علامـات البلـوغ وما ادراك ما فتحـى الاعـور

الحيوان المنوى وما ادراك ما شَعَر العانة........ (ودا الجننى انا وصديقى اب دومة) فى صُغرنا ...........حيث غياب المعلم الواعى والاُسرة الواعية لمراحل نمو أبنائها وبناتها والصراحة عند التربية فى البيت والمدرسة...... كان اب دومة (زول شين وراسو مدوقس) ولكنه كان ذكى جداً ........ وكنا نعتقد أن ذكاه يكمن فى تلك( الدومة) التى فى مؤخرة رأسه ، حينها كنا فى الصف الرابع إبتدائى ابناء العشرة اعوام تقريباً........... ذكر الاستاذ فى حصة التربية الاسلامية علامات البلوغ وذكر من بينها نمو شَعَر العانة بالنسبة للبنين والبنات ...........( إتلفت علىّ اب دومة وسألنى.......العانة دى شنو يامان؟؟ ناقشا ؟؟) .........قلت له (والله يا اب دومة غير الله يعينك مابعرف لى عانة تانية .... وبعدين حاجة ماعرفتها انت براسك المدوقس دا !!!... انا ح اعرفها من وين !!!) ..... ثم قال لى مستعجباً ( يامان دى قالوا بيقوم فيها شعر!!) ...... فقلت له (هى كان قام فيها شعر مامشكلة ، المشكلة تجى فى الامتحان وماننقشا دى شنو؟) ثم رد على قائلاً (عشان كدا انا ح أحكها ليك مع الاستاذ دا).... ورفع اب دومة يده سألاً الاستاذ ماهى العانة؟ واجاب الاستاذ (بعد سل روح وكبكبة .......وما اظن عشان الفصل كان مختلط وانما لضعف فيه).... هى منطقة فى جسم الانسان (وحاتكم استاذ الجن دا.... مازاد حرف على التعريف دا)......... وخرجنا من الفصل بعد ان قال الاستاذ نواصل درسنا غداً ........ وفى الطريق الى المنزل كنا نتسأل انا وصديقى اب دومة عن (عانة الجن دى ومكانها وين) وكان يردد اب دومة (اسى استاذ الجن دا لو وضح لينا اكتر ، كان الله داير يحاسبو!!) ........... وذهب كل واحد منا الى داره وهو مشغول بامر العانة ......... وفى البيت وجدتنى (حبوبتى ام سِروال وانا سرحان) ثم سألتنى (سرحان فى شنو ياولد؟؟) فقلت لها (حبوبة انتِ شعر العانة دا بيقوم وين؟؟) ثم نظرت لى شذراً (وقالت لى ..... خلى مسخرة وقوم جيب لى الدقيق من الطاحونة ..... العانة التخمك) ..... حينها بداءت تتكون لى فكرة سيئة عن شعر العانة وانها كلمة (كعبه تب) ....... وبعد ان عدت من الطاحونة قلت فى نفسى (القاتل الله والحايى الله ..... انا ح أسال ناس البيت واليحصل يحصل) وسألتهم جميعاً فردت على خالتى (وقالت لى خلاص بدو يقروكم فى قلة الادب) ........ وبعدها لم انتظر اى أجابة لان الامر صارخطير جداً ووليت هارباً......... ظللت فقط اردد فى نفسى (إن شاء الله اب دومة الشِفت دا يكون جاب خبر عانة السجم والرماد دى) ........ وفى الصباح قابلت اب دومة وسألته (اها يا شِفت نقشتها وين؟؟) .....(قال لى لا والله يامان ، سألت الجُلكينة ونهرتنى......... خلتنى الليل كل اتقلب واهبش فى روحى مِتل المجنون واسمع اسماء جسمى كلهن لروحى ... دى كراعى ودى يدى ودى بطنى ودى هنايتى ودا راسى ودى اضانى وووووو .... إلا عانة السجم والرماد دى مالقيتها).......ثم دخلنا الفصل وواصل الاستاذ وذكر من علامات البلوغ عند البنين هى بلوغ الحُلم و خروج الحيوان المنوى..........ثم (نطط اب دومة عينو وعاين لى وهو مخلوع وقال لى دا الشنو الجانا دا يا مان !!! نحن عرفنا العانة عشان نعرف الحيوان دا !!!) ورد على نفسه دون ان يسألنى (طبعاً انت ذاتك يافارة ماناقش حاجة ......... قاعد لى كدا ساى ذى الجك فى الفُضية)...... ثم سأل اب دومة الاستاذ ، ثم لا إجابة من الاستاذ كالعادة........ وجلس اب دومة حزين حيث لا إجابة لأسألته (وقلت ليهو يا اب دومة ولا يهمك انا جاتنى فكرة نعرف بيها الحيوان المنوى دا شنو؟؟....بس خليها لبعدين) ..... ثم قلت له (أقراء هنا يا اب دومة مكتوب شنو .....(وكان كتابنا انا واب دومة قديم ومشخبط )..... من علامات البلوغ عند الإناث الطشم ....... قلت ليهو انت يا اب دومة البنات ديل لمن يبلغن بطشمن وللا الحكاية شنو ........ لكن انا يا اب دومة عمرى ماشفت لى بت طاشمة وسكرنا وقالوا دى خلوها أصلها قاعدة تبلُغ !!!) ثم إلتفت الينا حمادة ود المدير وقال ( الكلمة دى الطمث ، انتو كتابكم عشان مشخبط ، عشان كدا ماواضحة الكلمة دى عندكم ) ونظر له اب دومة غاضباً وقال له (اى انت ماعشان ود المدير كتابك جديد وبراك ما مشترك مع اى قرد) ......... وقد اضاف الينا حمادة ود المدير عبئاً جديد ماهو الطمث عند الاناث؟؟ ....( قلت ليهو يا اب دومة ، اسمع الموضوع دا طالما بتاع جكس أسأل ناس إزدهار ديل لانو كنبتن جمبك....بكونن ناقشات الفلم دا أحسن من الاستاذ الكبكابة دا)......(وياريت لو ما قلت ليهو)....... وهو بصوته الضخم سأل ازدهار......(ازدهار ازدهار الطمث دا شنو؟؟؟ ) وحينها سمعنا الاستاذ وكل الفصل وصاح الاستاذ( اطلعو برة ياصعاليك وبكرة دقكم فى الطابور).......وخرجنا وفى الطريق ماذال اب دومة تفكيره عالقاً بالحيوان المنوى ..... (وقال لى اها يا شِفت نظريتك شنو فى الحيوان المنوى دا؟؟).......فردت له قائلاً ( بسيطة يا داقس .... طالما هو حيوان ح يكون موجود فى جنينة الحيونات ونحنا نمشى هناك عشان نشوفو)........ثم قال لى وهو فرحاً (والله يامان اول مرة تفكر صاح) ثم سألنى بشئ من الحيرة( لكن يافردة هو حيوان عديل كدا باربعة كرعين و بقرون وضنب !!!) ......... فأجبته ( والله يا اب دومة دا على حسب كلام الاستاذ لمن انت سألته ....مُش قال ليك حيوان يخرج من الرجل وما زاد عليها كلمة تانى ..... وكلمة حيوان دى معروفة شنو ياوهم ياماناقش حاجة).......... وسألنى مرة اُخرى ( اها يخرج دى انا مافهمتها كلوكلو ح يخرج مننا حيوان قدر دا كيف؟؟ ) فأجته بكل ثقة وقلت له (إحتمال الراجل بعد يكبر بحمل ذى النسوان ..... انت مُش النسوان ديل بحملن بس لمن يكبرن؟؟....فرد علىّ ( آى واللهِ) .....( قلت ليهو خلاص يمكن دا برضو ينطبق على الرجال) ثم قال لى وقد ملئته كل هموم الدنيا ( والله يا مان انا الحِمل والولادة ديل مابقدر عليهن ولا حاجة) فقلت له (والله يا اب دومة انا الحِمل والولادة ديل بقدر عليهن إلا الوحم دا الشئ الوحيد الما بقدر عليهو).......... حينها وصلنا جنينة الحيونات وبداءنا بالسلام على الغفير(إذيك ياعم الغفير) فرد علينا (اهلاً يا اولادى)..فقلنا له (والله ياعم الغفير نحنا عاوزين ندخل جنينة الحيونات وماعندنا قروش)........ فرد علينا بكرم حاتمى (مالو يا اولادى ادخلو لكن تجو راجعين بسرعة)........فرد عليه اب دومة (شكراً ياعم الغفير ، والله نحنا ذاتنا داخلين بس نشوف الحيوان المنوى وطالعين)........حينها انهال علينا الغفير ضرباً بعصاته وصاح فينا (امشوا يا اولاد ياقليلين الادب)..........بعدها قررنا انا وصديقى اب دومة ان لا نسأل احد فى البيت خوفاً من الضرب كما فعل بنا الغفير.
وفى فناء المدرسة حيث اجلس انا واب دومة والخوف يسكننا لما سوف نواجهه من ضرب فى الطابور ، ظهر لنا فتحى الاعور وجاء الينا وجلس معنا .........جاء فتحى الاعور الى مدرستنا منقول من مدرسة اخرى بعد ان دخلها فى عمر كبير جداً بعد ان ترك حواشة والده ......... كان فتحى يكبرنا بعدد كبير جداً من السنوات فيبدو ان فتحى الاعور بلغ الحُلم وقد خرجت منه جميع حيوانات الغابة من عهدٍ بعيد...... فقال لنا مستغرباً (شنو انتو يافِرد فاضحننا قدام الجكس والناس وتسألوا من العانة والحيوان المنوى والطمث !!) فبعد ان اكتشف فتحى الاعور باننا (فارات وما ناقشين اى حاجة) شرح لنا الامر بكل بساطة (وبلغة فِرد)........... بعدها صار فتحى الاعور صديقنا وصار عندنا مصدر معلوماتنا وصار عندنا اعظم من الاستاذ ومن البيت.......... فظل دائماً يحمل مننا التقدير والاحترام.
عاش فتحى الاعور طالما غاب المعلم والوالد.

