Post: #1
Title: قرار ود قاسم .. أين يصب ؟
Author: ابو جهينة
Date: 06-11-2006, 05:29 AM
فوجئت قبل أيام بوقوف ( ود قاسم ) بجانبي ليقول لي ماداً يده اليمنى : جيت أقول ليكم وداعاً و إلى لقاء قريب في حضن الوطن.
حسبته قرر إجازة مفاجئة.
لكنه فاجأني بقرار إستقالته و رجوعه للوطن بشكل نهائي.
توقفتْ الكلمات في حلقي طويلاً لسببين. قبل أن أدخل في دوامة إثنائه عن رأيه ، فقد كان واقفاً بكل حزم و قوة مع قراره :
الأول للقرار المفاجيء الذي لم يمهد له أخونا ود قاسم.
الثاني .. لم أعرف إلى أي الأمور أُرجع قراره .. هل إلى شجاعة فائقة ؟ أم ( زهجة و قرفة ) وصلتْ به حد التصميم ؟ أم إلى دراسة و حسابات حسبها بينه و بين نفسه ؟
السبب الثاني يتطلب من كل مغترب أن يقف عنده طويلا و طويلاً جدا.
قرار العودة هو كجمرة تخبو أوارها بين الرماد ..
كثيرون هم من يرقد قرار ود قاسم في قرارة نفسه .. و لكن عشرات الخيوط تكبله.
كثيرون رجعوا و قالوا الرزق على الله.
و لكن ماذا نفعل إن كان في الوطن لا مجال لأي عمل يدر الرزق في طاحونة تبتلع صغار الأسماك من حيتان ضخمة الكراديس.
و أعني بهذا أن رساميل المغتربين الصغيرة تقف متواضعة أمام بلايين هوامير السوق و الأعمال.
لقد شمر ود قاسم عن ساقيه و دخل لجة الوطن ..
ضربة بداية لشريحة من معارفه و أصدقائه .. و الكل في إنتظار ما سيتمخض عنه غبار التجربة و موج المخاض.
قرار شجاع بلا شك ، يشوبه إيمان راسخ بأن ( كوتة ) الإغتراب قد نفدتْ تماماً كصبرنا الطويل الذي تراختْ حباله.
أقول قولي هذا و في البال مقولة الدنقلاوي قريبي الذي قال عندما سألوه رأيه في الغربة .. فقال و هو ينفث دخان سيجارته :
و الله أول عشرة سنين صعبة ..
يعني كلنا كدة بالصلاة على النبي ... لازم نقعد عشرات كتيرات .. لأن كل عشرة محسوبة بحساب السنة الضوئية.
أو كذلك الذي قال في مطار جدة عندما وصلها لأول مرة من السودان : أنا جاي خروج نهائي.
ستظل هذه الجملة عالقة في أذهان بورداب الرياض لفترة طويلة .. ألا و هي :
قرار ود قاسم ..
|
Post: #2
Title: Re: قرار ود قاسم .. أين يصب ؟
Author: أحمد الشايقي
Date: 06-11-2006, 05:32 AM
Parent: #1
ودقاســم
لك التحية,
قرار صائب بكل تأكيد , من خبير اقتصادي, وسياسي ورجل اجتماعي بعيد الغور في ثنايا المجتمع السوداني,
ودقاسـم اضافة حقيقية وسيستفيد الوطن من تواجده بالداخل, والأهل والاصدقاء,
كما له الحق أيضا في الاستمتاع بالمجتمع والمعشر الطيب واللهج المريح,
للافضـل تخطو ودقاســم,
وسنفتقدك في الرياض,
لك التحايا,
أحمـد الشايقي
شكرا أبو جهينة, للتنويه, والود اللائق,
|
Post: #10
Title: Re: قرار ود قاسم .. أين يصب ؟
Author: ابو جهينة
Date: 06-11-2006, 04:31 PM
Parent: #2
مولانا أحمد
سلام مربع
Quote: قرار صائب بكل تأكيد , من خبير اقتصادي, وسياسي ورجل اجتماعي بعيد الغور في ثنايا المجتمع السوداني,
ودقاسـم اضافة حقيقية وسيستفيد الوطن من تواجده بالداخل, والأهل والاصدقاء,
كما له الحق أيضا في الاستمتاع بالمجتمع والمعشر الطيب واللهج المريح,
للافضـل تخطو ودقاســم,
وسنفتقدك في الرياض, |
أها يا أخوانا .. دة راى زول قانوني و عندو باع طويل في عالم الإقتصاد.
نشوف بقية الآراء .. يمكن ناخد نفس قرار ود قاسم .. أو يمكن نقول زى قريبنا : أول 30 سنة حارة.
|
Post: #3
Title: Re: قرار ود قاسم .. أين يصب ؟
Author: حمزاوي
Date: 06-11-2006, 05:49 AM
Parent: #1
أكيد القرار شجاع
أنتم السابقون ونحن اللاحقون
يا ودقاسم
هبرت ليك هبرة
من ورانا
|
Post: #11
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 00:32 AM
Parent: #3
حمزاوي
Quote: يا ودقاسم
هبرت ليك هبرة
من ورانا |
من حَضَرَ الهبرة فليهتبر
|
Post: #4
Title: Re: قرار ود قاسم .. أين يصب ؟
Author: عبد السلام أبوشنب
Date: 06-11-2006, 05:49 AM
Parent: #1
ابوجهينه شكرا
قرار العودة هو كجمرة تخبو أوارها بين الرماد ..
قرار لا يعمل به الا قله ، قرار يكتوى به اغلبنا ولا يشمر عن ساعد الجد ليعمل بها
اما اخونا ود قاسم وقد شمر عن ساقيه لدخول لجة الوطن .. هنيئا للوطن به
عقبال ما يجينا شجاعه وهمة ود قاسم
|
Post: #12
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 00:36 AM
Parent: #4
أخي العزيز عبدالسلام
تحياتي
هل قرار العودة يجب أن يتم وضع جدول زمني له ؟ أم يكون نتاج حالة من الإمتعاض من طول الإغتراب ؟ أم هو تمرد على الأوضاع بوجه عام؟
أرقد عافية
|
Post: #5
Title: Re: قرار ود قاسم .. أين يصب ؟
Author: maia
Date: 06-11-2006, 05:52 AM
Parent: #1
استاذنا ابو جهينة
التحية لك وللاستاذ ود قاسم
لي تعليق بسيط كلما اسمع عن شخص عاوز يرجع نهائي للوطن الام ، كل الناس المغتربة بتقول ليهو : ده قرار شجاع!!
كلمة شجاع في حد ذاتها بتعكس انه واقع الحال في سودان العزة يتطلب قدر من شجاعة مريم الشجاعة وزرقاء اليمامة حتى يتخذ الشخص قراره الشجاع ليعود بكامل ارادته ويجي يعيش في السودان تاني..!!
قلتها اول ما جيت السودان وساظل اقولها : السودان حلو مر بمعنى الكلمة ، في لحظة تنتابك احساسيس اانه الجابني الدنيا دي شنو من اصلوا خلي السودان!! تجي لحظة تانية تحس انه نفسك تضم السودان كلو جواك وما تطلع منه نهائيا وقطعيا
بلد عجيبة جدا !!
رغم كدا الناس بتضحك وبتتونس وعايشة جدا وتحيرك احيانا في مستوى الرفاهية ..مكشرة صباحا .. مهيصة ومفرفشة مساء
قرار العودة قرار شجاع تماما كقرار العودة للخرطوم من قبل ناس الحركة الشعبية ، فهو قرار يحتمل كل الاحتمالات الممكنة
الا ان يكون الشخص العائد على اساس متين وشغل جيد
تمنياتي للاستاذ ود قاسم بكل التوفيق ولكل من يفكر في الاستقرار
ما زالت في هذه البلد بعض من عافية جميلة .. فقط تحتاج لمن يحسها ويفهمها
ودمتم
|
Post: #7
Title: Re: قرار ود قاسم .. أين يصب ؟
Author: Khalid Saeed
Date: 06-11-2006, 07:06 AM
Parent: #5
ياغربه يابكاية ياغشاشة يامستهبله
تغرينا بي درهم قروش ووراك قنطار بهدله
جيناك لي سنتين وبس أو قول تلاته نكمله
نلقى المراد ونودعك نرجع حياتنا نبدله ..
الأستاذ/ أبوجهينه
المقاطع أعلاه جزء من قصيده طويله كتبها الشاعر/عثمان نور الدين في 18/12/1994م بمدينة الرياض .. وكم أتمنى أن ألتقيه وأسأله عن أحساسه الآن .. وهل رجع الوطن .. أم مازال مع الغربة البكاية الستهبله .
