الترابي: المسلم ممكن يبقى مسيحي، الرئيس ممكن يكون مسيحي أو امرأة..طيب كتلت كم زول ع شان تصل للـ

الترابي: لا مشكلة في اعتناق المسلم المسيحية



الخرطوم: إسماعيل آدم لندن: «الشرق الأوسط»

قال الدكتور حسن الترابي زعيم المؤتمر الشعبي المعارض في السودان، إنه لا مانع لديه في أن تؤول رئاسة السودان الى مسيحي أو امرأة، طالما كان من يتسلم المنصب عادلا ونزيها، معتبرا أن «الشريعة حرفت عن معناها الحقيقي». كما واصل الترابي فتاويه المثيرة للجدل، معتبرا ان من الممكن للمسلمين ان يعتنقوا المسيحية. وقال «ان الله عز جلاله منحنا حرية الفكر. المياه تخضع لقانون التحول، فهي تتبخر عند درجة مائة، وتتجمد عند درجة الصفر. لقد منحنا بعض المساحة». ويتابع «الله لم يرسل الملائكة ليفرضوا علينا اي شيء، نحن احرار في ان نكون مسلمين، او نصبح غير مسلمين، ونعود مسلمين».
وقال الترابي في مقابلة اجرتها معه وكالة الصحافة الفرنسية، «لا توجد لدي مشكلة إذا تولت امرأة الرئاسة (..) وإذا تقدم مرشح مسيحي نزيه سأنتخبه».

الى ذلك علمت «الشرق الأوسط» من مصادر مطلعة، أن بعثة مجلس الأمن الدولي إلى السودان، فشلت فى الحصول على «موافقة صريحة» من الرئيس عمر البشير، بشأن نشر قوات دولية فى دارفور بديلة للقوات الأفريقية، التى تحرس اتفاقا هشا لوقف إطلاق النار في الإقليم المضطرب .

.



الشرق الأوســط





.

.

الترابي

صاحـب الاسـم المشكلة

آآلآن؟؟!!



كم روحآ أزهقت بفتاواك؟

كم سنة ضوئية دفعت بلادنا للوراء؟

ثم تأتي اليوم، سعيآ وراء الكرسي اللعين، لتتوسل للغرب بأنك أكثر مرونة؟

ألعب غيرها

قد تروق الأفكار للغرب و اليسار، لكنهم لــــن يثقوا فيك، فابحث عن مسبحة والدك، عليه من الله شآبيب الرحمات، و ترجل درويشآ مكرّمآ

خير لك من أن تتكفف أصوات الحداثيين أعطوك أو منعوك..إني لك من الناصحين.

.

ألأخ ألطيب بشير
طبعا ألترابى دا أنا بتعامل معه بطريقة ناس[مسرح ألعبث]..وذلك لأنه شخصيه[عبثيه]مـلهمة...ومـن إلهاماته [ألنكته]ألتاليه:-
(قالوا ألترابى مات,شالوه ألجماعه عشان يدفنوه في مقابر شرفي...ولكن عـمك أحمد شرفى وموتاهو وقفوا [دت]..وقالوا..حرم مايندفن معانا... ألجـماعه مشوا لـمقابر أحـمد شرفي...لقوا ناس أحـمد شرفي ..رافعين راياتهم مهددين بالإضراب لو ألترابي إندفن وسطهم..مشوا [حمد ألنيل]برضو..ألجبانه[هايصه]
في ألنهايه قالوا..نوديه ندفنو جوار جده في [ودالترابي] ...ولكن كانت ألـمفاجأة..لقوا[ألجد]واقف بره ألحله وقال ليهم بالأنجليزي[NO]....
أهـا..ألناس إحتارت ..واحدين قالوا نرميه في البحر..وواحدين قالوا أحسن نحرقو..وبينـما ماهم في تلك ألحيره .جاءهم إبليس أللعين .وقال ليهم..أدونى أياهو وماتشيلو هم.
إبليس شال ألترابي لـمقبرة سيدنا آدم وقال ليهو:-[ياآدم جبت ليك ولدك ألترابي يرقد حداك...صمت سيدنا آدم طويلا..وقال لأبليس[ياإبليس يا ملعون إنت زمان فتنتني مع ألله لامن طردنى من ألجنه..فهسع داير تفتني مع ألترابي

.

