Post: #1
Title: موبايـــل الســـرور
Author: motaz
Date: 03-19-2005, 07:26 PM
Parent: #0
مستكاوي
موبايل السرور الديمة واضح قولو
بحفظ للبريد من يومو لا عند حولو
لو كتر الرصيد كل زول يخابر زولو
لو قل الرصيد البركة في مسكولو
موبايل السرور يوم تركواز يوم بني
لي نقل الشمار تلقاه تب متبني
لو بالايد اقوم اضرب وادوبي واغني
الا بس الرصيد دايما مخيب ظني
موبايل السرور قلل منامي وصبري
بالليل والنهار تلقاني باري ومبري
علمنا الكضب الزول يواعد ويجري
جوه البيت يكون ويحلف يقول في الكوبري
موبايل السرور حجمو الصغير محنا
ما في مقدمات تلقاه دق ورن
الايد في الاضان والزول ينق ويتمنى
خلى الناس تقول الزول ده طوفش جن
موبايل السرور والله بالغ وشذا
الولد انخلع من كرسي نط وفزا
الزول بس تقول شاف ليهو مدفع رزا
الا بس الجهاز في جيبو رن وهزا
موبايل السرور دايما حكايتو عجيبه
يرميك في الغرام ويديك صورة رهيبه
تسمع فيهو صوت تحلف تقول ترطيبه
والصوره بتكون في الاصل حاجه غريبه
موبايل السرور الديمه فاتي وبادي
ده بخليك دوام تنضم تنق بس رادي
ده الخلا الجميع كل زول بكون في وادي
بي كتر الغلاط ممكن تضارب عادي
موبايل السرور دي التكنولوجيا حبابا
في الدرب القويم نحنا بندق ابوابا
لو جابت فساد ترجع طريقا الجابا
شافعنا الصغير تلقاهو عافا وعابا
نقلا عن الصحافة
|
Post: #2
Title: Re: موبايـــل الســـرور
Author: Tumadir
Date: 03-19-2005, 07:47 PM
| Quote: لو قل الرصيد البركة في مسكولو |
الله يبارك فيك
|
Post: #3
Title: Re: موبايـــل الســـرور
Author: motaz
Date: 03-20-2005, 07:37 PM
Parent: #2
طماطم الغالية شكرا على المرور الجميل
الله يسلمك
|
|