كاتب .. و مذاق مختلف .. علي الحلاوي

قصصياته تحول الرقعة المكتوبة .. لمسرح ..
.. دعوة لقراءة احدي النمازج ..


أمي قاعدة تعوس في التكل ..
أنا والتاية أختي .. والسرة خالتي .. قاعدين في الضل .. بنشرب في شاي لبن ..
الزين أخوي رسلناهو يشتري لينا لقيمات .. ساعـة كاملة و ما جانا راجع ..
بي شرمة الحيطة شايف ابوي .. يدو تمشي لي فوق وتنـزل .. يلم في الغنم عشان يسوقن للراعي ..
أبوي كملان من لحم الدنيا ما بقدر علي قديم الغنم .. لكن أنا لو ما ضارباني الطورية في كراعي .. أكان تلقاني كارَي الغنم قدامي .. أوصلهم لي قدام الحلة .. جنب الطاحونة .. هناك تلقي اللمة .. أي زول دافر غنيماتو قدامو .. أنا مافي حاجة جابراني علي قديم الغنم .. الزين أخوي ممكن يقدمهن .. بس بتوديني شوفة وصال بت حاج اللمين .. أصلي بريدها بلحيل .. مما أخوها سافر السعودية .. وصال بقت تقدم الغنم

يتبع...

المقطع أعلاه من قصة للكاتب علي الحلاوي
قرأتها له ..هنا ..علي صفحات سودانيز أنلاين ..لفت انتباهي أسلوبه القصصي المتميز .. و أعجبتني تعابيره .. معقدة ..و منسابة بسلاسة و ذوق في آن معـاً... صدق التصوير جعل الشخوص ملموسة ..تنبض بالحياة.. و قريبة من القلب ...


أشــرككم في قراءة القصة كاملة:





أمي قاعدة تعوس في التكل .. أنا والتاية أختي .. والسرة خالتي .. قاعدين في الضل .. بنشرب في شاي لبن .. الزين أخوي رسلناهو يشتري لينا لقيمات .. ساعـة كاملة و ما جانا راجع .. بي شرمة الحيطة شايف ابوي .. يدو تمشي لي فوق وتنـزل .. يلم في الغنم عشان يسوقن للراعي .. أبوي كملان من لحم الدنيا ما بقدر علي قديم الغنم .. لكن أنا لو ما ضارباني الطورية في كراعي .. أكان تلقاني كارَي الغنم قدامي .. أوصلهم لي قدام الحلة .. جنب الطاحونة .. هناك تلقي اللمة .. أي زول دافر غنيماتو قدامو .. أنا مافي حاجة جابراني علي قديم الغنم .. الزين أخوي ممكن يقدمهن .. بس بتوديني شوفة وصال بت حاج اللمين .. أصلي بريدها بلحيل .. مما أخوها سافر السعودية .. وصال بقت تقدم الغنم

- يتبع -

.. الزين أخوي لمن جانا راجع .. لقي ضل الضحي كمل .. لقانا جرجرنا عناقريبنا ودخلنا الراكوبة .. مد لي اللقيمات ملفوفة بي جريدة .. عاينت ليهو قوي وصريت ليهو وشَي ..من طرف لسـاني قلت ليهو .. أوكلن إنتا يا الأبله .. انشاءالله ينفعنَك .. في الوكت دا أمي جات مارقه من التكل .. شايله ريكة الكــسـرة .. في يدها التانية ماسكة جردل العجين .. التاية مسكت منها الريكة .. بسراع بسراع لفت ليها كم طرقة .. ختتم في صحن الطلس الكبير .. السرة خالتي اتناولت حلة الملاح من الكانون بي طرف توبـها .. كبتها فوق الصحن .. سـمعت بطـني كوركت .. أصلي بريد ملاح الشـرمـوط الأبيض شديد .. بمـوت فوقو بلحـيل .. ضربنا ضرب تمام .. أكـلتا لا من إدشــيت .. قشيت ايدي في طرف العراقي .. قلعت مركوبي و إتمددت في العنقريب .. جريت توب أمي ختيتو تحت راسي ..


- يتبع -

.. ما صحتني إلا الخلعة .. شـوفتا الناس كلها تكورك وتتجاري .. صـحت بي أعلي صـوطي .. الحاصل شنو يا ناس .. المـات منو ؟؟ موت شنو يا زول .. قول بسم الله .. دا عوض ود الشامي جا من السعودية .. وقالو جابلهو جواب من أخوك حامد .. طبقت مركوبي في يدَى وقمتا جاري صـوف .. لمان وصلت بيت ناس الشامي .. لقيت اللوري واقف يادوب .. مكنتو تقسـَم .. والناس تنـزَل في الشنط .. جا الشامي طالع جارَي ليهو خروف فحل .. تكاهو وضبحو قدام الباب .. حامد نطَ الخروف .. نحن نطينا من وراهو .. ادعَيت في سرَى وقلت .. الله لـينا بي حال عـوض .. قـعدت معاهم لمن الواطا ضلَمـت .. الناس اتسلسلو واحد واحد .. منهم الفات يينوم بدري عشان يمشي الحواشات بدري .. ومنَهم الفات يحضر المسلسل في بيت ود الشـريف .. عوض ود الشامي طلع خلَاني قاعد براي .. تاوقت ليهو .. شفتو دخـل الأوضة الورانية .. بعد وكت جاني راجع .. قال لي تعال معاي يا النجيض .. ساقني وراء الأوضة وقال لي .. حامد أخوك زين وايد .. و بسلَم عليكم .. رسل ليكم الكيس والجـواب ديل .. ابقي عشرة علي الجـواب .. فيهو ريالات قال ترسلو بيها أبوك الحـج .. الوكت ضايق .. إنتو من بكرا لازم تقومو الخرتوم ..

