Post: #1
Title: هل الحب مرض؟
Author: zola123
Date: 03-25-2005, 12:13 PM
قرأت هذا الموضوع خفيف الظل على الانترنت
وأحببت أن اشرككم في قرائته.
أول مرة أعرف انه الحب مرض, دي بصراحة ما أدوها لينا !!! 
------------------------------------------------------------
أكد تقرير نشرته مجلة "سايكولوجيست" أو "عالم النفس".. أن داء الحب يمكن أن يكون قاتلاً وأنه يجب أخذ هذا الأمر بجدية علي أنه تشخيص حقيقي للمشكلة. ويعد فرانك تاليس المعالج النفسي في لندن أحد هؤلاء الذين يطالبون بزيادة الوعي بهذا الداء. من خلال التقرير الذي نشرته المجلة. قال إن الكثير يصابون باضطرابات نتيجة لوقوعهم في شباك الحب. أو يعانون بسبب الحب من طرف واحد وعدم استجابة الطرف الآخر. مما يؤدي إلي إقدام بعضهم علي محاولة الانتحار.. مشيرا إلي أن الدراسات التي تناولت حالة مرض الحب لا تزال قليلة. اضاف البروفيسور الكس جاردنر. اخصائي علاج نفسي في جلاسجو وعضو الجمعية النفسية البريطانية. انه يوافق علي ضرورة ان يكون الأطباء اكثر وعيا بخطورة داء الحب وانه من الممكن وضع العديد من الحالات تحت هذا التشخيص.. موضحاً إمكانية وفاة بعض الأشخاص نتيجة لتحطم قلوبهم عاطفياً. حيث يصلون إلي حالة من اليأس وفقدان الأمل. قال انه نتيجة للحب. فإن بعض الأشخاص يمكن أن يصلوا إلي حالة غير طبيعية من الإنهاك الجسدي.. وفي بعض الحالات يمكن أن يؤدي داء الحب إلي انتحار بعض الأشخاص. وقال د.تاليس.. انه قبل القرن الثامن عشر. وعلى مدي آلاف السنين. كان ينظر إلي داء الحب علي انه مرض عادي يصيب عقل الانسان عند وقوعه في حبائل الغرام. أضاف.. انه بمصطلحات العصر الحديث. فإن أعراض داء الحب يمكن أن تشمل الهوس. مثل الحالة المزاجية العالية أو تضخم الإحساس بالذات أو الاحباط. وتعبر هذه الحالة عن نفسها في صورة أرق أو غضب واهتياج.
على ان هذه الدراسة الحديثة قد سبقها الباحث الدكتورد. عبد الناصر كعدان حيث قال
قد يتساءل البعض هل العشق مرض؟
هكذا اعتبره أجدادنا الأطباء العرب المسلمون كالرازي وابن سينا والبغدادي وغيرهم.
إذا كيف اعتبروه ذلك؟ وما هي أسباب وأعراض هذا المرض وكيف يتم علاجه؟..
اعتبر العشق على أنه شكل مفرط من أشكال المحبة. وفي الوقت الذي ينظر فيه إلى الحب على أنه أسمى عاطفة يتحلى بها الإنسان، فقد اعتبر العشق أنه عبارة عن حالة مرضية تحدث نتيجة للمغالاة الشديدة في الحب، مما ينعكس ذلك بآثار سلبية على شخصية العاشق تظهر في اضطرابات جسمية، فضلا عن الاضطرابات السلوكية والتي كثيرا ما تدفع الشخص المصاب لأن يرتكب تصرفات غير عقلانية.
لقد عالج الأدباء العرب ومنهم الشعراء هذا الموضوع في شعرهم الغزلي بشكل خاص، واعتبره الكثير منهم بأنه المرض الذي لا يرجى شفاؤه
في حين أن الأطباء المسلمين القدامى، وعلى نحو مخالف للشعراء، قد نظروا إلى هذا المرض على أنه حالة مرضية كغيره من الأمراض العصبية أو النفسية كالصرع والصداع والسوداء له أسبابه المرضية وعلاماته وأعراضه وعلاجه. فأفاضوا في شرحه موضحين أن لهذا المرض علاجات مختلفة تطبق حسب حالة المريض وحسب درجة ثقافته، بالإضافة لطبيعة الظروف المحيطة به.
أسباب مرض العشق:
يقول ابن سينا في ذكر أسباب هذا المرض: "هذا مرض وسواسي شبيه بالمالينخوليا) Melancholy ، يكون الإنسان قد جلبه إلى نفسه بتسليط فكرته على استحسان بعض الصور والشمايل التي له، سواء أعانته على ذلك شهوته أم لم تعنه)".
الأعراض والعلامات:
أجمل سبط المارديني في مخطوطته الطبية المسماة الرسالة الشهابية في الصناعة الطبية أعراض وعلامات مرض العشق قائلا: "وعلامته غور العينين وجفافهما إلا عند البكاء، وغلظ الجفن من كثرة السهر والأبخرة المتصاعدة إليه. ويعرف معشوقه بوضع اليد على نبضه وذكر أسماء وصفات، فإذا اختلف النبض عرف أنه هو
لقد أجمع أكثر الأطباء العرب المسلمون الذين تحدثوا عن مرض العشق أن اضطراب النبض هو من العلامات الهامة لتشخيص مرض العشق بل وحتى معرفة هوية المعشوق.