أما بالنسبة لقرار الخال ودقاسم ..
فأنا أعتقد أن قرار الرجوع بالنسبة لنا نحن المغتربين أقرب مايكون لقرار ذهاب الإنسان للحرب .. فكل إنسان له فهمه الخاص .. فبعضنا يرى الحرب جهاد .. وبعضنا يراها وسيله لإرجاع الحقوق ..والبعض الاخر تفرض عليه الحرب .. كذلك الرجوع إلى السودان ..
إذا الإنسان دخل في مقارنة بين الوضع الذي يعيشه هنا مهما كانت الضغوط النفسية والوضع الذي سيعيشه في السودان مهما كان ماحققه من نجاحات ( مسكن أو سيارة أو خلافه ) فإن المقارنة لصالح الغربة لأننا في السودان إلى الآن نبحث عن الدواء ونبحث عن العلاج ونبحث عن كل شئ .. لأن الدولة لاتفعل شئ .. وفي الغربة متحقق لنا الحد الأدنا لنا ولعوائلنا .. فشئ خير من لاشئ .
اما إذا كان من الناحية العاطفية ( الحنين إلى الوطن .. والكفاف .. والقناعة ) فالنتيجة لصالح الوطن .. ولكن يحكمنا شئ مهم جدا ( هل نحن نحيا لآنفسنا أم لغيرناأولادنا مثلا ) فقد قال صلى الله عليه وسلم( الإبن مبخلة مجبنه ) .
حقيقة مشكلتنا مع الغربة مشربكة .. والحل صعب .. والقرار أصعب .. وعموما ربنا يبعد العوارض ..
وتحياتي لك ياأستاذنا أبوجهينة
وتحياتي للخال ود قاسم وإنشاء الله موفق ..
|
Post: #14
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 00:42 AM
Parent: #7
أخي العزيز خالد
تحياتي و مودتي
| Quote: المقاطع أعلاه جزء من قصيده طويله كتبها الشاعر/عثمان نور الدين في 18/12/1994م بمدينة الرياض .. وكم أتمنى أن ألتقيه وأسأله عن أحساسه الآن .. وهل رجع الوطن .. أم مازال مع الغربة البكاية الستهبله . |
تعرف يا خالد :
أسوأ شيء في الحياة : غربة الإنسان في بلدو و وسط أهلو. أحسن منها الغربة برة البلد.
أتمنى أن يكون شاعرنا هذا قد إستقر على خير.
شكرا على المداخلة
أرقد عافية
|
Post: #13
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 00:38 AM
Parent: #5
أختي العزيزة مايا
تحياتي و تقديري
Quote: قلتها اول ما جيت السودان وساظل اقولها : السودان حلو مر بمعنى الكلمة ، في لحظة تنتابك احساسيس اانه الجابني الدنيا دي شنو من اصلوا خلي السودان!! تجي لحظة تانية تحس انه نفسك تضم السودان كلو جواك وما تطلع منه نهائيا وقطعيا
بلد عجيبة جدا !!
رغم كدا الناس بتضحك وبتتونس وعايشة جدا وتحيرك احيانا في مستوى الرفاهية ..مكشرة صباحا .. مهيصة ومفرفشة مساء |
تحليل عميق يا مايا ..
بل وضعت أصبعك على موضع الألم تماماً.
أرقدي عافية
|
Post: #6
Title: Re: قرار ود قاسم .. أين يصب ؟
Author: DKEEN
Date: 06-11-2006, 06:52 AM
Parent: #1
الله يديم المودات بين الناس والمحبة تتواصل..
لو صح الخبر فان الرجل فقد كبير لنا وللعمل العام بالرياض..
ان السنين التي خلت بالرجل هنا مسيرة طويلة من الود والصداقات والاعمال التي سيذكر بها ابوطلال في محافلنا ومحافل غيرنا..
وبيني وبينكم لو القى لي زوجةزي ام طلال دي حرم امشي (65 كمل نومك) ذاتو دون وجل ..
ان خلف هذه القرارات الصائبة دوما إمراة عظيمة بقدر ام طلال..
الخبر يجعل في القلب غصة ..ولكن عزائي اني سالتقيه في المكان الذي جمعنا (حوش بكري)
حمزاوي انتا زاحي متين ياخوي؟؟
|
Post: #8
Title: Re: قرار ود قاسم .. أين يصب ؟
Author: Mohamed Abdelgaleel
Date: 06-11-2006, 07:20 AM
Parent: #6
قرار نقبط عليه الأخ ود قاسم .. كثيرون منا بحاجة لإتخاذ مثل هذا القرار .. ولكنه الركون البليد وعدم القدرة على إتخاذ أي قرار تتبعه مهام ويفتح الباب على إحتمالات كثيرة تقتضي تفعيل الإرادة لمواجهة الواقع الجديد ..
الصالحية .. المنتدى الثقافي الذي قاده ود قاسم بفعالية كبيرة رغم حداثة تأسيسه كان يؤمل كثيراً على ود قاسم .. نسأل الله أن ييسر الحال .
أصدقاء ود قاسم في سودانيزونلاين سيجدوا مكانه شاغراً وكبيراً.
نشكر لود قاسم .. أن حرك آسن ماء إستمرائنا للغربة الصعبة
والشكر لك أبا جهينة العزيز
|
Post: #16
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 00:48 AM
Parent: #8
عزيزي الأستاذ محمد عبدالجليل
تحية و مودة
و مشتاقون.
| Quote: نشكر لود قاسم .. أن حرك آسن ماء إستمرائنا للغربة الصعبة |
بالفعل و تماما كما قلت. هي بركة كان سطحها ساكناً فألقى ود قاسم حجراً فحرك ماءها لتصيب دوائرها مكامن القرار الهاجد فينا.
أرقد عافية
|
Post: #15
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 00:45 AM
Parent: #6
دكين المكين
Quote: وبيني وبينكم لو القى لي زوجةزي ام طلال دي حرم امشي (65 كمل نومك) ذاتو دون وجل ..
ان خلف هذه القرارات الصائبة دوما إمراة عظيمة بقدر ام طلال.. |
يعني يا دكين سبب إغترابك هو بحثك عن زوجة تتمتع بقرار صائب ؟
طيب يمكن تلقاها في إرس أو في أرقو ساب أو 65 كمل نومك و تكون قاعد بي جاي تضيع زمنك ساي.
مش ؟
|
Post: #9
Title: Re: قرار ود قاسم .. أين يصب ؟
Author: عاطف عمر
Date: 06-11-2006, 07:30 AM
Parent: #1
درجت على تكرار قولي أن قرار الغربة من الوطن ( الغربة التي لم يكن الموقف السياسي سبب فيها ) هو قرار نتخذه بصورة فردية - قد نجد عليه بعض المعارضة - من نوع ( ماإنت وضعك هنا كويس ماشي للتلتلة مالك ؟ وأولادك ديل ماشي بيهم وبعدين تتعب في موضوع تعليمهم __ ياخي المغتربين ذاتهم هسع بيفتشوا لى طريقة يرجعوا ما لاقين ---- ) بعض منها لا يخلو من وجاهة . لكن الشئ القطعي أن قرار العودة ليس بيدنا لوحدنا .
عوامل كثيرة تتداخل فيه ، منها الموضوعي ومنها المظهري
الموضوعي المتمثل في
- ماذا أنجزنا من الأهداف التي غادرنا الوطن والأهل لأجلها ؟؟
- الأنجال وتعليمهم والمراحل الدراسية التي هم فيها ؟؟
- المستقبل المعيشي أى في أى المجالات سوف نستمر لكسب العيش ؟؟
- تأمين المأوى المناسب ؟؟
وعوامل مظهرية
لا أحتاج - ولا أحب - الخوض فيها
شخص مثل ود قاسم
وقاراً
وعلماً
وخبرة بالحياة
إن اتخذ قراراً فهو قطعاً قد اتخذه بعد تمحيص ودراسة وفهم
أتفهم تداخل العواطف مع خوفنا الفطري من ( المجهول) مع فجائية القرار
لا نملك سوى الدعاء له بأن يوفقه الله تعالى
ويحفظه وذريته وزوجه وأهله
والحى مصيروا يلاقي
ابو جهينة
سلام ومحبة
هم السابقون
ونحن إن شاء الله بهم لاحقون
|
Post: #17
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 00:52 AM
Parent: #9
عزيزي الأخ عاطف
تحياتي و مودتي
و شكرا على المداخلة الغنية.
