Post: #1
Title: عندما يكون المزاج زنجبيلا
Author: ابو جهينة
Date: 02-24-2005, 01:19 AM
( الجبنة ) .. هل هي كلمة عربية ؟
أيام الشرغرغ و البنبر الخشبي المجلد حبل ( أيام لها فناجيل )
( يا بنية كبي الجبنة في ضل الضحااااااااوية ) ..
الطقوس المتبعة في شراب الجبنة عندنا في السودان تكاد تكون واحدة .. و في أوقات مختلفة.
في شرقنا الحبيب يفضلون أكل العجوة مع الجبنة أو القهوة ..
بقية أهل السودان يكثرون من السكر ..
إرتبطت القهوة عند البعض ( بجلسات الزار ) .. كما إرتبطت بتدخين ( السجاير ) وسط كثير من النساء الجالسات لرشف فناجيل القهوة.
قضيت جانبا من طفولتي في بربر .. زوجة عمي كانت تدمن القهوة و تضع جلساتها على قائمة أولوياتها اليومية .. كنت أجلس أمامها متربعا و هي تقوم بتلك العملية المتقنة اليومية ثلاث مرات في اليوم و وجهها و وجه ضيفاتها ينضح بمزاج عال وسط هرجلة الونسة المنطلقة بعشوائية حيث تكون صاحبة الصوت الأعلى هي التي تمسك دائما بدفة الحديث ..
أهل الحبشة يزيدون على طقوسنا بوضع الشمع و ( الفيشار ) .. حتى شكل الجبنة الفخارية أكبر حجما و لونها أسود أو أحمر ..
أنا شخصيا لا أحب شرب الجبنة أو القهوة بأنواعها .. و لكنني أعشق رائحة البن و هو ( يحمص ) على النار . رائحة جميلة و منعشة.
معظم أهل شرق أفريقيا يحبذونه مع جلسات ( القات ) الطويلة ..
بعض أصحاب المزاج ، و نظرا للحالة الإقتصادية الراهنة ،، قاموا بخفض عدد مرات التناول و البعض ألغاها من أجندته نهائيا مكتفيا بتلبية الدعوات ..
مزاجكم زنجبيلي دايما
|
Post: #2
Title: Re: عندما يكون المزاج زنجبيلا
Author: قرشـــو
Date: 02-24-2005, 01:44 AM
Parent: #1
حبيبنا ابو جهينة
جيتنا فى البنحبو بقى
الجبنة والبن تغنى لهما الكثير من اهلنا فى السودان
ولعلها الحب الوحيد المشترك بين معظم اهل السودان
قعدات الجبنة يا حبيب لها طقوس جميلة وتحلو فيها النقة والونسة
بحق الجبنة شىء رائع وكما قلت فان رائحة البن لا تضاهى ابدا وهو يقلى
ترى هل سمعت بجبنة منى ؟؟؟
|
Post: #3
Title: Re: عندما يكون المزاج زنجبيلا
Author: ابو جهينة
Date: 02-24-2005, 01:48 AM
Parent: #2
عزيزي العمدة قرشو
تحية بنكهة البن المحمص و طعم الزنجبيل
| Quote: ترى هل سمعت بجبنة منى ؟؟؟ |
لا ..
ممكن تزودنا بمعلومات يا حبيبنا ..
أرقد عافية
و شكرا على المرور
|
Post: #4
Title: Re: عندما يكون المزاج زنجبيلا
Author: walid taha
Date: 02-24-2005, 02:27 AM
Parent: #3
| Quote: Quote: ترى هل سمعت بجبنة منى ؟؟؟ |
فى انتظار جبنة منى..
|
Post: #13
Title: Re: عندما يكون المزاج زنجبيلا
Author: ابو جهينة
Date: 02-24-2005, 07:52 AM
Parent: #4
وليد المستكين المتمرد
| Quote: فى انتظار جبنة منى.. |
و نحن معاك في إنتظار جبنتها الكاربة بكل تأكيد
يللا يا عمدتنا
|
Post: #5
Title: Re: عندما يكون المزاج زنجبيلا
Author: Habib_bldo
Date: 02-24-2005, 02:29 AM
Parent: #3
يا فلاش باك المنبر أبو جهينة
ياريت تعكس لينا بعض الطقوس المصاحبة لجلسة الجبنة وطقوس أخرى لمناسبات مختلفة
لقد أمتعتنا في فترة سابقة بأحاجيك عن البلد فكانت صورة ناطقة لريف الشمال
أيامك كلها زنجبيل .. تقعد عافية
|
Post: #14
Title: Re: عندما يكون المزاج زنجبيلا
Author: ابو جهينة
Date: 02-24-2005, 08:06 AM
Parent: #5
عزيزنا حبيب بلدو
تحياتي
| Quote: ياريت تعكس لينا بعض الطقوس المصاحبة لجلسة الجبنة وطقوس أخرى لمناسبات مختلفة |
حاضرين يا ريس
شكرار على المرور في مجلس قهوتنا
|
Post: #6
Title: Re: عندما يكون المزاج زنجبيلا
Author: الصادق خليفة
Date: 02-24-2005, 02:33 AM
Parent: #1
الحبيب ابوجهينة
تحية طيبة
كنت امس و الحبيب اسماعيل وراق نحكي عن القهوة و الشاى و قلت ليه دي زكرتنى طرفه حكتها لي الوالدة بخصوص مجموعة من اهلنا بيحبوا القهوة و الشاى شديد فلي ابن عمي و ابن خالي من النوعية المستهبله قاموا هجوا ليك الجماعة ديل ببعض الاشعار و منها :
يا منادي ليهم جمله كبيرهم و صغيرهم خملا
يا منادي لي (ابو زعماتو) و الشينات نعلاتو وللكباية ببيعو شاتو
يا منادي لى (ابو كجل) لا بشك ولا بخجل للكباية بيقوم بعجل تقول روحو عليها بتنسل .