يمكن تلخيص أعراض وعلامات مرض العشق كما ذكرها الأطباء المسلمون القدامى: النحول – قلة الشهية – غور العين مع سماكة الجفن – حب العزلة مع الاسترداد وكثرة الصعداء – اضطراب النبض وخاصة تسرعه لدى ذكر المعشوق أو أي شيء يتصل به.
المعالجة:
لقد أجمع الأطباء العرب المسلمون الذين تحدثوا عن مرض العشق أن أفضل وأنجع علاج لهذا المرض هو الجمع بين العاشق والمعشوق وذلك على نحو تبيحه الشريعة.
مما سبق يمكن أن نذكر مقومات علاج مرض العشق على النحو التالي:
أولا- محاولة الجمع بين العاشق والمعشوق بالزواج إن أمكن، وفي ذلك يقول ابن هبل البغدادي: "العلاج لاشيء أنفع من الجمع بين العاشق ومعشوقه على وجه تبيحه الشريعة، فإنه يصلح ويبرأ. وإن لم يكن فالنظر من بعيد، وإلا فالتسويف)".
ثانيا- نصح العاشق وتعنيفه على أفعاله إذا كان من العقلاء.
ثالثا- إشغال العاشق ببعض العلوم العقلية ومجالس أهل الفضل، أو إشغاله ببعض الأمور الدنيوية الأخرى التي تصرف تفكير العاشق عن كثرة التفكير بمعشوقه. وقد تفنن الأطباء العرب في هذا المجال بابتكار الوسائل التي من شأنها أن تحقق هذا الغرض. فمن هذه الأمور ذكروا:
1-إشغال المريض ببعض العلوم العقلية ومجالس أهل الفضل، وذلك إذا كان ممن عنده الاستعداد لذلك. وإذا كان من المتدينين فيمكن تسليته بأخبار الزهاد والعباد والمساكين.
2- إذا كان العاشق صاحب صنعة أو عمل أو شغل ألزم بعمله أو شغله فلا شيء أضر عليه من البطالة والفراغ.
3- طول السفر عن مكان إقامة المعشوق، حيث أن ذلك مما يولد النسيان مع مرور الزمن.
4- ذكر بعض الأطباء –كابن سينا- أنه من الناس يسليه الطرب والسماع، ومنهم من يزيد ذلك من غرامه، ويمكن أن يعرف ذلك.
5- مما ينفع هؤلاء أيضا مجالس السرور واللهو والفرح، والتنزه وكثرة النظر إلى القمر. وهذه كلها اعتبرت من الأمور التي تصرف تفكير العاشق عن معشوقه.
رابعا- إفراغ المرة السوداء من الجسم والقضاء على مفاعلاتها السلبية في الجسد، وذلك بالتجفيف والتبريد. لذلك نصح الرازي بكثرة الاغتسال بالماء البارد، وحذّر من الأشياء الحارة من الأدوية والأغذية. وكذلك نصح بالنوم في الأماكن الباردة.
خامسا- الميل لتناول بعض الأغذية التي لها صفة التبريد مثل الرايب الحامض والبطيخ والقثاء والبقلة وغيرها من الأطعمة التي تساعد على استفراغ المرة السوداء وبالتالي تحقق غاية التبريد.
سادسا- أخيرا فقد نصح بعض الأطباء لمعالجة هذا المرض بأن تسلط بعض العجائز على العاشق، بحيث يجتهدن في أن ينقلن هوى العاشق إلى غير ذلك المعشوق بالتدريج، ثم يقطعن صنيعهن قبل أن يتمكن الهوى الثاني.
|
Post: #2
Title: Re: هل الحب مرض؟
Author: zola123
Date: 03-25-2005, 12:30 PM
Parent: #1
موسيقى تصويرية للبوست ( وانا ما مسؤولة)
|
Post: #4
Title: Re: هل الحب مرض؟
Author: mohamed osman bakry
Date: 03-25-2005, 12:43 PM
Parent: #2
كان كده...
معناهـا في اوتـبـريـك عـديـل كده
في الـبـــورد ده
|
Post: #13
Title: Re: هل الحب مرض؟
Author: zola123
Date: 03-26-2005, 03:42 AM
Parent: #4
محمد عثمان بكري
يا اخوي اوتبريك حب مش أحسن من أوتبريك شكل واستقالات؟
|
Post: #3
Title: Re: هل الحب مرض؟
Author: Mahadi
Date: 03-25-2005, 12:37 PM
Parent: #1
العزيزة زولا انت ماسمعتي بي مرض حامد
|
Post: #14
Title: Re: هل الحب مرض؟
Author: zola123
Date: 03-26-2005, 03:45 AM
Parent: #3
Mahadi
ما سمعت بيه الا من السودانيين ومن خلال نكتة وبعد شرح مستفيض.
