الداخلية تعتزم إصدار بطاقة جديدة للأجانب من أصول سودانية

الداخلية تعتزم إصدار بطاقة جديدة للأجانب من أصول سودانية
سودانيزاونلاين.كوم
sudaneseonline.com
2/16 1:31ص
أعلنت وزارة الداخلية السودانية عن نيتها إصدار بطاقة جديدة تعمل على تسهيل تنقل السودانيين الحاملين لوثائق سفر وجوازات أجنبية من خلال جميع المنافذ السودانية، بحيث لا يحتاج معها حامل البطاقة استخراج تأشيرة دخول ولا القيام بأي إجراءات إضافية عند وصوله السودان من تسجيل واستخراج أذونات لزيارة المناطق الغير مستقرة.
وأوضح مصدر بوزارة الداخلية أن البطاقة الجديدة سوف تمنح للأجانب من أصول سودانية، بعد إثبات سودانيتهم، بحيث يتم معاملتهم كسودانيين وتسهيلا لجميع تحركاتهم على الأراضي السودانية، وسوف يتم استخراج هذه البطاقات بعد وضع اللمسات النهائية عليها من قبل سفارات السودان بالتنسيق مع وزارة الداخلية السودانية. وسوف تكون مدة صلاحية البطاقة خمسة سنوات قابلة للتجديد لخمسة سنوات أخرى.




بموجب البطاقة الجديدة سيتم معاملتهم معاملة كريمة كسودانيين وسيكون لهم الحق في الاعتراض على اي سلوك امني ومن حقهم عدم دفع ضرائب او زكاة لمحطات التحصيل المنتشرة حتى بين ستات الشاي. من حقهم بموجب هذه البطاقة ان يستمتعوا بكل ما يستمتع به السوداني من ضياع حقوقه في وضح النهار ويستطيع ان يشكو لرب العالمين. (لو ناس الانقاذ بيخافوا من الله ما كان عملوا العملوه في عبادو)

بموجب هذه البطاقة سيتم اعتقال اي واحد متفلهم وقليل ادب يتضايق من سين وجيم بتاعت الجماعة اياهم ويقول عايز يتصل بسفارة بلده. ستسرى عليه قوانين الاهانة التي يتلقاها المواطن المغلوب على امره. ويا بخته لو طلع في مظاهرة ، سيلحق بناس بورتسودان يرحمهم الله.

مدة الصلاحية خمس سنوات: يا اخوانا العندكم جوازات اجنبية ما تسمعوا الكلام ده، خمسة سنوات قال. الجواز السوداني كان مدته خمسة سنوات، ناس الانقاص ديل سووه سنتين، نقصوا عمرو وزادوا الضرائب والرسوم ، في حد قدر يقول البغلة ولا البقرة في الابريق.
واضح انو حكاية الخمسة سنوات دي والرسوم الرمزية دي عشان يدردقوكم بيها، بعد شوية حيعملوا التجديد سنوي واسماءكم في الكمبيوتر وهاك يا ضرائب وزكاة وترعة كنانة والرهد والوحدة الجاذبة

اوع تتغشوا،

الاخ زول

اشكرك

الغريبه المعارضه ما مهتمه بالموضوع خالص. افتكر انه هذا الامر الغرض منه تحويل هؤلاء المواطنين لمواطنين من الدرجه الثانيه! يعني لو انت سوداني وعندك جنسيه اخري ستفرض عليك الحكومه ان تشتري البطاقه الجديده ب 200 دولار مثلا! يعني حا يلغوا التاشيره ولن يكون في مقدور السودانيين مزدوجي الجنسيه السفر للسودان الا عن طريق هذه البطاقه! يعني بدل التاشيره حا يشترطوا عليك تشتري البطاقه بالاوامر! هذا الامر مقصود منه ايضا تشغيل شركات بعض محسوبيهم العامله في مجالات البطاقات والتغليف! يعني لمان يغلفوا البطاقه بخمسين دولار افتكر ما بطاله معاهم!!

من ناحيه اخري هذا الامر مقصود منه حرمان السودانيين مزدوجي الجنسيه من المشاركه في الحياة العامه في بلادهم!!
انا بستغرب انه الشخص عنده جواز يدوه بطاقه كيف!! طيب الفائده من الجواز السوداني حاتكون شنو؟ وهل الشخص لو عايز يسافر بجوازه السوداني للسودان بتكون ممنوعه!!

عادة الشخص بكون عنده بطاقه وبعدين تترفع لجواز مش العكس!! تعرف اي شخص يستخرج هذه البطاقه معناها اتنازل من جوازه وجنسيته السودانيه!

الناس العندها جنسيات مزدوجه حقوا تنهض لمقاومة هذا الامر!!!


اشكرك
عسكوري

الأخ زول واحد،،
سلامي
أعتقد بجانب بعض القيود، سوف تشكل هذه البطاقة ميزة لشريحة كبيرة من السودانيين، فمع هذه البطاقة لن تكون هناك قيود من الدخول للسودان في أي وقت، بالإضافة إلى التعقيدات التي كانت تتم في تسجيل الأجانب وبعض الأذونات التي يشترط استخراجها للسودانيين الذين يودون السفر إلى مناطق مثل دارفور والجنوب أثناء الإضطرابات، وأعتقد أنها مخصصة للسودانيين من حملة الجوازات والوثائق الأجنبية من دون أصحاب الجنسية المزدوجـة.

الاخ عسكوري

مشكور على المرور العطر

Quote: الناس العندها جنسيات مزدوجه حقوا تنهض لمقاومة هذا الامر!!!