بين القوسين اسماء بعضهم.
طبعا الطقوس يمكن ان تكون متشابه عند الكثير من اهلنا و اصبحت ايضا جلسة القهوة مرتبطة بالشمارات و غيرها و على فكرة في الفترة الاخيرة انتشرت هذه الظاهره (تناول القهوة) وسط الشباب بصورة كبيره اي انها اصبحت برنامج يومي وقد لاحظت ذلك في اخر اجازة لي بالسودان .
|
Post: #15
Title: Re: عندما يكون المزاج زنجبيلا
Author: ابو جهينة
Date: 02-24-2005, 09:50 AM
Parent: #6
الحبيب الصادق خليفة
تحية و مودة
الظاهر أبو محمد إشتاق لأم محمد و قاعد يلف حول القهوة و الشاى ( المعنى في بطن الشاعر ) ..
| Quote: اصبحت ايضا جلسة القهوة مرتبطة بالشمارات |
القهوة لها عدة إنعكاسات على المزاج البشري :
الشمارات
الونسة
الصراحة و الفضفضة
الهروب من المشاكل
لمة الأحباب
الهروب من الملل
و بالطبع لكل بلد قهوته :
القهوة التركية + نسكافيه + إكسبريسو + بلاك كوفي + القهوة العربية
و الأتي كثير
أرقد عافية
|
Post: #7
Title: Re: عندما يكون المزاج زنجبيلا
Author: إسماعيل التاج
Date: 02-24-2005, 02:37 AM
Parent: #1
أبـو جهينة، والمواضيع الشيقة
مررت للتحية بـعـد أنْ جذبــتــني رائـحـة مقـالـك وهـــو يتحمص في الأتموسفير.
مقالك هذا، سوف يثير شجون الكثيرين ويذكرهم بقعدات ولمات الأمهات (الحبوبات/العمات/الخالات) في ضل الضهرية على وجه الخصوص والأحاديث العـذبـة.
كل التحايا
إســمــعــيــل
|
Post: #16
Title: Re: عندما يكون المزاج زنجبيلا
Author: ابو جهينة
Date: 02-24-2005, 11:36 AM
Parent: #7
مولانا العزيز الأستاذ إسمعيل
تحية ممزوجة بكل نكهات القهوة
| Quote: مررت للتحية بـعـد أنْ جذبــتــني رائـحـة مقـالـك وهـــو يتحمص في الأتموسفير. |
تعرف يا مولانا .. رغم إنو الواحد عاش في جو كلو مزاج القهوة و القعدة التي يعد لها إعدادا متقنا .. إلا أنني لم أنجذب أبدا إلى هذا المشروب السحري .. حتى في تسفاري الكثير شرقا و غربا حاولت أن أتصالح مع مذاقه فلم أقدر .. حاولت أن أشرب القهوة لزوم السهر أو الصحيان المستمر .. و لكن النتيجة كانت سلبية .. لا أدري ربما هناك أشخاص مثلي .. و لكن عديلي الدكتور محمد عبداللطيف قال لي : مركز التنبيه في مخك شغال طوالي ما بيقفل  
| Quote: مقالك هذا، سوف يثير شجون الكثيرين ويذكرهم بقعدات ولمات الأمهات (الحبوبات/العمات/الخالات) في ضل الضهرية على وجه الخصوص والأحاديث العـذبـة. |
عندما كنا نسافر لوادي حلفا بالقطار أيام الإكسبريس السريع ، ثم نصل لمحطة أبو حمد كنا نصلها مع صلاة الفجر .. و يندفع أصحاب الكيف إلى نزول درجات السلم إلى ستات الشاى و الجبنة على بروش تكون باردة بفعل مكوثها هناك مدة طويلة .. و تتطاقش الفناجيل و أكواب الشاى و صوت قلى الزلابية يقوم بعمل إيقاع لن تنمحي ذاكرته .. و تمتد الونسة حتى صافرة القطار المنطلقة لتنبيه الركاب للصعود ..
في أمريكا جاء خبر موت أم أحد الأصدقاء ( بطسبيرج بنسلفانيا و كان يحضر للماجستير في الجامعة ) قال من وسط بكاءه : أمي ضربت ليها لقيت بتشرب في الجبنة و قالت لى متمنية بس تقعد جنبي و أتونس معاك و إنت بتشرب معاى الجبنة ..
الونسة معاك يا مولانا بتجر و تطول ..
تسلم
|
Post: #8
Title: Re: عندما يكون المزاج زنجبيلا
Author: ود الشيخ
Date: 02-24-2005, 02:43 AM
Parent: #1
العملاق الثري
طبعاً لا احسبك تعلم بأن حبوبتي عمة أمي كلتوم بت حامد
قمر الانبياء تزوجها عمدة طوكر وهو هدندوي ولهم قرية
قبل طوكر اسمها ( إيرم ) والطريف في الموضوع أن سكانها
جميعهم اهل ولا يوجد بينهم غريب سافرت مع والدتي لترى
عمتها ووصوني بان لا تزيد الزيارة عن ثلاثة أيام وبقت
أمي تفتش في البقلعني من إيرم فمكثنا خمسة عشر يوماً
كل المقدمة عشان في القرية من اولاد حبوبتي وفي سني
خالي اوشيك وخالي بامكار اها اول يوم مشيت معاهم المدرسة
وفي الفسحة حقت الفطور الطلبة ديل كل واحد جرى ليك تحت
شجرة والمفاجأة إنو الشنط فيها عدة القهوة وكان الفطور عبارة
عن جبنة بالعجوة وكانت حكاية روعة واحسب إن ادمنتها وقتها
وكانت الخمسطاشر يوما
|
Post: #9
Title: Re: عندما يكون المزاج زنجبيلا
Author: معتصم دفع الله
Date: 02-24-2005, 03:21 AM
Parent: #8
يا أستاذ
جيتنا في المزاج الما خمج أخوك كييف جبنة شديد وبشربه في أوقات معينة وما أجملها مع طقوس أهلنا الحلوين ..