في المنتدى الطبي بتاع عكس الريح أول استشارة وصلتني كانت من زول سألني من مرض حامدn !!!!
|
Post: #5
Title: Re: هل الحب مرض؟
Author: أحمد الشايقي
Date: 03-25-2005, 10:12 PM
Parent: #1
د زولة 123
وإنتي الطبيبة
ومســؤولــة كامل المسؤوليـــة
وتحياتي
|
Post: #6
Title: Re: هل الحب مرض؟
Author: HAMZA SULIMAN
Date: 03-25-2005, 10:35 PM
Parent: #5
تخيلى فى ناس بحبو
ناس ما شافوهم
|
Post: #17
Title: Re: هل الحب مرض؟
Author: zola123
Date: 03-26-2005, 03:55 AM
Parent: #6
حمزة سليمان
وده من شنو لاكن؟
أعتقد ان ده بينطبق على الذكور
يعني من سماع أوصاف فتاة معين وخصالها ممكن يحبها
لاكن الفتيات ؟ صعبة شوية. المسألة تفاعلية عندهم أكثر.
|
Post: #15
Title: Re: هل الحب مرض؟
Author: zola123
Date: 03-26-2005, 03:47 AM
Parent: #5
أحمد الشايقي
Quote: وإنتي الطبيبة
ومســؤولــة كامل المسؤوليـــة
|
منو القال ليك, انا جبانة جدا وبامشي جنب الحيط
البوست ده أنا زاتي باتسائل معاكم فيه والمسؤولية تقع على كاتبه فقط!
وبعدين ماشاء الله شايفا تحليلك للموضوع ما بطال
|
Post: #7
Title: Re: هل الحب مرض؟
Author: أحمد الشايقي
Date: 03-25-2005, 10:55 PM
Parent: #1
| Quote: وعلامته غور العينين وجفافهما إلا عند البكاء، وغلظ الجفن من كثرة السهر والأبخرة المتصاعدة إليه. ويعرف معشوقه بوضع اليد على نبضه وذكر أسماء وصفات، فإذا اختلف النبض عرف أنه هو. |
دا منتشر وماخــد شكل وبائي
Quote: المعالجة:
لقد أجمع الأطباء العرب المسلمون الذين تحدثوا عن مرض العشق أن أفضل وأنجع علاج لهذا المرض هو الجمع بين العاشق والمعشوق وذلك على نحو تبيحه الشريعة. |
دا ما العرس زااااااااتو
|
Post: #8
Title: Re: هل الحب مرض؟
Author: sharnobi
Date: 03-25-2005, 11:14 PM
Parent: #1
وفى ناس بحبو ناس يكرهوهم
الحب حالة ارتقاء للانانية
يتجلى فيه الفرد
ان يتنازل بطوعية عن كل معالمه لشخص
محتمل
لا يقدر
ذلك
ولا هو يعى بذلك
اتذكرك كالخيال
لحظة التقيتك فى قاعو الشارقة معك من الناس اجملهم
الكتيابى ومحمد سيد احمد
وانسانة للحظة كوميض البرق
ان الحب حالة مرضية
بكل تداوينا فلم يشفى ما بنا
|
Post: #10
Title: Re: هل الحب مرض؟
Author: shazaly gafar
Date: 03-26-2005, 00:25 AM
Parent: #8
الاخت زولة
تحياتى
لمَّا كان مصدر الحب هو القلب
والقلب هو دليل الانسان من واقع لا ترى العيون ولكن ترى القلوب التى بالصدور
وربما كان القلب يمثل نصف الانسان برؤية احمد شوقى:
لسان الفتى نصفٌ ونصفٌ فؤاده ولم يبق الا صورة اللحم والدمِ
كان لزاماً علينا ان نربط بل نحكم الوثاق بين القلب والجسد لذلك يقول شوقى نفسه:
اذا القلوب استرسلت فى غيها كانت بليتها على الاجساد
ولذات السبب يقول ابو نواس:
يا ويح أهلى ابلى بين اعينهم على الفراش ولا يدرون ما دائى
فليس من الغريب ان تصيب العاشق (وحواحه وشحشاحه وخمَّة نَفَس)لا (من الحب ما قتل)
و-من - هذه مهمة للغاية لان الحب احياناً يعمى البصر والبصيرة فيلقى الى التهلكة لذلك كانت الاجابة اسهل ما يكون عندما انتفض جميل بثينة فى تلك الليلة الليلاء يسأل الناس:
الا ايها النوّام ويحكم هبُّوا اساءلكم هل يقتل الرجلَ الحبُّ
قالوا اجل ويسلّ عظامه ويجعله حيران ليس له لبُّ
ونحن بدورنا نسأل الله ان يحفظ القلوب من داءها حقيقةً ومجازا
|
Post: #21
Title: Re: هل الحب مرض؟
Author: zola123
Date: 03-26-2005, 04:19 AM
Parent: #10
Shazly gafar
Quote: (وحواحه وشحشاحه وخمَّة نَفَس)لا (من الحب ما قتل)
|
بس فضول, السيمبتومز دي تتجرم كيف بالانجليزي؟
وده الوصفه المقال أعلاه.
شكرا على المشاركة الثرية لاكن لا اعرف اذا وافقك كثيرون على دعائك بالحفظ من هذا الداء
يمكن هم عايزين كدة؟
|
Post: #19
Title: Re: هل الحب مرض؟
Author: zola123
Date: 03-26-2005, 04:11 AM
Parent: #8
شرنوبي
Quote: الحب حالة ارتقاء للانانية
يتجلى فيه الفرد
ان يتنازل بطوعية عن كل معالمه لشخص
محتمل
لا يقدر
ذلك
ولا هو يعى بذلك
|
كلام جميل وصحيح جدا.