جاءت الى بيتنا ست البنات من إحدى القرى وهى عروس(لنج) ومعها زوجها وهم فى طريقهم للخرطوم لقضاء شهر العسل ......... كان كل ماتعرفه ست البنات عن شهر العسل فقط هو بانها ( ح تمشى تشوف قاعة الصداقة العمرها ماشافتها وتشرب ليها كباية ليمون باااااردة فى المنتزة وتجى راجعة) ....... لان من تاريخ ميلادها وحتى زواجها ، كل الذى تعرفه وتسمعه عن ذاك الشئ هو حرام وعيب ، عيب وحرام .........لان (المسكينة ، عمرها ماسمعت انو الشئ دا حلال وماحرام ومافى زول شرح ليها ووضح ليها الشئ بتعاملوا معاهو كيف ..... والشئ دا ماعيب ، بس عندو وقتو المحدد ليهو)............هذا ماتعلمناه انا وصديقى اب دومة من فتحى الاعور.
فلا أسفاً على دور البيت والمدرسة ، طالما كان هنالك أمثال فتحى الاعور.............(وهاكم وزارة التربية والتعليم دى)..

(بس ياربى ست البنات دى لى اسى بتكون شربت ليها كم كباية ليمون !!).

*

عثمان حامد ...

والله بطنى وجعتنى من الضحك...

اعجبتنى جدا طريقتك فى طرح الموضوع ...

شكرا ليك

تسلم اخى محمد الامين.
وشكراً على مرورك الجميل وربنا دايماً يخليك ضاحك وسعيد.

اخوك: عثمان حمد

الأخ العزيز / عثمان حامد

لك خالص التحايا

على هذا السرد الظريف السهل الممتع

تكاد تكون هذه التجربة مرت على أغلب هذا الجيل

مع فارق قليل فى الأسماء فخبيركم كان أبو دومة ...

وخبيرنا كان إسمه آدم كدومبس

لك مودتى

عماد عثمان

الاخ عثمان حامد / تحياتى . انت عارف يا ابو عفان حبوبتك دى وكت دعتك وقالت ليك ( العانة التخمك ) كانت دايرا ليك الخير , كنت بقيت اما وزير او مشير دة لونجيت من الشهادة .