الوالدة الله يطراها بالخير من وأنا صغير كنت بقعد ليك معاها وبسرق اللعب أشرب لي منها فنجان كارب كده تقوم الله يديها الصحة والعافية تقول لي يا ولد والله الجبنة إلا ترميك ومن يومها أحببت أن أشربها معاها في جلسة أنس ظريفة ..
رد الله غربتنا فقد إشتقنا لكل حاجة حلوة مع أهلنا في وطننا الحبيب ..
وما أجملك يا أستاذ وأنت تشدنا إلى كتاباتك الجميلة والشيقة ..
دمت بخير ..
|
Post: #10
Title: Re: عندما يكون المزاج زنجبيلا
Author: tmbis
Date: 02-24-2005, 03:42 AM
Parent: #9
القهوة كيف ومزاج ..يا بوجهينة
برجع ليك بي مزاج البوست ده .. عايز ليهو قعده ضحوية ما زحمة شغل
|
Post: #22
Title: Re: عندما يكون المزاج زنجبيلا
Author: ابو جهينة
Date: 02-25-2005, 12:11 PM
Parent: #10
العزيز ود منصور علاء
تحية ممزوجة بكل نكهات الكيف و المزاج ..
| Quote: البوست ده .. عايز ليهو قعده ضحوية ما زحمة شغل |
أمبارح الخميس و الليلة الجمعة .. وين إنت ؟
|
Post: #21
Title: Re: عندما يكون المزاج زنجبيلا
Author: ابو جهينة
Date: 02-25-2005, 04:27 AM
Parent: #9
عزيزي معتصم
مزاجك و النيل الجاري ..
Quote: الوالدة الله يطراها بالخير من وأنا صغير كنت بقعد ليك معاها وبسرق اللعب أشرب لي منها فنجان كارب كده تقوم الله يديها الصحة والعافية تقول لي يا ولد والله الجبنة إلا ترميك ومن يومها أحببت أن أشربها معاها في جلسة أنس ظريفة ..
رد الله غربتنا فقد إشتقنا لكل حاجة حلوة مع أهلنا في وطننا الحبيب .. |
الجلسة في حضرة الوالد براها بتساوي كل أمزجة الدنيا و كل نكهات القهوة ..
حفظها الله
دمت
|
Post: #11
Title: Re: عندما يكون المزاج زنجبيلا
Author: almulaomar
Date: 02-24-2005, 03:55 AM
Parent: #1
أبا جهينه يا جميل مزاجك رايق وصافي وشارب موية النيل وإذا لم تسعفنا الكلمات على الإداء بشئ يضاف إلى هذا الجمال سوف نلوح بالمناديل وقعوتك ومزاجك بطعم الزنجبل
|
Post: #12
Title: Re: عندما يكون المزاج زنجبيلا
Author: عمر محمد عبد القادر
Date: 02-24-2005, 04:27 AM
Parent: #11
ابوجهينة سمعت بي جبنة ( سيدي الحسن ) وجبنة الست خديجة .. وجبنة ماربويا الحبشية
لكن اشهر جبنة هي جبنة حبوبتناحبوبة بت عثمان تشم ريحة القلية من مسافة ثلاثين زراع ..
ود الباوقة
|
Post: #23
Title: Re: عندما يكون المزاج زنجبيلا
Author: ابو جهينة
Date: 02-26-2005, 01:51 AM
Parent: #11
عزيزي جدا الوقور الملعمر
تحية مقيمة
| Quote: وإذا لم تسعفنا الكلمات على الإداء بشئ يضاف إلى هذا الجمال سوف نلوح بالمناديل |
أنت إسعاف الكلمات و الحرف ..
ننتظر إضافتك الزنجبيلية و نقبل مؤقتا تلويحة مناديلك ..
تعال .. البن إتحمص و جاهز
|
Post: #17
Title: Re: عندما يكون المزاج زنجبيلا
Author: Raja
Date: 02-24-2005, 12:55 PM
Parent: #1
ابو جهينة يا غالي..
عندما يكون المزاج زنجبيلا
تكون الأمور مية مية..
راجعة اقعد معاكم في البوست الخطييييييييييييييير ده
|
Post: #27
Title: Re: عندما يكون المزاج زنجبيلا
Author: ابو جهينة
Date: 02-26-2005, 02:58 AM
Parent: #17
رجاء
أهلييييييييييييييييييييييييييييييييييييييييييييييييييييييين
القهوة قربت تخلص و إنت ما جيتي ..
ما يكون لقيتي قعدة قهوة في مكان تاني
|
Post: #18
Title: Re: عندما يكون المزاج زنجبيلا
Author: AlRa7mabi
Date: 02-24-2005, 02:03 PM
Parent: #1
صديقي العزيز جلال
لك فوح النكهات أكملها ..
أشاركك هذه ( القعدة ) بمجتزأ من كلام كتييير مغنغت ..
... جلسة تغمرك فيها رائحة ( القهوة ) .. ما أعبقها .. رائحة البن ، تتصاعد أبخرته الزكية وهي تتلوى في دوزنة على تقلّب حباته .. تختلط رائحتة المنكّهة بعرق أمٍ حنون .. يلتصق شقك الأيمن بجنبها الأيسر .. دخلت على غيرما إستئذان جارة لك هى أمك بلا رحم .. تدور ( كأسات الجبنة ) مجراها الضيف ثم تراتب الأعمار .. يا لكفة ميزانك المهيضة ، تنو بحملها كلما رف جناح الذكرى ، فلتحلق فوق سماء حنينك ، فتتضخم بذلك أرصدة مشاعرك ، أحصها إذاً .. من الخاسر ؟؟؟
...
|
Post: #19
Title: Re: عندما يكون المزاج زنجبيلا
Author: نادية عثمان
Date: 02-24-2005, 04:37 PM
Parent: #18
العزيز ..الراقى
ابو جهينة
اشمه الان يملأ دواخلى ذلك البن المحروق يملا باحات بيتنا ويطير مع النسيم الى بيوتات عائشة وست النفر وخديجة وبت الشول !!