Quote: عوامل كثيرة تتداخل فيه ، منها الموضوعي ومنها المظهري
الموضوعي المتمثل في
- ماذا أنجزنا من الأهداف التي غادرنا الوطن والأهل لأجلها ؟؟
- الأنجال وتعليمهم والمراحل الدراسية التي هم فيها ؟؟
- المستقبل المعيشي أى في أى المجالات سوف نستمر لكسب العيش ؟؟
- تأمين المأوى المناسب ؟؟
وعوامل مظهرية |
تعرف يا عاطف.
لو كل مغترب قعد و حلل نقاطك دي و عرف هو موقعو وين من نتائج تحليل هذه النقاط : فأظن قرار عودته النهائية ححيكون موفق بلا شك.
أرقد عافية
|
Post: #18
Title: Re: قرار ود قاسم .. أين يصب ؟
Author: احمد العربي
Date: 06-12-2006, 01:09 AM
Parent: #17
الجميل ابو جهينه
عودنا ود قاسم ان يكون لنا استاذا
وهاهو يدخلنا مدرسه جديده وجديره بالاهتمام
فله التحيه
ونحن قادمون على هذا الدرب لامحال
مودتي
|
Post: #21
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 04:49 AM
Parent: #18
عزيزي أحمد العربي
تحياتي يا رجل يا زين
Quote: وهاهو يدخلنا مدرسه جديده وجديره بالاهتمام
فله التحيه
ونحن قادمون على هذا الدرب لامحال |
و عشناها ( غلربة ) كتبت علينا ... و من كتبت عليه ( غربة ) عاشها بحلوها و مرها .. و يبقى السؤال : هل آن أوان عودة كل الطيور المهاجرة ؟
هل الجو صالح هناك للعودة و الإستقرار ؟
أرقد عافية
|
Post: #19
Title: Re: قرار ود قاسم .. أين يصب ؟
Author: مريم بنت الحسين
Date: 06-12-2006, 01:16 AM
Parent: #1
تعرف يا عمو أبوجهينة... السودانيين شعب ما بعرف يخطط كله كله... الشي الوحيد البعرف يخطط ليهو هو الطلعه من السودان.. الرجعه دي، على الله... يعني الواحد لو ما انجبر يرجع ما برجع.. وتلقاه لما ينجبر ده، راجع بخفي حُنين، كأنه أصله ما حيرجع.. المشكلة انه المغتربين البتسدد عليهم طرق الاستمرار في دول الاغتراب برجعوا بحال أسوأ من حال ناس البلد... وده طبعا بكون ناتج عن حاجات كتيرة.. أهمها أنه بكون في متوهههط تحت المكيفات، وقايل مافي يوم بدقوا ليهو خروج... التخطيط للعودة او على الاقل الاستعداد لحدوثها شيء غاية في الأهمية... والواحد مفروض يفكر فيه بصورة جاده، حتى وان لم يرغب....فلابد أن تضطره الظروف إلى العودة...
أما قرار العم ود قاسم.. فأنا لا أستبعد أن يكون في كل ما ذكرته.. من زهجة غربة، وتخطيط مسبق، وقرار شجاع... نتمنى له التوفيق .. ولأسرته الكريمة التي أكرمتنا...
اقول قولي هذا،واستغفر الله لي ولكم من هم الغربة
بنت الحسين
|
Post: #20
Title: Re: قرار ود قاسم .. أين يصب ؟
Author: Muna Khugali
Date: 06-12-2006, 04:30 AM
Parent: #19
Quote: قرار صائب بكل تأكيد , من خبير اقتصادي, وسياسي ورجل اجتماعي بعيد الغور في ثنايا المجتمع السوداني,
ودقاسـم اضافة حقيقية وسيستفيد الوطن من تواجده بالداخل, والأهل والاصدقاء,
كما له الحق أيضا في الاستمتاع بالمجتمع والمعشر الطيب واللهج المريح,
للافضـل تخطو ودقاســم,
وسنفتقدك في الرياض, |
لن تستطـيع أن تعرف يقينا ..فبينما لكل ظـروفـه المادية والنفسية والقـدرة التي تتأرجـح بين التأقلم مـع نظـام رأسـمالي يتعمـد عـدم اتاحـة الفرص للمواطنين عـامة وتشجيع رأس المال للمشاريع دون إحتكار .. لا يسـتمع لآراء الخبراء وييستفيـد مـن خـبراتهم..نجـد ان هنـاك أيضـا قلة 'غـير الذين منحـوا وزارات' يخـبرونـك بسعادتهم للرجـوع وهناك مجمـوعـة أخـري مـن الذين نـدمـوا نـدما كبيرا لرجـوعهم ...
وعلي كـل حـال التجـارب تختلف..هناك أيضـا مثل..
ايه الجـابرك علي المر.. قـال.. الأمـر منه..
لكـن هنـاك سـؤال مهم...
مالذي تغير حـقيقة في وضـع حـقوق الانسان في السـودان مـن ناحية واقـع وقـوانين جـنائية ...اقتصـادية... وقرارات سـياسـية?
تحياتي أخي استاذ أبو جـهينة...
مني
|
Post: #22
Title: Re: قرار ود قاسم .. أين يصب ؟
Author: doma
Date: 06-12-2006, 05:00 AM
Parent: #20
نتمني له التوفيق قرار ما ساهل
لنا تجربه في هذا المضمار رجعت الاسره علي امل ان يستقر الحال ويعود الاب ولكن ليست الامور بالسهوله التي تتخيلها عندما تحزم شنطك وتتوكل علي الله . ما زال الاب في الغربه والاسره هناك بين قسوه الوطن وصعوبه الرجوع .
|
Post: #31
Title: Re: قرار ود قاسم .. أين يصب ؟
Author: ابو جهينة
Date: 06-13-2006, 07:36 AM
Parent: #22
الأخت العزيزة دوما
| Quote: ولكن ليست الامور بالسهوله التي تتخيلها عندما تحزم شنطك وتتوكل علي الله . ما زال الاب في الغربه والاسره هناك بين قسوه الوطن وصعوبه الرجوع . |
أوافقك الرأى تماماً.
فالعودة يجب أن يتم التمهيد لها ثم التخطيط المبرمج المدروس.
إلا إن كان هناك شيء جاهز ينتظر العائد كمشروع أثمر بالفعل أو لديه رصيد يمكنه أن يعيش على ريعه.
أرقدي عافية
|
Post: #23
Title: Re: قرار ود قاسم .. أين يصب ؟
Author: doma
Date: 06-12-2006, 05:00 AM
Parent: #20
نتمني له التوفيق قرار ما ساهل
لنا تجربه في هذا المضمار رجعت الاسره علي امل ان يستقر الحال ويعود الاب ولكن ليست الامور بالسهوله التي تتخيلها عندما تحزم شنطك وتتوكل علي الله . ما زال الاب في الغربه والاسره هناك بين قسوه الوطن وصعوبه الرجوع .
|
Post: #27
Title: Re: قرار ود قاسم .. أين يصب ؟
Author: ابو جهينة
Date: 06-13-2006, 01:07 AM
Parent: #20
أختي العزيزة منى
تحياتي و تقديري
| Quote: ايه الجـابرك علي المر.. قـال.. الأمـر منه.. |
و هذا بالفعل شعار أغلب المغتربين في الأرض.
دمت
و كوني بخير
|
Post: #24
Title: Re: قرار ود قاسم .. أين يصب ؟
Author: ابو جهينة
Date: 06-12-2006, 07:05 AM
Parent: #19
| Quote: السودانيين شعب ما بعرف يخطط كله كله... الشي الوحيد البعرف يخطط ليهو هو الطلعه من السودان.. الرجعه دي، على الله... يعني الواحد لو ما انجبر يرجع ما برجع.. وتلقاه لما ينجبر ده، راجع بخفي حُنين، كأنه أصله ما حيرجع.. |
عفارم عليك يا مريم.
شفتي المصريين شداد و لضاض كيفن في حتة التخطيط ؟ بالله الواحد يضرِّبا بالمللي و التعريفة و بيعرف متين يرجع و متين يتزوج و متين يشتري شقة و متين يحج ..
أما ما ذكرتيه هنا فهو كبد الحقيقة.
هل قلت لك بأنني متابع موضوع دافنشي ؟
واصلي .. سآتيك بعد أن أنتهي من قراءته.