الاخ فيصل ....لك تحياتى وشكرى على مرورك الطيب من هنا.
إن شاء الله تكون دعوة حبوبتى دى فعلاً لخير....بس بعيد من السياسة والحكومة.

شكرى لك .

الاخ عماد عثمان
خالص شكرى لك على المداخلة الظريفة دى......فعلا انها تجربة تمر على كل جيل ولكن تحتاج الوعى من الاسرة والمدرسة.

وتحياتى الى ادم كدومبس.

الاخ عثمان تشكر لهذا الطرح الثلث، والذى ناقشت فيه مسألة اجتماعية مهمة، واعتقد انك لا مست شئ لابد ان يلتفت له كل الاباء وهو مسألة التربية الجنسية بالنسبة للابناء، كذلك بالنسبة للمناهج المدرسية يجب ادخال مادة الثقافة الجنسية فى المدارس، وتوعية الاسر بأهمية هذه التربية وتلقينهم المعلومات الصحيحة، فى هذا الجانب، حتى لا يلجأ الابناء لوسائل وطرق غير واعية بمثل هذه الاشياء، ولنأخذ بالطفرة الهاءلة فى مجال الاتصالات بكافة اشكالها، من ما يجعلنا امام واقع ومحك لابدان نتخطى الاعراف التى اكل عليها الدهر وشرب.

شكراً لك اخ سيف على هذا الراى الطيب ، الذى نتمنى انه يجد الاهتمام من قبل المسؤلين.

لك شكرى.

الأخ عثمان....
مع انه الموضوع مهم و خطير لكني ضحكت و انا في المكتب لمن الناس حواليني قايلني جنيت!!!1بالمناسبة البورد ده ممكن يكون سبب للرفد!!!
المهم...
الكلام ده كان زمااااان.... لمن انا و انت كنا شفع (مع اني ما عارفاك عمرك كم)!!! لكن هسة و مع انه المقررات ما اتطورت عشان توصل معلومة تنفع الناس دي في حياتا لى قدام، الا انو العيال بقو "شفوت" و كاتلين الجدادة و خامين بيضا!!!!!
المشكلة انو الطريقة البلقو بيها المعلومة ممكن تكون غلط... يعني ممكن يشوفو صور عن ممارسات جنسية غير طبيعية في الانترنت و بعقولهم البريئة الخام يفتكرو ده هو الشي الطبيعي المتعارف عليه....
غايتو كتر خير "الهيئة القومية للاتصالات" قفلت اي موقع ممكن يكون فيهو أو ما فيهو حاجة غلط!!!!

حبيب عثمان سلامات
يا زول والله كتلتنا من الضحك وزي ما قالو شر البلية ما يضحك يعني ابدومة دا هسي عليك الله امو تدعي ليهو يبقى دكتور كيف يبقى والابجديات هو بيجد فيها صعوبة للدرجة دي ؟؟
احكي قصة حدثت ونحن في الجامعة - اتخيل - وفى المستوى الثالث في كورس الدراسات السكانية كان المحاضر يتحدث بنفس لغة استاذ ابودومة ويزداد حرجه لان القاعة مكتظة بالطلاب والطالبات وهنالك من يحضرونها للتثاقف فقط من بقية الدفعات والكليات وكانت المحاضرة تتحدث عن تنظيم الاسرة وليس تحديدها وعن الصحة الانجابية فمن ضمن الوسائل للتنظيم تحدث عن استخدام ( الواقي ) ومرا سريعا فكان ان سالته احدى الطالبات وما هو ( الواقي ) يا استاذ ؟؟ فبدا في الشرح الخجول فكان ان قطعت عليه حديثة : ما تقول الجوينتي ياخ فضجت القاعة بالضحك وانفك لسان الدكتور
يعني ناس ابودومة ليهم حق طالما هذا حال التدريس بالجامعات

Quote: اللقب: Salma Daoud الحالة: . عدد البوستات: 13 تاريخ التسجيل: 21-03-2005 محل الاقامة: الخرطوم

الف مرحب بيك في سودانيز يا سلمى وانشاء الله نعجبك بس احيانا كده ( الحالة ) بتقوم علينا فابقي بالك طويل
قلتي لي اسبوع وعاوزين يفصلوك بسبب المنبر كان كدا اخونا سجيمان داك ما تمشي عليهو
ولمن ( العجاجة والكتاحة ) تقوم في المنبر ابقي شوفي ليك كوفي احسن ليك

خالص التحايا ..
الزميل العزيز عثمان..

