Post: #1
Title: لوثــــــــــــــــــــــة صدق!!!!
Author: lana mahdi
Date: 03-02-2005, 07:06 AM
Parent: #0
. . [qb]
هل حدث أن اصيب/ت أحدكم/ن بلوثة صدق مطلق؟؟
هل سبق أن منيت إحداكن بلحظات غاية فى الصدق و الشفافية و قالت ما تريد لمن تريد كما تفكر فيه بالضبط بدون مرور على "مقص الرقابة الدبلوماسية"؟؟؟
فى هذا البوست سأحكي تجارب خاصة و أخرى سمعتها عن "لوثات"الصدق وعدم الدبلوماسية التى تصيب الإنسان كثيراً و أحياناً تكون عواقبها وخيمة..
هل حدث أن قلت لأحدهم "أنت لا تحتمل و لست من النوع الذى يمكن أن أجارى""؟؟
هل حصل أن واجهت مديرك برأيك فيه بدون رتوش و كان الرأى غاية فى القسوة و المباشرة؟؟
دعوة للكل لتوثيق هذه التجارب الجيدة دائاً-مها كانت عواقبها-والتى لا تخلو أحياناً من مفارقات و طرافة
محبتى[/qb]
|
Post: #2
Title: Re: لوثــــــــــــــــــــــة صدق!!!!
Author: عبد الحميد البرنس
Date: 03-02-2005, 07:12 AM
Parent: #1
وأنا في مدى الإستقبال.. أتطلع!.
|
Post: #5
Title: Re: لوثــــــــــــــــــــــة صدق!!!!
Author: lana mahdi
Date: 03-02-2005, 02:22 PM
| Quote: وأنا في مدى الإستقبال.. أتطلع!. |
ونحن نتطلع لاحدى لوثاتك الصدقية و التى اعرف انها كثيرة
|
Post: #3
Title: Re: لوثــــــــــــــــــــــة صدق!!!!
Author: ود الشيخ
Date: 03-02-2005, 07:30 AM
Parent: #1
عيك والله يا بت عمي انتي عارفه الخناقية لط في الوش
وجلايط كثيرة وحكاوي لا تنقطع هسع اديك رأي في بكري
|
Post: #4
Title: Re: لوثــــــــــــــــــــــة صدق!!!!
Author: عبد الحميد البرنس
Date: 03-02-2005, 08:56 AM
Parent: #3
في إنتظارك برضو يا خال!.
|
Post: #7
Title: Re: لوثــــــــــــــــــــــة صدق!!!!
Author: lana mahdi
Date: 03-02-2005, 02:25 PM
Parent: #4
| Quote: في إنتظارك برضو يا خال!. |
بتمنى تحتفظ بي رايك دة يا برنس بعد ما الخال يخش
دة خناقي
|
Post: #8
Title: Re: لوثــــــــــــــــــــــة صدق!!!!
Author: عبد الحميد البرنس
Date: 03-02-2005, 02:44 PM
Parent: #4
يا لنا:
المصريون يقولون عن ذلك:
إن فلان يفتقر إلى (الذكاء الإجتماعي)!.
مصر دولة بها الكثير من (المدنية).. لذلك تطلق تلك الإستعارة على (النفاق الإجتماعي).
إنهم في ذلك مثل (الخواجات).. يحاولون أن يجعلوا من علاقات (المصلحة المادية) فضاءا قابلا للتعايش.. لذلك تكثر في خطاباتهم اليومية عبارات مثل (كيف عامل).. (حضرتك).. (أتمنى لك ليلة سعيدة).. وما إلى ذلك.
لكن تعبيرك ( لوثة) ذا دلالة بالغة الجمال.. إذ أن قول الصدق أضحى مسألة مكلفة.. لا تعود على صاحبها في كثير من الأحيان سوى بالمزيد من العداء.
مع ذلك.. ماذا لو كسب الإنسان كل العالم وخسر نفسه!.
|
Post: #6
Title: Re: لوثــــــــــــــــــــــة صدق!!!!
Author: lana mahdi
Date: 03-02-2005, 02:24 PM
Parent: #3
| Quote: عيك والله يا بت عمي انتي عارفه الخناقية |
كيفن ما بعرفهم يا ود عمي
انعم و اكرم
البيت كلو خناقية والآراء الصادمة ما بتديك الدرب
وكمان ديل ملخبتين بي عركيين
يعنى شالو حسنيي اللط فى الوش!!!
|
Post: #9
Title: Re: لوثــــــــــــــــــــــة صدق!!!!
Author: عبد الحميد البرنس
Date: 03-02-2005, 02:50 PM
Parent: #6
الخال عارفو ومتابع كتاباتو من زمان يا لنا!.
|
Post: #10
Title: Re: لوثــــــــــــــــــــــة صدق!!!!
Author: munswor almophtah
Date: 03-02-2005, 05:27 PM
Parent: #9
((يعنى ابو الأسباط كتل الكديسه.......السر فى محل السر والجهر فى محل الجهر.....فاليقم الإمام واليستوى الماموم.....رفعت الأقلام وجفت الصحف....الاهل بلغت اللهم فاشهد ))
munsour
|
Post: #11
Title: Re: لوثــــــــــــــــــــــة صدق!!!!
