Post: #1
Title: يا شنتير وعزنا فقعتوا مرارتى يا ناس
Author: Balla Musa
Date: 03-12-2005, 07:57 AM
شنتير كيفك
عزنا دا تمليحة
دا ياخوى صاحبن من داهية بقولولا البالتوك كنت بعيد عنك مرضان بيها قبال ما أمرض بى سودانيز أون جمر دى.
عزنا ولدن سمح دواخل من أهلك ناس ود أب سن لكن هسع مصنقر فى دبى
يحفظ كتير من شغل أهلو الشكرية النضيف
قال لى أبوهو رسل ليهو كتب جديده توثيقية عن شعر الشكرية
وعشمنى وخلانى سويت لى طاقة فى قلبى وتانية فى نافوخى لى الشغل النضيف دا
ونضفت ليهو مكان جواى بعيد من نضم الخواجات, لكن مازالت الطاقة مفتوحة تدخل من خلالها زوامل الهم والألم خالية الضهور من أى مسكنات حفلا معسولة الحلب
وانت يافاقع مرارتى التانية دحين دا ما كتبتو إنت?
Quote: الليل أمسى وألبِل حرّرنّو مشيهِن
عَقَبَن موية .. والجبل أب قِرود راجيهِن
الـ خَلاني فرْض الخمسة ماقَـضِّـيهِن
رزْق الدنيا .. والـمِـحَـن البصارِع فيهِن |
ياخى أنا من شفت مداخلتك مع عبد الله بولا فاتح قلبى كلو شوارع ليك
عليك أمان الله دون تعويض للسكن العشوائى الجواهو.
ياخى ماتسرحلك بى بوست تعظيم لى أهلك الميامين ديك الآنسو غربتك
ياخى دا كلام حسم جدل الهوية زمان .. دا كلام لاهو أفريقى لا هو عربى وين ما تلقاهو على وجه الأرض تعرفو من لمعانو وتقول ياربى الثريا دى النزلا هنا شنو؟
ياشنتير ناس ودشورانى وود ضحوية ديل بستحقو ألف بوست لكن دايرين منك واحد
أبداهو من هسع وجدع فيهو على مهلتك وخليك منسرب بى وشك فيو لاحدى مابكرى قفل ياعيسى ظهر
الكلام دا كنت بطلبو من محسن لكن محسن نخليهو لى شغلو النضيف البسوي فيهو هناك دا
|
Post: #2
Title: Re: يا شنتير وعزنا فقعتوا مرارتى يا ناس
Author: Shinteer
Date: 03-12-2005, 12:16 PM
Parent: #1
عدم المعروض جفا يا بلة .. لكن ردمتك رسايل خسوسية على المسنجر .. وأنا والله جايي طوفة بس .. لأن البورد ده بقيت ما بدخلو بالساهل .. وقبال كدي خسّمت بكري بالنبي يشطبني وما شطبني .. الزول فنجري.
المهم يا عزيزي والله دخلت الليلة بالصدفة وليتني ما دخلت .. لانك لويت أعنّتي صوب ديار بارحتْـها راحلتي .. والخطام قد يدمي أنوف النجائب إن شدّه غير ذي دُرْبة .. والحمد لله أنت "لصيص" وبتعرف الضريبة This is not tax in any way .. لكن قريبك "أنا" لا يود الخوض في أي شأن من شؤون البورد لأني مستغرق في شأني الخاص الخسوسي خالس خالس.
استاذي الكبير القدير عبد الله بولا .. سامحه الله إن سامحني وإن لم. كنت أود النقاش معه في ذات الموضوع الغميس "الـكُ...." .. لكنه اختفى .. وترك الشأن معلقاً.
روبنا رايب يا بلة .. والداير القارص ما بيختانا .. بس الجيهة كيف؟. محسن ده اياه زولي .. وقبل دخول محسن .. دكتور بولا كان زولي سبعمية في المية .. لكن اين بولا؟ .. ثم أن محسن المسخوت معديها لي كلها طيران .. تطير عيشتو أب رزقاً طاير. أمانة مو زول ضرا .. تتّاقى في حجاه أكان القنا وقف صريف، زي ما بقول المسخوت.
أنا على باب سفر .. سفر طويييييييل .. وعرفت ناسي .. وبكون على اتصال معاهم .. بس انت ابقى على اتصال . وربنا يلمني في عبد الله بولا ... ود مرغم .. ود عيال شغبة الـ بـحِـلّوا الورْطة، أو كما قال قريبه ود شوراني، رضي الله عنه في الدارين .. ورضي عن آخرين.
أنا مفارق .. راسلني بالطاقة الورانية بيهناك .. وخليني من البورد ده عليك نبي الله شعيب.
|
Post: #3
Title: Re: يا شنتير وعزنا فقعتوا مرارتى يا ناس
Author: nazar hussien
Date: 03-12-2005, 11:33 PM
Parent: #2
يا شيوخنا اسياد الصريف والمحاجر سلام....بله وشنتير...
شنتير....ما تخليه يا بله امانه مو مسخوت وراسو دا ملان حدوثات....
ود العانس التحويرو سمّح صوفتو
شديتو ونشق طوفو وحدر مخلوفتو
قصدي الليله دهب البرته اشوف منسوفتو
قبال فوقنا صقط المصري تقرن فوفتو
ود شوراني
والله يا بله انا حالف من الكتابة في البورد دا الا ان ينجلي امر
بنات العباسي باقي بنات اصل وفصل....وفصلوهن من هنا علا باقي
هبوب البطانه دي بتخلينا ننضم كتر ونهضرب وليس علي السكران حرج
|
Post: #4
Title: Re: يا شنتير وعزنا فقعتوا مرارتى يا ناس
Author: Balla Musa
Date: 03-12-2005, 11:55 PM
Parent: #3
نزار حسين
كيف حالك آزول وانعلك عافية
نقول شنو عاد إنت حالف وشنتير خسمنى بى نبى الله شعيب ومحسن صايباهو حمى المتنبى اليومين دى. والله النمه مننا سرقت** وياستار على مكنة قلوبنا الحرقت,, آنزار
علوشيخنا ود السميرى القايل
جود ياخالق السر والخفى الموجود
وجود يا منزل الأعراف وسورة هود
جود ياخالقى جود بى شوفة المريود
يلفح روبة يلحم فى فؤادى نهود
البورد يانزار ياخوى بقا رتيب لكن نسوى شنو ؟ قدر ما اقول اتوب ابليس يلملم ناسو** يقول لى لاتوب التابو قبلك خاسو!!!
|
|