Post: #1
Title: مفاجأة لم تكن في الحسبان للمريخ في قرعة الكونفدرالية
Author: Ahmed Alrayah
Date: 05-13-2006, 01:33 PM
إذا فاز المريخ في دور ال16 لبطولة الكونفدرالية على بطل الكونغو -بإذن الله- سيلعب في هذه المجموعة:
| Quote: الفائز من الرجاء المغربي X الترجي التونسي |
| Quote: الفائز من النجم الساحلي التونسي X مورو يونايتد التنزاني |
| Quote: الفائز من ناشيونال النيجيري X ريسيمونتو الغيني |
________________________________
يا ربي أحسن لينا -كهلالاب- يصعد الترجي ولا الرجاء؟ رايك شنو يا عمر الفاروق؟
|
Post: #2
Title: Re: مفاجأة لم تكن في الحسبان للمريخ في قرعة الكونفدرالية
Author: Rakoba
Date: 05-13-2006, 01:46 PM
Parent: #1
أحمد الريح
(بركة) الجيت!
|
Post: #3
Title: Re: مفاجأة لم تكن في الحسبان للمريخ في قرعة الكونفدرالية
Author: Frankly
Date: 05-13-2006, 01:54 PM
Parent: #1
يا أحمد الريح يا أخي أنا كنت فاكرك زول بتقدر وتفكر وتوزن الأمور وتتحرى الجيد من الفاسد
لكن طلعت بيش وللأسف
هلالابي؟؟؟؟؟؟؟؟؟؟؟؟؟؟؟؟؟
لا حول ولا قوة إلا بالله
منه العوض
كنت قايلك زول تفتيحة
الله يهديك
قول آمين!!
الفكي فرانكلي
|
Post: #4
Title: Re: مفاجأة لم تكن في الحسبان للمريخ في قرعة الكونفدرالية
Author: Ahmed Alrayah
Date: 05-13-2006, 02:00 PM
Parent: #3
يا راكوبة،
(البركة) في قرعة الكونفدرالية
|
Post: #5
Title: Re: مفاجأة لم تكن في الحسبان للمريخ في قرعة الكونفدرالية
Author: Ahmed Alrayah
Date: 05-13-2006, 02:01 PM
Parent: #4
... منتدى المريخ http://almerrikh.com/phpbb/viewforum.php?f=1 فيهو شباب ظراف بيحبوا المريخ أكتر من السودان ذاتو !! واحد إسمو dr.murtada كتب مقال ظريف اسمو (عيسى حياتو مريخابي اكتر من شاخور زاتو) ويقصد قرعة دور ال16 التي أوقعت المريخ مع فريق متواضع من الكونغو بينما أوقعت الهلال مع فريق مغربي؛
لكن بعد قرعة قرعة ادور ال8 اتضح إنو حياتو هلالابي أكثر من الطيب عبدالله ذاتو
|
Post: #6
Title: Re: مفاجأة لم تكن في الحسبان للمريخ في قرعة الكونفدرالية
Author: Ahmed Alrayah
Date: 05-13-2006, 02:02 PM
Parent: #5
عيسى يا ود حياتو، بنهتف بي حلاتو
المريخ تبختر، وعايش في سعادتو
لكن يا خسارة، جات القرعة جاتو
زي أرض المعارك، تبشر بي مماتو
***
يا راكوبة أجهز، عشان تمشي العيادة
وأسمع من مجرب، خلاص أنسى السعادة
قيامتك يومك قرب، وما بنتفع عبادة
المغرب دي عقرب وفي توبس إبادة
أنحنا أخدنا خمسة، والراجيك زيادة
|
Post: #7
Title: Re: مفاجأة لم تكن في الحسبان للمريخ في قرعة الكونفدرالية
Author: Ahmed Alrayah
Date: 05-13-2006, 02:55 PM
Parent: #6
الأنطون فرانكلي
بس لو وريتني المريخ ده بشجعو كيف؟! يعني أعراض تشجيعو شنو؟ لأنو ما أظن زول نصيح كده بيشجع المريخ،
قال ليك واحد من مشايخ الصوفية ديل كان هلالابي، جاتو واحدة (مجنونة) والحيران أبو يدخلوها، قال لي الحيران: المريخابية دي دخلوها
ــــــــــــــــــــ
هاك دي...