تحياتي لزوجك و أسرتك
أرقدي عافية
|
Post: #30
Title: Re: قرار ود قاسم .. أين يصب ؟
Author: banadieha
Date: 06-13-2006, 02:32 AM
Parent: #24
أخي العزيز أبوجهينة،
في بداية دراستنا للفلسفة ومدارسها وأقوالها المأثورة هناك قولتان لا تنمحيان من الذاكرة مهما بلغت درجة وهنها: Know your opportunity والثانية Money is a good servant but is a bad master
وهما من البدهيات وسماحتهما في إنجليزيتهما وألا فالمعنى لافق بكل اللغات، ولو أننا حورنا في القولة الأولى المفعول به ليصبح "إغترابك" بدلا عن فرصتك في الأولى - وهناك شعوب كثيرة غيرنا تضع حياتها كلها ضمن هذا الأطار الفلسفي البسيط وتمشي أمورها وتحقق أهدافها- وليصبح "الإغتراب" بدلا عن "القروش" في الثانية عندها فقط سنقول لقد صب قرار ود قاسم في روافدنا جميعا وعلى وجه الخصوص أولئك الذين - منا - من كانوا يغادرون الدار صباح كل يوم إلى العمل تاركين وراءهم عروسا حبيسة أربعة جدران بعيدة عن حيشان أهلها ونديداتها تعيش شهور عسل في دوامة الدوامين حتى يمن الله عليها بمن يسلي وحدتها من طفل أو طفلة فينتقلان إلى دنيا الأمومة والأبوة وهكذا حتى تضيق العربة والشقة ولكن يظل العقد غير منفرطا والغداء لمة والعشاء لمة والفرجة لمة والمذاكرة لمة والطلعة لمة ثم فجأة يبدأ العقد في الإنفراط وتدور عجلة الإغتراب ولكن في إتجاه آخر (اغتراب الولد أو البنت وسط أقاربه وفي وطنه)..يالله..هل الإغتراب جينة؟ لا!
أشكرك أباجهينة على البوست وإتاحة الفرصة لي للتقاطع مرة أخرى مع ودقاسم.
|
Post: #33
Title: Re: قرار ود قاسم .. أين يصب ؟
Author: ابو جهينة
Date: 06-14-2006, 00:58 AM
Parent: #30
بناديها
تحياتي العطرة و المودة الراسخة و التقدير
أشكرك على المداخلة الغنية الشاملة و التي بحق أعجبتني جدا لأنها لامست سقف الواقع
| Quote: لقد صب قرار ود قاسم في روافدنا جميعا وعلى وجه الخصوص أولئك الذين - منا - من كانوا يغادرون الدار صباح كل يوم إلى العمل تاركين وراءهم عروسا حبيسة أربعة جدران بعيدة عن حيشان أهلها ونديداتها تعيش شهور عسل في دوامة الدوامين حتى يمن الله عليها بمن يسلي وحدتها من طفل أو طفلة فينتقلان إلى دنيا الأمومة والأبوة وهكذا حتى تضيق العربة والشقة ولكن يظل العقد غير منفرطا والغداء لمة والعشاء لمة والفرجة لمة والمذاكرة لمة والطلعة لمة ثم فجأة يبدأ العقد في الإنفراط وتدور عجلة الإغتراب ولكن في إتجاه آخر (اغتراب الولد أو البنت وسط أقاربه وفي وطنه)..يالله..هل الإغتراب جينة؟ لا! |
نعم. الإغتراب ليس جينة. و لكننا نبحث عنها و نحشرها بين طيات خلايانا حشراً ثم نندب اليوم الذي حصلنا فيه على جواز سفر و تأشيرة دخول للغربة.
أرقد عافية
|
Post: #25
Title: Re: قرار ود قاسم .. أين يصب ؟
Author: عزالدين آدم علي
Date: 06-12-2006, 08:08 AM
Parent: #1
كان نبأ قرار أخونا الأكبر ود قاسم بالنسبة لي بل وللكثيرين فاجعةً بعد أن هاتفني الأخ معتصم دفع الله .
فبقدر ماشجعه البعض وإدعوا بأن قراره صائباً بل وشجاعاًإلا وأنني أقول لابد من وقفة مع هذه الحكمة: (إن في العجلة الندامة وفي التأني السلامة) .
وأما إذا السؤال طرح نفسه : هل لديه وعود وإبتسم له الحظ مع الحكومة وعن طريق شخص مثلاً ؟ فليقف أيضاً مع الحكمة: (كثير من يظن أن صفاء النفوس إبتسامة ولكن وراء كل ستار خيانة) .
والله ياودقاسم أنني أقولها من صميم فؤادي، سنفتقدك كثيراً إذا مانفذت قرارك بشكل نهائي لما ستتركه من فراغ كبير في نفوسنا وساحة العمل العام (ونحن ماعايزنك تسيبنا) وذكراك ستظل في وجداننا جميعاً.
لوداير تسيبنا جرب وإنت سيبنا
لوداير تحب حب وأنساهو ريدنا
يوم ترجع تصافي نسامحك ياحبيبنا
_______________________________
الذكرى الجميلة لو تعرف معناها
لا دنيا بتزيلها ولا آخره بتمحاها
أخوتي الأعزاء - سواء بقي معنا أخونا الخلوق ودقاسم أم رحل عنا فلابد من تكريمه وأمثاله أيضاً(ونحن جاهزون) .
عزالدين آدم علي
|
Post: #37
Title: Re: قرار ود قاسم .. أين يصب ؟
Author: ابو جهينة
Date: 06-14-2006, 04:15 AM
Parent: #25
الفنان عزالدين
تحياتي و تقديري
| Quote: وأما إذا السؤال طرح نفسه : هل لديه وعود وإبتسم له الحظ مع الحكومة وعن طريق شخص مثلاً ؟ فليقف أيضاً مع الحكمة: (كثير من يظن أن صفاء النفوس إبتسامة ولكن وراء كل ستار خيانة) . |
سؤال كبير ... و الإجابة عليه من ود قاسم ستكون أكبر.
أرقد عافية
|
Post: #38
Title: Re: قرار ود قاسم .. أين يصب ؟
Author: ابو جهينة
Date: 06-14-2006, 07:20 AM
Parent: #26
أختي العزيز إنعام
تحياتي و تقديري
| Quote: نعم هي لجة لابد منها اذن فلنعّجل بالدخول |
المشكلة هي كيفية بَلْ الرجل .. الباقي هين .. لأنو ال بيبلل كرعيهو أكيد بيعوم في اللجة ..
أها ود قاسم دة أنا عارف إنو ما بلل كرعيعهو .. جا جاري و تووووش دخل الكنار ..
الله يدي العافية بس.
أرقدي عافية
|
Post: #40
Title: Re: قرار ود قاسم .. أين يصب ؟
Author: Tabaldina
Date: 06-14-2006, 07:44 AM
Parent: #38
..
.
Quote: جا جاري و تووووش دخل الكنار ..
|
قرقر قرقر
والله انا قلت الزول دا عمل كونتراكت اوفر سيس من ورانا
يا ريت يدخل الكنار ما النار ..
السودان بقي نار يا ابوجهينة
مالكـ بترهب الخلق والعالمين
مودتى؛
|
Post: #42
Title: Re: قرار ود قاسم .. أين يصب ؟
Author: ابو جهينة
Date: 06-14-2006, 08:41 AM
Parent: #40
تبلدينا العزيز
مشتاااقوون
Quote: قرقر قرقر
والله انا قلت الزول دا عمل كونتراكت اوفر سيس من ورانا
يا ريت يدخل الكنار ما النار ..
السودان بقي نار يا ابوجهينة
مالكـ بترهب الخلق والعالمين |
هسع عليك الله يا تبلدينا إنت وكت قررت ترجع .. كان فجعة ولا بتخطيط ؟
كلنا نوينا .. بس ربنا يدينا العمر و نقدر نمشي على خطى التخطيط.
أرقد عافية
|
Post: #28
Title: Re: قرار ود قاسم .. أين يصب ؟
Author: Ridhaa
Date: 06-13-2006, 01:25 AM
Parent: #1
الأخ العزيز أبوجهينة
سلام ...
قرار عودة الأخ ودقاسم قرار حكيم ( ان الله لن يضيعه ) سوف يكون هنالك
مليون باب مفتوح لود قاسم عند وصوله لأرض الوطن ...
