الامانى السندسية تتعرض للخطف ...

كعادتى فى متابعة قناة النيل الأزرق وفى برنامج جديد وجدت احد الشباب يشدو باغنية حبيبنا الموصلى الأمانى السندسية ...

هذه الاغنية لها فى حياتى ذكريات جميلة ووقع خاص لانى سمعتها فى زمن غير هذا وكنت انا غير انا ولذا اصبحت عزيزة وغالية بالنسبة لى ولا ارضى فيها أى تغيير أو تبديل...

لا اعلم هل استأذن ذلكم الشاب من حبيبنا الموصلى لاداء تلك الرائعة أم لا فذلك شأنه
ولكنى كمستمع استنكر بشدة تسجيل اغنية لفنان بيننا مازال يثرى الساحة بعطاياه وروائعه تسجل بصوت فنان اخر وتبث ...

تصور الجيل الجديد الذى لم يسمع الاغنية من صاحبها الاصلى يظن ان هذا صاحب الاغنية وبذلك يضيع حق أدبى على مبدعنا الموصلى ...

المهم فى الأمر لماذا يسجل التلفزيون اغانى ويبثها باصوات مقلدين بينما اصحابها مازالوا موجودين بيننا ؟؟؟

اننى مستاء جدا من قناة النيل الازرق لتكرارها ذلك مرارا دون مراعاة لمشاعر المستمعين الذين يحبون اغنية ويكون فى وجدانهم اثر لها على اصالتها وحينما يتم بثها بصوت اخر يحدث شرخ واسى شديد فى دواخلنا ..

لك التحية حبيبنا المايسترو الموصلى
ومد الله فى عمرك لتمنحنا المزيد من الروائع والالحان الشجية ...

قبل فترة ذهبت لأداء حفلة خاصة لمناسبة خاصة وقد شعرت حينها بالامتعاض لذوق الحاضرين في أختيار الاغاني الركيكة إلى ان سالني أحدهم فجاة : حافظ الاماني السندسية ؟ فطرت فرحا لشعوري ان هنالك من يفهم اخيرا فجاملته قائلا : يا خي والله أنت زول راقي خلاص !! فقال لي : كييييف ياخي !! أنا أي غنية بغنيها نادر خضر حافظا .. !!؟

شنكل :

ومن يومها أصبحت اغني في المناسبات (على كيفي) وما بدي فرصة لي زول يختار !!

قرشوووووووووووووووو

كلو الا اغانى ود خالى ده زول صعب ودمو حااااااااار بمشى طوالى يبشتن ليكم الفنان ده !!

قلت لى الفنان اسمو منو هو ؟!!

الفنان هو الفنان الممتاز مجاهد عمر.

قرشو ..

إزيّك ..

لو كان الفنان هو مجاهد عمر زي ما قال ملاسي ..
فاستاذنا الموصلي ما ح يقول حاجة .. لأنه مجاهد (أستاذ) وخريج قديم من معهد الموسيقى ..
وأحد مؤسسي فرقة عقد الجلاد ..ولو ما أضاف ما بينقص..
يعني زول فهمان وما بيبشتن الغنا ..
وسؤالك التحت ده ،، يا هو المجننا وما لاقين ليهو إجابة(أستثني منه مجاهد) : -

Quote: لماذا يسجل التلفزيون اغانى ويبثها باصوات مقلدين بينما اصحابها مازالوا موجودين بيننا ؟؟؟

الأستاذ صلاح عبدالله

لك التحية

ياخوى الزول على راسنا من فوق لو غنى لينا اغانيه الخاصة

لكن ليه التلفزيون يسجل اصلا ويبث اغانى لغير اصحابها ؟؟؟

مع خالص الود

الاخ حسين ملاسى

لك التحية

Quote: الفنان هو الفنان الممتاز مجاهد عمر.

الحق لله صوته جميل جدا
ولكن الاعتراض ليه يغنى اغانى ناس ثانين
ما يغنى اغانيه هو
وساعتها سنصفق له طربا

لكن العتب على القناة ما عليه هو

Quote: الفنان هو الفنان الممتاز مجاهد عمر.

اوع تقول العمل دويتو مع اسرار..
قايتو هو..
الليله يامجاهد شيل شيلتك؛ عمك الموصلى بطير جنك..
بس اول نزلو لينا العمل عشان نحكم ماتدرشو الولد ساى..

حبيبنا معتز

لك التحية

يازول انا ما سمعت شغله مع اسرار ولا حاجة
لكن الزول صوته سمح تب
المشكلة مافيه هو يا حبيب
المشكلة انه ده عمل لشخص اخر تم تسجيله فى التلفزيون ويتم بثه حتى دون الاشارة الى انه عمل شخص اخر...

