Post: #1
Title: نبكيككيف وابكيك كيف؟ الى روحه الطاهره الى هاشم في علياءه
Author: عبدالله وداعه الامين
Date: 06-07-2006, 10:22 PM
نبكيك كيف
وابكيك كيف
قول ليا كيف؟
وانا والحزن راكبين على جرح الاسى
ونتوشح الالم النزيف
شادين علي سرج الغنى الشلناهو
بنكوس الفرح
زي نسمة هابيها الخريف
ما كنا قايلنك خلاس
بتفوتنا يا زولا سمح
وتسيبنا في الوجع المخيف
"اسبوع تمام
انا والنجوم"
شلناكا زي كل الهموم
جوانا يا زولا نضيف
لو كان "كنوز الدنيا"
والكون غرتك
ما كنت تدينا الفرح
وازاهر الشوق الوريف
ماقلنا "غيب وتعال" كمان
تلقانا
يا هاشم
لقينا الحرقة
والالم السخيف
و"حان الزفاف"
وانا "كنت خايف من فراقك"
وهسه بعدك كم بخاف
دايرني ابقى كمان ضعيف؟
لو كان "مصير الحي بلاقي"
"حتى باقي العمر شيلو"
و وسد الجسم الرهيف
الرملة وادينا البحر
لو بس" افوت عينيك" انا
وقامتنا بعدك ما تقيف
يا" زول هناك"
مكتوب علي كل البقع
جوانا بتشيل البقع
حتى البقع
وتقاوم المد العنيف
"وخلفتى في قلبي الجراح"
يوم فتا بتسابق الصباح
لا لقينا من بعدك رباح
لا فينا سكتا النواح
زي الرياح ...
سافرتا من دنيا الكضب
شان تلقى في دنيا الرباح
الطيبة والجنة البقت
مفروشة يا هاشم سماح
رغم الجراح
دايرنا نقراك يا حزن؟
ما انت بس اقرانا صاح
ما انت بس اقرانا صاح
عبدالله وداعه الامين
لندن 08.06.2006
|
Post: #2
Title: Re: نبكيككيف وابكيك كيف؟ الى روحه الطاهره الى هاشم في علياءه
Author: عبدالله وداعه الامين
Date: 06-08-2006, 10:10 AM
Parent: #1
فات اللي كان
بدينا من نغمو الحنين
وبجرتق الروح اغنيات
وبدوزن الوتر الوقف في حزنو
اداهو الصفات
ومن بعد ما مات الفرح جوانا
فجر دنيتو
واداهو من تاني الحياة
وبتبقى يا هاشم اكيد
ومعانا
بنشيلك وشم
بمتدى لي بعد الممات
ماتقولوا مات
|
Post: #3
Title: Re: نبكيككيف وابكيك كيف؟ الى روحه الطاهره الى هاشم في علياءه
Author: Dr. Moiz Bakhiet
Date: 06-08-2006, 11:08 AM
Parent: #2
الغالي عبد الله
لك يا شاعر المدينة الهمام العزاء والصبر الجميل
ولك محبتي العميقة
|
Post: #4
Title: Re: نبكيككيف وابكيك كيف؟ الى روحه الطاهره الى هاشم في علياءه
Author: ناجي عز الدين الصديق
Date: 06-08-2006, 02:02 PM
Parent: #1
الحبيب عبد الله وداعة
تحية حزينه من سماء الرباط الغاتم
( غيب وتعال تلاقنى نحن زي ما نحنا )
التحية لك ولي احساسك المرهف
تابع وسوف نتابع معك بعيون دامعه .
وإلى الملتقى يا صديقي
|
Post: #5
Title: Re: نبكيككيف وابكيك كيف؟ الى روحه الطاهره الى هاشم في علياءه
Author: wail tagelsir abdalla
Date: 06-08-2006, 06:44 PM
Parent: #1
رحمة الله على عزيزنا و معبر طموحاتنا
الحزن فينا كعل يمشي على ساقين
لك حسن العزاء و كل الصبر
وائل
|
|