Post: #1
Title: قصيدة جديدة للأستاذ عزمي أحمد خليل مهداه للصديق الرقيق الصنديد الشاعر محجوب محمد شريف
Author: عزمي أحمد خليل
Date: 05-24-2006, 01:40 AM
قصيدة جديدة للأستاذ عزمي أحمد خليل
بعد السلام
هذه قصيدة جديدة للأستاذ عزمي
مهداه للصديق الرقيق الصنديد الشاعر محجوب محمد شريف
Imad-eldin Ali Babiker
ترجع حديد
شعر عزمي احمد خليل
مهداه للصديق الرقيق الصنديد الشاعر محجوب محمد شريف
صحيح والله الزمن مقلوب
وسيد الحق يعيش مسلوب
حتى الفجر بيبقى غروب
ويسافر للعلاج محجوب!!!
@@@
سيرتك شاغله كل مجال
وكل الناس قلوبها عليك
شلت الهم ... عشانهم كم
وضحيت واصلو ما هاميك
وكنت في كُل حاره جسور
دوام حب الوطن ماليك
لا يوم لنت ... لا هادنت
وهسع الكل جميع يفديك
@@@
عمرك كلو شلتو نضال
وكُل بلادي طُفت سجونها
ما إتغيرت ... وما جابنت
وللثورات بقيت مجنونها
باعوا كتير مبادئ وخانوا
الا براك ابيت ما تخونها
لا غراك مال ... لا جاهـ
ولا خيبت عزه ظنونها
@@@
ترجع بكره إنت حديد
وتلقى عدو الوطن روََّح
والشتل الزرعتو زمان
من كتر الصمود فتح
اصلو الضلمه مهما تطول
لا بده الصباح يصبح
وتشرق بالمعزه شمس
للحزن السكن تمسح
@@@
السودان الوطن الواحد
تانى يرجع للمبادى
وينجلى البلا ... والغلا
والمنافقين يمشوا غادى
وتانى تكتب الف غنيه
بيها يتغنوا الشوادى
ما الجميله ... ومستحيله
يا ها دائماً بس بلادى
@@@
سلامتك والله يا محجوب
ويا ميَّ ما تشيلوا الهم
اخو الخير للوطن بيرجع
ونوال بالفرحه تتبسم
وتزغرد بالعديله أميره
ويعود للدار وِليد مريم
ويطير البوم من الخرطوم
وكل حر بالحياه ينعم
واشنطن 20/5/2006
|
Post: #2
Title: Re: قصيدة جديدة للأستاذ عزمي أحمد خليل مهداه للصديق الرقيق الصنديد الشاعر محجوب محمد شريف
Author: أبوذر بابكر
Date: 05-24-2006, 02:24 AM
Parent: #1
Quote: ما الجميله ... ومستحيله
يا ها دائماً بس بلادى
|
تحايا وتقدير لأستاذنا عزمى
والمنى الدائم لشاعر الناس والبلد
بالعافية التامة
بإذن الخالق القادر
وتحية للأخ عماد الدين بابكر
|
Post: #3
Title: Re: قصيدة جديدة للأستاذ عزمي أحمد خليل مهداه للصديق الرقيق الصنديد الشاعر محجوب محمد شريف
Author: sadiq elbusairy
Date: 05-25-2006, 04:31 PM
Parent: #2
الاستاذ عزمي احمد خليل
ايها الرائع
اياهو محجوب
من يومو حديد
سافر و يرجع حديد
و الزمن بالصح مقلوب
ده الاغبش مسحو الطباشير
يسافر مريض
و الناس البيهدو الشعب النار
رصاص و قاشات تعلم تحت الحزم
و في الضهر و الراس
سمينين و امينين في الخرطوم
يعرسوا في الواحدة و الاثنين
اياهو يا عزمي الزمان مقلوب
يد بتمد الكتاب تتبتر
و يد تمد السياط تتباس
ايهو الزمن فات و جانا بقفاهو
لكن محجوب عقاربه صح
زمانه صح
مكتبته صح
شبابيكه صح
محجوب حديد و ح يرجع حديد
بس ندعو و نقول يارب الحديد
تشيل البأس عن الراجل الحديد
عن الانسان الشديد
حبيبنا محجوب الاسمه موقع
في حيط كل السودان
في حواريه و سجونه
غرب و شرق
محجوب ارجع لينا
املى الكراس
و شخبط الوان
و ارسم النسيم
و افتحه له الشبابيك
في انتظارك يا حبيب
تحياتي ة اشواقي
اخوكم
الصادق البوصيري
|
|