Post: #1
Title: زيارتي لصلالة و دهشتي حول امكانية الامتزاج العربي الافريقي داخل الجزيرة العربية
Author: domdom
Date: 05-27-2006, 12:12 PM
Parent: #0
اولا و بعد وصولي مباشرة لمطار صلالة الدولي احسست بانني في الخرطوم ( سيادة السحنة السمراء )
اندهشت لانني ودعت قبل اكثر من 24 سنة وهم الدم العربي في شخصي (للاخريين مطلق الحرية في الانتماء )و خاصة بعد ان راجعت كثير من الاشياء مثل اكل الكسرة لشعوب القرن الافريقي و السوداننين وجود الشلوخ عند معظم القبايل السودانية و الشلوخ عند معظم قبايل القرن القرن الافريقي و عدم وجودها عند العرب النغمة الموسقية او السلم الموسيقي في القرن الافريقي سباعي مثل النغم السوداني اما السلم العربي مختلف
طيب باختصار انا خلاص وصلت لانو هوية السودان سودانية يعني انا شاكي في مسالة العربية دي و خاصة انني قارنت بين سحنة و عادات و سلوك النوبين من دناقلة و حلفاويين و سكوت و محس ( بعدين المحس بتاعيين الوسط ديل كلامهم براهو ) و بين قبايل الوسط .مافي فرق بينهم طيب الخلا ديل عرب و ديل غير عرب شنو؟؟؟؟؟؟
المهم الاشياء دي بي تخميرها معاي خلتني ما افكر في انو نحن عرب
اها وصلت صلالة و هاك يا سمرة و الله العظيم الشي الغير عادي انك تشوف ليك زول ابيض المهم في دهشتي ديك قمت سألت ليك واحد من الناس انتو جيتو من زنجبار (و كنتو مصاهرة عربية افريقية ) كنتاج لي طرد العرب اخونا قام ضحك و قال لي نحن قبل زنجبار و قال اسم اسرته
المهم مشيت معاهو ز كنت جري جدا قلت ليهو انو الرق الكان في غرب افريقيا مشي لي الامريكتين الشمالية و الجنوبية اما رق شرق افريقيا جاكم هنا
قام زولكم حمر لي و قال لي نحن موجوديين في الجبال و نحن سمر و بعدين جنوب عمان و اليمن فيها سمر كتير قبل الرق .
و الله انا اتلخبطا اها الجماعة ديل جنسهم شنو
المهم اليوم التاني مشيت لي مزار النبي ايوب داخل الجبال و كانت هنالك مفاجأة اكبر من كده, سواق العربية الوداني كان اسمر بملامح عربية و قلنا ده خلطة زي ناس وسط السودان المهم زولك لما كلام في التلفون بي رطانة تشبة الامهرية ( لغة الحبش) اها انا قلت ليهو كلامك ده شنو قال لي دي لغتنا نحن اهل الجبل , اها هل في لغة عند العرب او لهجة عند العرب غير العربية
الحمد لله في هذه الرحلة زرت الاتي
قبر النبي ايوب - و الله العظيم انا شميت لي طيب من بعد متين متر من القبر
قبر النبي عمران
بعدين برضو محا قالو بانو ذبحت فيهو ناقة سيدنا صالح برجع ليكم بعد ارتب افكاري
مع السلامة
|
Post: #2
Title: Re: زيارتي لصلالة و دهشتي حول امكانية الامتزاج العربي الافريقي داخل الجزيرة العربية
Author: domdom
Date: 05-27-2006, 12:45 PM
Parent: #1
ايضا اثار دهشتي اكتشافي بان الاشجار الموجود بكثرة و في بساتين كبيرة و التي ظننتها اولا نخيل ما هي الا اشجار جوز هند
برضو واحد قال لي انو صلالة بلد البخور الضكر
اشتريت منو كميات اصلو قالو بعالج النزلات و الحساسية
المهم لسع انا مندهش لسمرة الناس و رطانة اهل الجبل الزي الامهرية و عايز اي واحد من الاخوة الموجودين بالسلطنة و خاصة صلالة موافتي عن الحاجات دي
ان شاء الله بعد تحميض الفيلم حا اقوم انزل قبر النبي ايوب عليه السلام
و النبي عمران عليه السلام
و صورة مذبح ناقة سيدنا صالح
|
Post: #3
Title: Re: زيارتي لصلالة و دهشتي حول امكانية الامتزاج العربي الافريقي داخل الجزيرة العربية
Author: Adil Osman
Date: 05-27-2006, 01:16 PM
Parent: #1
الاخ domdom
تحية طيبة
موضوع ظريف. يجلى بعض الاوهام. هنا صور تؤكد ما ذهبت اليه عن سواد او سمرة بعض العمانيين.
عمانيون فى السوق فى مدينة صلالة
مواطن عمانى من صلالة
|
Post: #4
Title: Re: زيارتي لصلالة و دهشتي حول امكانية الامتزاج العربي الافريقي داخل الجزيرة العربية
Author: domdom
Date: 05-28-2006, 01:29 AM
Parent: #3
الاخ عادل شكرا علي المشاركة
طبعا انا فتشت لي سودانينن في اليوم الاول اتونس معاهم بس بعد وصولي الفندق لقيت ليك البلد كلو السودان و كما عهدنا السودانيين يظهر سمعتكم كويسة جدا و علاقتكم بالناس في صلالة طيبة.
المهم
اثار دهشتي موضوع الرطانة المثل اللغة الامهرية فهل من مزيد
ثانيا كنت ابحث عن صديقي القديم و رفيقي ايام الشباب سيد احمد رحمة الشايقي من نوري عرفتا انو في صلالة فلو في تلفون ليهو لانو متوقع يكثر حضوري لصلالة التي احببت رغم ترحالي الكثير لاول مرة اشعر باني في بلدي
|
Post: #5
Title: Re: زيارتي لصلالة و دهشتي حول امكانية الامتزاج العربي الافريقي داخل الجزيرة العربية
Author: Adil Osman
Date: 05-28-2006, 01:46 AM
Parent: #4
الاخ domdom
تحية طيبة
انا لا اعيش فى عمان. اعجبنى الموضوع فساهمت فيه بهذه الصور. اتمنى ان يرى اعضاء البورد فى عمان هذا البوست ليجيبوا على تساؤلاتك الهامة.
|
Post: #6
Title: Re: زيارتي لصلالة و دهشتي حول امكانية الامتزاج العربي الافريقي داخل الجزيرة العربية
Author: domdom
Date: 05-28-2006, 10:10 AM
Parent: #1
اها يا ناس صلالة و سلطنة عمان ساعدونا شوية لغاية ما نحمض الفيلم
|
|