طيب وحيث انك خبرة وكدة
غير الحب؟هل رأيت فعل بشري يضر فيه الباذل أو المعطي جراء كرمه؟؟
عن لقاء الشارقةو حقيقة لا أذكر. حضرت لقاءين للبورداب في الشارقة الأول قبل سنتين والثاني قبل سنة فأيهما عنيت
عموما تشرفنا كتير
|
Post: #9
Title: Re: هل الحب مرض؟
Author: أبوالزفت
Date: 03-26-2005, 00:13 AM
Parent: #1
زولا 123
سلام
أنتى ماسمعتى
ومن الحب ما قتل
أها البقتل شنو غير المرض
الحب وما أدراك ما الحب
اننا اليوم لا ندرى
نحن فيه فى جدٍ
أم فى لهو ولعب
وما عليكم أن تعلموا
وما عليكم أن تعبدوا الجمال
أنما هو حرام أن تضلو الدرب
سكن الداء فى قلوبكم
وما للداء دواءٌ او آيه
شئتم ام أبيتم
فأن الدموع لابد فيه جاريه
وإذا بالليل يسألكم سأل
مالى آرى عيونكم ساهر
وإذا بالنهار تسألون
لماذا اعينكم جارية
يا ايها المحبين
ما انتم فيها الاضائعين
وستعرفون كيف كان يبكى قيس بالسنين
والى ما صار اليه فأنكم ستصيرون
|
Post: #11
Title: Re: هل الحب مرض؟
Author: تاج السر حسن
Date: 03-26-2005, 00:39 AM
Parent: #9
يازوله بداية مبروووك مقدما أسألوا الخبراء أن كنتم لا تعلمون!!
ثانيا الرائع/ عثمان حسين ، يغنى :-
الحب عطاء جزاء الكريم يا قلبى عند الناس عدم
صدقنى يا قلبى المتيم فى الحقيقه الحب وهم
|
Post: #23
Title: Re: هل الحب مرض؟
Author: zola123
Date: 03-26-2005, 04:53 AM
Parent: #11
تاج السر
الله يبارك فيك, لاكن على شنو؟؟؟؟؟؟
وبعدين ما عايزين خبراء ولا حاجة كفاية عليناالخبثاء منهم
شكرا على بيت الشعر الجميل
|
Post: #12
Title: Re: هل الحب مرض؟
Author: Habib_bldo
Date: 03-26-2005, 00:39 AM
Parent: #9
زولة صباحات الحب والله يبعدنا وأياكم من دائه وأعراضه
سمعتي المثل البيقول (أسال مجرب ولا تسأل طبيب)؟؟؟؟؟؟؟؟؟
المرة دي نحن نقول أسال الطبيب ولا تسال مجرب وأنتي بحكمك طبيبة هل صادفك مرض اسمه الحب في قائمة الامراض والاسقام التي مرت في قواميس الطب ومعاجمه؟؟؟؟؟؟؟؟؟؟؟؟
|
Post: #16
Title: Re: هل الحب مرض؟
Author: sudania2000
Date: 03-26-2005, 03:49 AM
Parent: #12
السلام عليكم يا عسل
يدوب عرفت انا مالي من زماااااااااااااااااان
شكرا علي التشخيص يا دكتورة.........لوووووووول
تلفونك مشغول و معطوب خلينا نسمعك
|
Post: #20
Title: Re: هل الحب مرض؟
Author: عمر محمد عبد القادر
Date: 03-26-2005, 04:15 AM
Parent: #16
زولا 123...
ما سمعتي بي :-
اصلو المحبة عذاب ...
جنني ساكن الموردة ...
قاموبو زيارة لى كدباس ...
السبب ( المضيع ) عمري دخان الضحية البدري ...
معاهن ام لهجن عجن ( هرسن ) عضامي وتلجن
انا قلبي بدددق مالو بدددق .. ( خفقان يعني )
الجرحو( نوسر ) بي غور في الضمير فوق قلبي خلف الكي
رشقتني عيونو وبقيت ( مجنون ) من اول نظرة
شوية وارجع لك ... لك الود
ود الباوقة
|
Post: #26
Title: Re: هل الحب مرض؟
Author: zola123
Date: 03-26-2005, 05:02 AM
Parent: #20
عمر عبد القادر
| Quote: شوية وارجع لك ... لك الود |
دي مع الأغنية ولا من عندك؟
عشان الكلام ده لازم تجي راجع تترجمه لي
|
Post: #25
Title: Re: هل الحب مرض؟
Author: zola123
Date: 03-26-2005, 05:00 AM
Parent: #16
سودانية 2000 الحبيبة
أوعي تكوني يا عسل فاكراني في السودان من اليوم داك؟
انتي بتغطسي وين كلميني؟ اديني تلفونك في المسنجر سريع قبل ما تغطسي تاني.
