الحظوظ إنْ عاكستْ ... زى الشرا في القندول

إلى صديقي ( ود السنجك ) .. الذي كان و ما زال يؤمن بمثل واحد طوال حياته :

الدنيا إن مشتْ .. بي خيط العنكبوت تِنْقاد ... و إن أبَتْ .. تقطِّع سلاسل الحداد ..

أهديه قصته نظماً مجوبكاً ... بعد أن أقسم ألا يغترب و ألا يمر حتى مجرد مرور بالقرب من بنك ..

***

و أهديها إلى الوداعية بتول التي تسكن في ضواحي الكلاكلات :

***

بكامل قواي العقلية ..
لا خمراً شربتَ .. و لا مسطول ..
و كآخر حل للمُشْكِل المزمن ..
و قبال نجمي يخبو و يكون مصيرو أُفُول ..
وافقتَ أشُور الخالة الشهيرة بتول ...
و أعرف قصة حظي التعيس .. ليه بالفقر موصول ؟
ضِحْكتْ عيشة خيْتي .. و جارتنا أم الشول ..
قالوا أكيد ..
دة كلام زهج .. يا بقيت مخبول ..
وداعية ؟ و كمان بالإسِم الخالة الشهيرة بتول ؟
ياخي ما معقول ..
ما شفتها في حفلة وصال ..؟
سِكْرتْ .. وقفتْ لطْ و غنت ( تكولن كول ؟ )
رطنَتْ .. جابت لغات كل العجم .. من تتار و مغول
كوركتْ .. و بيْبَيَتْ .. يابْ إيدن تَسِد و تطول ..
و وقعتْ غمرانة نص الدارة..
و لما أسيادا قالوا :
طلباتك يا حاجة بتول ..
قالت : إسكيرت و بلوزة من عفراء مول ..

***

معليش يا جماعة ..
أسمحوا لىْ
أشوفا بس شن بتقول ..
و أسباب عكوس الحظ ..
و المستقبل المجهول ..
ليه محل ما أقَبِّلْ مَكَجَّن و ما مقبول ..؟
زول ممتاز .. زول وناس .. و كلي أصول
عني كدة .. الناس جميع بتقول ..
الخدمة و أدَِيناها ...
و غير شهادة البكالريوس ..
مخي ملان ... تقول كشكول ...
يا حاجة بتول ...
هاكي .. أهي دي سيرتي ..
قدامك زى كتاب مبهول ..
كشْكشي ودَعِك .. شوفيهو شن بيقول ؟

***
حدرتْ لي ..
ثم أخدتْ سفة ..
و قرطعتْ جُغْمة من جرْكِن في اليمين متكول ..
قالت بفصاحة و عويناتا في الودعات :
يا ولدي .. مصيرك لا غبار عليه
واضح قدامي و غير مجهول ..
جَدِّدْ البظبورطي .. و خليهو ساريَ المفعول ..
فقدَمك يا ولدي سيكون سريع منقول ..
و سيكون باليورو و اليَنِّ .. الرصيد مشمول
و أحرص على ضريبتك
و زكاتك تدفعا قبال يحول الحول

فتبسَّمَ شخصي المسكين .. من قولها المسئول
معقول ؟
بسافر ؟
و أبقي المغترب ؟ معقول ؟
و البنية ال غراما في القليب مأهول
تبقي ستي و ست ريدي ؟
و يرتاح فؤادي ال بالكمد مكتول ؟
و سرحتَ بعيييييييييييييييييييييييييييد ..
غايتو أول ولد .. بَدَلِّعُو بي إسم شبلول
مالو ؟ دة ما إسم جدي ال كان أيام التُرُك مسئول
و أول بنية ( حتى و لو ما رضتْ ست ريدي ) ..
بدلعا و بناديها : ووووووووووووووو .... يو دول ..*
إسم حبوبتي .. الوارثة جروف و شتول
و جريت فرحان ..
و قدام بيتنا ..
لقيت عسكري واقف منتظر
بالله أتقول مصابح غول ..
شنباتو تقيف عليهن الحِدَّاية ..
عضلاتو تِبِش .. و الكتيف مفتول
قال لي : أركب البوكسي ( ولا قوللي رافض )
مالي شن سويت يا جنابو ؟
قال لىْ : يا جنا شيكاتك في البلد
طايرة ... تصول .. و تجول
و رصيدك يا حريف ..
يجيبلك إن كتَّرْ ..
تلات عيشات .. و حَبَّة فول ..

**
الحظوظ إن عاكست ... زى الشرا في القندول

***

ترجمة :*

ووووووووووووووووووووو : ( حرف نداء طويل التيلة للدلع أو في حالة الإستجداء )
يو دول : يو معناها أم Mother
دول .. إسم حبوبات قديمات من زمن الباشبوزق , و الفلقة في الخلاوي. و يمكن الرجوع إلى الضليع دكين للشرح أكثر.

