جارتنا (الشايقيه) مهتمه بكرة القدم وتشجع (المريخ) بجنون !!!! وتحب أن (تهترش) مع (شيرى)!!!

جارتنا الشايقيه المهتمه بكرة القدم مثل عدد كبير من السودانيين والسودانيات تتبادل الحديث مع احدى جاراتها التى لا تهتم بذلك المجال كثيرا ولا تعرف عنه الا بعض ما تتطلع عليه فى الصحف الرياضيه التى يحضرها زوجها من وقت لآخر، لكنها متابعه جيده للمسلسلات والأفلام المصريه، لذلك بكت بحرقة شديدة لوفاة النجم الأسمر أحمد ذكى، خصوصا حينما تتذكر دوره فى مسرحية مدرسة المشاغبين، وتتخيله على نفس تلك البراءة والمسكنه، فتزيد دموعها نزولا.
أما جارتها الشايقيه فهى على غير كثير من النساء السودانيات لا تهتم بمتابعة تلك المسلسلات أو الأفلام، لكنها مهتمه بكرة القدم لدرجة الجنون.
حينما تابعت فوز (المريخ) على ذلك الفريق المغمور من (مدغشقر) وعلمت أنه سوف يقابل بعد ذلك فريق (المقاولين العرب) المصرى ، (لفحت) ثوبها وذهبت الى جارتها مهمومه طالبة منها فنجانا من القهوة ثم بدات (تفضفض) لها عن ذلك الهم الذى جعلها ساهمه فقالت:-
أنتى يا ستنا (المريخ) ده هسه يا ريتو أنغلب من (ديوك) مدغشقر ولا اسمو مو كدى؟؟ أكان ريحنا من ملاقاة (المصريين) ديل، الطوالى غالبين (المريخ) ده وحاقرين بيهو التقول طالبنو مغصه، وتقول نحنا (الشايقيه) ديل الحرقنا زولهم (المفترى) الأسمو (الدفتردار)، ما يمشو يشوفو (الجعليين) الهلالاب ديلك هم (الولعو النيران) وحرقو ليهم زولهم، وكمان غلبو ليهم أكبر فريق عندهم اسمو (الأهلى) وجوه الكليه الحربيه (التن) !!!
هسه المباراة دى حقيقة مدخلانى فى هم شديد (ضمه) عشان كان فوزنا فيها ما نقدر نطلع الشارع ذى الهلالاب نحتفل بى فوزنا ده لأنه فوز على فريق صغير، بيلعب فى الدرجة الثانيه الا شد حيلو وأنتصر على الفرق الكبيره فى بلدو، وده السبب الخلاهو يلاقينا. وكمان البطوله البيلعب فيها ما عندها قيمة ولا تقدير عند الأتحاد الأفريقى مثل البطولة الشارك فيها الهلال قبل كمين يوم.
ولو أنتصروا علينا خصوصا فى السودان تبقى ديك الفضيحه و(المغصه) عديل، فريق صغير ينتصر على المريخ ويبعدو من المنافسه رغم المحترفين من اليمن والسنغال وراوندى والقروش الكثيره البدفعوها ليهم؟؟؟
والزاد الطين بله عندنا (مدير كرة) شيطان وملحلح وشاطر، بيعرف كيفن يفرح الحكام وساعة الزنقه (الكاش بيقلل النقاش) هسه اتسلطوا عليهو (أولاد الحرام) وقالوا ليهو مع السلامه!! ما كان ينتظروا لعبة المصريين ديل وبعدين ان شاءالله يرموهو فى (الحبشه) ما كان بيهمنا كتير!!!!
غايتو الله يستر وينعل أبو (الكورة) ومرضتها، وربنا يشفينا منها ، قولى آمين.
خاطره اخيره:-
نرفع ايادينا مع (الشايقيه) المريخابيه لأنتصار المريخ على المقاولين على طريقة (بيتر) أو (اسرائيل) او (نيتنياهو) و(صاحب العقل يميز)!!!

ههههههههههههههههههههه

لا لا دى بالغت فيها

انت المقعدك وسط النسوان شنو ؟ و كمان بتنقل كلامهن !

= = =

اللهم ارحم احمد زكى.

شفت الظلام ده يا أبو اللمين ؟؟؟

Quote: انت المقعدك وسط النسوان شنو ؟ و كمان بتنقل كلامهن !

** واحد صاحبى جعلى قال (الما بسمع كلام مرتو ما راجل) أها شن قولك يا مظلم؟؟؟

صاحبك الجعلى كلامو ميه ميه ... امسك فيهو قوى

تحياتى