جيبى عدة الجبنة لى خالاتك يابت ..!
اه
الله
اسمعها امى تنادينى الان
استاذنك ابو جهينة فالشرقرق يجب ان انظفة بحبة رملة حمراء
اشربه معى ..واشربه معك
فنجان القهوة الزنجبيلى المزاج!!
خادم الله بت عبد القادر ..سترينا كم سنعيش بعد هذه الرشفة حسب فنجالها الكاذب
اه كم اعشقها (قعدة القهوة الحميمة ) عندما تجتمع نساء الحى ويطلقن بخور التيمان فيأتينى مخلوطا بروائح الفراديس
بن
زنجبيل
قرفة
هبهان
آآآآآآآآآآآآى يمة جايبة العدة اهى دى !!
مااروعك ابو جهينة !
|
Post: #20
Title: Re: عندما يكون المزاج زنجبيلا
Author: ابو جهينة
Date: 02-25-2005, 03:49 AM
Parent: #19
عزيزي جدا ود الشيخ الزول الماكن المكين
محبة صادقة
Quote: وفي الفسحة حقت الفطور الطلبة ديل كل واحد جرى ليك تحت
شجرة والمفاجأة إنو الشنط فيها عدة القهوة وكان الفطور عبارة
عن جبنة بالعجوة وكانت حكاية روعة واحسب إن ادمنتها وقتها
وكانت الخمسطاشر يوما |
تعرف يا ود الشيخ .. دائما أسافر إجازة الصيف للسودان بالبر عن طريق سواكن الخرطوم .. أجمل لحظات بقضيها لما إتونس مع أولاد الهدندوة الذين يبيعون في الطريق .. في منتهى الذكاء و سرعة البديهة و النكتة الحاضرة .. أحب طريقة نطقهم للغة العربية ..
طبعا قبل كدة في بوست حكيت النكتة بتاعة واحد ببيع سيوف في الطريق دة .. قمت أخدت منو سيف و طلعتو من جفيرو و قلت ليهو : الحديد ما أصلي ..
قام قال لى : إنت الترك تهارب ؟
يعني عاوز تحارب بيهو الأتراك 
أرقد عافية
|
Post: #36
Title: Re: عندما يكون المزاج زنجبيلا
Author: ودقاسم
Date: 02-27-2005, 04:27 AM
Parent: #20
أبوجهينة
فنجان جبنة بي شمالو
يسوى الدنيا بي ( هالو )
لا أشرب القهوة حاليا ، كنت أشربها أيام الشباب وفي الصباح تحديدا ،،، تعرف ليه ؟ أسأل العالمين ببواطن الأمور ،،، وتعجبني جلسة القهوة وما يدور فيها من أنس ، لكني أشفق على أهلنا وهم يضيعون الزمن في إشباع مزاجهم وبهذه الصورة التي تتكرر يوميا، وربما في اليوم الواحد أكثر من مرة ،، الآن المكائن الحديثة لصنع القهوة جعلت القهوة مشروبا سهلا يمكنك تناوله داخل سيارتك أو مكتبك وأنت تقضي عملا أو تقوم بمشوار هام ،،، والبن يختلف ، ولا أعلم لماذا ، لأنه يحتاج لنفس الظروف المناخية إلا أن البرازيلي غير الحبشي غير اليمني ،،، وفي السودان أدمن أهلنا شرب القهوة ، وأهملوا إنتاج البن بالرغم من أن إنتاجه ممكن ...
|
Post: #29
Title: Re: عندما يكون المزاج زنجبيلا
Author: ابو جهينة
Date: 02-26-2005, 03:31 AM
Parent: #19
الأخت العزيزة الشاعرة نادية عثمان
تحاياتسابق ريحة البن المحمص لتصل لمعانقة مزاج حروفك الجالسة في قعدة الجبنة مع الخالات و الجارات ...
Quote: كم اعشقها (قعدة القهوة الحميمة ) عندما تجتمع نساء الحى ويطلقن بخور التيمان فيأتينى مخلوطا بروائح الفراديس
بن
زنجبيل
قرفة
هبهان
آآآآآآآآآآآآى يمة جايبة العدة اهى دى !! |
كأني أسمع قرقعة الفناجيل تموسق مزاج الجالسات في إنتظار الرشفة الأولى ..
نادية
مزاجك مزيج من زنجبيل معطون بالهبهان و القرفة ..
أرقدي عافية
|
Post: #28
Title: Re: عندما يكون المزاج زنجبيلا
Author: ابو جهينة
Date: 02-26-2005, 03:03 AM
Parent: #18
عزيزي جدا و صديقي الصدوق الرحمابي
مشتاقون يا رجل ..
Quote: جلسة تغمرك فيها رائحة ( القهوة ) .. ما أعبقها .. رائحة البن ، تتصاعد أبخرته الزكية وهي تتلوى في دوزنة على تقلّب حباته .. تختلط رائحتة المنكّهة بعرق أمٍ حنون .. يلتصق شقك الأيمن بجنبها الأيسر .. دخلت على غيرما إستئذان جارة لك هى أمك بلا رحم .. تدور ( كأسات الجبنة ) مجراها الضيف ثم تراتب الأعمار .. يا لكفة ميزانك المهيضة ، تنو بحملها كلما رف جناح الذكرى ، فلتحلق فوق سماء حنينك ، فتتضخم بذلك أرصدة مشاعرك ، أحصها إذاً .. من الخاسر ؟؟؟
... |
بكلماتك هذه و كأننا إلتقينا على رائحة البن المحمص و بخور التيمان يعبق .. و الهبابة تعمل بلا كلل و الجمر يتقد و شرر صغير يتطاير من بين جنبات الجبنة الجالسة على الجمر ..
