عندما أتى تنظيم القاعدة للسودان.......درافور نموذجاً

Quote: خاص: سودانيزأون لاين في إختتام زيارته الدولية للعاصمة البريطانية لندن أقام الأمين العام لحركة / جيش تحرير السودان مني آركو مناوي مؤتمرا صحفيا بحضور كافة وسائل الإعلام الدولية ، حيث أكد لهم أن النظام السوداني يعمل و بتنسيق مباشر مع تنظيم القاعدة في دارفور ، و حذر المجتمع الدولي من خطورة الأمر إن لم يتعاضد المجتمع الدولي للعمل على إنهاء نظام الخرطوم ، كما أكد سلامة الحركة ووحدتها و تماسكها و طالب المجتمع الدولي و خصوصا بريطانيا على بذل الجهود للإسراع في القبض على للمجرمين و تسليمهم للعدالة كمفتاح أساسى للسلام في كل السودان ، و كشف الأمين العام للحركة عن إرتياحه التام من خلال كل لقاءاته التي تمت في الخارجية البريطانية مؤكدا أنها إيجابية و سوف تدفع بإقرار العدالة الدولية ،

فانا عايز اعرف هسع هو منو ضد منو؟ ولا منو مع منو؟؟؟ عشان نقدر نتعاطف مع قضية درافور بالصورة الصحيحة والواحد يحدد موقفوا

اولا قالوا الجنجويد ديل (عرب) ءهمهم الأول والاخيرأبادة (الزنوج) في دارفور بمساعدة الحكومة السمها فاير على الما اولاد العرب، السؤال: الجنجويد ديل اصلهم من وين؟؟؟ يعني هل هم عرب استوطنوا دارفور ولا جوا غايرين، طبعا لو جو غايرين القضية واضحة لكن لو استوطنوا استوطنوا من بتين تقريباً يعني ما بالضبط شديد؟؟؟

وبعدين الجا اول فيهم منو ؟؟؟ الجنجويد ولا الحكومة؟؟؟ يعني الحكومة جات لقت الجنجويد ديل وسلحتهم ولا الجنجويد جو لقوا الحكومة وطلبوا منها انها تساعدهم؟؟؟؟

طيب عرفنا الجنجويد عرب، نجي للحكومة، هل الحكومة ايضا عربية يعني عندها جنس محدد؟؟؟

يعني هل الحكومة مقصود بيها الجبهة أم مجلس الوزراء أم العرب في الحكومة؟؟؟

لأنه حسب علمي المتواضع انه ليس كل اعضاء الجبهة في دارفور (عرب) ولا كلهم (زنوج)، اكيد فيهم شوية من هنا شوية من هناك، طيب الشوية المن هناك ديل كيف وافقوا على كتل اخوانهم، خصوصا انه الموضوع ده بدا من بدري ما من امس بس

ده سؤال

السؤال الثاني: الحكومة دي ما كلها اولاد عرب، قطع شك فيها الما اولاد عرب، وبالتالي ينطبق عليهم نفس السؤال الاول؟؟؟

نخلي ده كله كوم ونجي للكوم بتاع القاعدة: وحسب علمي ايضا ناس القاعدة ديل ما عندهم خيار وفقوس يعني ما عندهم قشة مرة، ما بيخدوا اولاد العرب بس وما بشركوا معاهم الما اولاد عرب، فالشئ الاكيد انه تنظيم القاعدة - فرع دارفور، فيه من الاتنين، يبقى السؤال الاول والتاني مكرر هنا للمرة التالتة

وبعد ده كله هل يعقل ناس القاعدة ديل يجوا راجعين تاني لناس الجبهة بعد العملوه فيهم، يروى والعهده على الراوي، انه الشيخ اسامة زاتو مرقنو كرعيه من السودان والا هسع كان يكون في خبر كان، فيبقى كيف بعد ما كان عايزين يجهزوا على شيخهم يجوا ويقفوا معاهم عشان يقضوا على (الزنوج) في دارفور، بعدين دارفور دي لو حسبناه بالكيلو مترات بس بعيده جداً من واشنتطون وبغداد والرياض.

بعدين عندي سؤال محرقني ليه فترة انتو الحكومة دي سمها فاير على اولاد الزنوج ديل ما لها عليهم؟ يعني بالعربي الفصيح كده، ما طايقاهم مالها؟؟؟ يعني اولاد الزنوج بتاعين دارفور ديل سو ليها شنو لمن قلبت عليهم جنس القلبه دي

ما في زنوج كتار في السودان ده في جبال النوبة وجبال الانقسنا وجبال عطشان ورويان ومويه اشمعنى بتاعين دارفور ديل بالزات يعني؟؟؟ والله انا نفسي اعرف السبب

واظن، والله اعلم، انه زنوج دارفور ديل مسلمين عن بكرة ابيهم

افيدونا افادكم الله

لأنه والله الواحد بقى ما عارف يضحك ولا يبكي ولا يعمل شنو زاتو ما عارف