بالله ما حاجة تفقع المرارة ؟؟؟

شاعرتنا الغالية ندو

لك التحية

شوفى ياختى ناسك ديل احسن تكلميهم ما يعتدوا على حقوق الناس ومزاج الناس
يعنى كل يوم القاهم يبثوا اغانى رائعة باصوات شباب جدد
وبعدين انا كده بقوم احرش زى ناس حبيبنا الموصلى يقاضيهم عديل كده
هى المسالة قايلنهافوضى ولا فوضى ؟؟؟

شكرا لمرورك يا ستى

ياناذر بالغت اها وقلت ليهو شنو؟

ناذر الفنان

لك التحية والتصفيق

ياخوى غنى على كيفك ولاى كان
لكن حرام تسجل فى التلفزيون غناء ناس ثانين وهم موجودين وكمان التلفزيون يبثها

والنتيجة تكون

Quote: فقال لي : كييييف ياخي !! أنا أي غنية بغنيها نادر خضر حافظا .. !!؟

شفت ده البرفع لى ضغطى ذاته ....

اقعد عافية

العمدة قرشو
المؤدي هو مجاهد عمر، وهاك الأغنية كمان!

الأخ راكوبة

لك التحية

ومنور كعادتك يا حبيبنا

اما الصورة التى أتيت بها فقد زادت الطين بِله ...
انا شاهدت هذا الشاب الرائع على قناة النيل الازرق
واعتبرت ان قناة النيل الازرق هى الوحيدة التى لا ترعى الاصول
فما بال تلفزيون السودان؟؟؟؟

اشتركت فى موقع تلفزيون السودان وشكيت وبكيت منهم ولكن .... لا حياة لمن تنادى

انهم يترفعون عن سماع اراءنا والرد علينا

ولكنهم يتركبون اخطاء شنيعة والله

ليس هذا الشاب وحده وانما الكثيرون الذين يسجلون اغانى لاخرين وتبث لهم....

ترى هل الغيت لجان النصوص أم ماذا؟؟؟؟

شكرا راكوبه والشاب حقيقى صوته رائع جدا وجميل ولكن الحق حق يا سيدى ..

أدهي من كدة يا قرشوا
الأغنية مسجلة في شريط لفنان إسمو مصطفي مين كدة ما عارف بقلد محمود عبدالعزيز



و الشريط ماستر كمان ما حفلة يعني


شفت كيف

Quote: اما الصورة التى أتيت بها فقد زادت الطين بِله ... انا شاهدت هذا الشاب الرائع على قناة النيل الازرق واعتبرت ان قناة النيل الازرق هى الوحيدة التى لا ترعى الاصول فما بال تلفزيون السودان؟؟؟؟

في الغالب يا قرشو الصورة من تلفزيون السودان و الأغنية من تلفزيون النيل الازرق؛
فالمزازيك المصاحبة ما اظن ناس تلفزيون السودان عندهم زيها!!

ملاسي يا خطير
هو كذلك تماماً.. تلفزيون السودان فيهو مشكلة في الصوت، خاصة مع الأعمال الموسيقية، تطلع رديئة جداً. على عكس كل الأعمال التي نسجلها من النيل الأزرق، تكون رائعة جداً.

الاخ خالد عبدالله محمود

لك التحية

Quote: أدهي من كدة يا قرشوا الأغنية مسجلة في شريط لفنان إسمو مصطفي مين كدة ما عارف بقلد محمود عبدالعزيز و الشريط ماستر كمان ما حفلة يعني شفت كيف

عينى خلاص البلد بقت فوضى ولا شنو ؟؟؟

وصلت درجة المتاجرة بممتلكات الغير كمان ؟؟؟

حتى الان لم نسمع حبيبنا المايسترو الموصلى

امكن اتنازل عن ذلك العمل ؟؟؟

ولكن هل تنازل كل عمالقتنا عن اعمالهم لاولئك الشباب ؟؟؟

حتى ولو حصل فاين اعتبار اذواقنا كمستمعين ؟؟؟

Quote: حتى الان لم نسمع حبيبنا المايسترو الموصلى امكن اتنازل عن ذلك العمل ؟؟؟

و أنا أيضاً في أنتظار حبيبناو أستاذنا الموصلي ليفصل في الموضوع فربما
تم الأمر بالإتفاق معه