Author: lana mahdi
Date: 03-07-2005, 08:34 AM
Parent: #10
متفقين يا منصور
السر فى محل السر
وكذا الجهر
|
Post: #12
Title: Re: لوثــــــــــــــــــــــة صدق!!!!
Author: Mayada
Date: 04-10-2005, 12:24 PM
Parent: #1
موعاد
ست البنيـــــــــات
|
Post: #13
Title: Re: لوثــــــــــــــــــــــة صدق!!!!
Author: Mayada
Date: 04-10-2005, 12:27 PM
Parent: #1
اذكر مرة زماااااااااان (ايام السغرة) وانا يادوووووووووب بتعمل في واحد اتين كان عمي متغدي معانا وبعادة السودانيين، امي بتخسم فيهو...
النبي كان ما اكلت...
غايتو اكلك عاجز خلاس...
الرسول مد يدك للصحن دة...
وطبعا انا راسي شغال زي مروحة الطربيزة يمين شمال بين امي وعمي...
الينفضك كان ما جربت من الـ...
صحن السمك دة اصلو ما مديت ايدك عليهو...
قمت انا لما روحي حرقتني نطيت طواااااااااالي وقلت ليها منو القال ليك، اكل *لتااااتة سمكات...
وطبعا ماصدقو، لغاية اسة وفي اي مناسبة بتكون دي نكتة المناسبة...
*لتاتة=تلاتة
ست البنيـــــــــات
|
Post: #14
Title: Re: لوثــــــــــــــــــــــة صدق!!!!
Author: ابو جهينة
Date: 04-10-2005, 01:56 PM
Parent: #13
أختي العزيزة لنا مهدي
تحية يشوبها لوثة الصدق
سأحكي لك بكل لوثة حادثتين أصابتني فيهما لوثة صدق ممزوجة بالهاشمية و العفوية :
1: عندما رحت أخطب زوجتي المرحومة المصرية .. كان لديها عم صعيدي يقف الصقر على شاربيه .. و يبدو أنه لا يحب صنفنا .. فلما عرف أنني نوبي قال بعنجهية الأتراك و الباشوات : هو البرابرة ورانا ورانا .
فقلت له و أنا أضع ساقا على ساق : أسيادكم يا عمدة ..
و كادت الخطبة أن تتحول إلى تراجيديا لولا تعلق المرحومة بأهداب هذا البربري العنجهي.
2. في لوس أنجلوس عام 1982م .. ذهبت مع أحد الأمراء إلى زيارة طبيب عراقي كبير متجنس بالجنسية الأمريكية و متزوج من أمريكية .. و لأن الأمير يعرف عفويتي و شلاقتي فقد قال لي : ما تعمل أي تعليق مع الراجل و زوجته .. خليني أتكلم معاه في الموضوع بتاعي و نمشي.
و لأنني أعرف أنني لا أملك لساني .. فقد أجبته بنصف نعم .
فتح لنا الدكتور الباب.
و جاءت إمرأة في أرذل العمر .. فقلت للطبيب : ما شاء الله .. هذي الوالدة ؟
فبهت الذي فتح الباب و بهت معه الأمير ..
فقد كانت الحيزبون هي زوجته..
و عند خروجنا لم أنتظر الأمير .. فقد ركبت Yello cap و إنطلقت تاركا إياه يتهدد و يتوعد ..
أها كيف ؟ لوثة عدييييييييييييييييييييييييييييييييييل  
تحياتي ليعقوب
|
Post: #16
Title: Re: لوثــــــــــــــــــــــة صدق!!!!
Author: lana mahdi
Date: 04-10-2005, 02:20 PM
Parent: #14
الحبيب ابوجهينة
قلتا لى الحيزبون طلعت المودام؟؟؟
ودة حالتو موصينك قبل تخشو؟؟
طبعا اتخيلتا الامير زى البرسموهو في كتب الكراكتير البطلع من راسو دخان و هياكل عظمية..
بس ما وريتنا المدام رد فعلها كان شنو؟؟
لوثة الصدق بتاعتك كانت عينة
|
Post: #15
Title: Re: لوثــــــــــــــــــــــة صدق!!!!
Author: lana mahdi
Date: 04-10-2005, 02:17 PM
Parent: #13
Quote: اذكر مرة زماااااااااان (ايام السغرة) وانا يادوووووووووب بتعمل في واحد اتين كان عمي متغدي معانا وبعادة السودانيين، امي بتخسم فيهو...
النبي كان ما اكلت...
غايتو اكلك عاجز خلاس...
الرسول مد يدك للصحن دة...
وطبعا انا راسي شغال زي مروحة الطربيزة يمين شمال بين امي وعمي...
الينفضك كان ما جربت من الـ...
صحن السمك دة اصلو ما مديت ايدك عليهو...
قمت انا لما روحي حرقتني نطيت طواااااااااالي وقلت ليها منو القال ليك، اكل *لتااااتة سمكات...
وطبعا ماصدقو، لغاية اسة وفي اي مناسبة بتكون دي نكتة المناسبة...
*لتاتة=تلاتة |
ست البنيات الحبيبة ميادة و عمو ما خنق ولا شرق بعد الملاحظة القوية دى و عد السمكات ال"لتاتة"؟؟؟
|
|