هلا يا عبدالله

Quote: شخصيه[عبثيه]

و الله جننتو جن
هو كذلك
لكن بصراحة في الفترة الأخيرة كتّـر المحلبية شوية
يخيل لي ليس هناك شيء لم يتفنن في بالفتوى
عشنا و شفنا

.

الطيب بشير..




انها الصورة الحقيقية قبل التصريحات الاخيرة..
كارلوس يامحبظ دة ثاثير اسخليسيوى ..

.

اسماعيل يا حبيب

و الله جننت الاضنين جن

بقى يشبه شنو؟

لوووول يا الخاتي القول..و الله ناس الاستوديوهات منكم خووووفة!

.

ممكن انبثاقا من اراء الترابي دي نحول مجري الحوار يا الطيب لنقاش ما قاله الترابي ونعرف رائكم شنو من تولي المسيحي للرئاسه في السودان او المرأه؟؟؟
انا رائ طبعا بقولوا ليكم من الان. الدين دا يكون في الجامع في البيت في نفسك ويكون هناك فصل تام بين الدين والدوله الا لو انتوا عايزين فصل الجنوب دا شئ اخر .
لانه لا يمكن التوفيق بين الدوله الاسلاميه وحقوق غير المسلمين فيها خاصه تولي الرئاسه .

Quote: انا رائ طبعا بقولوا ليكم من الان. الدين دا يكون في الجامع في البيت في نفسك ويكون هناك فصل تام بين الدين والدوله الا لو انتوا عايزين فصل الجنوب دا شئ اخر .

نعم الراى يا استاذة دوما
نعم من اجل دولة ديمقراطية (علمانية بالتحديد) تحفظ للكل حقوقهم الدينية، الثقافية، و للخ..
كفانا مزايدات بإسم الدين..

.

سلام يا ياسر

أتفق معك في أن الجزء الخاص بفصل الدين عن الدولة (الآن) أفضل لأن الدولة الانقاذية شوهت الدين

و أتحفظ على التعميم

و أرفض في قول العزيزة دومة ما ورد في الكوت بتاعك..و هو:

Quote: الا لو انتوا عايزين فصل الجنوب دا شئ اخر .

فصل الجنوب يا دومة عاوزينو ناس الجنوب..تصريخات قادتهم بتقول كدة..

و ما بيخوّف..و خليني أستعدل ليك الجملة..لو الجنوبيين عاوزين يفصلوا اقليمهم بي راحتهم

هم البيقرروا المصير ما نحن

الاستفتاء في مصير وحدة السودان حكر على الجنوبيين فقط!

عرفت البيفضل الفصل منو يا دومة؟

.

Quote: فصل الجنوب يا دومة عاوزينو ناس الجنوب..تصريخات قادتهم بتقول كدة..

بس مع دولتكم الدينيه المبيتين عليها النيه دي اي صاحب ديانه غير الاسلام يعتبر مواطن درجه تانيه ولو كنت مكانهم لفضلت خيار الانفصال اليوم قبل غد.
يبقي تصريخاتهم دي لانهم قراءوا ما تضمرون .
اما حكايه انه الانفصال لا يخيفك دي ما قدرت افهمها يعني بتعتبر ان جنوب السودان غير مهم بالنسبه لبقيه ارجاء الوطن فليذهب لتبقي الشريعه ؟؟؟
ولو كان كذلك لما الحرب والخسائر التي تكبدهاالناس علي مدي اربعين عام ؟؟؟

.