- يتبع -

.. ما خليت عوض يتم كلامو .. خـطفتا الجواب والكيس .. عايز أموت من الفرح .. يعني أبوي بـمشي الحـج .. ندق النوبات وناكل الفـته .. ويجينا راجع معاهو الشنط الكبار .. قمت جري علي بيتنا .. وأنا داخل بيتنا .. عتَرت لي عتـبة الباب .. ضربتني في نفس مكان ضربة الطورية .. لكن أكلتها ساكت .. وقطعـتها في حشـاى .. من الفرحة عايز أطير .. ما حسيت بالضربة .. لقيت أمي واخواني والسرة خالتي متلمين .. ما عارف السهرن لي قدر دا شنو .. قبال ما اصلن كوركت بأعلي صوطي .. أدوني البشـارة .. ردوا كلهم بي صوت واحد زي أولاد حاج الماحي .. بشارة خير .. يللا بشرنا .. رديت عيهم .. حامد رسل لي أبوي عشـان يزور بيت الله .. قال تجيبوهو للحج بسراع .. كلهم صنَو زي الكبت فيهم مطرة .. إلا الولد الزين .. قام ينطط زي الكديس ويكورك .. الحاج حجا وجا .. شراب البيـ.. نهـرتو فرد نهـرة .. ما خليتو تمَ كلامـو .. أخلاقي جات في نـخــرتي .. فنيت وراهو مركوبي .. ما تسكت يا .. ماتميت كلامي .. لمن شفت صـنة أهلي .. الزين جري واتضاري بي ضهر أمي .. شبت أختي في حلقي .. هـو متين أبوي بقي علي الحج ..

- يتبع -

.. حـامد دا مو نصيح .. الله لا كــسـَـبك آآ حامد آآ خوي .. أبوي شديد ونصيح .. عاوز تكتلو لينا .. الله يرحمك يا بـوي .. أهـو دي جـزاتك .. تبيع بقراتك وغنيماتك عشان تسـفَرو .. يـجي يسوقك للموت بي يدو .. أنا أتوهطتا في نص العنقريب وبقيت أعاين .. أمي ساكتة .. ما فتحت خشوما … ما قالت بغــم .. خالتى السرة كانت بتمتم .. ما عارفا بتقول شـنو !! .. لكن صرة وجيها والدميعات الجارية في خدها معناها انها ما عافية من حامد أخوي .. فجأة .. التاية أختي نطت من بمبرها .. دخَـلت يدها في الكانون وشالت الرماد .. كبـتو فوق راسـا .. و دفقت الباقي فينا .. الرماد دخل لي في عيني .. مسكت طرف توب أمي الكنت متوسدو قبييل .. قشيت بيهـو دموعـي .. التايـة نطت لي فوق .. لحدي ما راسـا دقَـا المرق .. بقت تسكلب .. يا حليلك يا بـوي .. يا الهداي ورضَاي .. يا المـا غلطَـا علي زول .. يا الدايرين يسوقوك و إتـَا لي هسع شديد ولضيض تقـدَم في الغنم و تشتهي ملاح اللوبـة .. حامد أخوي الله لا كــسَـبو .. عـايز يـيتمنا ويشـمَت الناس فينا .. أنا لمـان اتذكـر اليوم داك .. شـعرة جـلدى تكـلَب .. ما بعـرف أضـحك ولَ أبكي .. بالجـد بكـيت لمن جـو الحـجـاج راجـعين .. حتَي ما قـدرت امسـك النوبـة و أدقها .. قـدر ما حـلفوني بي اسـم الله .. أبيت أجي بي طرف الحلقة .. من اليوم داك .. ما مسكت لي نوبـة جلـَدتهـا .. ولا أبوي شاف ليهو عافية .. لا حامـد أخـوي رســل لينا قروش .. ولا رجـع مع أولاد الحـلة لمن حرب الخليج قـامـت و إنتهـت .. ومن يوم داك .. ما سـمعنا ليهو خـبر ولا أتـر .. الله لا كـســَبك يا التاية يا أختي

- إنتهت -

اميرة عبد الرحمن
تحياتي
علي الحلاوي كاتب ساخر كبير انقطع عنا هذه الايام
نشكرك علي تسليط الضوء علي هذا الوغد الساحر الكبير و دعوته ليواصل .
لقـد قـررت أن أهـرقـك يــا بانـدودثى

اذا رجعت لمكتبة الحلاوي فلن تفارقيها بسهولة لذا انصحك الا تفعلي ان لم تكوني قد فعلتها حتي الان .

حمد فتح الرحمن .. شكرا‘ لمرورك الكريم و شكرا‘ لايرادك .. للوصلةالكنز .. نافذة علي بعض عالم الحلاوي ..
اطلعت علي مكتبته .. و اخترت احدي الدرر لعرضها.. و اشراك القارئ الاستمتاع بهذاالجمال ..فالقصة بنظري لوحة ..لا أعرف ان كانت مكتوبة هي ام مرسومة ..