Post: #1
Title: اسماء الجنيد.... جيتى انتى
Author: waleed500
Date: 02-01-2005, 03:21 AM
Parent: #0
جيتى انتى **** من دغيش رد الجواب ومن طعينات الحراب ومن عقابات الشياب من عبق نفس الصحاب من غرس تحت التراب وذكرى جدى الفى الكتاب وجيتى انتى…. من دوايه وعود ثقاب والمصالى والحجاب والصرارى الفى الجراب والعيون الشارده فى لون الرهاب خايفه من مطر السراب وحانه لى شدر الهشاب وصوت المطرتحت السحاب والبنيات الشباب فى دريبات العذاب وبرضو جيتى.. وما ختيتى.. **** وجيتى انتى .. من خدار طين الجروف.. من بياض قلب الشغوف.. من خيوط نسج الحروف.. من شعاع لون الطيوف .. من عشق زولا لهوف .. ومن نضم جيلا بشوف..
**** وجيتى انتى..
من نفس ريق الاهل .. من بيوت رويانه طل .. ومن نزيف مطرا هطل.. من هناك فوق المقل .. ومن ذكر جدا مهل .. فى وشيهو دعوات تهل بالبشائر والامل .. وافراح قبيلة فى كل محل .. دفرت دموع وسط الوحل .. فشان تعيش رغم الحصل .. رضيانه بى فرحا فضل .. وعشمانه فى لمة شمل .. يسطع يطل نجما افل
ويرجع يعود من فات رحل .. وجيتى انتى.. يا الضل القبيل الما كمل ..
**** اسماء الجنيد مسقط
|
Post: #2
Title: Re: اسماء الجنيد.... جيتى انتى
Author: waleed500
Date: 02-01-2005, 04:02 AM
Parent: #1
الاستاذه اسماء خوالص التحايا وبقول
في هذاالصباح..
وجدت نفسى اغرق في حلمي
واتمرد في غبار دمعي
واختال بين ورود كلماتك
وجدتك أنثى بمليون انسه
تحمل هموم اهلى وطيبة اهلى
وحنين الماضى بين عينيك
يبحث عن اوراقي
وحقيبتك
السوداء
تحمل اشلائي
في هذا المكان
وقفت بين لهفتك
وجنونك
مثل الشوك الأبيض
موطن بلا زهور
يحتل عقلى
ينزع اسراري
يجبرني على الرحيل
الى كلماتك في هذا الزمان
وجدتك أمراة
مشردة بين فواصلى
يحتضنك المى
يزرع فيك الشيح
منذ زمن الحب
وانا انشد اللحن
وانا اسابق الفجر
وانااعانق الريح
واحزم حقائبى
لأسافر .. عبر كلماتك
|
Post: #3
Title: Re: اسماء الجنيد.... جيتى انتى
Author: abuguta
Date: 02-01-2005, 04:27 AM
Parent: #2
اسماء جيتى انتى بعد الغياب... جيتى من حلم السراب... حاملة فى فاهك رضاب.. وسلاما للصحاب... فى البوادى والهضاب...
جيتى انت زى نسمعة عصر... وزى قهوة مقلية بجمر.. معاك الحب والزهر... يانجما يغيب وتانى يظهر.. يادليلنا بين السحاب والمطر.. جيتى انتى وجاء وليد وجيت انا ومعاى المطر
اسماء وينك جميلة هذه الجداول والسرابات المخضرة والمسقية بحنية الوطن
شكرا وليد
|
Post: #5
Title: Re: اسماء الجنيد.... جيتى انتى
Author: waleed500
Date: 02-01-2005, 12:07 PM
Parent: #3
الحبيب ابوقوتة خوالص الحب والاستاذة اسماء زوله جيرة بالمتابعة والرصد وكلماتها تنبع حنية وطيبة وصدق ممزوج باصالة سودانية حقيقيه
|
Post: #4
Title: Re: اسماء الجنيد.... جيتى انتى
Author: waleedi399
Date: 02-01-2005, 11:53 AM
Parent: #1
ياااااااا انا يا سيد الاسم ..
لك الود والتحية ..