وبعدين ألف مبرووووك ما يسمعنا تاج السر يجي يبارك ليكي
شفتي مرض بباركوه؟؟
عقبال مرضتي أنا قولي أمييييييين
|
Post: #24
Title: Re: هل الحب مرض؟
Author: zola123
Date: 03-26-2005, 04:59 AM
Parent: #12
حبيب بلدو
| Quote: هل صادفك مرض اسمه الحب في قائمة الامراض والاسقام التي مرت في قواميس الطب ومعاجمه؟؟؟؟؟؟؟؟؟؟؟؟ |
أبدا والله
وده المجنني, العرب ديل عملوا ليه أعراض وأدوية كمان
حاجة عجيبة
|
Post: #22
Title: Re: هل الحب مرض؟
Author: zola123
Date: 03-26-2005, 04:19 AM
Parent: #9
ابو الزفت
بصراحة لسة ما سمعت بزول مات من الحب
بكونوا مستهبلين ساي
في زول لاقي
|
Post: #18
Title: Re: هل الحب مرض؟
Author: abas
Date: 03-26-2005, 04:07 AM
Parent: #1
دكتورة
في مرض احلي من الحب
ده المرض الناس كلها عاوزاه وبتفتش عليه
شفنا الناس بتتعالج لكن في ده الناس بتفتش المرض
انجدنا يا دكتور القلوب
احلي مرض
|
Post: #27
Title: Re: هل الحب مرض؟
Author: zola123
Date: 03-26-2005, 05:04 AM
Parent: #18
عباس
سلامات
نقطة جميلة جدا, الناس البتكوس المرض
يعني المرض ده له مسببات يا ربي فايروسات ولا باكتيريا؟
وبينتقل كيف بالشم؟ ولا بالسمع ولا بالشوف؟
ما لازم نمشي مع الموضوع بمنطق شوية
واذا عرف السبب قدرنا نعرف الدواء. مش كدة؟
ده لو زول داير دوا
|
Post: #28
Title: Re: هل الحب مرض؟
Author: انتصار محمد صالخ بشير
Date: 03-26-2005, 05:39 AM
Parent: #1
زولا سلامات
الحب دا يا اختى اجمل احساس ويكون احلى اذا كان هنالك تبادل بين الطرفين اما الناس البتفكر بالحب من طرف واحد اعتقد من المنطق عدم الاسترسال فيه لان النتائج معروفة تؤدى للمرض وكمان يازوله كل المرضى من الرجال ماسمعت لى مراة مرضت بالحب ولا المراة اكثر تحمل لهذا المرض على العموم انا احترم الرجل لانه شجاع استطاع ان يعبر ويمرض
وموضوعك شيق نريد ان نسمع كل الاراء
انتصار
|
Post: #34
Title: Re: هل الحب مرض؟
Author: zola123
Date: 03-26-2005, 11:07 AM
Parent: #28
انتصار بشير
| Quote: كل المرضى من الرجال ماسمعت لى مراة مرضت بالحب ولا المراة اكثر تحمل لهذا المرض |
كيف ما بيمرضوا يا انتصار
بيمرضوا ونص لاكن بيقطعوا في بطونهم ويسكتوا
بس الرجال البيعبروا
تحياتي وشكرا على الاضافة الجميلة دي
|
Post: #29
Title: Re: هل الحب مرض؟
Author: بلدى يا حبوب
Date: 03-26-2005, 06:41 AM
Parent: #1
زولة 123
كوكب الشرق ام كلثوم غنت (الحب كده- حب ايه الانت داير تقول عليه -)
ومقاطع من اغانيها
*الحب كده وده مش عايز كلام
*حب ايه الانت عاوز تقول عليه
انت عارف قبله معنى الحب ايه
*نشتكى منه لاكن بنحب
ولكن اين موقع الحب فى الطب ؟؟
تحياتى
|
Post: #30
Title: Re: هل الحب مرض؟
Author: Safa Fagiri
Date: 03-26-2005, 07:44 AM
Parent: #29
زولة 123
....
yes
مثل القريض
تماما....
thanks for the
wonderful song
|
Post: #36
Title: Re: هل الحب مرض؟
Author: zola123
Date: 03-26-2005, 11:10 AM
Parent: #30
صفاء فقيري
ما تحرجيني لاكن, القريض ده شنو ما عرفته !!!
وانتي عشان حلوة عجبتك الاغنية
|
Post: #35
Title: Re: هل الحب مرض؟
Author: zola123
Date: 03-26-2005, 11:09 AM
Parent: #29
بلدي يا حبوب
| Quote: ولكن اين موقع الحب فى الطب ؟؟ |
ما عندو اي موقع, تصدق؟ وده المحيرني
أم كلثوم دي خليها على جنب, عشان حكااااية براها
انا سمعت شحتفت روح أحمد رامي مخصوص وأبت تعرسوا
قالت لو عرست معينه حينضب ويبطل يكتب كلمات حلوة لأغانيها
|
Post: #31
Title: Re: هل الحب مرض؟
Author: مريم بنت الحسين
Date: 03-26-2005, 08:05 AM
Parent: #1
زولة صاحبتني...
والله يا خيتي، وما ليك علي حلفان.. وحاة الله مرض.. شفتي شي كده، يبدا من أصبع رجلك الصغير، ويبدا ينتشر زي الغرغرينه، لما يصل طرف أطول شعره في راسك... والمشكله يا بت أمي لا بنفع فيهو دوا، ولا بًرود (استحمام يعني) .. حمته من النوع البخليك تهضرب، وتمشي تتكلم مع روحك..بيتغلغل في المفاصل لحدي ما يصل كريات الدم الحمراء (حاكم البيضاء دي بتكون انتهت من قولت تيت)... ويبدا يجوطها ويصوتها.. بتصل مرحلة الهذيان.. خاصة لما تنفرد بروحك المالامي فيها دي... وتقعدي تتكلمي مع الصورة في المراية.. ومع نفسك وانت سايقه السيارة.. ومع ورقه بخطه/ها تكوني محتفظه بيها من سنة (دو)...