نسأل المولى عز وجل أن يسدد خطاه
ونرجو من الجميع أن لاينسوه من صالح الدعاء
مودتي
|
Post: #29
Title: Re: قرار ود قاسم .. أين يصب ؟
Author: garjah
Date: 06-13-2006, 01:50 AM
Parent: #28
الحبيب
جلال أبوجهينة
سلام كبير بحجم الوطن
انت عارف يا غالي قرار حبيب الكل قرار صائب
وفعلا قرار محتاج لشجاعة...ولام عيال اشجع
ظلت ام العيال لكل المغتربين او معظمهم تعتبر فرملة تمنع العودة
انا غايتو مع الضل...اي واحد عندو بيت ولو صغير حقو يفرتك طوالي
تحياتي
وت هسع في العشرة الكماوية؟
|
Post: #47
Title: Re: قرار ود قاسم .. أين يصب ؟
Author: ابو جهينة
Date: 06-15-2006, 03:14 AM
Parent: #29
قرجة أبو العباس
تحياتي أيها العزيز
| Quote: ظلت ام العيال لكل المغتربين او معظمهم تعتبر فرملة تمنع العودة |
هنا مربط الفرس ...
فرمالات العودة كثيرة .. و إمكانية حلحلتها متاحة .. إلا فرملة أم العيال ... فيها كثير من اللغط و الشد و الجذب الذي قد يؤدي في كثير من الحالات إلى فراق أبدي.
أرقد عافية
|
Post: #46
Title: Re: قرار ود قاسم .. أين يصب ؟
Author: ابو جهينة
Date: 06-15-2006, 00:52 AM
Parent: #28
الأخ العزيز جدا Ridhaa
تحياتي و مودتي و تقديري
Quote: قرار عودة الأخ ودقاسم قرار حكيم ( ان الله لن يضيعه ) سوف يكون هنالك
مليون باب مفتوح لود قاسم عند وصوله لأرض الوطن ... |
نتمنى من كل قلبنا ذلك و ما التوفيق إلا من عند الله.
وفقكم الله و إيانا ..
دمتم
|
Post: #32
Title: Re: قرار ود قاسم .. أين يصب ؟
Author: Tabaldina
Date: 06-13-2006, 07:56 AM
Parent: #1
..
.
حقيقة الانحناءة للخال ود قاسم
بقراره الصائب بتوقيت العودة للوطن
فقد اخذت منه الغربة ما اخدذت وما اعطت لا يساوى قدر ما نالت
له التحية والترحيب وكل المودات
حبيبنا ابوجهينة
Quote: قرار العودة هو كجمرة تخبو أوارها بين الرماد ..
كثيرون هم من يرقد قرار ود قاسم في قرارة نفسه .. و لكن عشرات الخيوط تكبله.
كثيرون رجعوا و قالوا الرزق على الله.
و لكن ماذا نفعل إن كان في الوطن لا مجال لأي عمل يدر الرزق في طاحونة تبتلع صغار الأسماك من حيتان ضخمة الكراديس.
و أعني بهذا أن رساميل المغتربين الصغيرة تقف متواضعة أمام بلايين هوامير السوق و الأعمال. |
الارزاق بيد الله
والمجالات متعددة ومفتوحه
والخبرات تصنع المستحيل
ولا مستحيل هنا ..
كثيرون اتخذوا قرار العودة وانت ادري بهم
ولان احوالهم والله افضل من سنوات اغتراب مضت
صدقنى لو استطعت ان ادفع ثمناً لست سنوات عجاف هناكـ
لتعاد لى كاملة لفعلت .. اليس كذلكـ يا ود شاموق ..
التحية لود قاسم بانضمامه لركب العائدين المرابطين هنا
وعقبالكـ يا ابوجهينة ولعزيزنا بناديها
بس اعقلها وتوكل؛
مجدداً التحية للقابعين هناكـ
والعائدين هنا..
|
Post: #49
Title: Re: قرار ود قاسم .. أين يصب ؟
Author: ابو جهينة
Date: 06-17-2006, 01:29 AM
Parent: #32
عزيزي تبلدينا
تحياتي العطرة
Quote: وعقبالكـ يا ابوجهينة ولعزيزنا بناديها
بس اعقلها وتوكل؛ |
آمين.
دعواتك
|
Post: #34
Title: Re: قرار ود قاسم .. أين يصب ؟
Author: أبو ساندرا
Date: 06-14-2006, 01:13 AM
Parent: #1
إتصلت بالشقيق ودقاسم في نفس يوم القرار ،بعد عودته من مكان عمله حيث أودع إستقالته
أوضح لي أن القرار كان مؤجلآ منذ سنوات والآن حدث مادفع بالقرار إلى الامام
حاولت مناقشة بدائل اخرى معه
وجدته مقتنع جدآ بالعودة
بل
حاول إقناعي بأن احذو حذوه
ودي يلقاها عند الغافل
أحيي الشقيق ودقاسم على قراره الشجاع
وإن كنت أفضل أن يتخذه بعد تفكير وتدبير
أمنياتي له بالتوفيق
|
Post: #35
Title: Re: قرار ود قاسم .. أين يصب ؟
Author: Saifeldin Gibreel
Date: 06-14-2006, 01:19 AM
Parent: #34
| Quote: كثيرون هم من يرقد قرار ود قاسم في قرارة نفسه .. و لكن عشرات الخيوط تكبله |
|
Post: #36
Title: Re: قرار ود قاسم .. أين يصب ؟
Author: jini
Date: 06-14-2006, 01:49 AM
Parent: #35
حبيبنا أبو جهينة
لكل شخص ظروفه الخاصة وفرصه الشخصية وما يصلح لفلان لا يصلح لعلان بالضرورة!
ود قاسم من جماعة أقضوا اموركم بالكتمان ودارى على شمعتك تقيد!
قرار راديكالى زى دا لا يمكن ان يكون وليد اللحظة يعنى ولا خروج عودة ستة شهور!
ربما عرضت عليه وظيفة افضل بكل المقاييس وربما منصب نظرية (المؤامرة)
انا شخصيا سافر ود قاسم ود جاسم انا ما نيش متعتع من هنا والزرعنا يجى يقلعنا!
شن بودينى لى ابوعصاية والبشير عقلت ولا شنو!
كل ما اتمناه لود قاسم هو التوفيق له ولأسرته الكريم
جنى
نكشة
قبل عدة سنوات اتخذ احد اصدقائى قرار العودة النهائية وبذلت قصارى جهدى لاثنائه دون جدوى ويبدو ان الحاحى ضايقه فرد منفعلا انا كان جيت البلد دى تانى تف لى فى وشى!
ولم يستدير العام دورته والا واخونا يكابس للعودة فقلت له مهاتفا تعال ما تخاف نحن اهلنا ربونا كويس ما بنتف للناس فى وشيهم!
|
Post: #41
Title: Re: قرار ود قاسم .. أين يصب ؟
Author: Elawad Eltayeb
Date: 06-14-2006, 07:53 AM
Parent: #36
أتمنى لود قاسم وأسرته الكريمة كل التوفيق.
|
Post: #56
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 01:57 AM
Parent: #41
العوض الطيب
و لكم أمنياتنا بحياة طيبة و عافية مستديمة و صحة موفورة
|
Post: #55
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 01:55 AM
Parent: #36
عزيزي جني
تحياتي و مودتي
| Quote: لكل شخص ظروفه الخاصة وفرصه الشخصية وما يصلح لفلان لا يصلح لعلان بالضرورة! |
دة كلام تمام جدا. ظروف المغتربين متباينة كما و كيفا
Quote: ود قاسم من جماعة أقضوا اموركم بالكتمان ودارى على شمعتك تقيد!
قرار راديكالى زى دا لا يمكن ان يكون وليد اللحظة يعنى ولا خروج عودة ستة شهور!
ربما عرضت عليه وظيفة افضل بكل المقاييس وربما منصب نظرية (المؤامرة) |
غايتو يا جني أنا ماشي إجازة .. و حأتابع و أرصد .. لو الكلام دة حاصل .. لينا كلام تاني مع الزول دة.
| Quote: انا شخصيا سافر ود قاسم ود جاسم انا ما نيش متعتع من هنا والزرعنا يجى يقلعنا! |
ربنا يديك العافية و الصحة و يقويك ...
Quote: نكشة
قبل عدة سنوات اتخذ احد اصدقائى قرار العودة النهائية وبذلت قصارى جهدى لاثنائه دون جدوى ويبدو ان الحاحى ضايقه فرد منفعلا انا كان جيت البلد دى تانى تف لى فى وشى!
ولم يستدير العام دورته والا واخونا يكابس للعودة فقلت له مهاتفا تعال ما تخاف نحن اهلنا ربونا كويس ما بنتف للناس فى وشيهم! |
دة زى السوداني ال لما طلع البترول في السودان .. قام شتم السعودية و الكفيل و قال بكرة تجونا هناك .. و عمل خروج نهائي ... و راح هناك .. و إرتطم حاله بجدار الواقع المرير .. و عاد بتأشيرة عمرة .. و لا زال زائغاً يتوارى من الكشات.
