أغنى أغنياء السودان و المفاجأة ترتيب صلاح ادريس في القائمة!

صاحبنا (شمارات) عرف بحبه الشديد لمعرفة الأخبارو المعلومات و عرف بذكائه على جرجرت من يظن أنه يملك المعلومة للبوح بها.
كان يجلس مع شلته و كان الحديث عن أغنى اغنياء العالم و عن ترتيب الأمير الوليد بن طلال بينهم و كيف استطاع احتلال مكانه بين هؤلاء العمالقة و فجأة حول (شمارات) الحديث عن أغنى اغنياء السودان قائلا : أغنياء العالم ديل كلامهم تقيل مليارات سااااكت لكن كدي وروني أغنى أغنياء السودان نحن زمان كنا بنعرف أسماء لكن هسع ما سامع ليهم خبر باقي لي ما عرفو يواكبو العولمة البنسمعها دي و هسع في أسماء بعضها قديم و البعض جديد ، أحد الجالسين قال: هنا ما بنقدر نعرف بدقة و ترتيب لانو هنا المعلومة ما متوفرة خاصة في مجال التجارة لكن ناس الصناعة نسبيا في معلومات متوفرة و هم الأكبر في السوق ، أحد الشباب المتعلمين قال: هنا ما في شفافية و ما في جهات بتوفر معلومات دقيقةلكن هناك شركات تساهم في الاقتصاد بصورة واضحة و تحتل جزء من السوق و أصحابها هم بالتأكيد يحتلون أعلى القائمة ، انتبه ( شمارات) أكتر و قال : كدي طيب ورينا حسب معلوماتك حتى الأغنى و لو بدون ترتيب ، قال الشاب : أنا بفتكر الشركات دي أصحابها هم الأغنى:

مجموعة أراك –حسن مالك و اولاده
مجموعة دال – أولاد داؤد عبد اللطيف
مجموعة الدالي و المزموم – هاشم هجو
مجموعة النفيدي
شركات آل البرير

بالاضافة الى عدد من الاسماء التجارية ، بما ان (شمارات) مريخابي و يخلط الأوراق تدخل في الحديث و هو يبتسم في خبث :طيب هسع وينو صلاح ادريس وسط (الفطاحلة ديل) أصلو (الرشاشات) قايلنو اغنى زول في البلد ، قال الشاب: صلاح ادريس رجل اعمال يمتلك استثمارات كبيرة لكن كان يعيش خارج السودان و كتيرمن استثاراته هناك و عرف في السوق السوداني قبل فترة قريبة نسبيا ، لكن ما عارف ترتيبه وسط هؤلاء بس بالتأكيد حسب الظاهر بيجي بعدهم ،ضحك شمارات و هنا تدخل أحد الهلالاب الجالسين و قال : يا شمارات مالك ما سالت من رئيسكم (يقصد جمال الوالي) قال شمارات: الوالي شاب ناجح و مريخنا فوق و هاك (أفراس) دي (يقصد شركة افراس للنقل التي يملكها السيد / جمال الوالي).

دا جزء من ونسة (شمارات) و شلته ، هل من معلومة عن أغنى أغنياء السودان ترتيبا تنازليا؟


الحاج حمد