اقول انو كنت اقل من ديل فى الضحك والاندهاش.. اكون كضاب..

لى درجة يمكن انا زاتى اول من قراء البوست ده ساعة نزلتو لكن ساعتها ما فهمته الحاصل شنو..
لمن الشباب ديل جو وعلقو حتى وقع لى الكلام ..

ماذكرته شى واقعى وصحيح وانا شفتو فى نفسى قبل ما اقراها تفاصيلو كالا تى..

عرفت الكلام ده بداية فى سنه سادسه اتذكر ساعتها الكلام ماوقع لى طبعا زعلت شديد جدا وزعلت اكتر من الوالد قلت لي ابوى ده قليل ادب بالشكل ده ياحبه انا 3 ايام مصدق وماكرهته فى الدنيا دى شى زى ابوى ساعتها والغريبه ماكرهته الوالده لشنو (الله تعلم) ..المهم بى زعلتى ديك و3 ايام مصدع وحتى مصروف ما مشيت شلتو منو وبقت ابحث عن الحاصل شنو فى الموضوع ده وليه الناس ما بتجى الدنيا دى الا عن (طريق قلة الادب دى)..
ود جيرانا فايتنا بى سنه كده. كان ابوهو اشترى ليهو من الدار السودانيه للكتب كتاب يتكلم عن الموضوع ده بطريقه رسومات قلت بس ده وقع لى فى جرح مشيت جبتو وداير اسال منو الوالده طبعا ده غير الاسئله الكانت سابقا ومحرجه ولمن ما اقدر كنت يرسل اخوى الصغير ...
اها بى جاى بى جاى الوالده عرفت الكتاب وقامت شاكلت ود جيرانا وو الخ ..

اها الموضوع ما وقف عن دى ...
لمن جينا المتوسطه تالته لسه اخوك كان مسطح تعرف بس عشان ما كنت محتك بالشفع كتير وكده ..
اها فى حصة العلوم فى تالته متوسطه على شلاقتى طبعا متحير من انو العمليه دى ليه ما تم الا بشكل ده مادام الخالق قادر يعنى مالقى الا الطريقه دى وو الخ من الاسئله ...
سالت ليك الاستاذ كان هوالمدير بعدين كان معروف انو زول مابخجيل اصلو ..
قلت ليهو يا استاذ (نحن ليه بدرسونا الحاجات دى)؟؟؟!!

قال لى (عشان الواحد ما يكون شايل ليهو حاجه ماعارف يعمل بيها شنو)..

طبعا دى بتذكرونى بيها الدفعه الى الان...

برضو لى شلاقتى ما وقفت الى هذا الحد ..
قمت مشيت بره بعد نهاية الدوام المدرسى ..
لقيت لى واحد زى (فتحى الاعور بتاعك ده ) زى مابقولوا مقرم قريم السنين ..
وسالتو..
بعد كمية اسلئة قام هو سالنى ..
قال لى انت كنت قايل الزول بجيبوهو كيف ولا المراه بتلد كيف؟؟
قلت ليهو
انا كنت قايل كل مراءه بعد مايتزوجوها كل تسع شهور بتلد...

قال لى..
طيب لو كدى ماكان بيتكم ده بقى زى جحر الارانب..
فبهت الذى كفر..

الشى الاغرب قلت ليهو انا هين عندنا ود جيرانا سالتو نفس السؤال ..
وقال لى
اساسا الراجل بجيب لى مرتو الاكل وهى بتلد...

هاهاهاهاهااههاهااهاهاهااهاهاهاهااهاهاهاهاها

معتز ....ياخى انت زول حلو جداً.......والف شكراً على المداخلة الجميلة دى.

سلامى وودى.

تشكر اخى محمد حسن على مشاركتك الحلوة.