سعدت جدا بمرورك ..
أيامك بطعم الزنجبيل
|
Post: #24
Title: Re: عندما يكون المزاج زنجبيلا
Author: ود الشيخ
Date: 02-26-2005, 02:14 AM
Parent: #1
تعرف يا أبو جهينة
طبعا سكنا بورتسودان فترة ليست بالقصيرة حتى غادرنا
السودان نهائي وكذا كتبت علينا الهجرة منذ الاذل
فاخوك حافظ كمية من نكت اهلنا الهدندوة قال ليك لمن
الفلسطينين طلعوهم من لبنان في جزء منهم جابوهم اركويت
وجبيت اها قالوا الفلسطيني مشى اشترى حاجات من الدكان
وادى بتاع الدكان ورق مية دولار واشترى حاجات كثيرة وادروب
بعاين ساي اها بتاع الدكان رجع ليك للفلسطيني باقي كثير
وادروب يعاين لمن الفلسطيني مشى أدروب سأل سيد الدكان
قال ليهو أسمأ( اسمع) إتا الدول ده أداك ورقه خدره واهده
وإتا اديتو هاجات كتيرة وكمان رجعت ليهو باقي كتير
الورقة دي شنو؟ الدول ده إندو منها كتير سيد الدكان قال
ليهو الله يزيدو ده الدولار أها أدروب مشى كمن ليك للفلسطين
عاوز يسرقو الفلسطيني إشتغل في أدروب كراتي لمن خلاص
غلبو قالوا أدروب كورك ليك للفلسطيني
يا فلستيني إسرائيل كيف
معليش للخروج عن الموضوع
|
Post: #25
Title: Re: عندما يكون المزاج زنجبيلا
Author: قرشـــو
Date: 02-26-2005, 02:30 AM
Parent: #1
الحبيب أبو جهينة
مع رائحة البن والبخور ومع الطقوس الراسخة فى الاذهان والتى لم تغيرها الحضارة بكل معداتها الحديثة تكون جسلة لا تتم الا فى يومين اوثلاثة فى السنة فقط وهى قهوة منى عززى حينما يتجمع الحجاج فى منى وليس هنالك من تجمع سامى وخالى من الغرض سوى فى تلك الايام وهى ما تسمى ايام التشريق والناس يكملون مراسم الحج حينها تكون قهوة منى سيدى وهى حلم وامنية لمن لم يؤدى فريضة الحج وهى كناية عن اداء فريضة الحج ..
فى خيمة السودانيين يجتمع الناس وخاصة الحاجات منهن ولست ادرى من أين يأتى البن ولكن يتم قلى البن حتى تعم رائحة كل المخيم وهى ائذانا بدعوة مفتوحة لكل الحجاج وسرعان ما يتهافتون ويتنادون ويتجمعون رجالا ونساء وتبدأ الطقوس المعروفة والمحببة وتبدأ أهازيج المدائح الجميلة التى تتناسب والمقام ولا تنفض القعدة الا مع الاذان ...
هذه قهوة منى سيدى
وهنالك قهوة سيدى الحسن كما اشار حبيبنا اعلاه وهى رائعة ولكنها تقام فى السودان وفى كسلا الحبيبة وعند جبل التاكا ..
لك ولهم جميعا كل الحب
|
Post: #26
Title: Re: عندما يكون المزاج زنجبيلا
Author: ابو جهينة
Date: 02-26-2005, 02:54 AM
Parent: #25
أبوالنسب ودالباوقة عمر
تحياتي
| Quote: ابوجهينة سمعت بي جبنة ( سيدي الحسن ) |
دي زى ما قال العمدة قرشو في كسلا
| Quote: وجبنة الست خديجة .. وجبنة ماربويا الحبشية |
دي الجبنة أم شهقة
| Quote: لكن اشهر جبنة هي جبنة حبوبتناحبوبة بت عثمان تشم ريحة القلية من مسافة ثلاثين زراع .. |
الريحة تجيب الطاشي ..
حليل أيام زمن الحبوبات ..
شكرا على المرور
أرقد عافية و مزاج قرنفلي و زنجبيلي
|
Post: #32
Title: Re: عندما يكون المزاج زنجبيلا
Author: ابو جهينة
Date: 02-26-2005, 06:20 AM
Parent: #25
عمدتنا
جعل الله أيامك كلهابيضاء بياض أيام التشريق ..
إنه الكرم السوداني الأصيل يتجلى دائما في أوقات كتلك الأيام العظيمة ..
شكرا عمدتنا العزيز ..
أيامك بنكهة البن و طعم الزنجبيل
|
Post: #30
Title: Re: عندما يكون المزاج زنجبيلا
Author: lana mahdi
Date: 02-26-2005, 03:36 AM
Parent: #1
اخي الحبيب ابوجهينة
انا مدمنة للقهوة بالزنجبيل
بتعدل مزاجي جداً
وخاصة لو اتعملت قدامي بي قلايا و شرغرغا وفندقاومنقدا و هبابتا
والفشار على الطريقة الاريترية، و الفل المشتت على طريقتي
وبخور التيمان
|
Post: #31
Title: Re: عندما يكون المزاج زنجبيلا
Author: ابو جهينة
Date: 02-26-2005, 04:28 AM
Parent: #30
أخي العزيز ود الشيخ
تحية ماكنة و غليدة
| Quote: يا فلستيني إسرائيل كيف |
أها المسكين دة أخد علقة في عقر دارو .. ما يفك زهجتو إلا جبنة كاربة ..