Quote: اما حكايه انه الانفصال لا يخيفك دي ما قدرت افهمها يعني بتعتبر ان جنوب السودان غير مهم بالنسبه لبقيه ارجاء الوطن فليذهب لتبقي الشريعه ؟؟؟

يعني يا دومة انت موش سألتيني سؤال؟؟و اهو تحته خـط؟
في داعي لي حكاية (يعني) الجبتيها بعدو دي..و هي (يعني) بتاعة ح تعلمونا شغلنا..و ما اليه؟
حصل أنا قلت ليذهب الجنوب لتبقى الشريعة و لا الذرّيعة؟
ما قدرت افهمها
أوضح نفسي يا ستي
الجنوبيون يتعاملون مع فكرة الانفصال كسكين لذبح الشمال..الليلة جيتكم بالانفصال أوووخخخ..ح تموتوا بعد ما ننفصل..أووخخخوواا..و البعض واقع فيهم دلع شديد..وووووب علينا النبي ما تنفصلوا..آآآه ياروحي و يا نفسي يا جنوب السودان خليك هنا و بلاش تفارق!!
لمّحت ليك لرفضي لفكرة أن تقرير مصير وحدة السودان سيحدده الجنوبيون من دون الشماليين!
لو اختاروا الانفصال ح نعمل شنو؟
نرحب بيهم كجيران
طيب المخيف في كدة شنو؟
أووخخخووا ..تاني مافي
انفصلوا مبروك..قعدوا مرحب..حياد ايجابي
لكن تهديد بالانفصال و ابتزاز بي أووخخخوووا..لأ ..لألأ

.

أخوي الطيب

ده كلو عـــادي مـن زول فقد بـوصلـتو وأصبح يخـرَب عـدَتـو بـراهــو

لكن الـمو عـــادي النـاس الدَقــسو وإتَلحـسو وراه والنـاس االسـادرة في غيَـهاومـاشـيه وراه

الله يـهديه ويهـديـهم ويـهديـنا

ويحمـينا من جهـجهة الكـبر

.

حبيبنا حيدر حسن

مرحبتين

الترابي باقي لي زي العاوز يهدّ المعبد على البشير و علي عثمان طه

بطريقة يا فيها يا أخفيها

غير انو الراجل بقى مخرّف، بقى متعة

يعني الترابي اللي كان الحاكم بأمره كل الزمن دة ينتهي الى مهرّج!

زي النميري لمن دخل عليهو زائر في مستشفى أمريكي لقاهو بيلوّن في رسومات أطفال!

مصير الظلمة واضح فهل يتعظ الذين يمدّ لهم الرحمن مدّآ في (القهر) الجمهوري الآن؟

.

.

Quote: ونعرف رائكم

Quote: انتوا عايزين

Quote: انا رائ طبعا بقولوا ليكم من الان.

الحبيبة دومة..الخلّـى رايك فردي يعبر عن نفسـك و خلآني أنا ضمن مجموعة شـنو؟؟

و أرجو أن تكوني قد اخترت لأخيك مجموعة طيبة

رأيي الشخصي أن الإسلام هو النموذج الأفضل و أن تقصير اللصوص و القتلة الذين طبقوه لا يحسب عليه

رأيي أن ما قاله السيد الإمام الصادق المهدي قبل عشرين عامآ هو الحل:

نحتاج للتربية حتى يطالب الناس بشريعة الإسلام، لا أن تفرض عليهم

و في الفترة دي، و القول لي، ان شاء الله يحكم النقر..I don't care

المواطن العادل البيحكم برضا الأغلبية

هو الأجدر بالحكم الآن.

.

لووول يا الطيب صيغه الجمع للتفخيم وكدا (بعدين انت صحح الاملاء وحاتك انا نسيت قواعد اللغه العربيه دي اكون ممتنه كمان ) تعظيم ليكم مش لما الزول يكتب لمديره خطاب بيقول وارجو من سيادتكم آملين في قيادتكم الرشيده

.

إلى صاحبة السمو الأميري دومة
نحن قد وافقنا على تبريركم
و أنعمنا عليكم ببعض الرضا
آملين أن تراعوا مكانة جنابنا السامي في كتاباتكم المستقبلية

فخامة الباب العالي..رفعة الكاتب الختير الطيب بشير

لوول يا دومة

يجازي محنك

.