الرجاء المغربي القوي خير وأحب إلى الهلالاب من الترجي التونسي الضعيف (هذه الايام) ... وفي كل خير
|
Post: #8
Title: Re: مفاجأة لم تكن في الحسبان للمريخ في قرعة الكونفدرالية
Author: haider osman
Date: 05-13-2006, 05:06 PM
Parent: #1
A1 Win NAHD (Algeria) - ASFAR (Morocco)
A2 Win OCK (Morocco) - El Hilal (Sudan)
A3 Win Inter Clube (Angola) - USCAFOOT (Madagascar)
A4 Win Petro Atletico (Angola) - UCST PAD (Senegal)
ده مجموعة الهلال ....
وده الفرق بينا وبين الشعوب...
تنجلى العنصرية ...الراسخة فينا ومدفونة فى الاوصال ..
فى غير مكانه......
كده خلينا حبايب ...سوكرتا............. وبس
|
Post: #9
Title: Re: مفاجأة لم تكن في الحسبان للمريخ في قرعة الكونفدرالية
Author: Ahmed Alrayah
Date: 05-13-2006, 08:02 PM
Parent: #8
| Quote: تنجلى العنصرية ...الراسخة فينا ومدفونة فى الاوصال فى غير مكانه |
إزيك يا حيدر
هلال مريخ دي ما أظنها عنصرية، الموضوع مناكفات لن تصل حد المهاترات، عشان ناس الكورة كلهم زي راكوبة كده... مريخابي لكن بأخلاق الهلالاب، هو ذاتو السنة الجاية نازل فك تسجيل مع صلاح الأمير(*)
مجموعات الكونفدرالية يصعد منها فريق واحد فقط (لا غير) للمباراة النهائية، غايتو مجموعة المريخ لو دايرين منها 4 من 4 المريخ احتمال ما يصعد!
انا قلت إنو القرعة مفاجأة لأنو ناس المريخ اتعودوا ليهم سنين يلاقو فرق ما معروف ذاتو بجيبوها من وين... أوتالي ويوسكاف والجواميس وسان لويزيان والضرايب وباماكو وشنو ما عارف،
آخر مباراة للمريخ مع فريق تونسي أو مغربي كانت سنة كم؟ في واحد بيتذكر؟ على ما اظن قبل 15 سنة مع الأفريقي التونسي!!
__________________________________
(*) ده كمان جابو لينا من وين؟ نحن ناقصين (قلق)؟!
|
Post: #10
Title: Re: مفاجأة لم تكن في الحسبان للمريخ في قرعة الكونفدرالية
Author: Ahmed Alrayah
Date: 05-15-2006, 01:38 AM
Parent: #9
| Quote: لوبوبو بتاع أيه.. نرغب في مواجهة الترجي والرجاء.. ليعلما الفرق بين المريخ والآخرين! |
أول مرة نتساوى -مزمل أبوالقاسم وأنا- في الرغبة! وأخشى أن يعلم الترجي والرجاء أن الفرق بين المريخ والآخرين في الألوان بس!
|
Post: #11
Title: Re: مفاجأة لم تكن في الحسبان للمريخ في قرعة الكونفدرالية
Author: ود المايقوما
Date: 05-15-2006, 03:02 AM
Parent: #1
الدباب ( المجروس ) / احمد الريح
الصباح الباهي لونك ...
| Quote: كده خلينا حبايب ...سوكرتا............. وبس |
ولسه باقي ليكم هلال بورتسودان ... بالمناسبة في الافريقية القصر الجمهوري والدفاع والشرطة الشعبية وحرس الحدود يمتنعون ...
فريق احرز ثلاثة اهداف في الاهلي المصري واربعة اهداف في كانون ياوندي في الخرطوم قادر للوصول للمبارة النهائية كما وصلها من قبل واحرز الكاس ..
واوعا من الخمسة ....
دهـ المريخ .. وياهو دهـ السودان ..