أرقد عافية
|
Post: #52
Title: Re: قرار ود قاسم .. أين يصب ؟
Author: ابو جهينة
Date: 06-18-2006, 03:10 AM
Parent: #35
الأخ العزيز سيف الدين جبريل
تحياتي و مودتي الراسخة
| Quote: و لكن عشرات الخيوط تكبله |
جئنا يا أبو السيوف و الطموح بيت و عربية .. فتشعبتْ الأمور .. و تكالبتْ المسئوليات .. و زاد عدد الأيتام و الأرامل , .. و عندما ترسل ( شيلة عرس ) لود خالتك .. فإن الحكاية تجر منذئذ و حتى إلى يوم عودتك النهائية .. و ترسل مصاريف علاج لواحد في الأردن أو مصر أو الهند .. فتصبح الحكاية عادة جارية و يا ويلك لو قصرت مع واحد ..
و هكذا أخي العزيز .. تطقطق حبات سبحة الغربة .. تلتهمنا و نحن كالمخدرين ..
رد الله الغربة سالمين غانمين .. آمين
أرقد عافية
|
Post: #51
Title: Re: قرار ود قاسم .. أين يصب ؟
Author: ابو جهينة
Date: 06-17-2006, 07:38 AM
Parent: #34
عزيزي أبو ساندرا
تحياتي لك أيها القابض على جمر الغربة مثلنا
Quote: بل
حاول إقناعي بأن احذو حذوه
ودي يلقاها عند الغافل
أحيي الشقيق ودقاسم على قراره الشجاع
وإن كنت أفضل أن يتخذه بعد تفكير وتدبير |
اليوم الصباح قابلني أنا طالع و هو داخل للشركة .. قام كورك لى : يا مغترب ..
مع إنو صديق الموج قال ليهو : إن ما رجعت لقواعدك في معتوق .. ما تقول لى إنتهيت من الغربة .. لأن أمدرمان برضو مغترب فيها ..
ود قاسم فكر و قدر كثيرا .. و لكن مع إيماننا بأن كل شيء أرزاق إلا أن صغار المستثمرين ينتظرهم جيش من الغيلان و التماسيح .. لذا فإن أحسن سلاح لمواجهة هؤلاء هو ( رساميل مدنكلة + خبرة في السوق + نفس طويل )
أرقد عافية
|
Post: #39
Title: Re: قرار ود قاسم .. أين يصب ؟
Author: صديق الموج
Date: 06-14-2006, 07:37 AM
Parent: #1
ابوجهينة العزيز..ود قاسم حل جزء من المشكلة بانه تخلص من الغربة الاولى ولكن ود قاسم
فى امدرمان برضو بكون مغترب الا اذا رجع معتوق بتاعته ديك حتى يكون تخلص من الاغتراب..عموما انا
قلت ليه خلى لينا ام طلال والاولاد فى امدرمان حقتنا وغور محل ما تغور مش يا تمبس..قال ود قاسم
انهى الاغتراب قال!!!!
|
Post: #43
Title: Re: قرار ود قاسم .. أين يصب ؟
Author: خالد عويس
Date: 06-14-2006, 02:19 PM
Parent: #39
العزيز أبوجهينة
الأخ ودقاسم رقم ضخم سواء بقي بالرياض أو عاد للخرطوم. ولا شك أن وجوده وحضوره الكبير مؤثر، فهو طاقة عظيمة، وعشق كبير للوطن، ورجل أصيل اتمنى له التوفيق أينما حل
|
Post: #58
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:10 AM
Parent: #43
أخي العزيز خالد عويس
تحياتي و مشتاقون يا رجل.
إرهاصات العودة صارت تضرب على أبواب الكثيرين. المهم هو التخطيط و التمهيد .. لأن أي شيء مفاجيء له مردود سلبي بلا شك.
أرقد عافية
|
Post: #57
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:08 AM
Parent: #39
عزيزي أبو حيدر الموج
تحياتي
Quote: ابوجهينة العزيز..ود قاسم حل جزء من المشكلة بانه تخلص من الغربة الاولى ولكن ود قاسم
فى امدرمان برضو بكون مغترب الا اذا رجع معتوق بتاعته ديك حتى يكون تخلص من الاغتراب..عموما انا
قلت ليه خلى لينا ام طلال والاولاد فى امدرمان حقتنا وغور محل ما تغور مش يا تمبس..قال ود قاسم
انهى الاغتراب قال!!!! |
ود قاسم بيقول ليك .. حسع هو قع المرحلة الأولى .. باقية ليهو فركة كعب لي معتوق.
و قال ليك إنت من أمدرمان للصلحاب و المتمة عاوز ليك سفر و نية و زاد طريق و أوراد السفر ..
أرقد عافية
|
Post: #44
Title: Re: قرار ود قاسم .. أين يصب ؟
Author: luai
Date: 06-14-2006, 03:01 PM
Parent: #1
الاخ الكريم والعزيز ابوجهينة ..تحية وسلام ..
اولا اغبط ود قاسم على هذا القرار الحاسم ...
وهو قرار موفق باذن الله ..انا على قناعة تامة
ان القادم افضل اقتصاديا بالسودان من هنا
قد يتطلب الامر في البداية شويه معافره ومدافره لكن باذن الله
افضل من الاغتراب هذا وطننا وملكنا جميعا وخيراته للجميع ..
وبالتوفيق لود قاسم واسرته ،،،
|
Post: #45
Title: Re: قرار ود قاسم .. أين يصب ؟
Author: 3bdo
Date: 06-15-2006, 00:39 AM
Parent: #44
الحبيب جلال ابو جهينة
سلامااات
كدي قارن بين الحاجات دي بين التسعينات وبين 2006
المرتب - قيمة الدولار من جهة ......... ايجار البيت - مصاريف الإقامة - التغير الاسري- تكاليف المعيشة سنة 1995 من جهة تانية
وبين
المرتب - قيمة الدولار من جهة ......... ايجار البيت - مصاريف الإقامة - التغير الاسري- تكاليف المعيشة سنة 2006 من جهة تانية
اي واحد بيعرف حساب وصادق مع نفسة حيفكر طوالي في الرجعة ... اما الناس اللي استمرأت الغربة وعيشة تكبير الكروش فهم ما حيفكروا يرجعوا براهم مهما كانت نتيجة العملية الحسابية اللي فوق ... الا يطردوهم طرد
طبعا انا خليت السعودية قبل سنوات ومشيت الامارات ... وخليت الامارات السنة الفاتت ورجعت السودان ... بس بصراحة كده ربنا وفقني في شغلة كده رجعت بيها السودان وما ارتجال ساي ... الرزق من الله صاح .. بس الارتجال في القرارات غير محبذ ...لكن صدقني ... البيرجع السودان رجالة ساي برضه بيلقي وضعه ... طالما جايي بخبرة عملية كويسة...يعني قاعدين نلملم في الدولارات في الغربة ... الواحد كل اخر شهر يكون مديون ... يعني الدين في السودان عيب ؟
البلد اتغيرت شديد والظروف المالية احسن بكتير من التسعينات ... الزول يسعي وربك بيتم الباقي
كلام مريم بت الحسين ده مبضع علي الجرح
|
Post: #48
Title: Re: قرار ود قاسم .. أين يصب ؟
Author: حريقة
Date: 06-15-2006, 07:13 AM
Parent: #45
العزيز ابو جهينة
نحايا
تعرف انا وصلت لي قناعة انو الغربة دي عبارة عن ساقية جحا
لو قعدت مية سنة الحال حا يظل هو الحال وما حتنتهي الا بقرار انتحاري وشجاع
لانو لو اخضعت المسالة لي حسابات ابدا ما حا تصل للقرار دا
وزي ما قال عبدو فوق:-
اي واحد بيعرف حساب وصادق مع نفسة حيفكر طوالي في الرجعة ... اما الناس اللي استمرأت الغربة وعيشة تكبير الكروش فهم ما حيفكروا يرجعوا براهم مهما كانت نتيجة العملية الحسابية اللي فوق ... الا يطردوهم طرد
عشان كدا بشوف انو قرار ود قاسم دا صاح وجا في الوقت الصالح
وربنا يوفقو محل ما يمشي .. رغم انو فقد كبير لناس الرياض
ونحن علي الدرب سائرون ان شاء المولي
ارقد عافيه
|
Post: #50
Title: Re: قرار ود قاسم .. أين يصب ؟
Author: إسماعيل وراق
Date: 06-17-2006, 01:42 AM
Parent: #48
الحبيب أبو جهينة
سلام وتحية
قرار العودة (ود قاسم) (نموذجاً) تتحكم فيه عوامل كثيرة أهمها الظروف المحيطة بالشخص سواء ظروف العمل أو قراءته الإستباقية لمستقبل أيامه في ارض الغربة.