Quote: يعني يا دومة انت موش سألتيني سؤال؟؟و اهو تحته خـط؟ في داعي لي حكاية (يعني) الجبتيها بعدو دي..و هي (يعني) بتاعة ح تعلمونا شغلنا..و ما اليه؟ حصل أنا قلت ليذهب الجنوب لتبقى الشريعة و لا الذرّيعة؟

لوول يا الطيب تصدق يعني دي معاها رفعة حاجب كمان وعوجة قدوم وسندة حنك بيدي اليمين .
لا اكتمك سرا انا و الدوله الدينيه لا نتفق البته اها (ألان) بتاعتك الختيتها لي بين قوسين ديك ابت تتبلع وقفت في حلقي وقلت معناته عاجلا ام اجلا الشريعه هي مطلب الشمال يعني ابو الطيب بس معترض علي كيزان الانقاذ لكين شريعه يجيبها حزب الامه ولا الوطني الاتحادي بتكون هي المبتغي . اها ناس الجنوب اخير ليهم ينفصلوا اليوم قبل باكر وليذهب الجنوب ,وابو سبعين والذريعه وتبقي الشريعه

.

بالحــيـل يا دومـة
الآن دي، حسـب فهمي لكلام السيد الصادق، انو الناس تطالب بالشريعة بعد الفترة التي أسماها التربية. أنا مسـلم و أرى أن نظام الشريعة كمنهاج أصلح من ديمقراطية أرى سوءاتها في دولتها الكبرى، حيث أعيش، كل صباح.
أنا ماني علماني، و لا أحجر على العلمانيين حقهم في التفكير.
نموذج طالبان نسخة السودان منفّر
لكن التربية التي قصدها الصادق لو أخرجت لنا حكّـامآ زاهدين تكون أفضـل بديل لجماعات جاغوم بن بلاّع ديل.
الجنوب سيذهب يا دومة من غير شريعة
سيفصله أبناؤه، أصحاب حق تقرير مصير الشمال من حيث الوحدة و الإنفصال!، و حينها سنرحّـب (نحن الطيب بشير ) بالدولة الجارة..و لن نرضخ (الآن) لأيّ أووخخخوووا أو تهديد..زي ما قلت ليك قبيل..بعد ما يحددوا يقوموا الجنوبيين لينا، مشكورين، إنو بلدنا ح يبقى موحّـد و لا دولتين، نحن معاهم في الحالين..جيران حلوين..أو أخوان في الوطن حميمين ..بلا دلع و لا غبن..

.

انت عارف يا الطيب التربيه القصدها الصادق دي انا ما لمستها الا عند الجمهوريين يعني بالواضح فكر محمود محمد طه . وبما ان فكر محمود محمد طه الذي رفض وقتل ومازال صاحبه يوصف بالمارق والزنديق يبقي الحل هو الديمقراطيه الغربيه والفصل التام بين الدين والدوله . في الجزئيه الاخيره اوافقك تماما فيما ذهبت اليه ان رضوا حبابهم عشره وان ذهبوا نتمني لهم حظا اوفر بس من غير حروب

.
و الله يا دومة المحك هو السـلطة
الأخوان الجمهوريون جماعة تنتهج اللاعنف في صراعها
و هذا مسلك حضاري يضمن للمعارضين، إن تيسّـر للجمهوريين الحكم، سلامتهم الشخصية.
أنا لا أرى أن طرح الجمهوريين الصفوي قادر على تحقيق إجماع شعبي في المستقبل المنظور يمكّـنهم من الحكم عبر صناديق الإقتراع.
سـعيد باتفاقنا حول جزئية جنوب السودان
تقديري


.

Quote: أنا لا أرى أن طرح الجمهوريين الصفوي قادر على تحقيق إجماع شعبي في المستقبل المنظور يمكّـنهم من الحكم عبر صناديق الإقتراع

طبعا بالتاكيد لن يحدث التفاف شعبي حول الفكر الجمهوري. هذاالفكر سابق لعصره ولم يخلق انسانه بعد الا نفر قليل .