دباب وهلالابي ...( بصرة )
تحياتي الكتيرررة
|
Post: #12
Title: Re: مفاجأة لم تكن في الحسبان للمريخ في قرعة الكونفدرالية
Author: Rakoba
Date: 05-15-2006, 06:46 AM
Parent: #11
ودالريح
طوالي (فليق)، هسي كده ولمن يجو ناس (خريبكة) كيف
Quote: احداث شغب وعنف في مران الهلال
الجماهير الغاضبة تقذف ريكاردو بالحجارة وتطالب برحيل الارباب والبرير
اندلعت احداث شغب وعنف دامية في مران الهلال امس حيث استقبلت الجماهير الغاضبة اللاعبين بهتافات معادية وظلت تهتف لنجوم الفريق بعبارة (بره بره) وعندما حاول مدرب الفريق ريكاردو ان يقوم بتهدئة الجماهير قامت بقذفه بالحجارة والكريستال ورغم ذلك قام بمخاطبة الجماهير قائلاً : لا داعى لمثل هذه التصرفات .. انا احب الهلال مثلكم .. بل احبه اكثر من بلدى البرازيل .. التزموا الهدوء لان الهلال لم يفقد الممتاز بعد .. ولكن الجماهير لم تستجب لنداء ريكاردو وقامت برمى الكراسى داخل الملعب لمنع اللاعبين من التدريب وبعد ذلك تدخلت الشرطة وقامت بطرد الجماهير من الاستاد كما قامت رابطة اهل الهلال بالدخول للملعب وحماية اللاعبين وبعد ذلك انطلق تدريب اللاعبين والذى غاب عنه حمودة بشير والنذير محمود وتدرب من خارج الملعب جوليت وريتشارد جاستن وسيؤدى الهلال تدريبه الرئيسى لمباراته المهمة امام الموردة اليوم باستاده |
كتب مزمل بالصدى اليوم
Quote: نقلت قناة (حجر) الإخبارية عدة أنباء تفيد بارتفاع أسعار الطوب بصورة جنونية في البقعة (شمال)!
* ويقال إن معظم الصحف زودت محرريها بسترات واقية من الدراب.. وخوذات واقية من الحجار العنقودية!
* وقيل إن بعض المصورين يفكرون بجدية في اللجوء إلى سوق المراتب والمخدات لحماية الكاميرات!
* أما قضية الكراسي المتطايرة فقد أحيلت إلى المستر برونك.. ليناقشها مع المستر كوفي عنان في لقائهما المرتقب بلاهاي الأسبوع المقبل!
* ويقال إن السكرتير العام للأمم المتحدة قرر مناشدة مجلس الأمن الدولي الإسراع في إرسال قوات حفظ السلام للعرضة شمال!
* وقال عنان: إن ما يعانيه لاعبو الهلال ومدربهم هذه الأيام يشير بجلاء إلى حجم الكارثة الإنسانية التي يتعرض لها الفريق الأزرق!
* وانتقد صمت المجتمع الدولي إزاء ما يحدث في سوق العيش!
* تفاصيل أوفى من مراسلنا في الفلوجة والرمادي وبعقوبة في النشرة المقبلة!
* الطوب هين.. والدراب مقدور عليه!
* الخوف كل الخوف من العبوات الناسفة.. والسيارات المفخخة!
* انعدام الأمن في مناطق العرض شمال أدى لانخاض سعر المتر إلى ثلاثمائة ألف لحلوح فقط!
* ولو استمرت ثورة الحجارة الحالية سيواصل سعر متر الأرض المحروقة تراجعه بمعدل يفوق تراجع الهلال في الممتاز!
* سئل ريكاردو عن رأيه في الكراسي التي لاحقته مساء أمس الأول.. فقال إن حكم (التمرين) كان سبباً في ثورة الجماهير!
|
لنا الصدارة ولسوانا الحجارة
|
Post: #13
Title: Re: مفاجأة لم تكن في الحسبان للمريخ في قرعة الكونفدرالية
Author: طارق جبريل
Date: 05-15-2006, 08:42 AM
Parent: #1
العزيز احمد الريح كيفنك
| Quote: عشان ناس الكورة كلهم زي راكوبة كده... مريخابي لكن بأخلاق الهلالاب، |
لا ياخ بالغتة عديل كدة
هو راكوبة دا الخلاه يشجع المريخ شنو غير اخلاق المريخاب
|
|