أركب البوكسي ( ولا قوللي رافض )

ابو جهينة الظريف

سلامات

Quote: يا جنا شيكاتك في البلد طايرة ... تصول .. و تجول و رصيدك يا حريف .. يجيبلك إن كتَّرْ .. تلات عيشات .. و حَبَّة فول ..

لكن جنابو ده فضحك فضيحة السواد و الرماد
غايتو أحسن ليك تركب البوكسى ساااااااكت







الفولانى

عزيزي الفولاني

تحايا و تقدير

Quote: غايتو أحسن ليك تركب البوكسى ساااااااكت

وللا قوللي رافض

صاحبك كان داير يفرتق بدون ما يسدد شيكاتو ..

أرقد عافية

Quote: الدنيا إن مشتْ .. بي خيط العنكبوت تِنْقاد ... و إن أبَتْ .. تقطِّع سلاسل الحداد ..

وانا من اكثر المؤمنين به ..





ظريييفة .. أوي .. قصيدتك دي .


تاريك ماساهل ياخال ..

كل مرة الواحد يعرف فيك جانب(ابداعي _مجوبك) ..

يديـــــــــك العافية ..

قريبي العزيز سمو

مودتي المقيمة

Quote: كل مرة الواحد يعرف فيك جانب(ابداعي _مجوبك) ..

و ما الدنيا إلا جوباك مجوبك حد الجوبكة .. فأمشي مع تيارها .. و أفرد لها أشرعتك .. ستجد طعماً مختلفاً لكل أوجه الحياة.

أرقد عافية

الأخ الأديب الأريب أبو جهينة ..

تحياتي أفندم ..

النظم حلو بالجد ما هو مجوبك ..

استمتعت شديد والله ..


وبحب أكرر معاك الحكم المنسوبة للشيخ فرخ ود تكتوك حلال المشبوك ..


إن جادت عليك بي خيط العنكبوت تنقاد ** وإن عاجت عليك تقطع سلسل الحداد


إن جادت عليك تجيك من جبال ياسو ** وإن عاجت عليك تدفق الفي الدواك عاسو


تشكرات ..

واصل ..

جاد

أخي العزيز جدا جاد

تحياتي و سلامي
شكرا على المرور

Quote: إن جادت عليك بي خيط العنكبوت تنقاد ** وإن عاجت عليك تقطع سلسل الحداد إن جادت عليك تجيك من جبال ياسو ** وإن عاجت عليك تدفق الفي الدواك عاسو

حكمة بليغة .. ألا رحم الله شيخنا ود تكتكوك.

أرقد عافية

المبدع حد الزهج أبا جهينة ، وإرتباط الزهج بالإبداع هو لغة نعيشها ونعايشها الآن في السودان فقد قال الولد لجكسايته والله بلوزتك دي تافه خالص فشكرته وهي تبتسم حتى بانت سعاد - عفوا – نواجزها وردت عليه لكين ما تقول لي بنطلونك ده ما عفن شديد فأنتفخ وأنتشي صاحبنا وشكرها وهو يرسم إبتسامة الرضا على شفتيه .
نرجع للمثل مرة وأتذكر حكايتي معاك
تقول بنت المناخير السيد (بت المنى خير السيد) أن أصل المثل كالتالي:
إن جادت عليك بي خيط العنكبوت تنقاد
وإن عكست تغلب السلسل القواد
والكلمة الأخيرة من عجز البيت لا علاقة لها بالقيادة الرشيدة أو غيرها. وراجعين يا أبا جهينة إن شاء الله بعد أن ننتهي من ضرب الجير بكره كأس العالم يا فرده وهي مناسبة تستحق الإهتمام خاصة وأن المسافة بين العيد والعيد بقت بعيده خلاص

عزيزي الأديب الأريب الملا عمر الوقور

تحياتي و مودتي المقيمة

Quote: وإرتباط الزهج بالإبداع هو لغة نعيشها ونعايشها الآن في السودان فقد قال الولد لجكسايته والله بلوزتك دي تافه خالص فشكرته وهي تبتسم حتى بانت سعاد - عفوا – نواجزها وردت عليه لكين ما تقول لي بنطلونك ده ما عفن شديد فأنتفخ وأنتشي صاحبنا وشكرها وهو يرسم إبتسامة الرضا على شفتيه .

Quote: تقول بنت المناخير السيد (بت المنى خير السيد) أن أصل المثل كالتالي: إن جادت عليك بي خيط العنكبوت تنقاد وإن عكست تغلب السلسل القواد والكلمة الأخيرة من عجز البيت لا علاقة لها بالقيادة الرشيدة أو غيرها.