بدون تعليق !!!!!!!!!!!!

الشايقي
_____________
فاوضني بلا زعل

.

Quote: فاوضني بلا زعل

.

أخـي العـزيز الطيب، تحـية لك..
يحـضرني الآن مقال للأخ عادل عبد العـاطي تعقيبا على فتاوي التـرابي السـابقة، ربما تكـون قرأته، وتجـده مـرة أخـرى هـنا:
الفقهاء هم من حرم زواج المرأة المسلمة بالكتابي وليس الق...ة!!! عادل عبد العاطي

وخـلاصته؛ وهو مـا أود أن أقـوله أيضا، أن التـرابي لم يـأت بجـديد الآن، ولكـن بالطـبع فهـو له أجـندة ومـآرب أخـر؛ وكما أردد دايـما، فهـذه هي طريقة الإسـلاميين في كل زمـان ومكـان، أي تغـيير تكتيكاتهم والمبنية كلها على الديـن وفقا لمتغـيرات الواقع والظـروف والمعطيات المتغيرة؛ ولا يوجـد عـندهم شـي اسـمو ثوابت؛ ودونك سـيئة الذكـر ثوابت الإنقاذ.. لأنهم حصل كتلوا ناس عشـان طالبوا مثلا بتقرير المـصير للجـنوب، وبعـد داك كتلو ناس تانيين لأنهم اعـترضوا على تقـرير المـصير (إلا خال الرئـيس لن يقـتل!).. مثلما أعـدموا الأسـتاذ محـمود بتهمـة الردة، والآن يفتـي (نفـس) الترابي أن الدين (زي المـويه)!..فالرجـل في نظـري لم (يخـرف)؛ وهـو ما زال (حـيٌ يسـعى!)..وأعـني بأنه لم يـأت بجـديد ؛ أن المـواطن السـوداني البسـيط لم يكـن ينتطـر فتوى من التـرابي أو غـيره ليصـوت في أول إنتخابات قادمة للشهـيد جـون قرنق، وقد رأينا (صيغة الجمع هنا ليست للتفخيم والتعظيم!)، رأينا كيف فرح كل الناس بتولي قرنق منصبه، ومشـاركة الحـركة في الحـكومة.. أهلنا يا سـيدي في سـودري وكسـلا (وربما طابت!).. محـتاجين للعـيش والسـكر والعـلاج والتعـليم، وليس للدين، فهـو عـندهم، وهـم كفيلين به ولا يرجـونه من أي حـكومة كانت.. وأنت تعـرف أن أكتر من تسـعين في المية من السـودانيين يعـيشون في فقـر مـدقع، وأن غالبية الشعـب (الآن في القرن ال21) هـم من الأميين!.. ولا أتـوقع أنهم يرفضـون أو يعـترضون أو تأخـذهم حـمية الجاهلية لو تولي مسـيحي (أقـرأ جـنوبي!) رئاسة الدولة؛؛ لا بل كما أسـلفت كانوا سينتخبونه بأنفسـهم ما دامـوا مطـمئنين لوطنيته وأمـانته وإخـلاصه لخـدمـتهم في الجـوانب التي ذكـرت؛ أو زي ما بقـولوا (لبرنامجه الإقتصادي).. يعـني هـم متقدمين على الترابي الذي لم يتوصل لهـذا الإخـتراع العـظيم الا البارحة!.. لكـن زي ما قلت هـم ناس (سـويين) وعايشين على طبيعتهم وليس لديهم أي طموحات أخـرى خفية يمتطون الدين لتحقيقها.. وأديك قصة كمثال؛؛ وطـبعا ناس الجبهة كانوا وما يزالون يسـتغلون المقولة المنسـوبة للإمام الصادق (قوانين سبتمبر لا تسـاوي الحـبر الذي كتبت به!).. وقد سـاروا بها في الركبان والبلدان؛ وروجـوا (لنفس الأسـباب التكتيكية) أن الصادق المـهدي لا يريد الشـريعة إلى أخـره.. ومـع ذلك صوتنا ليه وانتخبناه؛ فقط لأنه أيضا وعـدنا بالسـكر والمستشفيات مش بالشـريعة!.. المهـم القصة إنو الكـيزان جـو لي أهلنا هناك وقروا ليهم (الفرمالة) دي؛ وإنو الصادق المهـدي قال ما دايـر الشـريعة؛ طبعا في بالـهم اسـتغلال الـورع الشـديد والخـلاوى التي عـرفت بها المنطقة، كما عـرفت بولائها للأنصار أيضا..فـرد عليهم كـبيرهم: والله كان السـيد الصادق قال ما دايـر الشـريعة.. نحـنا زااتنا مانا دايـرنها!)..ولك السـلام..