القناعة الثابتة كل مغترب وإن طال غيابه يوماً على طائرة أو باخرة للوطن محمول.. وبالتالي علينا حساب كل شئ وبالمسطرة..
العودة لا بد منها ولكن لها شروطها واسبابها المنطقية.. ود قاسم كحالة، أعتقد أن الرجل مكث أكثر من عشرين عاماً بأرض الغربة، آن الآوان أن يقضي بقية العمر بين أهله وأحبابه متنقلاً بين أم درمان ومعتوق.
.
.
الأهم يا حبيب هو مناقشة محفزات العودة الطوعية للبلد... وهذا نضمي يدخل في عالم ساس يسوس... هل الجهاز المتنرح يمكنه مساعدة كل شخص يود الخروج النهائي على سبيل المثال أن يقدم له إعفاء كامل عن سيارة وأثاث منزل جديد... أم يلاحقه بمتأخرات الضرائب والزكاة.
.
.
لنا عودة يا حبيب مع قرار العودة..
|
Post: #53
Title: Re: قرار ود قاسم .. أين يصب ؟
Author: محسن خالد
Date: 06-18-2006, 04:16 AM
Parent: #50
..
إزيك يا أبا جهينة،..
بوستيك دا ما شفتو إلا الليلة، الموضوع دا أنا بنوم بيهو وبصحى بيهو، وقرّبت أجن منو،..
حمدلالالالو بالسلامة ود قاسم، أمانة ما ضو ومبروك، سَوَّى الصحي صحي مفروض يتعمل،..
حمدلالالالو دي بتقولها حبوبتي بعد البنيّة المتعسرة خلالالاص ديك تنحل،..
حَرّم في الغربة دي كلنا بنيات متعسّرات، وولادتنا دي لا حصلت ولا أظنها تحصل، قرفنا دا فوق كم وبكم وليشنو ما بعرفو؟
هسّع جيبي قرش ما فيهو، والــ saving دا طوالي بطلع "سيف saif" ويجذ الماهية البهيمة دي من ضنبها لقرونها، طيّب الهمبعة والزمبعة البي برّه دي فوق أم كم؟
حَرّم الغربة دي كلها، وأجري من بلد لبلد، غير كتبي الطبعتهن ديل ما خدمت لي فيها أيتها خدمة ذات فايدة، وطبعاً قصة البيت وما البيت دي قصص براها وحكمتها تانية،..
كل يوم أصرّ مكتبتي ودفيديهاتي وهديماتي في شوّال وأقول أتكامل أهلي المسيكتاب،..
أوفّر من هنا وجاي كان ألفين وألا تلاتة آلاف دولار وأتراوح ضهارينا ديك،..
أشتري لي حصاناً باتع ومعاهو كارو، تقعد كدا في طرف الكارو وتخت سوطك في حكرك، وحُقّة التمباك في صُفاقك، وتباري من دغش بحيضان البرسيم، الضحى تشق الحلال تبيعو، الضهر تجي راجع تتشطّف وتتعنقلك جنب كتاب، أول شيء كلام الناس بضرسك لأنو بتلقاهو خااام، والأكل بضرسك لأنو بتلقاهو مكررر، والبنات بضرسنك لأنو بتلقاهن عويراااات وشينااات، شويتين شويتين بتتفتح مساماتك القروية ويعود كلام الناس من ريحة أمبارح، وتستعيد كشنة بصل التقلية حرفنة مناداة مصارينك، آآي وبرضو بتبدأ تستمتع بسذاجة البنات وسينقلب المصطلح لشفاعة براءتهن، تقوم تغشلك واحدة وتغشك، وتمشوا سوا، الليلة مات فلان، بكرة بتلد الرضية، وهلم اندغام وتخفي عن مشاكل وجودية تظهر في دوارق الغربة ومعاملها وتختفي باختفاء الإقامات ببلاد الأغيار،...
أها أحسب معاي يا أبا جهينة للزمن داك بكون باقي كم؟ 37 سنة ناقص 32 سنة ونص، تخت الكارو وتطلع بالحصان، أهاا يا سيد اللمنتي ليك الصافي ما أكتر من خمسة سنة مهما اتفنجرت الدنيا معاك،..
تاني شنو؟
حَرّم الحاجات الغاشانا هسع دي كلها، تبزقها مع أول سفّة من طرف الكارو ديك، وتكتشف إنك شخص حقيقي مية في المية، الغربة دي غير تجعل مننا أشباح وثلاجات لحفظ الأمراض النفسية والعُصابات والرهابات، تاني شنو؟
حمدلالالالالالك بالسلامة يا ود قاسم، وقريب بتلّب معاك بهناك، ونشوف،..
..
|
Post: #63
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:37 AM
Parent: #53
عزيزي الأخ أبو خالد محسن خالد
تحياتي و محبتي
وينك يا زول ؟
شكرا على المداخلة الغنية ...
| Quote: حَرّم في الغربة دي كلنا بنيات متعسّرات، وولادتنا دي لا حصلت ولا أظنها تحصل، قرفنا دا فوق كم وبكم وليشنو ما بعرفو؟ |
أنا بعتبر يا أبو خالد إنو قرار الغربة أصلا كان غلطة العمر.
| Quote: حَرّم الغربة دي كلها، وأجري من بلد لبلد، غير كتبي الطبعتهن ديل ما خدمت لي فيها أيتها خدمة ذات فايدة، |
طبعا كتبك دي بالدنيا و ما فيها .. عصارة فكرك و تجاربك في هذه الفانية ..
بس تعال شوف ال أباطم و النجم .. لا فكراً عصروهو .. لا مالاً كسبوهو .. لا رجعة قادرين عليها .. لا قعاداً متحملنو .. قلقلة ما بعدها قلقلة.
Quote: كل يوم أصرّ مكتبتي ودفيديهاتي وهديماتي في شوّال وأقول أتكامل أهلي المسيكتاب،..
أوفّر من هنا وجاي كان ألفين وألا تلاتة آلاف دولار وأتراوح ضهارينا ديك،..
أشتري لي حصاناً باتع ومعاهو كارو، تقعد كدا في طرف الكارو وتخت سوطك في حكرك، وحُقّة التمباك في صُفاقك، وتباري من دغش بحيضان البرسيم، الضحى تشق الحلال تبيعو، الضهر تجي راجع تتشطّف وتتعنقلك جنب كتاب، أول شيء كلام الناس بضرسك لأنو بتلقاهو خااام، والأكل بضرسك لأنو بتلقاهو مكررر، والبنات بضرسنك لأنو بتلقاهن عويراااات وشينااات، شويتين شويتين بتتفتح مساماتك القروية ويعود كلام الناس من ريحة أمبارح، وتستعيد كشنة بصل التقلية حرفنة مناداة مصارينك، آآي وبرضو بتبدأ تستمتع بسذاجة البنات وسينقلب المصطلح لشفاعة براءتهن، تقوم تغشلك واحدة وتغشك، وتمشوا سوا، الليلة مات فلان، بكرة بتلد الرضية، وهلم اندغام وتخفي عن مشاكل وجودية تظهر في دوارق الغربة ومعاملها وتختفي باختفاء الإقامات ببلاد الأغيار،... |
قريت الكلام دة .. ثم عاودت القراية .. جاتني الجملة دي في كل مرة بفلاش :
| Quote: وتستعيد كشنة بصل التقلية حرفنة مناداة مصارينك، |
يا سلام يا محسن .. يا سلااااام ..
Quote: أها أحسب معاي يا أبا جهينة للزمن داك بكون باقي كم؟ 37 سنة ناقص 32 سنة ونص، تخت الكارو وتطلع بالحصان، أهاا يا سيد اللمنتي ليك الصافي ما أكتر من خمسة سنة مهما اتفنجرت الدنيا معاك،..
تاني شنو؟ |
و الله ما في شي باقي .. ولا شي
| Quote: حَرّم الحاجات الغاشانا هسع دي كلها، تبزقها مع أول سفّة من طرف الكارو ديك، وتكتشف إنك شخص حقيقي مية في المية، الغربة دي غير تجعل مننا أشباح وثلاجات لحفظ الأمراض النفسية والعُصابات والرهابات، تاني شنو؟ |
تمام
| Quote: حمدلالالالالالك بالسلامة يا ود قاسم، وقريب بتلّب معاك بهناك، ونشوف،.. |
و العاقبة للمتعسرين في الغربة.