برضو

Quote: وراجعين يا أبا جهينة إن شاء الله بعد أن ننتهي من ضرب الجير بكره كأس العالم يا فرده وهي مناسبة تستحق الإهتمام خاصة وأن المسافة بين العيد والعيد بقت بعيده خلاص

تخيل يا عزيزي .. أنا يمكن أعتبر نفسي من الناس ال همهم رايق .. فأنا لا أحب كرة القدم على الإطلاق .. و هل تصدق أنني لا أتابع كرة القدم لا كاس العالم و لا كاس أفريقيا و لا يحزنون.
أهم رياضة عندي هي سباق الخيل .. و ألعاب القوى بأنواعها.

أرقد عافية و شكرا على المرور و في إنتظارك ..

أستاذنا / أبو جهينة ‏

يسعد مساك بكل خير ,,,,,,,,,,,,,,,‏

‏======================== ‏
تسجيل حضور ومتابعة ‏

وزمان بقولوا الدنيا كتير من الاجتهاد وشوية حظ ‏
وحاليا بقولوا كتير من الحظ مع شوية اجتهاد ‏

‏*** ‏

بالخاطر لعائشة ( عشة الفلاتية ) في مقام الحظ البعاكس :‏

جفت العين والمنام بدري ‏
الحبائب بي لو تدري .....‏
ما راعوا أخلاصي وجليل قدري ‏

وعني مالم صدوا وأتوا روا ‏
حظي عاكس ولا هم جاروا ‏

‏********* ‏

مرور للتحية ورفع البوست ‏

وأكيد فائق التحية والتقدير ,,,,,,,,,‏

كرتعت لي كم جغمة يا أباجهينة وقلت اسلم عليك.

Quote: طلباتك يا حاجة بتول .. قالت : إسكيرت و بلوزة من عفراء مول ..

جميييييل يا ابو جهينة




حقيقة ممتعة

Quote: فتبسَّمَ شخصي المسكين .. من قولها المسئول معقول ؟ بسافر ؟ و أبقي المغترب ؟ معقول ؟

غربة تاااانى
الكلام كدة لاكن
ما بينفع

خالص التحايا

غادة

الأخت الفاضلة غادة عبدالعزيز

تحياتي و تقديري

شكرا على المرور.

Quote: غربة تاااانى الكلام كدة لاكن ما بينفع

ناس جوة عاوزين يغتربوا.
و ناس الغربة عاوزين يرجعوا.
غايتو حالة تحنن العدو يا غادة.
لكن زولنا جنب المطار ساكت ما بيحب يمشي.
و كمان ما بيحب يسمع سيرة البنوك أو الشيكات.

أرقدي عافية

عزيزي بناديها

تحية و مودة و تقدير

سعدت للمرور.

Quote: كرتعت لي كم جغمة يا أباجهينة وقلت اسلم عليك.

أوعك يكون من جركن الجاجة بتول ال على اليمين متكول ؟

غايتو تعال بالشي كرتعت منو دة .. عشان نكرطع معاك ..
شكرا للمداخلة.
أرقد عافية

أخي العزيز عبدالناصر الخطيب

تحايا عطرة و مودة مقيمة

سعدت كثيراً بولوجك دنيا هذا عاثر الحظ صديقي الذي يقبع منذئذ في السودان منتظراً ضربة حظ .. فربما..

Quote: وزمان بقولوا الدنيا كتير من الاجتهاد وشوية حظ ‏ وحاليا بقولوا كتير من الحظ مع شوية اجتهاد ‏ ‏*** ‏

و الله يا عبدالناصر .. لو الحظ موجود .. حتى قليل الإجتهاد مالو لزوم.

الواحد يمدد كرعيهو و يتوسد حظو.

Quote: بالخاطر لعائشة ( عشة الفلاتية ) في مقام الحظ البعاكس :‏ جفت العين والمنام بدري ‏ الحبائب بي لو تدري .....‏ ما راعوا أخلاصي وجليل قدري ‏ وعني مالم صدوا وأتوا روا ‏ حظي عاكس ولا هم جاروا ‏

أحب الإستماع لهذه الأغنية جداً.
شكرا كثيرا.
أرقد عافية

عزيزى جلال

سلام و شووووووووووق

شكرا للإمتاع .. فأنت هكذا دوما .. الواحد يدخل مواضيعك و متأكد أنه سيخرج مرتاحا و ممتلئا بإبداعك

و التحية لشيخى الملا .. ما أن دخل دارا إلا و عطّرها بعبق أحرفه

أخي العزيز و صديقي الصدوق علي الحلاوي

تحياتي و شوقي الممتد

مشتاقون . وين أراضيك ؟

سعدت لمرورك و أشكرك على المداخلة.
كن بألف خير و أرقد عافية