Quote: ممكن انبثاقا من اراء الترابي دي نحول مجري الحوار يا الطيب لنقاش ما قاله الترابي ونعرف رائكم شنو من تولي المسيحي للرئاسه في السودان او المرأه؟؟؟ انا رائ طبعا بقولوا ليكم من الان. الدين دا يكون في الجامع في البيت في نفسك ويكون هناك فصل تام بين الدين والدوله الا لو انتوا عايزين فصل الجنوب دا شئ اخر . لانه لا يمكن التوفيق بين الدوله الاسلاميه وحقوق غير المسلمين فيها خاصه تولي الرئاسه .

كلام الأستاذه واضح ومحدد .

الردود كلها مزاوغات علي طريقة الترابى

دايريين الكلام العديل
مع تحياتى إحترامى

.

كتب رأفـت ميلاد، مقتبسـآ كلام دومة لي:

Quote: كلام الأستاذه واضح ومحدد . الردود كلها مزاوغات علي طريقة الترابى

لمصلحة الحوار سنتجاوز عن سوءة تقييمك للناس و وصف ردودهم بالمزاوغات الترابية
كنا قد أوضحنا في بوست آخر أن تصحيح كلام الناس بالقلم الأحمر لا يفيد، و ليس من حق احـد!
أقتبس لك هنا بعض ردودي التي أراها واضحة
لا مزاوغـة فيها
و الحكم للقاريء
1/

Quote: أنا مسـلم و أرى أن نظام الشريعة كمنهاج أصلح من ديمقراطية أرى سوءاتها في دولتها الكبرى، حيث أعيش، كل صباح.!

2/

Quote: أنا ماني علماني، و لا أحجر على العلمانيين حقهم في التفكير.

3/

Quote: الجنوب سيذهب يا دومة من غير شريعة سيفصله أبناؤه، أصحاب حق تقرير مصير الشمال من حيث الوحدة و الإنفصال!

** يا ريت نسمع رأيك إنت الشخصـي..من غير مزاوغات أو اقتباسات

و زي ما قلت انت

Quote: دايريين الكلام العديل مع تحياتى إحترامى

.

.

مرحبتين أخي الكريم عيسى يوسف
لم يأت الترابي بجديد، كما تفضّـلت، سوى أن المسلم يمكن أن يبدّل دينه كما يستبدل ملابسـه!! دي جديدة..
أعجبني جدآ تحليلك لزئبقية الجماعة الهؤلائيّـة و وصوليتهم و استغلالهم لعاطفة أهلنا. لكن زي ما قالوا ناس القرية:
كان زعماءنا المعروفين ما دايرين الشريعة..أنحن ذااااتنا ماني دايرينها
الشخصية السودانية التي أرادوا إعادة صياغتها!
لا و الله
نحن كدة كويسين..الخبز و التعليم و الصحة ..قبل الشريعة
لكن كمان يا عيسى بعد ما..نحلم نقرا نتداوى..لو تمت التربية الواردة في حديث السيد الصادق و طالب الناس بالشريعة..بيكون أفضل لو طبقنا الشريعة لأن ذلك انتصار لهوية الشعب الذي طالب بها..أظن أن ذلك سيتم بعد أن يقرر الجنوبيون مصير وحدة البلاد و ذلك في القريب المنظور.
تحية ليك


.

