابيت تجيبو..
اها آنوريك الحصل ليهو في أول يوم
طبعاً هو غاوي قشرات بالجلابية (ليست بيضاء بيد انها مكوية)
اها بعد ما لبس الجلابية قال يمشي البنك يغيّر شوية مصاريف
(800) ألف جنيه،تساوي 80 ألف دينار
المهم صاحبنا ختاها ليك باليمين وقال يصل البدوي
اها لما وصلو في المكتب لقي الجيب (قطفة يمين) ، الحمد لله لم تكن هناك عقرة شمال ، ووحاتك الموس قطع شك تعمل قطعية في 3 رؤوس من الحجم الاطفالي
(smooth شرط) لدرجة ان الفلوس انزلقت كأنهاعلى سراميك دون ان تحدث جلبة
اها المحطة الثانية في المشاوير كانت لي اخونا الرائد مالك (نمسك عن باقي الاسم) المهم بعد الوصول واكتشاف الفعلة ، أخونا الرائد أصر على فتح بلاغ ، وجرى نقاش شديد حول الموضوع وجدواه باعتبار ان الحرامي بيكون(زاغ قبيل) وبعدين الحتة التمت فيها السرقة ما معروفة بالضبط..لن اخبرك بما تم ، لكن اكتشفت ان العامل (النفسي) كان وراء اصرار اخونا النظامي على الاجراءات
....
ويكتشف اخونا ان التمزيق الحدث للجلابية كان أفظع من جرح المبلغ المفقود بإعتبار ان الجلابية أثيرة عنده مثلها مثل المقتنيات النادرة (وهي فعلاً كذلك بمقاييس الهندام في البلد)
بالنسبة لي معاذ فافتكر زي في الحتة ما عندو مشكلة ذلك للتالي:
1- معاذ جاء برفقة العيال (ولى انا غلطان) لذلك لن يحتاج الى مشاوير كدراوية طويلة مما يجعل امر اختلاطه بالجماعة اياهم قليلة نسبيا.
2- الطول الذي يمتاز به يصعب مهمة الزول الحرامي إذ يحتاج الى طول مواز ..ولم يثبت حتى الان ان فئة شق الجيوب من طوال القامة.
3- معاذ غير معتاد على لبس الجلابيب ..مما يزيد من مساحة تأمين الأموال المحمولة نقداً
..غير ذلك الا ان يقع في نوع آخر من النشالين وهم الذين يمكن ادراجهم في فئة المحتالين..
وهذه ايضاً تتوقف على نوع الخدمة التي يحتاجها خلال اجازته ،مثل شراء قطعة أرض، استبدال عملة في السوق المواز، بيع عربة، او منقولات تدخل في سياق السلع الرأسمالية المعمرة (مكنة تصوير، مكنة آيسكريم،مشغل،مصنع تلج صغير..الخ الخ) ومعاذ الذي نعرفه غير مهموم بمثل هذه الأشياء.
قلت
(لكن صاحبي ما سمع كلامي لأنو صدروا ضيق للنصح وجيبو واسع للنشل.
أما أخونا المشى قريب ده فلا خوف عليه من النشالين بل العكس، لأنو
راجل تفتيحة وواقع من السماء عشرة مرات، بالإضافة إلى إنو شايل تزكية
مني أنا لشيخ النشالين ببانت وشارع الأربعين بحكم نشاطاتي السابقة المشبوهة
معهم وأخص منهم كمال نظرية وآدم جكس، عشان يسمحوا للراجل ده لو إتضايق في
الضرائب يخلوهوا يطرح ليهو فردتين تلاتة والمسألة ما فيها حرج لأنها من الشعب وإلى الشعب).
كويس انك عملت ليهو تزكية ، لكن حاذكرك قصة أخونا(ود....) الكان قدامنا في الجامعة بي سنتين..يعني بتعرفو شديد..
قال مرة وقعت منو قروش (زي 40 جنيه) بمقاييس 1991 كانت مصاريف لا بأس بها ربما تكفي اسبوعاً، المهم هو جاء ناطي بالحيطة البتفصل بين الكلية والداخلية (كلية الآداب في العرضة) وفقد الفلوس
ومن الغبينة حلف بقسم مغلظ (ولا القسم الدستوري) ...هوي ما تقولني حاجة انا ما قلتها هسي في زول جاب سيرة البحر ولىّ القوات الدولية...؟
المهم (ود...) حلف الا يسترد المبلغ كاملاً ..لكن كيف؟
قال سيسترد المبلغ من اصحاب البصات والمطاعم وستات الفول وبتاعين الموية ..ألخ.
انا افتكترت انو الزول دا حيمشي يشتغل في الضرائب ..!
وبعد كم يوم جاء وقال خلاص المبلغ رجع..!
قلنا ليهو كيف ؟ قال عملت ورقة طويلة
وبقيت ادخل المطعم وأضرب كويس وازوغ..وأسجل في الورقة...
واركب البصات وازوغ من الكمساري ويسجل في الورقة....
واجي جنب ست الفول اخمش واسجل في الورقة......
وكمان بتاعين الموية يجغم نص كوز ويضيف للحساب..
وهكذا دواليك حتى وصل المبلغ الى تمامه...
(وجه بفردة شارب يمين)..
...
عليك الله تعال راجع