أرقد بألف عافية يا أبو خالد و ربنا يرد غربتك سالم غانم
|
Post: #62
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:28 AM
Parent: #50
الحبيب أبو محمد الوراق
تحياتي و محبتي
مداخلتك فيها حاجتين مهمتين بالحيل :
(1)
| Quote: ود قاسم كحالة، أعتقد أن الرجل مكث أكثر من عشرين عاماً بأرض الغربة، آن الآوان أن يقضي بقية العمر بين أهله وأحبابه متنقلاً بين أم درمان ومعتوق. |
.
بس المشكلة يا دوبك مسئولية ود قاسم بدأتْ .
تهيئة البيت للسكن.
إكمال تعليم الأولاد.
البحث عن وظائف لهم.
تزويجهم.
توفير مال معاشي تحسبا لأي طاريء
(2)
Quote: .
الأهم يا حبيب هو مناقشة محفزات العودة الطوعية للبلد... وهذا نضمي يدخل في عالم ساس يسوس... هل الجهاز المتنرح يمكنه مساعدة كل شخص يود الخروج النهائي على سبيل المثال أن يقدم له إعفاء كامل عن سيارة وأثاث منزل جديد... أم يلاحقه بمتأخرات الضرائب والزكاة.
. |
و دة بيت القصيد.
تأمين عودة المغترب هو كالعنقاء أو لبن العصافير.
أرقد عافية
|
Post: #61
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:21 AM
Parent: #48
أخي العزيز حريقة
تحياتي و مودتي
Quote: تعرف انا وصلت لي قناعة انو الغربة دي عبارة عن ساقية جحا
لو قعدت مية سنة الحال حا يظل هو الحال وما حتنتهي الا بقرار انتحاري وشجاع
لانو لو اخضعت المسالة لي حسابات ابدا ما حا تصل للقرار دا |
أنا معاك بأنو الغربة ساقية جحا .. من البحر إلى البحر ..
و لكن العودة الإنتحارية صعبة .. و إخضاع العودة للحسابات مضيعة للوقت ..
شايف قرار الغربة أصلاً كان غلط كيف ؟
أكبر مقلب.
أرقد عافية
|
Post: #60
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:18 AM
Parent: #45
الأخ العزيز عبدو
تحياتي و مودتي الصادقة
| Quote: الرزق من الله صاح .. بس الارتجال في القرارات غير محبذ ...لكن صدقني ... البيرجع السودان رجالة ساي برضه بيلقي وضعه ... طالما جايي بخبرة عملية كويسة...يعني قاعدين نلملم في الدولارات في الغربة ... الواحد كل اخر شهر يكون مديون ... يعني الدين في السودان عيب ؟ |
دة كلام صاح .. و لكن :
1. ال عندو خبرة دة ما عندو مشكلة تب.
2. ال ما عندو خبرة و عندو راس مال صغير .. لا بد من إحتضان الدولة لصغار المستثمرين و إلا ضاع راس المال في غمضة عين.
3. ال ما عندو لا دة و لا دة .. أباطو و النجم .. دة يمشي وين ؟ خصوصا أن شريحة الغبش أكتر و هم أكتر ناس كانوا مدفونين بمسئوليات متفرعة بين الأهل و أسرهم.
أرقد عافية
|
Post: #59
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:14 AM
Parent: #44
عزيزي لؤى
تحياتي و مودتي
أكيد الأرزاق على الله. و لكن لا بد من إعمال العقل و التفكير قبل أي خطوة. فقد أمرنا الخالق جل و علا بأن نضرب في مناكب الأرض سعياً وراء الرزق ..
Quote: قد يتطلب الامر في البداية شويه معافره ومدافره لكن باذن الله
افضل من الاغتراب هذا وطننا وملكنا جميعا وخيراته للجميع .. |
دة كلام صحيح جدا.
المشكلة في ناس رجعوا و أولادهم في الجامعات و بيدفعوا بالدولار ...
دي براها مشكلة عويصة.
أرقد عافية
|
Post: #54
Title: Re: قرار ود قاسم .. أين يصب ؟
Author: Zongiya
Date: 06-18-2006, 01:34 PM
Parent: #1
الموضوع ده انفتح مره مع صحباتي و مره مع اسرتي قبل يومين
بدا الموضوع بسرد احوال البلد و الاهل في السودان وحال البلد التي نسكن فيها
وبدا سيناريو تخيل الاستقرار في السودان دونما مناسبه !!رغم المصالح و الارتباطات هنا
اكثر في بلد الغربه..
و الغريبه لم نتطرق للاحوال الماديه ووكيفيه المعيشه و العمل و المشاكل و الدراسه و الخ
اكتفوا ب قول(المهم بنعيش)
اعرف مغتربين يعانون من زهج و تعب الغربه مع انو ما في جاجه جابراهم
قعدتنا في الغربه ما ماشه تعملنا اغنياء و في السودان ما مشين نموت من الجوع..
و مع ذلك المقارنه ما سليمه 100%..
ربما لاني اشجع الاستقرار في السودان اكثر..واتمني ان استقر هناك
ود قاسم تمنياتي ليك بالتوفيق و لاسرتك كذلك
تحياتي
|
Post: #64
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 02:41 AM
Parent: #54
الأخت العزيزة زنجية
تحياتي و تقديري
سعدت لمداخلتك.
Quote: و الغريبه لم نتطرق للاحوال الماديه ووكيفيه المعيشه و العمل و المشاكل و الدراسه و الخ
اكتفوا ب قول(المهم بنعيش) |
طبعا يا زنجية زول بموت من الجوع هناك مافي.
المشكلة في روافد المتطلبات من تعليم و علاج و مواصلات و تجهيزات أسرية و مناسبات و مجاملات.
غايتو لو ما الدولة عملت نظام متكامل لعودة المغتربين ... مشكلة حقيقية.
أرقدي عافية
|
Post: #65
Title: Re: قرار ود قاسم .. أين يصب ؟
Author: Al Sunda
Date: 06-19-2006, 03:11 AM
Parent: #64
حبيبنا ابو جهينة
نقول لود قاسم مبروك القرار وهو في نهاية الأمر قرار شخصي وفق أعتبارات مقدرة من صاحب القرار.
تذكرت هذا البوست وانا اتابع نشرة الجزيرة مساء أمس وفي تقرير عن دارفور ،كان المتحدث هو احد قادة حركة تحرير السودان (جناح اركوي ) رئيس الوفد القادم إلى الخرطوم .
تخيل !وجدته زميلنا الاخ محمد التجاني الطيب .
ويربطنا،ود قاسم وهذا المحمد التجاني الطيب وشخصي أننا ابناء دفعة واحدة لكلية الاقتصاد بجامعة الخرطوم في منتصف سبعينات القرن الماضي .
سبقنا محمد التجاني الطيب إلى السودان على طريقته ، هل تأخرتُ و ود قاسم وغيرنا (كانت دلة البركة(مثلاً) تستوعب تلك الدفعات وحتى قبل ظهور النتائج النهائية واستلام الشهادات وبها الكثيرين من ابناء الدفعة ) في العودة إلى السودان؟ ربما ؟
| Quote: غايتو لو ما الدولة عملت نظام متكامل لعودة المغتربين ... مشكلة حقيقية |
وغايتو كان راجي الدولة ياكا المارجعت
لك مودتي
|
Post: #66
Title: Re: قرار ود قاسم .. أين يصب ؟
Author: ابو جهينة
Date: 06-19-2006, 03:46 AM
Parent: #65
عزيزي الأخ السندة
تحياتي و تقديري
شكراً للمداخلة الغنية.
| Quote: وغايتو كان راجي الدولة ياكا المارجعت |
تصدق يا السندة .. سنة 1988 رجعت للسودان بعد أن أسست مشروع كلفني حوالى 80 ألف دولار بالتمام و الكمال. لظروف خارجة عن الإرادة و المراقبة اللصيقة و الإعتماد على (ذوي القربى و المؤلفة جيوبهم ) فقد فشل المشروع فشلاً سريعا و ذريعاً ...
ثم عدت إلى ركوب موجة الهجرة شرقا و غرباً .. مع قناعتي التامة بأن حكوماتنا الرشيدة منها و الراشدة لن تنفعنا ( شروى نقير ) أو عقال بعير ..
كان الله في عون تلك الشريحة التي لا خبرة لها و لا مال و لا راسو ..
أرقد عافية
|
|