الله بسعلك (على قولة سيجيمان) ده ماهو الجن زاتو، خلي المرض
بنت الحسين
|
Post: #33
Title: Re: هل الحب مرض؟
Author: عمر الفاروق شيخ الدين
Date: 03-26-2005, 08:42 AM
Parent: #31
طول عمري بخاف م الحب ...وسيرة الحب.. وظلم الحب لكل أصحابو..
وأعرف حكايات مليانة اهات ودموع وأنين ..والعاشقين دابو ..ما تابو...
طول عمري بقول لا انا قدر الشوق وليالي الشوق ولا قلبي قدر عذابو...
وقابلتك إنت..ولقيتك بتغير كل حياتي ..ماعرفش إزاي حبيتك يا حياتي ..
من همسة حب لقيتني بحب.. لقيتني بحب وادوب في الحب وصبحي وليل علي بابو ....
تخريمة :
التلاتة أبيات الأولي ده حالي من وانا طفل لحدي قبل 3 سنوات ... والبيتين الأخيرين من قبل 3 سنوات وإنتي ماشة ...
|
Post: #38
Title: Re: هل الحب مرض؟
Author: zola123
Date: 03-26-2005, 11:14 AM
Parent: #33
عمر الفاروق
مع ان حكاية المشي دي ما واقعة لي
لاكن برضو يمكن تساعد في النسيان
الله على ثومة وكلامها
|
Post: #37
Title: Re: هل الحب مرض؟
Author: zola123
Date: 03-26-2005, 11:13 AM
Parent: #31
مريم بنت الحسين
| Quote: من النوع البخليك تهضرب، وتمشي تتكلم مع روحك..بيتغلغل في المفاصل لحدي ما يصل كريات الدم الحمراء (حاكم البيضاء دي بتكون انتهت من قولت تيت)... ويبدا يجوطها ويصوتها.. بتصل مرحلة الهذيان.. خاصة لما تنفرد بروحك المالامي فيها دي... وتقعدي تتكلمي مع الصورة في المراية.. ومع نفسك وانت سايقه السيارة.. ومع ورقه بخطه/ها تكوني محتفظه بيها من سنة (دو)... |
لاكن ما باسألك جرستك وصلت أطرافالكرة الأرضية وسمعها الأقصى والداني
أنا كنت فاكرة نفسي براي العويرة 
أها وبعد ده في فايدة ولا مافيش؟
|
Post: #32
Title: Re: هل الحب مرض؟
Author: EMU إيمو
Date: 03-26-2005, 08:32 AM
Parent: #1
زولة123
بكل أسف إنطباعاتي عن الرقم 123
ليست بالطيبة
ولكن بالكفة الأخرى يثقل الميزان
ويقلب اليقين على الشك
ومن الحب ما قتل
قصص الحب التي حملت إلينا عبر صفحات التاريخ
في مجملها معاقة إن كان قصة جميل وبثينة أو روميو وجوليت
أو الشكسبيريات أو تايتنك أو حتى قصة نعمات (تاجوج) والطيب عبد الله
أنا أعرف كمية من علاقات الحب الغرامية والتي ذهبت بعقول أطرافها
من الشباب وأتهم فيها الفتيات بالخيانة.
- النزير . زميل تعرفت عليه بالجامعة وهو رجل وإنسان بمعنى الكلمة
لم تكن له علاقة جهرية مع طالبة حتى تخرجه ، ولكنه بعد التخرج إقترب
قلبه من فتاة تعرف عليها بإلتصاقها للنشاط الذي يعمل به كرئيس لجمعية
القرآن الكريم بإحدى الجامعات. وبعد عودته من إجازة علم ان الفتاة
تزوجت ، ومن حينها فقد عقله وهو اليوم حبس
- وكمثل هذه القصة أيضاً أعرف واحد من بلدياتي أحب فتاة بكل صدق
ولكنها بم ترعى العهد فباعته وذهبت بعقله
- والمثال الثالث هو الأخ ياسر الذي يواصل علاجه بمستشفى تجاني الماحى
مع قليل من جرعات العلاج الروحي ، وهو كيسه لا يختلف كثيراً السابقين
سوى انه كان لا يزال طالب ثانوي
فهذا قليل من ما أعرفه عن مريضي الحب أو الشاكوش
ورغم هذا أقول كما قال صلاح عبد الصبور
هل كان ما بيننا
حباً ... وعشناه
أم كان حلماً عندما أدركنا الصبح نسيناه
أم أننا خفنا على قلبنا
وفي ثرى الخوف دفناه
لو عاش ، لو فتّحت للشمس عيناه
كنّا رعيناه
لمّا تركناه
في مهمةٍ قاسٍ رميناه
في قلبه أنفاسه تبكي
أنّا هجرناه
يا أيها الحب الذي ماتا
لو يرجع اليوم الذي فاتا
لو عاد يوم منك
عشناااااااااااااااااااه
|
Post: #39
Title: Re: هل الحب مرض؟
Author: zola123
Date: 03-26-2005, 11:17 AM
Parent: #32
أيمو
ما عاجباك ال 123 لييييه؟
لاكن أصحابك ما يحننوا
معقولة لاكن؟
تعرف أنا شبه متأكدة معظم الجنوا ديل لو قربوا شوية من البحبوهم يمكن ما كان حصل ليهم الحصل
بمعني انهم أكيد عاملين في خيالهم صورة عظيمة للمحبوب وصفاته الرائعة حد الكمال وما قارنوها بالواقع.
