Post: #1
Title: ...... شيزوفرينيا السهر ومنبه بنبز ......
Author: محمد أبوعاقلة الطريفي
Date: 06-18-2006, 01:42 PM
ليل طويل
وصحيت المنبه
عقارب بتلف حول نفسها
مسجونه في قفص اتهام برتقالي وشفاف
في جواها سم سهر وفي راسي رسم سهر
جاتني الدقسه وفتحة خشم متباريات ...
ستره وفضيحه
الدقسه ستره وآآآآآآآآآآه فضيحه
مدت الرجلين ما قدر اللحاف
وجاذبية الواطه ما قصرت معاي
وفي ود بين اصبعين وشعرة راس
شعور بالدوخه والصحيان في وقت واحد
وبتلف عقارب مقلقه
زعلتني ...
قتلت عقرب الساعات بفردة السفنجه اليمين
وعقرب الدقايق بـ أف ...
وعقرب الثواني خليته تلف علي الفاضي
مافي زول جائب ليها خبر ...
ذات الشوكه الحاده والحاجه الحلوه ... وأسرع واحده فيهم
جاريه علي الصباح
خفة مراهق ... مجبور علي الرنين
لفه وأنين باسم قانون الحركة
طول الليل هناك ...
حواس بتفرفر ... وجسد خامد علي جنبه
يدي اليمين ... خدرت ... رفعتها من غير احساس... طردتها .. سألتها
شنو الوداك تلكلكي في الكيبورد !!
جاتني مكسوفه وبتعتذر... دفقت السفن أب... يا خساره أنا داون
طول الليل هناك ...
قاعد مع فردة ضلمه ... ورجلي التانيه ملككه في حفرة طمي
و الفرح معطون في بركة نبيذ
------------------------ -
كان الرنين
شبه الأنين
داسيك في الركن الحنين
تاكي لي ضلفة قلب
وما بدخلك ساكت فراغ
ساكت علي الوجعه وسفر
ساكت عشان بلقاك سهر
ساكت بدون فرحه ووتر
ساكت عليك ساكت ....
------------------------ -
يا مارقه من ضوضا وضلمه
افتحي الباب للحلم
وغني لو غاب المغني بلا عذر واضح
او احتمالات زحمة في آخر محطه
دقي المسامير في طرف مخده
ودخلي المسادير في طبلة سمع
طول الليل هواجس
حلم لابسك بشارة وتوب
وبغزل من شقاك طرحه
حلم جوايا بتحكر
وبتوقع وصول فرحه
بدون طبال
بدون اعلان وراحة بال
بدون مكياج ملون
لون الليل واحد
وطبع النجوم واحد
ضو بفلق في شياطين الشمارات
وانا امتهنتك شتارات
بفلق فيني شيطانك واسب دينو
------------------------ -
خليني في الليلات مفر
خليني في داخلك مطر
أمرق علي سافل هواك
حفير جمه
------------------------ -
وصحيت المنبه
كوراك كورال طلع مني
والشوكة طعنتني
المنبه قال لي يا مزعج
بهتني ساكت ...
انا كنت ساكت وأي حاجه فيني كانت بتتكلم ...
بتتألم ...
تئن ...
شيزوفرينيا السهر ومنبه بنبز
|
Post: #2
Title: Re: ...... شيزوفرينيا السهر ومنبه بنبز ......
Author: Elkhawad
Date: 06-18-2006, 07:33 PM
Parent: #1
Quote:
قاعد مع فردة ضلمه ... ورجلي التانيه ملككه في حفرة طمي
و الفرح معطون في بركة نبيذ
|
ده دفن الليل
ممكن احجز
|
Post: #3
Title: Re: ...... شيزوفرينيا السهر ومنبه بنبز ......
Author: محمد أبوعاقلة الطريفي
Date: 06-18-2006, 10:56 PM
Parent: #2
الخواض
دي اكتر حته كاسرا فيني ضلعه
وما تسأالني من الفرده التانيه
بس
محاوله رسم فاشله
والصباح استيكه اجباريه
اسمنت واسفلت وافكار بتتلف نفسها
انتحار الفكره لانتحال زول بالنهار
|
|