و الله أعلم عشان ما نظلم الناس ديل ساكت

على حد علمي الأعمال الغنائية بعد مرور زمن معين تصبح متاحة للجميع، ولا يمنع وجود اتفاق بين أصحاب حقوق العمل مع أي جهة ترغب في إعادة إنتاج العمل، ودائماً ما نسمع بكثير من المشاكل جراء إقدام بعض الفنانين الشباب والشياب على التغني للآخرين، ويظهر الموضوع الكبير المتمثل في الحقوق والحقوق المجاورة.
قبل فترة أصدر عصام محمد نور ألبوم للكاشف، وبعده السفير الاستاذ الكابلي ألبوم كامل لحسن عطية والقائمة تطول وتطول..
وياريت نسمع إفادة موسيقارنا الموصلي حول هذه النقاط.
وياقرشو، أسمع وشاهد النيل الأزرق برضو، بالرغم من كل شيء فهي تقدم الأشياء في قوالب جاذبة ومريحة للغاية

تصدقوا ياجماعة

بالامس كذلك وايضا فى قناة النيل الازرق

سمعت واحد بغنى اغنية للبلابل .

يعنى الواحد يعمل شنو بالله

يبطل يشوف تلفزيون ولا كيف ؟؟؟

حبيبنا راكوبه

لك التحية

ان يتغنى احدهم فى الحفلات العامة فذلك ممكن
وان يسطو احدهم على أعمال اخر ويتكسب منها باصدارها فى شريط برضو بتحصل
ولكن ان يسجل احدهم اعمال اخرين وفى التلفزيون وتُبث فذلك الذى احتار فيه

يخيل لى الحكاية بقت جايطة خالص ..

Quote: وياقرشو، أسمع وشاهد النيل الأزرق برضو، بالرغم من كل شيء فهي تقدم الأشياء في قوالب جاذبة ومريحة للغاية

أعترف ان قناة النيل الازرق جميلة ومتميزة جدا عن القناة الحكومية والتى اصبحت كلها نقة
ولكن بصراحة حاجاتهم دى قاعدة تفور دمى ياخى
تعرف انا مشترك فى باقة الـ ART من اجل النيل الازرق ولا اشاهد بقية الباقة ابدا

غايتو الله يهديهم ياخى

الهميم قرشو

جزاك الله خيراً

تصدق مرة البروفسير الراحل عبدالله الطيب قال انه مرة كان يتسوق في سوق بمدينة الابيض سمع صوت

شريط قرأن بصوت الراحل صديق احمد حمدون ولما سال صاحب محل بيع عصير(كان مشغَل الشريط) عن

كيفية حصوله عليه.. قال له انه متوفر في كل مكان لبيع اشرطة الكاسيت بالمدينة

أفرد البروفسير صفحة كاملة عن عملية السطو ،كما سماها،على حقوق صديق حمدون دون الرجوع الى

أولاده او من يقومون مقامهم، وطالب حينها السلطات المعنية بفرض غرامات على المعتدين على حقوق

الغير خاصة لو كانوا قد غادروا الدنيا مثل صديق حمدون

طبعاً الراحلين / البروفسير وحمدون كانا يشاركان في تلاوة وتفسير القران الكريم بالمغرب ايام

شهر رمضان المبارك في حضرة ملك المغرب الراحل محمد الخامس واعتقد الشريط المعني هنا كان

يتعلق بتلك المناسبة

ياعزيزي الحال عندنا يحتاج لغربلة شديدة في كل شيئ...

في مستوى المفاهيم وفي التطبيق

الحبيب حيدر حسن ميرغنى

لك التحية

ذكرتنى سيدى عهد مضى كنا نستمع للاذاعة وبرنامج شرح القرآن الكريم حينما يتلو الشيخ صديق احمد حمدون ثم يفسر الاستاذ البروفسور عبدالله الطيب ... ياااااااه ما اجمله من صوت تلاوة وصوت شارح ..

شكرا سيدى على الاثراء وحقيقة الحقوق الادبية فى السودان ضائعة
وما يحيرنى لماذا يصمت الناس على ذلك

ولماذ يصمت اهل الحق ؟؟؟

هذه ليست اريحية ابدا

الحبيب قرشو تحياتي

الحقيقة انا لست متواجد بالنت لوجودي بالامارات العربية لوضع اللمسات النهائية لشريط شروق ابو الناس وأرد الان من انترنت كافيه

الحقيقه ان مجاهد فنان ومن المعجبين جدا باعمالي وأنا اقدر له ذلك كما اقدر لك حرصك التام
على اعمالي

تحياتي للمتداخلين جميعا ومحبتي

بالنسبة للمطرب الاخر لقد طلبت مني احد الشركات وبالحاح التنازل لفنان ناشئ وقام عديد من زملائي وتلاميذي الذين اثق بهم بطلب تنازلي (المؤقت) لذلك الشاب وقد حدث أرجو ان يكون قد قدمها بطريقة مستقلة ومقنعة

تحياتي

Quote: الحقيقة انا لست متواجد بالنت لوجودي بالامارات العربية لوضع اللمسات النهائية لشريط شروق ابو الناس وأرد الان من انترنت كافيه

كافيه نت ؟!!