أرقد عافية
|
Post: #33
Title: Re: عندما يكون المزاج زنجبيلا
Author: ابو جهينة
Date: 02-26-2005, 10:59 PM
Parent: #31
الأخت العزيزة لنا مهدي
تحية و تقدير
Quote: مدمنة للقهوة بالزنجبيل بتعدل مزاجي جداً
وخاصة لو اتعملت قدامي بي قلايا و شرغرغا وفندقاومنقدا و هبابتا
والفشار على الطريقة الاريترية، و الفل المشتت على طريقتي
وبخور التيمان |
مزاج الجبنة دة مزاج غريب جدا .. زوجة أحد السفراء السودانيين بأوروبا .. وجدت عندها طقم جبنة كامل .. لغاية الهبابة و ملقاط الجمر لزوم البخور .. و العجيب إنو صديقاتها من زوجات ديبلوماسيين عرب و غربيين و آسيويين أدمنوا على القهوة و ريحة بخور التيمان ..
أرقدي عافية
|
Post: #34
Title: Re: عندما يكون المزاج زنجبيلا
Author: صديق الموج
Date: 02-27-2005, 01:00 AM
Parent: #1
ابو جهينة ..شفت الجماعة بتاعين القهوة جو جارين كيف
خصوصا الو بتاع انجلترا مولانا اسماعيل التاج،وبعدين
معتصم قال بشربه مع امو!!!!! جنس كضب ،هو اماتنا زمان
بقولوا لينا الشفع الصغار ما يشربو القهوة ..عشان
بتعمل شنو كده ما عارف!!!!!
مزاجك دائما زنجبيلا،،،
|
Post: #35
Title: Re: عندما يكون المزاج زنجبيلا
Author: ابو جهينة
Date: 02-27-2005, 02:09 AM
Parent: #34
عزيزي أبوحيدر الموج
تحية لك و للأسرة الكريمة
Quote: شفت الجماعة بتاعين القهوة جو جارين كيف
خصوصا الو بتاع انجلترا مولانا اسماعيل التاج، |
قالوا الكيف روابطو زى رابطة الدم و صلة النسب ..
Quote: وبعدين
معتصم قال بشربه مع امو!!!!! جنس كضب ،هو اماتنا زمان
بقولوا لينا الشفع الصغار ما يشربو القهوة ..عشان
بتعمل شنو كده ما عارف!!!!! |
غايتو أنا الحمدلله ما شربتها لا صغير ولا كبير خوفا من ( بتعمل شنو كدة ما عارف
متى موعدنا ؟
|
Post: #37
Title: Re: عندما يكون المزاج زنجبيلا
Author: ابو جهينة
Date: 02-27-2005, 04:51 AM
Parent: #35
ود قاسم
تشكر على مداخلتك الزنجبيلية النكهة
| Quote: لا أشرب القهوة حاليا ، كنت أشربها أيام الشباب وفي الصباح تحديدا ،،، تعرف ليه ؟ أسأل العالمين ببواطن الأمور ،،، وتعجبني جلسة القهوة وما يدور فيها من أنس ، لكني أشفق على أهلنا وهم يضيعون الزمن في إشباع مزاجهم وبهذه الصورة التي تتكرر يوميا، وربما في اليوم الواحد أكثر من مرة ،، الآن المكائن الحديثة لصنع القهوة جعلت القهوة مشروبا سهلا يمكنك تناوله داخل سيارتك أو مكتبك وأنت تقضي عملا أو تقوم بمشوار هام ،،، والبن يختلف ، ولا أعلم لماذا ، لأنه يحتاج لنفس الظروف المناخية إلا أن البرازيلي غير الحبشي غير اليمني ،،، وفي السودان أدمن أهلنا شرب القهوة ، وأهملوا إنتاج البن بالرغم من أن إنتاجه ممكن ... |
تعرف يا ود قاسم : أهلنا أدمنوا على حاجات كتيرة و لكنهم لم يحاولوا توطينها بالسودان .
مثلا عندنا في الشمال البعيد .. ما عرفوا زراعة الفواكه إلا في زمن قريب جدا و الغريبة كل حاجة هناك نجحت ما عدا الموز ..
يومك قرنفلي
|
Post: #38
Title: Re: عندما يكون المزاج زنجبيلا
Author: معتز تروتسكى
Date: 02-27-2005, 07:06 AM
Parent: #1
عندما يكون المزاج زنجبيلا
وكذلك عندما يكون كبسمة النوار00
والاوتار00
على شرفة الاوانى والفنجان00
وتبدا الاعشاب فى ممارسة العشق الالهى انسجاما00
والابحار00
زنجبيلا من ذاك المشوار00
الى قهوة فى حضرة الوطن 00
فى حضرة الاسفار00
يا قهوتها 00
ياسيدى البن الحروف من ايديك مزاج وكيف 00
فسلمت لهذه الطقوس 00
استاذى العزيز0
ابوجهينه كفينك والحاله عموم00
وايامك بالمثل مزاجا زنجبيلا000
****************************
اذكر من على ذكرى جلسة قهوتك تلك بعض ذكريات جدتى انها عندما حضرة من البلد الى البندر وجدت الن المنزل كله ايادى عامله فلم يكن هناك متسع من الوقت لفنجان جبنه الصباح وعمله فقام الوالد باحضار ذاكر البن المسحون وجاهز ليخف عليها معانات عملة او لغيره ولكنها (دقت ركن ) وقالت ان الصداع لايزال راكزا فيها فطالبت بمطالب ادوت القهوه (الكانون والفحم والمقلاية والبن ) وكان مالها عد ان بدات فى قلي البن وبدات رائحته مع تلك الاعشاب ..استنشقت نفسا عميقا من ذاك الدخان وقالت الان يكون المزاج زنجبيلا00
|
Post: #40
Title: Re: عندما يكون المزاج زنجبيلا
Author: ابو جهينة
Date: 02-27-2005, 10:42 PM
Parent: #38
عزيزي المبدع معتز تروتسكي
تحية بنكهة الزنجبيل
Quote: عندما يكون المزاج زنجبيلا
وكذلك عندما يكون كبسمة النوار00
والاوتار00
على شرفة الاوانى والفنجان00
وتبدا الاعشاب فى ممارسة العشق الالهى انسجاما00
والابحار00
زنجبيلا من ذاك المشوار00
الى قهوة فى حضرة الوطن 00
فى حضرة الاسفار00
يا قهوتها 00 |
جميل هذا الحكى الذي يمازج أركان المزاج بزنجبيلية تفوح حميمية ..