وعشان كدة تعبانين, أن انصح اي زول قرب يجن يلحق الأمور ويمشي يعبر عن نفسه
ولو فيها شاكوش الله كريم لاكن ما تصل للجن.
|
Post: #40
Title: Re: هل الحب مرض؟
Author: Outcast
Date: 03-27-2005, 02:04 AM
Parent: #39
العزيزة زولا 123,,
يقولون:
"Love is temporary insanity curable by marriage"
|
Post: #51
Title: Re: هل الحب مرض؟
Author: zola123
Date: 03-31-2005, 11:52 AM
Parent: #40
أوتكاست العزيزة
| Quote: Love is temporary insanity curable by marriage" |
على قولة الخليجيين
صح لسانك
|
Post: #41
Title: Re: هل الحب مرض؟
Author: أحمد الشايقي
Date: 03-27-2005, 02:16 AM
Parent: #1
Quote: ولو فيها شاكوش الله كريم لاكن ما تصل للجن.
|
ما دا البيجــنن زاتــو
|
Post: #42
Title: Re: هل الحب مرض؟
Author: عمر الفاروق شيخ الدين
Date: 03-27-2005, 02:46 AM
Parent: #41
يا إيمو :
تحياتي ...
Quote: النزير . زميل تعرفت عليه بالجامعة وهو رجل وإنسان بمعنى الكلمة
لم تكن له علاقة جهرية مع طالبة حتى تخرجه ، ولكنه بعد التخرج إقترب
قلبه من فتاة تعرف عليها بإلتصاقها للنشاط الذي يعمل به كرئيس لجمعية
القرآن الكريم بإحدى الجامعات. وبعد عودته من إجازة علم ان الفتاة
تزوجت ، ومن حينها فقد عقله وهو اليوم حبس
|
النزير صاحبك ده لو كان رئيس رابطة أصدقاء مصطفي سيد أحمد أو رئيس جمعية فلاحة البساتين كان لحق أمات طه ...
ده حالتو رئيس جمعية القرأن الكريم ؟؟؟؟؟ والله تراهو الحب ده حاجة صعبة خلا ص...
|
Post: #53
Title: Re: هل الحب مرض؟
Author: zola123
Date: 03-31-2005, 11:54 AM
Parent: #42
عمر الفاروق
أنا زاتي كنت حاقول كدة
لاكن ما تزعلوا انت وايمو من بعض وتبوظوا لي البوست
يعني ناس القرآن الكريم ما بيحبوا ولا شنو؟
|
Post: #43
Title: Re: هل الحب مرض؟
Author: معتصم دفع الله
Date: 03-27-2005, 03:05 AM
Parent: #41
العزيزة زولا
سلام كتير ..
ليس هناك إختلاف على مفهوم الحب ..
ولكن عندي سؤال هل للحب زمان ومكان ؟
وهل ينتهي الحب ليصبح شئ عادي بين المحبين ؟
مثال إثنان بيحبو بعض لفترة طويلة وبعد الزواج تكون الأمور عادية بينهما ..
هل هنا إنتهى الحب وهل أصبح مثله مثل اللوحة المعلقة على الجدار ؟..
وأنا أقول الناس دي بتجن من شنو ؟ ..
|
Post: #54
Title: Re: هل الحب مرض؟
Author: zola123
Date: 03-31-2005, 11:55 AM
Parent: #43
معتصم دفع الله
كل اسئلتك اجاباتها نعم للأسف
أنا ما عارفة الناس تاعبة روحها على شنو؟
|
Post: #52
Title: Re: هل الحب مرض؟
Author: zola123
Date: 03-31-2005, 11:53 AM
Parent: #41
أحمد الشايقي
شاكوش أهون من الوهم ده
|
Post: #44
Title: Re: هل الحب مرض؟
Author: مريم بنت الحسين
Date: 03-27-2005, 03:09 AM
Parent: #1
Quote: أنا كنت فاكرة نفسي براي العويرة
أها وبعد ده في فايدة ولا مافيش؟ |
حسي انا عملت ليك شنو؟ انا بحكي حال الناس ...
كدي انت قولي لي، في فايده ولا لع؟
بنت الحسين
|
Post: #55
Title: Re: هل الحب مرض؟
Author: zola123
Date: 03-31-2005, 12:00 PM
Parent: #44
مريم بت الحسين
دايرة تعملي روحك فالحة علي عشان توقعيني؟
أقول ليكي حاجة
الاعتراف بالحق فضيلة
أنا بحب
بحب
بحب ماما وبابا وأخواني...شديد كمان 
|
Post: #45
Title: Re: هل الحب مرض؟
Author: abas
Date: 03-27-2005, 04:58 AM
Parent: #1
امك قبض
الشرك قبض
قبض منو لكن
زولا 123
أنا كنت فاكرة نفسي براي العويرة
أها وبعد ده في فايدة ولا مافيش؟
مريم بنت الحسين
بكااااااااااااااااااااااااااااااااااايه
انتي وكت ما قدرو بتسوه ليه
|
Post: #56
Title: Re: هل الحب مرض؟
Author: zola123
Date: 03-31-2005, 12:07 PM
Parent: #45
عباس
كلمها أيوة. براها فضحت روحها
أنا ما قلت حاجة
|
Post: #46
Title: Re: هل الحب مرض؟
Author: EMU إيمو
Date: 03-27-2005, 08:33 AM
Parent: #1
عمر الفاروق
مع إحترامي لحديثك ولكن أقول لك على جنب !!