رباه !!

واين ذهب كمبيوتر ياسر الوجيه ؟!

موصلى ود خالى اتصل بى ضروووورى عايزاك ..سمح؟

قول لشوشو ام لارا انى زعلاااانة منها جدا وهى عارفة السبب شنو !!

موصلى الزول فعلا صوتو حلو ياخ..

آآآآآآ ..
أيوه أيوه ..
دي البيغنيها حيدر بورسودان نيالا ... صاح ؟؟


........
التحية لمجاهد .. الجميل .

Quote: آآآآآآ .. أيوه أيوه .. دي البيغنيها حيدر بورسودان نيالا ... صاح ؟؟

هى دى براها ياخى ؟؟؟؟؟

ندويه بركه الجيتي طيبه يا اطيب زول

بتصل بيك ان شاء الله

ياسر كومبيوترو خسنك شويه وربما يشتري واحد جديد

وهو يشيل ويشكر فيك

وانا سهر الاستديو قدد عيوني

بكلمها ليك

حبيبنا المايسترو الموصلى

لك التحية والاحترام

Quote: الحقيقه ان مجاهد فنان ومن المعجبين جدا باعمالي

هذه لن نخالفك فيها البته ... الرجل فنان فنان ...

سؤالى مازال قائما لماذا لا يغنى هذا المتمكن أعماله الخاصة ولماذا لم تلحن له طالما انك اقتنعت بادائه وتمكنه .. وهذا طبعا ليس من شأنى ...

بصراحة عتبى ليس عليك وليس عليه هو
بل على التلفزيون الذى سجل اعمالك بصوته واصبح يبثها
والمشكلة فى امثالى الذين لا يستطيعون هضم عمل احبوه بصوت آخر

تصدق يا استاذنا اننى لا اطيق ان يؤدى نفس الفنان عمله القديم بصورة مختلفة عن الاولى ؟؟؟
يعنى الاستاذ ترباس لما غير طريقته من غناء الرق الى استخدام الالات احجمت عن سماعه واكتفيت بذكراه القديمة وليس وحدى بالطبع فى ذلك ...

اشكر اريحيتك سيدى وكرمك الفياض بتنازلك عن اعمالك التى يقينى انها لم تكن ساهلة عليك ولم تلحنها بسهولة لاخرين حتى يجدوا فرصتهم فى الظهور وولوج الساحة الفنية ...

بس ببكى واتحسر على لجان النصوص ..

.

قرشو القدير

ليت كل من يأتوننا بالأغاني الجميلة في مثل صوت هذا المجاهد ، إن المشكلة ليست فيمن يغنون

إنما من يصرحون لمن يغنون بالغناء .

لاهتمامك وقفة إحترام


عبير

رائعتنا المبدعة عبير خيرى

لك التحية والاحترام

اكيد البوست ده نور وازدان بمرورك الجميل الباهى وانا كمان راسى كبر لحضورك وكلماتك الجميلة التى اعجز عن شكرك عليها ...

Quote: إن المشكلة ليست فيمن يغنون إنما من يصرحون لمن يغنون بالغناء .

هذه لب المشكلة عزيزتى
وانت اهل حل وعقد واهل قرب ليتكم تتدخلون

مازلت اتساءل هل الغيت لجان النصوص والالحان والاصوات ؟؟؟

وهل اصبحت وسائل الاعلام مشرعة الابواب لكل من هب ودب بلا قيد ولا شرط ؟؟

ام ان مسالة المحاسيب تسربت ايضا الى هنالك كما شملت كل الساحات الاخرى ...

سعيد عزيزتى بقدومك
ووضعك اليد على الجرح

مع كل الود

.

قرشو القدير

شكراً لكلماتك

وسأرد على تساؤلاتك رغم أني لم أجد لها رداً من قبل

Quote: هل الغيت لجان النصوص والالحان والاصوات ؟؟؟

كعادة المسئولين الإنقاذيين يلعبون الشطرنج بمن يريدون له أن يبقى في منصب

مسئول لأنه يكتمل فيه الركن الولائي وتنتج عن هذه اللعبة وضع الشخص المناسب في المكان الغير مناسب .

فماذا تفسر أن يكون في لجنة إختيار الأصوات من لم يدرس أساسيات الموسيقى حتى !

