بس شمارات الركشه وماادراكم الركشات

الركشه وماادراكم الركشات هذه المصيبة التى دخلت الى البلاد فى زمن الاستثمارات الانقاذى الموجه الى الجيوب واستبشر البعض بوجودها لا حب فى استنشاق ابخرة العودام ولكن كما يقولون بالبلدى ( كيه لناس الـتاكسى)
وبوضع الايجابيات والسلبيات فى ميزان الجمهور لوجدناالكفة ترجع سلبيا وما اكثرها ولكن اهمها ازدياد مرض الرطوبة بين كبار السن وكذالك الجلوس المبكر على الكراسى وكل ذالك بأمتناع كبار السن عن رياضة المشى طالماتتحاوم الركشات والسلبية الثانية داء عضال يصيب الجهاز التنفسى للكل نتيجة استنشاق أبخرة احتراق البنزين والزيت مما أدى لانتشار التهاب الجيوب الانفيه وهو خير دليل لذالك اما عن الايجابيات فلقد وجد العديد من ابناء الوطن رزقا لهم انساقوا اليه قهرا حيث نجد العديد من خريجى الجامعات يقمون بقيادة الركشات عموما هذا مدخل الى الموضوع ولنا عودة فيه .

ندخل فى عنوان البوست
ما وددت ان اكتبه لماذا سميت بالركشه على فكرة حقوا ننسى اصل الاسم وطبعا باللغة الهنديه لكن رايكم شنو نجتهد لنجد له معنى بالسودانى المهم انا بتوكل وابدأ

اسم ركشه اذا اخذنا الحرف الاول *الراء ولتشابه مع حرف فى اسم اخر وهو
راكوبهونسبة للعلاقة بين الراكوبة وما يستر لركشة والدليل وجود المواسير الحديدية فى انشائهماوكذالك اهميةالمعورش به وهوالمشمع عليه يمكن القول ان
حرف الراء = مستمد من راكوبة
اما الحرف الثانى *الكاف وقد يكون هذا الحرف يرمز الى كلمة B] كشه وارتبطت بالعسكرووجه الشبه بين الركشه والكشه نجده فى الحملات المتكررة التى يقوم بهاافراد شرطةالمرور كثيرا وذالك بأن تساق الركشات كالقطيع الى اقسام الشرطة
الحرف الثالث*الشين ويرمز هنا الى كلمة شمار والشمارات انواع كما تعلمون وهذا موضوع اخر وما يهمنا ان سائق الركشه تعود على استخدام الشمارات حتى لا يحس الركاب بأزير المكنة ولفحة السموم خاصة فى ايام الصيف ولا ننسى فصل الخريف وتراشق الركشات بذرات المياه .
الحرف الاخير * الهاء وهنا يرمز الحرف الى كلمة* هوانم ولان الهوانم اصبحن اكثر استخداما للركشات ووجه الشبه هنا تعلق الهوانم بالركشات
واختم البوست بهذه الطرفه
مسطول سالوه عن الفرق بين الركشه والكاروى جاوب على طول
الفرق انو الحمار فى الركشة بيكون بالداخل
تحياتى
تحياتى

سلام مربع


العملتها امجاد في التاكسي
لقتها في الركشــة

بلدي يا حبوب :

ياخ مالك مع الركشة !!!! والله أخوك في الأجازة وفي أول يوم من المطار لي البيت وبس سلمت علي ناس البيت وقمت لي حركات المغتربين ديك وقلت أوزع الوصايا ونظام الود حنكوش والجزمة جدييييييييدة والساعة دهبية واللون فيهو حبة راحات وقممممممممممممممممممت كده أشرت ليك لي التكسي الما خمج .............
تكس تكس تكس ........لو سمحت أبقي أروح الموردة جمب القصر !!!! أيوة يا حبيب إتفضل ..أها كم يا الحبيب ..أركب وباخد منك 20 ألف ....
أنقر ما قلبت ليك سوداني مية المية وشبكتو ليك يا اخوي انا ماشي الموردة ولا سوق امدفسو ..شتت يا عمك شتت ..
وأول ركشة تووووووووشك أخوك كورك ليها ركشة ركشة ...والله راحاااااااااااااااااات شبكني ليك شنو يا معلم القشرات دي شكلك ماشي للجاحة ( الجكساية) قلت ليهو يا اخوي اها ماشي الموردة وجاي راجع سريع اها بي كم ..
قال لي مشية وجية بي 10 الف وعشااااانك يا لذيذ جيب 8 الف (ماشي وجاي)
أنقر ما ركبت ؟؟؟؟؟؟؟؟؟؟؟؟
والله يا حبوب صاحبك بتاع الركشة دق معاي الحنك ولمن عرفني جاي الليلة من السعودية حلف بي دينو وأيمانو إلا يعزمني حاجة باردة ووداني أشهر محل ليمون في أمدرمان جمب سوق الموردة لاحظ دفع لي 1000 جنيه عشان الليمون يعني بقا المشوار بي 7 الف
وانا بتونس معاهو سمع أجمل مصطلحات انا بحبها وطووولت ما سمعتها :
* بيستي كولا ..(بيبسي كولا)
*الإستبالية ..(المستشفي).
*مستشفي الديش .. (الجيش).
*تلاتة قينان..(تلاتة أقوان ).
*الحسس ..(الجكس)

ده كلو وأنا ماشي المشوار علي أنغام زبيدة الأنقاذ مرة ومرة هاجر كباشي ومرة فاطنة الجعلي :
تقوم بينا كب ..تقع بينا رب .. العربييييييييييييييييييييية ..

