ونسة مع زول راستا.. Rasta Savaii

مقالة مثيرة للاهتمام بصحيفة الصحافة



ونسة مع زول راســـــتا
هيلا سلاسي كان داير يبقى إله..!!
نحنا حركة إجتماعية ..

* كثيراً ما قابلت شباباً اصحاب شعور طويلة مضفرة.. يذكروني بي بوب مارلي.. تساءلت كثيراً عن هذه الظاهرة الى ان جاءني اخونا «بتاع المصائب» محمد خير عبد الله بالاستاذ حاتم عبد العزيز شاب طويل وشعره كذلك ومضفر ولابس طاقية.. وقال لي بضحكة: اخونا ده راستا... وبدأنا معه انا خليفة حسن بله ومحمد خير لنعرف ما هي الراستا ولعلها حلقة اولى..
* نتعرف عليك؟
ـ حاتم عبد العزيز..
* ومن هو حاتم عبد العزيز؟
ـ كنت موظفاً مصمماً.. تشكيلياً.. امين سر اتحاد فرق الموسيقى الحديثة..
* تشكيلي موهبة ودراسة موسيقى برضو؟
ـ الموسيقى هواية ودرست كورسات مع المرحوم محمد تاور.
بدأنا اصدقاء الجيتار..
* ما هي الراستا؟
ـ الراستا حركة عندها علاقة بالسلام الإجتماعي بتدعو للسلام.
* جاتنا من وين؟
ـ بدأت في اثيوبيا قبل الميلاد الكهنة في المعابد وهي ديانة اثنية قديمة.
* لكن ما عندها ظهور كبير؟
ـ بعد ان تم غزو للمناطق الاثيوبية اختفت واحتفظ بها شخصان ثلاثة.. اعادها واحياها هيلاسلاسي.
* احياها سياسة ام ديانة؟
ـ كديانة وكي يؤمن موقفه بهذه الفكرة وفي النهاية هو نفسه حاول ينقلب عليها وقرر ان يكون هو إله الراستا.
* وهسه منو الإله بتاعكم؟
ـ ما فيها إله بل في حاجة اسمها الرأس الكبير.
* شيخ والاّ زول ذي البابا كده؟
ـ نعم ذي البابا ونفس طقس البابوية مع اختلافات بسيطة.
* وهل ما زالت محصورة في دول بعينها؟
ـ انتشرت الآن في كل العالم.
* وفي السودان؟
ـ على مستوى السودان اتعملت روابط اسرية واجتماعية وهناك لقاءات دورية.. وفي العيدين.
* عندهم تواريخ محددة بالتأكيد؟
ـ عيد في يوم 5/1 وهو عيد السماح ودي ترجمته.
* والثاني؟
ـ العيد الثاني في اكتوبر بيعادل حاجة زي عيد الربيع وعيد الزهور.
* وهل عندكم خطوات عشان تبقى راستا؟
ـ انك تبقى راستا طقوسها مرهقة جداً لكن في مراحلها الاولى من مظاهرها الشعر «دريت».
* اشرح لينا؟
ـ يكون الشعر طويلاً ومضفراً دي يبقى لمدة «4» شهور للمراقبة.
* بتراقبوه لشنو؟
ـ نوع من الاهتمام به.
* وعلاقتكم بالسياسة؟
ـ ممتنعون عن السياسة اذا تنظير او تطبيق وعلى مستوى الديانات هي بتستقي من كل الديانات.
* يعني ما بتفرض ديانة بديلة لعضو الراستا؟
ـ لا ما بتفرض ديانة محددة ممكن تكون معتنقاً ديانتك وعضو راستا.
* طيب وبعد الـ «4» شهور؟
ـ في الـ «4» شهور الاولى على العضو التزامات عليه ان يكون ملتزماً بها سلوكاً وعملاً.
* مثلاً؟
ـ مطلوب الإمتناع التام عن المخدرات والكحول وممارسة الجنس وفي رياضة محددة عليك ممارستها.
* ............................؟
ـ بعد تتجاوز الفترة دي بتكون تحت مراقبة لمدة سنة وبعدها بتتكون لجنة دون ان تكون انت على علم بها بترفع توصياتها للمرحلة البعدها.
* ............................؟
ـ أول ما يتم قبولك بظهر لك شخص من اللجنة يبلغك وبتعمل شكل احتفالي «حفل شاى» وده تتويج اول وبمشي للمرحلة المقبلة والترفيع.
* عندكم كم مرحلة؟
ـ هي «3» مراحل والمرحلة لا تقل عن سنة ونصف السنة.
* وبمسميات؟
ـ المرحلة الاولى اسمها البرعم والثانية اسمها التتويج والثالثة اسمها الرأس.
* وشنو حكاية الطواقي دي؟
ـ الطواقي «3» الوان بتاعة العلم الاثيوبي وجدت منذ التنظيم الاول قبل الميلاد.
* والوانها بتتوزع بنظام؟
ـ لا اي شخص يختار لونه للطواقي.
* وعندكم بنات راستات؟
ـ نعم في بنات راستات.
* ............................؟
ـ في حالة الزواج ممكن تكون راستا وتتزوج شخص عادي والعكس صحيح.
* قلت الشباب يضفروا شعرهم والبنات برضو؟
ـ البت بتعمل كوفات «المشاط الاثيوبي».
* مراكزكم وين؟
ـ الرئاسة على مستوى العالم في جامايكا والمركز الرئيسي في اثيوبيا وفي افريقيا في جنوب افريقيا والسنغال والنيجر.
* وعندكم نظام مضبوط في السودان؟
ـ في السودان نحنا لسه لكن المسألة ماشة.
* وعندكم طقوس؟
ـ الطقوس موجودة والطقس الاساس التسامح والمحبة.
* ............................؟
ـ بنلتقي على البحر ونتفاكر في امورنا.
* ............................؟
ـ اعيادنا في البحر.
* ليه في البحر بالذات؟
ـ لانه في الاساس لقينا انه البحر هو المصدر الاساسي لألوان العلم «أصفر، أحمر، أخضر».
* رأسكم منو في السودان؟
ـ التنظيم في السودان ما اخد شكله الرسمي.
* وتمويلكم من وين؟
ـ بتجينا اموال من جهات عالمية لانشطة خيرية ونحنا بنحاول نلملم اطرافنا.
* عددكم كبير؟
ـ في العاصمة نحنا اكثر من اربعمائة.
* والاكثر منو البنات الاولاد؟
ـ الاكثر الاولاد.
* والاعمار؟
ـ كل الاعمار الغالبية في الاربعينات.
* والزول العندو صلعة ممكن يكون راستا؟
ـ ابو صلعة يكون صديقنا فقط.
* قلت انها كانت ديانة قديمة هل ما زالت كذلك.
ـ لا هي الآن حركة اجتماعية فقط.

Quote: * والزول العندو صلعة ممكن يكون راستا؟ ـ ابو صلعة يكون صديقنا فقط.

عندى واحد صاحبى كان راسته راسه بقى صلعه قرعه وبعد داك بقى ما شغال بيهم معناها يكون رفدوه!!!
ههههههههههه