Quote: وهل اصبحت وسائل الاعلام مشرعة الابواب لكل من هب ودب بلا قيد ولا شرط ؟؟

الإجابة نعم فوسائل الإعلام مقيدة بنفس الشروط والمواصفات ونحن نفتقد كثيراً لفن النقد

ونأسف لانعدامه ، فالناقد الرسمي الآن هي الدار .

Quote: ام ان مسالة المحاسيب تسربت ايضا الى هنالك كما شملت كل الساحات الاخرى ...

مسألة المحاسيب والوساطات بدأت بالإعلام يا قرشو ثم إلى الساحات الأخرى حتى الطب .

المشكلة أكبر من أن تناقش في مساحة ضيقة يا قرشو ولا أمل في مناقشتها على نطاق واسع

لما نحياه من حرية رأي !!!!

لي عودة

عبير

يعني مطربة حليوة تجيد فن البوضي لانقويش ناهيك عن الاصوات الصادرة
من حنجرتها مين سيكون من معجبيها بالتاكيد هم الجنس الزكري بالطبع
قليل جدا من المعجبات لانها اصلا ببغاء تردد اغاني وطن الجدود وطني
ولو ان استفتاء صغير عن مطربة الجماهير الان تم في اقرب جامعة
للسوق العربي وبالطبع هي جامعة النيلين والبيانات فقط زكر او انثي لكان
معجبيها هم الشباب المرهف وليس الشباب المثقف ولكن للاسف هنالك
مثقفين من الشباب يخلقون هالة حولة المطربة الببغاء وبالطبع لهم
اسباب مقنعة تجعلهم يفعلون ذلك فهم ادري بها
يعني اعطني اي جنس انثوي من الصنف الذي يجعل الرجال يبتلعون
ارياقهم لصنعت لك منه موهبة غنائية ببغائية تجعلك تنفق وانت في غيبوبة

الأخ الدكتور سعيد زكريا

لك التحية

بالأمس القريب شاهدت حفل لاتحاد نساء السودان بمناسبة مرور عام على السلام من شاشتنا الفضية ..
الحفل جميل لا غبار عليه البته ( رغم تكرار الكلمات التى سبق لى سماعها منهن فى مناسبات سابقة ) ولكن ما غاظنى فى هؤلاء النسوة (المجيهات) صاحبات النفوذ فى التنظيم (إتحاد نساء السودان) انهن كن يطربن لكل مغنية حتى جاءت الرائعة أمال النور ذات الصوت الملائكة والوجه الصبيح والتى غنت كأحلى ما يكون ولكن للاسف لم تتفاعل معها اى امرأة ولم يصفق لها احد وهى التى أشجت واطربت وغنت كما لم يكن الغناء ...

أمثال المطربة امال النور يجب ان تجد فرصتها وتجد التشجيع من الاخرين ليس لانها لا ترى النور ولكن لانها تشع النور من صوتها الرائع الجميل النادر ....

حقا سيدى القصة بقت لها مقاسات مختلفة ....

لك الود

أديبتنا الرائعة عبير خيرى

لك التحية

وما اسعدنى بعودتك الميمونة وقولك كلمة الحق التى يتوارى الناس منها ..

Quote: كعادة المسئولين الإنقاذيين يلعبون الشطرنج بمن يريدون له أن يبقى في منصب

لعل هذا واضحا تماما فى ما نشاهده وفى ما بعد حملة الصالح العام التى لم تبقى ولم تذر سوى المحاسيب ومن ساعتها والحكاية هايصة ...

لكننى كنت اظن انه بعد التغيرات على الساحة ستعود الامور الى نصابها وان الحق سيعود لاهله ...

Quote: المشكلة أكبر من أن تناقش في مساحة ضيقة يا قرشو ولا أمل في مناقشتها على نطاق واسع لما نحياه من حرية رأي !!!!

وحرية الرأى عزيزتى ان لم تصل بابراز المسالب وفضح الخفى من الامور المشينة والظالمة فما فائدتها وماذا نفعل بها ؟؟؟
اتمنى من اهل الرأى والذين تصل اصواتهم الى اعلى ان يواصلوا النبش وفضح المخازى فهذا دورهم حتى يصل الحال الى ماهو افضل ويحصل كل انسان على حقه فى هذا الوطن الضائع بين هؤلاء واولئك ..

وليس على الله ببعيد عزيزتى

لك الود كله

.

أرأيت يا قرشو ما فعلت كلمة الحق ؟

الاخ العزيز قرشو لك الود.....رمضان كريم
بقول المثل .... سمح الغنا في خشم سيدة .
لك التحية ....وكل الحب للفنان الكبير يوسف الموصلي