| Quote: اذكر من على ذكرى جلسة قهوتك تلك بعض ذكريات جدتى انها عندما حضرة من البلد الى البندر وجدت الن المنزل كله ايادى عامله فلم يكن هناك متسع من الوقت لفنجان جبنه الصباح وعمله فقام الوالد باحضار ذاكر البن المسحون وجاهز ليخف عليها معانات عملة او لغيره ولكنها (دقت ركن ) وقالت ان الصداع لايزال راكزا فيها فطالبت بمطالب ادوت القهوه (الكانون والفحم والمقلاية والبن ) وكان مالها عد ان بدات فى قلي البن وبدات رائحته مع تلك الاعشاب ..استنشقت نفسا عميقا من ذاك الدخان وقالت الان يكون المزاج زنجبيلا00 |
عبق الأشياء القديمة هي التي ترقد في حنايانا .. و الجدات و الأجداد لهم ترموميتر تجاه الأشياء المعتقة .. مرتبطون بها إرتباط ماء النيل بضفتيه ..
حفظكم الله
و دمتم
|
Post: #41
Title: Re: عندما يكون المزاج زنجبيلا
Author: ابو جهينة
Date: 02-27-2005, 10:46 PM
Parent: #38
عزيزي و صديقي معتز
Quote: عندما يكون المزاج زنجبيلا
وكذلك عندما يكون كبسمة النوار00
والاوتار00
على شرفة الاوانى والفنجان00
وتبدا الاعشاب فى ممارسة العشق الالهى انسجاما00
والابحار00
زنجبيلا من ذاك المشوار00
الى قهوة فى حضرة الوطن 00
فى حضرة الاسفار00
يا قهوتها 00 |
جميل هذا الحكى المنساب بجنزبيلية حميمة ..
| Quote: اذكر من على ذكرى جلسة قهوتك تلك بعض ذكريات جدتى انها عندما حضرة من البلد الى البندر وجدت الن المنزل كله ايادى عامله فلم يكن هناك متسع من الوقت لفنجان جبنه الصباح وعمله فقام الوالد باحضار ذاكر البن المسحون وجاهز ليخف عليها معانات عملة او لغيره ولكنها (دقت ركن ) وقالت ان الصداع لايزال راكزا فيها فطالبت بمطالب ادوت القهوه (الكانون والفحم والمقلاية والبن ) وكان مالها عد ان بدات فى قلي البن وبدات رائحته مع تلك الاعشاب ..استنشقت نفسا عميقا من ذاك الدخان وقالت الان يكون المزاج زنجبيلا00 |
إرتباط الجدات و الأجدادبمعتق المزاج هو كإرتباط ماء النيل بضفتيه .. مزاجهم لا يعكر صفوه إلا الإبتعاد عن هذه الطقوس القديمة ..
أيامك كلها زنجبيل
تسلم
|
Post: #39
Title: Re: عندما يكون المزاج زنجبيلا
Author: Raja
Date: 02-27-2005, 08:39 AM
Parent: #1
أبو جهينة العزيز..
جيتكم راجعة ومعاي قهوة تركي من بن "محوًج" تحويجة "العميد".. وهي أخطر تحويجة للبن في مصر.. حيث يضاف الجنزبيل والهبهان وجوزة الطيب وحاجات حلوة تانية للبن المحمًص وتطحن معه.. والبيشرب فنجان قهوة منه تاني ما بيغيًرو..
..
أحب القهوة التركي بـ "وش".. وهي تقيس مهارة البيصنعها من عدمها.. طبعا بحبها سكر زيادة.. أو على الريحة.. ومافي شئ في الدنيا بيخليني أشرب قهوة سادة.. حتى ولو في بيت عزاء..
غايتو يا أبو جهينة جنبنا "مقلة" بتاع بن على شارع الملك فيصل.. لما يطلًعو البن من الفرن ويفرشوه في الحوض عشان يبرد الريحة توزن الدماغ الما بيتوزن.. وعندهم اوقات ثابتة للقلي.. والريحة تجي لغاية عندنا في البيت رغم اننا أقرب لشارع الهرم من فيصل..
ما بعرف لو رحلنا من هنا نعمل شنو مع إدمان الريحة البتجينا في وقت العصرية..
..
برجع تاني..
|
Post: #42
Title: Re: عندما يكون المزاج زنجبيلا
Author: ابو جهينة
Date: 02-27-2005, 11:16 PM
Parent: #39
الأخت العزيزة رجاء
أهلييييين ( محوجة ) بكل تحويجة ( العمدة ) ..
| Quote: جيتكم راجعة ومعاي قهوة تركي من بن "محوًج" تحويجة "العميد".. وهي أخطر تحويجة للبن في مصر.. حيث يضاف الجنزبيل والهبهان وجوزة الطيب وحاجات حلوة تانية للبن المحمًص وتطحن معه.. والبيشرب فنجان قهوة منه تاني ما بيغيًرو.. |
..
حاجات تانية دي هي الجايبة الكيف .. سر الخلطة ..
| Quote: أحب القهوة التركي بـ "وش".. وهي تقيس مهارة البيصنعها من عدمها.. طبعا بحبها سكر زيادة.. أو على الريحة.. ومافي شئ في الدنيا بيخليني أشرب قهوة سادة.. حتى ولو في بيت عزاء.. |
المصريين عندهم حاجات غريبة .. يعني حتى القهوة يخلوها تعمل حداد على الميت و يخلوها سادة و حزينة ..
