محجوب شريف
يا نمّه دابت في الحنين !!!
يا صرخه يا حس الوطن
صوت المزارعيه البتكدح في الجروف ...
يا نخله تزخر ديمه بالخير والهنا ..
إن شاء الله يوم ما تشوف عنا ...
ما يعتريك وجع النزيف ...
يا روعه يا محجوب شريف ...
****
يا غنيه ذابت في الحنين منداحه من زمناً بعيد ...
مسدار بيعزف فوق نخيلات الوطن ...
نمة حزن وأصدق نشيد ...
منجل يحش رهق التعابه ..
يسند يقالد في المساكين والغلابه ...
جدول يبلل في يباس حلق الضهابه ...
زخة مطر نازل يرطب ...
أرض الملايين الشقت ..
في غمرة الموت والحرابه ..
يا صوت هتف جرأه وحماس ..
يا قامه في يوم ما انحنت ..
في وجه طغيان العصابه ...
يا رايه بالعز والشرف ..
مرفوعة الراس والمهابه ...
يا جبهه ناصعه من النضال ..
ما اتلوثت رغم السجون ...
حملت جراحاتها وعذابه ...
***
يا قافيه ما لانت لضيم ..
يا صاحب القلم العفيف ...
يا بهره يا أجمل شفيف ...
إن شاء الله تسلم يا شريف ...
والصحه ترجع ليك يابا ...
عصفور تغرد في الحقول ...
والعافيه ضاماك في رحابه..
يا نغمه صادقه من الوطن ...
يا حاجه زي صوت الربابه ...
ــــــــ
ياسلام الفنان ادريس
شعر جميل فى زول جميل
لك التحية
الصورة بأنامل المبدع عصام عبد الحفيظ
من بوست
( .. أبق قليلا ! )