Quote: نحن كدة كويسين..الخبز و التعليم و الصحة ..قبل الشريعة لكن كمان يا عيسى بعد ما..نحلم نقرا نتداوى..لو تمت التربية الواردة في حديث السيد الصادق و طالب الناس بالشريعة..بيكون أفضل لو طبقنا الشريعة لأن ذلك انتصار لهوية الشعب الذي طالب بها

يا ابا بشير اكان الشريعه الاسلاميه هي البتحدد الهويه السودانيه يكون وضع رأفت ميلاد والشهيد ميلاد شنو؟؟؟!!
بعدين كلامك جاء كدا وكانك قاطع الشك بانه كل اهل السودان ينادون بالشريعه الاسلاميه يعني انت حددت ان اهل السودان هم مسلموه فقط وتناسيت ان هناك سودانيين مسلمين لا يريدون تطبيق الشريعه وانا واحده منهم لانه لا في الماضي لا الحاضر لا المستقبل سانادي بتطبيق شريعه تحرم مواطن سوداني مثلي حقوقه المدنيه .لو كل مسلم فينا طبق الاسلام في نفسه بنكون عملنا فائده كبيره ودعوا الدوله مدنيه توفر لكل سوداني غض النظر عن دينه حقوقه المشروعه .
ولنا بنات حواء في عدم تطبيق الشريعه فوائد اخري يعني مش ممكن تجي سيده راشده عادله وفهمانه تكون متل تاتشر كدا تحكمكم يا رجال السودان تكتمكم النفس

Quote: سنتجاوز عن سوءة تقييمك للناس

أخوي الطيب ده كلام قاسى فعلآ

يمكن يكون رد فعل لكلامى

Quote: الردود كلها مزاوغات علي طريقة الترابي

لم أقصد علي الإطلاق من التقليل والإستهانة بالآخرين
يمكن لعدم المعرفة المداعبة كانت ثقيلة
أعتزر

الحقيقة أنا عابر سبيل وخارج الحوار


فقط بهرنى رد الأستاذة دومة

Quote: ممكن انبثاقا من اراء الترابي دي نحول مجري الحوار يا الطيب لنقاش ما قاله الترابي

من متابعتى لمداخلات الأستاذة التى تكون بسيطة فى طرحها وبليغة فى مدلولها وفى لب الموضوع
ودائمآ طرحها لأشياء نخاف أن نناقشها حتى مع أنفسنا رغم إيماننا بها
بحكم العادة أو التقاليد والموروثات

أحيى فيها الشجاعة وأعرب عن إعجابى بطرحها السهل الممتنع

وشكرآ عزيزى الطيب

يديك العافية

.
لم أقصـد القسـوة، عزيزي رأفـت، و لا داعي لإعـتذار

آســف أنا على كلامي الذي قسـا على صباحك

الأسـتاذة دومة من أرقى كتّـاب البورد ..و كلامها يبهر فعلآ، و ما يعجبني فيها أكثر من أن يحتويه

بوسـت .. لقد نصـرت زوجتي في هذا البورد حين توارى فزعآ أقرب الناس!! أنا أحبها (بي خشم الباب)

و ع شان كدة عاوز أقنعها بأهمية تربية المسلمين على الإسلام الصح صح..

أنحن يا صديقي لا نمثّـل طالبان الكيزان..و لانا قريبين من طرحها..إسـلامنا، النسخة الأصـلية، ملؤه التسامح

و ستكون دومة سفير دولتنا لدى الإتحاد الأوروبي

تقديري

.

العزيز رأفت ميلاد
القومه ليك يا حبوب
صمتي في حضرتك ابلغ كلام
المتلك دا الزول يقول ليه شنو واي لغه ستوفيك حقك ؟؟؟!!!
لله درك ويا لك من انسان طيب والطيب حبيب الله .
مرحب بيك ولا تنقطع عنا

.