Quote: غايتو يا أبو جهينة جنبنا "مقلة" بتاع بن على شارع الملك فيصل.. لما يطلًعو البن من الفرن ويفرشوه في الحوض عشان يبرد الريحة توزن الدماغ الما بيتوزن.. وعندهم اوقات ثابتة للقلي.. والريحة تجي لغاية عندنا في البيت رغم اننا أقرب لشارع الهرم من فيصل..
ما بعرف لو رحلنا من هنا نعمل شنو مع إدمان الريحة البتجينا في وقت العصرية..
.. |
قدامك حل من إتنين : يا إما ما ترحلي أو أرحلي
ما رحلتي : No Problem و يستمر المزاج
لو رحلتي : قدامك حل من إتنين :
يا إما تجي كل يوم العصر أو تشوفي ( مقلة ) تانية
جيتي كل يوم : No Problem
شفتي مقلة تانية مزاجك حيتخرب و نقعد هنا بدون إبداعاتك ..
عشان كدة أنا بفضل إنك ما ترحلي
قوامك و سلمي على الوالدة
|
Post: #43
Title: Re: عندما يكون المزاج زنجبيلا
Author: Raja
Date: 02-28-2005, 10:05 AM
Parent: #42
عندما يكون المزاج زنجبيلا
|
Post: #44
Title: Re: عندما يكون المزاج زنجبيلا
Author: ابو جهينة
Date: 02-28-2005, 11:45 PM
Parent: #43
رجوية
عندما يكون المزاج زنجبيلا
زنجبيلا يكون المزاج عندما تكون هنا رجاء
|
Post: #45
Title: Re: عندما يكون المزاج زنجبيلا
Author: سارة حمزة
Date: 03-01-2005, 06:47 AM
Parent: #44
ابو جهينة
الجابني بخور التمان وريحة القهوة لكن للاسف لقيناكم كملتو
يا ربي بحصل البركة عارفها هي شنو البركة
انا كيفة قهوة شديد و بالجبنة وطقوسا كاملة
وقهوة التيرمس والبوتجاز دي ما بتنفع
اها منتظرين المزاج الزنجبيلي
|
Post: #47
Title: Re: عندما يكون المزاج زنجبيلا
Author: ابو جهينة
Date: 03-02-2005, 00:31 AM
Parent: #45
الأخت الأستاذة سارا حمزة
تحياتي و تقدري
| Quote: الجابني بخور التمان وريحة القهوة لكن للاسف لقيناكم كملتو |
عشان خاطرك نبدأ الجلسة من أول و جديد
| Quote: يا ربي بحصل البركة عارفها هي شنو البركة |
طبعا الجملة دي كنت بسمعها من مرة عمي الجعلية .. و لكن بكل صراحة ما بعرف معناها ..
Quote: انا كيفة قهوة شديد و بالجبنة وطقوسا كاملة
وقهوة التيرمس والبوتجاز دي ما بتنفع |
صدقيني يا سارة قهوة التيرمس و البوتوجاز زى قراصة الطاوة .. ما ليها غير الشكل و يس
| Quote: اها منتظرين المزاج الزنجبيلي |
مداخلتك زنجبيلية ..
و نواصل
شكرا عاى المرور البهي
|
Post: #46
Title: Re: عندما يكون المزاج زنجبيلا
Author: maia
Date: 03-01-2005, 10:00 AM
Parent: #1
العزيز ابوجهينة
مزاجك زنجبيلا
بحب جدا ريحة البن المحمص واكاد ادخل جوه علبة البن من جمال ريحتها واعشق منظر فنجان القهوة ذو الوش الما ليهو حد
وكل فنجان قهوة وانت بخير
|
Post: #48
Title: Re: عندما يكون المزاج زنجبيلا
Author: Elawad Eltayeb
Date: 03-02-2005, 03:35 AM
Parent: #46
كونجو بونا
|
Post: #49
Title: Re: عندما يكون المزاج زنجبيلا
Author: سارة حمزة
Date: 03-02-2005, 03:54 AM
Parent: #48
| Quote: طبعا الجملة دي كنت بسمعها من مرة عمي الجعلية .. و لكن بكل صراحة ما بعرف معناها .. |
شكرا جزيلا يا ابو جهينة
البركة دي المرة التانية من البن يعني لما تشرب المرة الاولة
بيقموا يزيدو الشرقرق موية ويحتوهو في النار اها دي البركة
وتكون اخف شوية من الاولة لانها ما بيزودها بن ومرات بيكون في دور
تالت
اها يا ربي بحصل ياتا
|
Post: #50
Title: Re: عندما يكون المزاج زنجبيلا
Author: ابو جهينة
Date: 03-02-2005, 05:25 AM
Parent: #49
دكتورة مايا ؟
وين إنت يا زولة ؟
مشتاقين جدا ..
و كيف الوالد و الأهل ؟
إنتي حسع وين بالضبط ؟ لسع بي هناك ولا بي هناك
| Quote: واكاد ادخل جوه علبة البن من جمال ريحتها واعشق منظر فنجان القهوة ذو الوش الما ليهو حد |
تشبيهك لجمال ريحة البن خلن ريحتو فايحة هنا ..
و في ناس بتشرب القهوة عشان ( يقرو الفنجان ) و خاصة الشوام ..
أرقدي عافية و بمزاج زنجبيلي
|
Post: #51
Title: Re: عندما يكون المزاج زنجبيلا
Author: ابو جهينة
Date: 03-02-2005, 10:59 PM
Parent: #50
العوض
غايتو دي قريبة لرطانتنا ..
ترجمة على الشريط يا الحبيب
|
|