الذين يركبون الحافلات والبصات يسمعون هذه العبارة كثيراً
على جنب لأن هذا البوست طرح مشكلة في سؤال
على جنب لأنك لا تعترف بالآخر رأي أو إنسان أو شيطان
وكهذا تعاليّ الصبح منه بحد الخيط
الحب الذي تراه بمنظارك الخاص أنا أنظر إليه بالقلب
وحتى لا تفهمني كما تشاء ، فأنا ذكر حالة في سير القطار
الأخت زولة
آسف على أخذ الرحلى بطريق شائكة
|
Post: #57
Title: Re: هل الحب مرض؟
Author: zola123
Date: 03-31-2005, 12:08 PM
Parent: #46
أيمو
خد راحتك وما تتحسس
|
Post: #47
Title: Re: هل الحب مرض؟
Author: ملكة سبأ
Date: 03-27-2005, 08:45 AM
Parent: #1
| Quote: يمكن أن يصلوا إلي حالة غير طبيعية من الإنهاك الجسدي |
حمى يعني ؟؟
كنت قايلاها حالة خاصة !!
زولة ان مش مسؤولة عن الموسيقي التصوريرة وبس !! ان مدانة تحت المدانة 130 كمان
مودتي
|
Post: #48
Title: Re: هل الحب مرض؟
Author: غادة نصر
Date: 03-28-2005, 03:00 AM
Parent: #47
هل الحب مرض؟
د/ ايناس
وانا بقول انو الحب علي اطلاقة دواء لاي مرض .
كل الحب
غادة
|
Post: #49
Title: Re: هل الحب مرض؟
Author: sudania2000
Date: 03-28-2005, 05:41 AM
Parent: #48
زولا يا عسل
حب شنو يا بت انت صدقتي
دا انا البحبو مرتبط و البحبني ما عاجبني و الحالة دي من يوم ما قمت .....
غايتو وصلت لقناعة تامة انو الحب دا مرض ووهم كبير يعيش فيه الشخص بمزاجه و يمرض روحو بمزاجو ...و لا شنو يا من قلت انني تؤام روحك ....دائما يطير الحب ويبقي الاحترام علي قول امل وهبي ...في حالة الناس الفي البر و حقوق وواجبات في حالة الغرق....
اضربي اليوم .......بستنااااااااااااااااااااك
|
Post: #60
Title: Re: هل الحب مرض؟
Author: zola123
Date: 03-31-2005, 12:13 PM
Parent: #49
سودانية 2000
يا جبانة !!! غيرتي أقوالك كدة سريع ؟
كويس علم وجاري التنفيذ
|
Post: #59
Title: Re: هل الحب مرض؟
Author: zola123
Date: 03-31-2005, 12:12 PM
Parent: #48
غادة نصر
دوا كيف ولي شنو؟
الحكاية اتلخبطت كدة خالص
|
Post: #58
Title: Re: هل الحب مرض؟
Author: zola123
Date: 03-31-2005, 12:10 PM
Parent: #47
ملكة سبأ الحبيبة
ما تجيبي لي تهمة لاكن
استمتعي بالأغنية وانا ما مسؤولة تاني.
Quote: حمى يعني ؟؟
كنت قايلاها حالة خاصة !!
|
ما عارفة ياختي, وكان عارفة ما حاقول زاته في البورد ده
|
Post: #50
Title: Re: هل الحب مرض؟
Author: عمر الفاروق شيخ الدين
Date: 03-28-2005, 06:21 AM
Parent: #1
إيمو :
تحياتي ..
| Quote: مع إحترامي لحديثك ولكن أقول لك على جنب !! |
حا أجنب طالما أنك إحترمت حديثي ..
ولا تعليق علي باقي حديثك ..
انا رميت إشارة يمين وطالع ليك من الشارع كلو ..
وسامحك الله علي الطريقة الفهمت بيها التعليق ..
|
Post: #61
Title: Re: هل الحب مرض؟
Author: متوكل بحر
Date: 03-31-2005, 09:26 PM
Parent: #50
يازولة ازيك
ارجوك لوسمحتى ممكن ترسلى اغانى من نفس النوع النازل
فى البوست بتاعك دة رجاء
(الاغنية جميلة وواضحة جدا شكرا)
|
Post: #62
Title: Re: هل الحب مرض؟
Author: zola123
Date: 04-15-2005, 01:34 PM
Parent: #61
متوكل بحر
العفو , لاكن على شنو؟
يعز علي أقول ليك اني ما عاملة أي مجهود في الاغنية دي
لطشتها من صفحة الاغاني حقة بكري
واليك اللينك:
http://www.sudaneseonline.com/SudaneseMusic/
|
|