دومـة المهجـومـة (المرجـومـة) لووووول..
ركّـزي معاي بت أمّـي
أنا في كلامي الإقتبستيهو دة ذااااتو قلت:

Quote: ..لــو تمت التربية الواردة في حديث السيد الصادق

يعني دومة نفسها كمسلمة تطالب، يومها، بتطبيق الشريعة!!
أنا كتبت التربية كشـرط .. و ما قلت انو الشريعة هي البتحسم هويتنا، أرجعي لكلامي، قلت بعد التربية بيكون تطبيق الشريعة:

Quote: إنتصار للهوية

تلك التي حسمتها التربية!
ركّزي معاي يا البنيّـة واحدة واحدة

.

ابو موحي اسعد الله صباحك U made my day"دومه المهجومه المرجومه" ضحكت في الصباح الباكر دا
اولا دعني احييك لتطيب خاطر الزول السمح دا و بالجد امس لما قريت رده واعتذاره اللطيف سالت ادمعي وقلت في نفسي اكيد ابو بشير ح يجي وح يقول كلام سمح اها مشكور ويسمح عملك .
اها يا ظريف يا الرايق وماك ضايق بعد ما تتم تربيتنا ونقوم نطالب نحن بالشريعه انتصارا لهويتنا باقي الجماعه ح ينتصروا لهويتهم كيف ؟؟؟
اها انت وريني الحل للناس غير المسلمين والمسلمين الذين لا يرون ما يري المسلمون الذين تمت تربيتهم ؟؟
انا غايتو تغيير تاني لتربيتي ما ظنيت يحصل يا الطيب لانه في رائ انه ليس هناك افضل من الدوله المدينه دوله المواطنه والدوله الدينيه علي اطلاقها لن تكن عادله طالما ضمت مواطنيين من ديانات اخري فاما يفرغ السودان من غير المسلمين وتقام الدوله الدينيه الاسلاميه او تركنوا للدوله المدنيه والكل له حريه معتقده وممارسته.

.
العزيزة دومة
أشكرك أختي و أحيي الأخ رأفـت مرة تاني
الدولة العادلة وهم يا دومة ..لم أجدها في الخليج المرفّـه..و لا أمريكا التي تتبجح بالديمقراطية و لن تحققها الدولة الإسلامية..العدل المطلق عسير..و الجماعة ثاروا على سيدنا عثمان بن عفان صهر نبينا الكريم عليه أفضل الصلاة و التسليم و ذبحوه و هو يتلو القرآن..فلن يعدل بينهم الصادق المهدي أو دومة..سيظل البشر يشكون..
أنا أتحدث عن أشواقي كمسـلم، فلا تأخذي بناصيتي و لا بلحيتي يا بنت أمي
اغلبية تحكم ..هذا أمر حاصل هنا و في أوروبا..أنا أمريكي مسلم..لكني لا أملك عشر معشار ما يملكه المسيحي هنا..هذا بلدي..لووووول..و لا في مساواة حاصلة هنا و لا يحزنون..الأغلبية المسلمة في السودان، بعد ما ينعدل الحال و نبقى ناس تمام و الترابيين ديل يموتوا يعدموا طافي النار..شريعة جدي الشيخ الطيب دي أحسن منها مافي..نوبات و مدايح..و كلو في الله..لا فيها نظام عام و لا أمن عام..أي حاجة بالنية بس بالنية.

.

الحبيب الطيب
دابك فرحتني شديد وكتين اسلامك بقي اسلام ناس جدك الشيخ الطيب لانهم ديل الناس العرفو حقيقه الدين وهو اطعام الطعام وافشاء السلام دين الرحمه والمحبه الدين الساهل البدخل قلبك من غير لجه ومن غير حجه . يا اخي انا الناس المتل ديل بريدهم في الله.
اخوك رأفت دا راجل طيب ودخل قلبي لانه ما انفعل بل وجد ليك العذر وكمان أعتذر شفت سمحاة النفس كيفن حلوه ؟؟؟.
وبعدين معاك يا الطيب؟؟؟!! زوجتك دي ما في مقام بت الحشاالبت متل النسمه دي بت مبروكه هي عارفه اني بحبها والقلوب شواهد .