قالوا أمو حنكوشة تعمل كده بي رموشا ..حناااااااااااانة والصفقة مالا تعبانة ..
والما بتصفق إنشااااااااااااء الله ما يعرسوها (والله تسمع جنس صفيق)..


السايق الركشة ..
والحنة نقشة ...
الحنة نقشة انا بحب بنات ناس عشة ..
عشة..عشة ..عشة ..عشة..عشة...

بجيك تاني إنشاء الله ..

زولة 123

شكرا على الصورة بس دايرن شماراتك مع الركشة الكانت فى الاجازة بين الاهل فى السودان
-------
شيرى
ما هترشى لينا فى بوست عن الركشة وشكرا على المرور
-----
عمر شيخ الدين

Quote: وأول ركشة تووووووووشك أخوك كورك ليها ركشة ركشة ...والله راحاااااااااااااااااات شبكني ليك شنو يا معلم القشرات دي شكلك ماشي للجاحة ( الجكساية) قلت ليهو يا اخوي اها ماشي الموردة وجاي راجع سريع اها بي كم .. قال لي مشية وجية بي 10 الف وعشااااانك يا لذيذ جيب 8 الف (ماشي وجاي)

والله لكن شمارك حار وطبعا هذا يندرج تحت الحرف الثالث الشين= شمارات
فى انتظار المزيد

جميعا لكم شكرى

وتحياتى

الركشات اصاحبها يكتبون خلفها بعض العبارات وهى كثيرة واذكر موقف طريف فى يوم اتيت الى صاحب الركشه وقلت احسن اتفق معاه بمجرد ان سمع كلامى ضحك وقال لى انت حسه جيت بوين لحدى ما وصلت الركشة بينى وبينكم قربت اعمل فيها جعلتى لكن الراجل طلع مفتح وطلب منى اشوف المكتوب خلف الركشه اجمل حاجة لمن كحلته لقيت كاتب (ما بنتخلف)
وركبت الركشه على الضحكات ووصلت مشوارى وعلشان ما ينتخلف ده دفعت ليه دبل .
بس انا المحيرنى الناس البتقيف فى الشوارع مستنية الركشات وأول ما يشوف ركشه جاية على طول يقعد يكوريك وكمان الناس الجنبه فى الشارع (ركشه ركشه ركشه) بينى وبينكم ده حس كلام الزول يسوق الركشه وكمان تبقى ليه شهادة ميلاد تحمل اسم (ركشه)
تحياتى

Quote: .....الركشة أطرف العربات واصغرها حجما, تسير ب 3 عجلات وهيكل يتسع لشخصين خلف السائق. لم اشاهد مثلها من قبل في السودان في زيارتي الاخيرة عام 92 , اما الان فهي تملا الشوارع هناك. تناسب التنقل في الطرقات الداخلية والازقة وغير مسموح بسرها في الشوارع الرئيسية لاكن الكثير لا يعبا ويسر بها. طبعا اجرتها هي الاقل ولذالك هناك مبالغة في استخدامها. أطرف موقف مر بي هو تلك النسوة الاربعة. كانوا ينتظرون مرور ركشة غير عابئين بالوسائل الاخرى التي تمر امامهم....توقفت احدى الركشات وحقيقة استغربت وتوقفنا في محاولة لعدم تفويت هذا المشهد لننظر كيف ستركب النسوة الاربعة في هذه المركبة الصغيرة. جميعهمن (ماشاء الله) من ذوات الوزن الثقيل. انحشرت 3 منهن في المقعد الخلفي بقدرة قادر ...انتظرنا تصرف الرابعة طويلا , فقررت الركوب بجانب السائق. هذا الاخير اخذ في تدوير الركشة التي كانت تزأر دون جدوى....زن...زن...زن ..الركشة ابت تقوم بعد فشل زريع في تحريكها سنتيمتر واحد نزلت النسوة غاضبات... وفي ثواني كانت الركشة منطلقة تسابق الريح مبتعدة عنهن ..... في حادثة اخرى طريفة للركشات, حكت لي سيدة أنها اقسمت على مقاطعة هذه الركشة طوال حياتها . السبب كان سقطة مدوية لها هي وصديقتها كل واحدة في اتجاه معاكس والسائق( يلاوز) يمين وشمال مبتعدا عن دورية شرطة تلاحقه, واظنه كان لا يحمل رخصة..طبعا لا توجد ابواب جانبية وعلى الراكب تحمل مسؤولية ثباته داخلها.