قصـــيدة حـــب لمحجــــوب شــــريف

أبت قريحة الاستاذه آسيا سكينجه بالدوحه الا ان تتفتق وتعبر عن مشاعرها حبا لهذا الشاعر الانسان الذى ملأ دنيا السودانيين جميعا وشغل مشاعرهم بالحب .





عافية
زهرالربيع الطل شايل شذى الياسمين
شفق المغيب محمر شوفتو بتسر العين
النيل ضفاف مخضر دايما هواه عليل
(محجوب شريف) أجمل شامخ عفيف ونبيل
............
محجوبنا تاج عزة
يا نا المهيريات
فى الحارة مابننجم
بالصبر نتحزم
نعرف نشيل الليل
نعرف نقسم الهم
محجوبنا يا أكرم
ورينا دينك كم ؟
................
ليك من عيونا النور
ليك من وريدنا الدم
ليك في الفجر دعوات
العافية ليك تنتم
ومن عزة حنية
تهب عليك نسمات
تغشاك مع الصلوات
تلقاك تتبسم
تتنسم الصحة
وتطويه توب الهم
..................
والفرحة تملا الكون
الرملة جنب النيل
يغازلو فى القمرة
والقمرة وضاحة
تضوى مليون ميل
ونخلاتنا تتمايل
والقمرى ليهو هديل
و(السنبلاية) تميل
ومعاها( مريم ومى)
وعزة فى اليوم داك
بالفرحة عايزة تطير
بالله وريها
قوليها دينك كم ؟
..............
اشراق صباحاتنا
أطفالك الحلوين
ما عرفوا نوم الليل
سامروا النجمات


اتلموا لعبوا شليل
شع من عيونم ضو
صح الصباح فى التو
اتنادو مافى مقيل
اتغنو أنشدوا كم
قصيدة لى محجوب
وقالو ناذرين دم
كرامة لى محجوب
وجوك جارين سيل
جوك (بالنفاج)
وبالباب العديل
وحولك التفوا
ذى سكسكا منضوم
فى وسطو سوميتة
وسمعتهم سألوك
يا بابا دينك كم؟
بالله ورينا
يابابا قو لينا
باللله دينك كم ؟
..................
محجوب بشارة الخير
ياشمعة ضواية
ياغيمة فوق الكل
يانجمة سراية
يا المن حروفك نور
كحل عيون عزة
وختاها فوق للحور
يا المن سماك رذاذ
نقع سقى الوديان
خدر وشى ا##########
وعلينا ما عز
بالله ورينا
قول لينا دينك كم
بالله دينك كم ؟


آسيا عوض سكينجه
الدوحه

المعذره هناك خطأ حدث عند النسخ واللصق فى القافيه الخامسه قبل الاخيره اذ الصحيح كالآتى :

خدر وشى الواطه
وعلينا ما عز
بالله ورينا
قول لينا دينك كم
بالله دينك كم

up

Quote: ليك من عيونا النور ليك من وريدنا الدم ليك في الفجر دعوات العافية ليك تنتم ومن عزة حنية تهب عليك نسمات تغشاك مع الصلوات تلقاك تتبسم تتنسم الصحة وتطويه توب الهم

ود الزين
لك التحية والود

اعجبتنى هذة القصيدة جدا جدا فهى بحق تعبر عن صدق الحب الكبير
لشاعرنا المهموم بحب وحزن الوطن شاعر الشعب محجوب شريف
التحية للاستاذة اسيا لهذة الدرر الفريدة ،،
وقريبا ستسمع وتشاهد هذة الكلمات ملحنة باروع كورال ،،،،

خالص تحياتى واحترامى

وقصه أخرى من قصص الحب لمحجوب شريف التى استطاعت كاتبتها ان توصلها الى هذا المكان بعد قصيدة الحب الى ذلك الرجل ذو النفس الابيه والكبرياء الذى زلزل اركان الطغاة فى قصورهم ووراء اسوارهم ، لم تلن له قناة ابدا , لم تتبدل قناعاته ، لم يقف بين بين لانه ببساطه عوده خاتى الشق



قصة حب لمحجوب شريف
فى ذات أمسية
فى جلسة سرية
أصدرت أحكام
اغتالوا حرية
وكمان حقوق انسان
وكنا صاحين تب
وجفنا ما نعسان
(محجوبنا) يا انسان
شافوك هناك غضبان
تهتف مع الثوار
تهتف بذا السودان
تحلف ب (ق) و( النور)
يا نحن يا الشيطان
العسكرى المابتوب
السوى كم خازوق
فى شعبنا التغيان
هوت كلابن هو
صوت الرصاص فىالجو
ما طال هتافاتنا
فكونا بالبمبان
وساقك السجان
حبسك ورا الفضبان
ختاك فى الزنزان
كم عذبك تعذيب
الحارس السجمان
كم ساومك للبيع
المفلس العدمان
الليدو ملوية
الخاين الغبيان
صبرت صبر ايوب
وثبت مع الفرسان
سطرتو للتاريخ
أحرف سطور من نور
بالخالص الرنان
وحلفنا نحن كمان
العين بى عينان
والسن بى اثنان
قضية مدروسة
ونحن مابنتهان
والفيهو محرية
فارسنا ماهو جبان
وحصانا ما كسلان
والراية ذات ألوان
الأبيض الزاهى
للسلم ساسو أمان
وللأحمر الغانى
ترابنا كم عطشان
حذار من البركان
حذار من البركان
واقروا للتاريخ
كم لينا كان طوفان
كسر مجاديفم
بشتن صواريهم
شتت دراويشم
خرف رواويسم
غرق حراميهم
قلب موازينم
فرقت حساباتم
خربت ديارم تب
( حتلوا ما قلعوا)

اسيا عوض سكينجة
الدوحة

فوق من اجل محجوب شريف

متعه الله بالصحه والعافيه

والبسه ثوبها وجعل بناته قرة عيونه من احسن ما يكون لوطنهن ولاسرتهن

الأخ ود الزين
الأخت آسيا عوض
ما أجمل الشعر حين يكون محوره أستاذنا محجوب شريف الإنسان الرمز
لكن أجمل ما قيل شعرا في محجوب وللأسف لم يحفظ هما بيتين من الشعر قالهما محمد طه القدال قالهما في ندوة سياسية في مدينة الثورة أيام الديمقراطية الثالثة وكان مرشح تحالف القوى الديمقراطية الأستاذ محجوب شريف ، ألف القدال بيتا الشعر ونحن في طريقنا إلى الندوة وألقاهما بطريقة الدوبيت المعروفة سألت القدال عنهما قبل عدة أعوام فلم يتذكرهما
البيتين فحواهما بأنه لو كان للنساء أن يتنن على أزواجهن لكانت كل فتاة قد تزوجت بمحجوب شريف فوق أزواجهن
للأسف تلك الأبيات ضاعت لكن يبقى لنا وليد مريوم وهو البتنن به كل جميل ورائع