ونسة بنابر وشمار متواصل

التحية لهؤلاء اللذين يجلسون على البنابر و قد تحولت اجسادهم من حرارة الشمس الى اللون الطوبى علشان ما تمشوا بعيد انا قاصد الناس الغلابة شايلن االموية بالجرادل وكمان وحدين شيالة حافلات فى المواقف واخرين كل رصيدهم فى السوق صوت سنين ولوزات مدرعة من كترة (كل حاجه بالف - جابوه بالطيارة وباعوه بالخسارة - لو مكضبنا شوف الزبون الحسه فارقنا - تعال مقدرين ظروفك بنستر حالك) وهلمجرا.
هذه الفئه من ناس محمد احمد لا همها ستر الحال وتربية العيال بدور الجرائد لكن علشان يعمولها شمسية والله يلفوا فيها ليفة حمام وبعد مرات تتحول الجريدة الى بساط من الحروف ومتكأ للراحة على أى رئيس تحرير وما تنسوا ديل ما عندهم قشة مرة لو يكون رئيس قسمنا بمحيك البدرى او ضنب الككوى(وزير العمارات المنهاره) على الجريدة المهم الواحد داير راحتوا بالله ده ما سعادة تلقى واحد من الجماعه اياهم على ضل برنده عمارة جديدة ساند راسه على ناسى عجرم وتاكل ظهره على سور السفارة الامريكية وتعال شوف مادى كرعينه على صور ناس القائمة 51 ده كله مدخل بس تعال نشوف شماراتهم شنوعن الوضع اليويمن ده فى السودان قبال ما ادخل على الشمارات كده اشوف لى ست شاى فى السوف الشعبى استقراطية لانو شغالة بعد الساعه 6 مساء وما تنسوا طبعا ساكنه فى عمارة تحت التشييد
-----
تخريمة على وزن حلوتنا اعادها لينا بكرى سريعا هى واخواتها واخوانها (رجاء العباسى )
ضنب الككوى ده اصلو مثل وشرحه قالوا لحلبى لمن يكون ماسك ليه ككوى(قرد)وداير يطلع منه قروش بمشى لى لمة الناس ويمسك ضنب الككوى واديه قرصة علشان الكووى يرقص . مافى داعى امشى بعيد اكيد عبر القنوات الفضائية شفتوه (كيف رقيص ضنب الككوى)
نواصل

عذرا للخطا الغير مقصود وهو

Quote: هذه الفئه من ناس محمد احمد لا همها ستر الحال وتربية العيال

والصحيح
هذه الفئه من ناس محمد احمد همها ستر الحال وتربية العيال
نواصل
تحياتى

المهم اتحلت وقدام زنك الخضار بتاع السوق الشعبى كانت الجلسة والناس القيافة بطبعهم جالسين ومدخل الشمار سببه واحد عتالى خاطه فى كرعيه راديو ناشنوال يابنى والمؤشر على اف ام والمحطه اذاعة لندن وطبعا نشرة الساعه الخامسة بتوقيت لندن الاخبارية وعلى متابعننا مراعاة فروق الوقت وخبر النشرة مجلس الامن يوافق على ارسال 10 الف عسكرى لمراقبة السلام فى السودان وقبال ما يتم المذيع الخبر نطه واحد من الجالسين وبحرقة قايل *بالله شوف ناس مجلس الامن ديل التقول عليهم مجلس بلدية السوق الشعبى غير لمة العساكر والكشات ما عندهم حاجة نحنا ما ارتحنامن ديل كمان يجبوا لينا بوليس وخواجات واحد رافع فنجال القهوة التقول ميكرفون جاوبه* وقال ليه انت الظاهر يقيت اطرش يا زول الخبر دحن بقول البولايس ديل قاصدين دار السلام يعنى وعشان التوضيح والتوضيب(طبعاالبتكلم معاه صبى جزار)قاصدين محلية امبده عديل وبالامانه قبال شهرين كان شفته اللمة والحراب والعكاكيز بين المواطنين ولمن اتخبرت لقيت ليك الحكاية شكل اولاد قبيلة واحدة المهم ده ما علينا الداير تتفهنه انو طبليتك بتاعت التمباك الفى دار السلام شوف ليها مكان تانى لانو عساكر ناس بره ديل بتاعن سيجاير نضيف ساكت يا زول واحد فرده بضحك ادخل* وقال ليهم يا عالم الكلام البتقوله ده اتنو قايلنه فى اذاعة منقه والله شنو ده كلام خواجات وما بقع الارض وموضوع مجلس الامم ده قاصد الحكومه عديل وبالامارة كمان قالوا العساكر الجاين مو خواجات سمع اضنيه ديل جابينهم من بنقلاديش وباكستان ومصيبة يقو ل عليها البنجاب ويا التوم اخوى شفته امبارح لمن غشينا مستشفى الخرطوم ودحن لما شقينا السوق العربى تذكر الناس ابان عيون دقاق وقصار التقول عليهم حاج دقسه البأجر لينا العناقريب ما خد المقاس عليهم بس ديل الجاينكم يعنى تانى يا فرد مع العالم ديل الحشاش امله شبكته نحنا ما صدقنا خليناهم فى السعودية وكمان جايننا فى امدرمان والله ود العم عنان ده ما عمل خير فينا /فرده متقل على حيطة السوق الشعبى استلم الميكرفون وهاك يا تنظير * كل الحكاية لو دايرن تعرفوها انو الموضوع ما سلام ديل قصدهم دارفور وهنا تدخلت بتاعت الشاى وبصوت عالى * هو يا رجالة ما توقفوه علينا السوق الله ومنعول كلام المذيع الوقف علينا الزبائن كل ما زول يجى يلقاكم فى شماراتكم وانته مالكم ومجلس الواد جون ده خليكم مع مجلس السوق الشعبى الموريكم المكثم بدون بصل وكلام تانى بسمعه طشاش وانى جارى كرعى واتخارجته
نواصل