محمود يريد ان يعرف

هذا المقال بقلم الزميل محمودفرح

حيرة محمود فرح في بلد الحزن و الفرح


هذا صديقي وزميلي ود فرح .... محمود هكذا نلقبه ، خرج من السودان منذ ثلاثين عاما أكمل دراسته الجامعية خلالها وزاد عنها والتهم من الخبرات مايساعده على المنافسة فى الغربه..اطلع على هذا المنبر فأعجبه كثيرا ...مداخلات الأعضاء و تعليقاتهم الساخرة و الساخنة أحيانا ، دخان الحفرة ونجاح الناس وهمومها فقرر ان يكتب همومه لكى نشاركه .. مشكلتو انو صادف اعلان غريب يطلب وظيفة يعرف تماما مواصفاتها ومداخلها .... استغرب لوجود هذه المتطلبات فى بلده.... ما هذا ؟ هل وطنى به امكانيات هذه الوظيفة ؟ هذا لا يعنى الاستفزاز ولكن معناه أن وطني قد تغير ، هذا معناه أن وطني قد تقدم كثيرا.. هذا معناه ان وطنى قد تعافى ...... المهم مش ده المقصود

يقول محمود: تقدمت للوظيفة من منطلق حب الاستطلاع....ومعرفة ما يحدث فى وطنى
المهم اتصلوا بي لعمل المقابلة ...... اللى بيعمل المقابلة واحد غير سودانى..... استغربت وقلت لنفسي ايوه الوظيفة فى بلد تانى.....عملت المقابلة ونجحت.... وكنت متأكد انو العملية فى بلد تانى...
ومرت الايام وفجاة لقيت مكالمة من السودان قلت ايوه امكن اخوى.....لا ديه الشركة العملت المقابلة
الشركة : الو... محمود ؟
محمود : نعم اهلا وسهلا مين معاى ؟
الشركة : شركة ...........
محمود : اهلا
الشركة : هل ممكن نستفسر عن بعض الامور الكاتبها فى السيرة الذاتية
محمود : اتفضل
الشركة : قالت سؤالها
محمود : تحدثت بلباقة واتكلمت كأنو زول بيكلم ريدتو ... اتكبكبت فى البداية .. تماسكت لم اصدق نفسي فى هذا اليوم تحدثت بلباقة وقوة لم أعهدها في نفسي....
مرت الايام....
واتفقت مع الشركة على كل شى وللعلم مع كل مقابلة ومكالمة كنت استخير
الا ان ارسلو لى العقد كما اريد ومن هنا بدا سؤالى الذى استسمحكم فيه
هل ارجع السودان بعد ثلاثون عاما من الغربة (مع العلم اني لم ازر وطنى الا فى عزاء ابى ) و أزيدكم أيضا أن أبى قد توفى و امى كذلك ولم يبق لى غير اخى الضرير واختى
علما باني متزوج من امرأة ليست من بلدى ولى ابن بالجامعة وابنة فى الثانوى
شعور غريب يخالجنى... خوف وفرح .... توقف تفكيرى تماما منذ فترة ولم اعد ذلك الرجل المنظم
ماذا افعل .... ارشدونى .....ارشدونى ........ارشدونى

محمود محمد فرح

محمود يا أخوي أنا والله خايف نصيحتي تخليك بره السودان سنينا عددا ، أول حاجة البلد بقت صعبه خلاص والباعوض نزلتك من الطياره وملاريا بدون فحص تري بالعين المجردة والمجربه ،وخدمات حدث ولا حرج الموية يا كافي البلا إلا يرفعوها بي طلمبة شفط والكهرباء الدفع مقدما وبرضو بتقطع رغبة من الهيئات المختصة في التخفيف عن المواطن ومساعدته في إدخار بعض الدنانير في حساب كرت الكهرباء وترشيد الإستهلاك ، البلد السنة كلها مناخ واحد الصيف بل الحر والضبان والله عندو كرعين وقرنا إستشعار تقول حبل حلفا أو ليفة سلك أخشن من الصنفره ، ما في حاجة إسمها وظيفة ثابته ، كل واحد في كرسي الوظيفة زي القاعد ليهو في قالب جلى في أى لحظة ممكن يشيلوهو بره والكفاءة دي أصبحت مسألة لا قيمة لها فصديقي اللدود طلال حاصل على درجات عليا في المحاسبة ومتخصص في شئون الأوراق المالية ومسائل الأسهم وإدارة المحافظ قال شنو يرجع السودان ويشتغل مشي لي سوق الخرطوم للأوراق المالية وشافوا ورقو وعملو ليهو إنترفيو ومن يومها أمشي وتعال بكره وبعد بكره وتاني بكره لمن زهج لما فيهو واحد من ناس سوق الخرطوم للأوراق المالية وقال ليهو بالحرف الواحد والله يا بن العم لو على مسألة كفاءة شهاداتك دي تخليك مدير سوق الخرطوم للأوراق المالية لكين بتعرف منو في الحكومة وده المهم ، المحسوبية يا ود عمي عطلت الكفاءات وهجرت العقول وقتلت الإبداع ومثلت بإنسان السودان إيما تمثيل والنتيجة قطر يحتضر وشعب وصل حد الصبر

شكرا ود القدال على افراد مساحة ومشاركة هموم الأخ محمود ومحمود طبعا زميل

دراسة وصديق عزيز وحقيقة محمود موضوعوا شائك جدا لأنوا محمود عندما خرج من

السودان خرج خروج نهائى بمعنى لم يترك خط رجعه ولم يبدى اى محاولات للرجعه

ولولا وفاة والدة العام الماضى رحمة الله مااظنة فكر فى العودة لدلك اصبحت

الهوة كبيرة بينه وبين السودانوالمشكلة الآن مش فى محمود المشكلة فى اولاد

وأهل محمود الذين لم يروا السودان قط ولم يبذل اخى محمود مجهودا كبيرا

فآ ذلك فقد استسلم هو لذلك وترك الأمور تمشى الى ان بلغ الأولاد ماشاء الله

سن التعليم العالى وايضا كان كل التفكير منصب على دولة اخرى لتكون محطة محمود

الأخيرة وهى بالطبع غير السودان لدلك محمود موضوعوا شائك ولكن غير مستحيلا وممكن محمود

يوفق بين جميع الرغبات يعنى يقبل وظيفتوا فى السودان ودة برضوا بلد الأهل والأجداد

ولدى محمود العديد من الزكريات فى السودان قد تكون عزاء له وفى نفس الوقت يقضى

اجازاتوا فى بلد الأهل وبذلك يكون قد نال الرضاْء من اهل الرضاء وفاز بالوظيفة الظريفة

والله المستعان تحياتى لمحمود واسرته وشكرا للقدال ونصيحتى لمحمود ان ماخاب من استخار

والله ولى التوفيق .