الاخت سلمى لك ودى وشكرى على مرورك الطيب.

شفتنة العيال لوحدهم لا تكفى ، اعتقد لابد من وجود الراعى و المصحح لتك الشفتنة.

نصيحة ليك ......... بعض البوستات احسن الواحد يقراها فى البيت، عشان الرفد وكدا.

لك سلامى.

العزيز عثمان حامد
لك تحيات الورد
يطربني كثيراً مثل هذا الحكي الصادق الجميل
والتحية لك ولقلمك الرشيق الذي اطلقت له العنان
ليجري ويجري في محطات الذاكرة وتتحفنا بهذا العمل الرائع
لك مني الود

سؤال اخير
هل انت عثمان حامد الصيدلي الذي اعرفه
ان كنت انت الف مرحب
وان لم تكن مليون مرحب
خالد العبيد
سدني

شكرا عزيزى خالد
راجع ماسنجرك

الاخ عثمان حامد

و الله اتحفتنا بالاسلوب السلس الجميل و أشعلت بعض الاحداث في ذاكرتنا ،
فمثل هذه الاشياء لها ذكريات جميلة ،،،
ووقع المفاجئة بكون كبير على الزول و خاصة لمن يقولوليهو انو العلاقة بين ابوك و امك كانت كدة
انا بصراحة لمن شرحولي الموضوع ده في المدرسة و طبعاً بعض التوضيح من بعض المفتحين زي فتحي الاعور برة الفصل رجعت البيت و كلي نظرات متشككة ،،، و بقيت اعاين لأبوي و امي بتشكك ،،، (شوف بالله و قاعدين عادي زي المافي حاجة) و الغريبة ما كرهتهم لكن كنت زعلان منهم ليه ما كلموني ؟؟؟
يعني الواحد عندو راي برضو في الحاجات دي ،،،، (حسيت انو ممكن ادي نصايح يعني)،،،،

بس اهم حاجة ما نغلط نفس الغلط و لي وليداتنا نكون خير ناصحين .... و دمتم ،،، و دمت لنا عثمان

يا أبوعفان كلامك حلو وجميل ومفيد ومليان بالحكم والتوجيه ، يا ها دي المسكوتات ، المسكوت عنها بلغة المثقفاتية ، والمشكلة أن السكات لا يمنع أبدآ تواتر المعرفة ، بتصل المعلومة بس بدل ما تصل عن طريق الأعور ودنقس بتاع تورتسكي كان مفروض تصل ممنهجة ومدروسة وبقنوات توصيل المعرفة والمعلومات ، وديل لازم يتم اعدادهم لهذه المهمة بدل ما يكونوا معلمين الله من طرق توصيل المعلومة بحيث لايكون هناك أي لبس وتعطش ومن ثم بحث عن المعرفة بالمسارات الأخرى والطرق الخلفية
نحن تسنت لنا فرصة عظيمة للمعرفة ، نحن دي بقصد بيها أولاد حلتنا أيام الصبا الباكر ، كان في حلتنافلان العوير كان كلما يشوف حمارة مارة يقوم يرفع عراقيهو وتحت العراقي مافي أي حاجة { تيوب ليس } وعلى الطبيعة وقبل المدرسة ذاتو كنا شايفين الحاصل شنو ، ومستغربين لمن نقارن بيننا وبينه ، كان خنفس هناك ، مكان العانة ، دغل كثيف ، في الأول كنا قايلنو براهو كده عشان عوير ، لكن ناس عبدو حسين تولوا مسئولية الشرح.

الشيئ الذي خلعني هو أول مرة خرج فيها ذلك الحيوان مني ، ده كان خروج لذيذ جدآ ، والله لليوم ومع كل محاولاتي لإخراج ذلك الحيوان لم أعيش مثل طعم تلك الدهشة الأولى ، يعني كل مجهوداتي اللاحقة في إخراج الحيوان بس كانت عشان أعيش إحساس تلك اللحظة ، الآن كففت عن محاولاتي لإداركي إن تكرار ذلك الإحساس مستحيل ، يعني اول يوم حصل فيهو { الطيار مراد } ده كان فيهو إحساس ماتع جدآ وغريب ومدهش

up