وللاستاذة اسماء خالص الشكر على هذه الروائع والدرر النفيسه ..
وساعود اليك .. لانهل من هذا الفيض مرات
|
Post: #6
Title: Re: اسماء الجنيد.... جيتى انتى
Author: waleed500
Date: 02-01-2005, 12:19 PM
Parent: #4
وليد يا نديدى شكرا على مرورك هنا ورايح انتظر عودتك محمل بما طاب من روائع بت البلد سومة ما تجينا فاضى
|
Post: #7
Title: Re: اسماء الجنيد.... جيتى انتى
Author: soma
Date: 02-01-2005, 10:08 PM
Parent: #6
سلاااااااام يا اهلى الحنان الشوق وطن ..والود وديان .. جاريه عامه البلدان وساقيه كل مكان
اخى الحنين وليد 500 اب رايا سديد سلام يا با
حقيقة ادهشنى تعبيرك .. وكلامك المرتب .. بقيت اجى اتاوق وارجع يا ربى اكتب شنو ؟ اقول شنو للنضم المن الجوف ده ؟ حيرتنى وادهشتنى عباراتك السلسه .. اديت القصيده رونق آخر ولفحتها بى توب زاهى الالوان ووشحتها بعبارات زادت من رونقها ..وبساطتها
و ايضا فى حقيقة لازم تقال .. وهى ان هذه الابيات التى سميتها قصيده .. السبب الرئيسى فى وجودها بين طيات الكلام هو اخونا الشاعر الفنان .. ودعمى خضر عطا المنان نزل قصيده جميله تحت اسم جيتى انتى حقيقة كانت من اروع ما قرأت فى الاونه الاخيره ادهشتنى مفرداتها ..واعجبت بى الاسلوب وعطر دواخلى معانيها النبيله خضر عطا المنان هذا الرجل المسكون طيبه ومعروف بى وطنيته الصادقه كنت كل ما اجى اتاوق فى جيتى انتى .. تطلع بعد الابيات ردا له على ما كتب ومجاراه ايضا .. واكيد يااخوى خضر الاصل اجمل من الصوره.. واكيد انت وجيتى انتى اصل ماصل وشعر معتق .. لك التحايا العطرات والاحترام والتقدير والاذن منك لاقتباس اسم قصيدتك ايضا .. .......... والتحيه للاخ وليد 500 بلا حدود تيراب الجدود وكلامو الجميل .. تسلم وليد وربنا يقدرنى اسعدكم بقدر سعادتكم لى ولى وقفه اخرى معاك ان شاء الله اخى وليد شكرا خدار ورجعة ديار ...
**** اخوى اب قوته الخرزه والسيموته حبابك يا سقف الاهل حبابك يا المهل يا مطرا وخيرا نزل عم وطاف كل محل حباب طلتك يا ود الجروف والطين حبابك يا نسايم النيل .. والله قاعده لكن المشغوليات يابا .. العيد مبارك عليك يا ود البلد والعفو لله والرسول .. كتر خيرك انت يا ابو قوته للطله السمحه وسلم لينا على العقاب برا فرز وشكرا ليك لمة اهل فى نص الحوش ودعوات تبراك وين ما تمشى ...
*** وليد 399 حبابك يابا وكل سنه وانت طيب ربى يسعدك ويهنيك ويعليك فوق المابيك ويوهط العافيه بين ايديك شكرا ليك على الطله وحبابك من تانى
**** وليد500 سيد الدار كريم المقدار البكرم الجار لونت دارنا خدار الله يخدر دربك وينور قلبك
شكرا لن تكفى لك الود جداول محنه
|
Post: #8
Title: Re: اسماء الجنيد.... جيتى انتى
Author: waleed500
Date: 02-02-2005, 11:06 AM
Parent: #7
يوم لاقيتك .. شلت كلامك وكيف صريتك.. اتراجعت .. دفنت حنانى وجيت لفيتك .. قصة طويله .. لونها بدايتك واتمليتك .. فرشت كلامى ..جمب مخلايتك واترجيتك .. تنشر منو.. وتملا عبايتك .. واتحديتك .. انو كلامك نصو حكايتك شارب منك ..ولاقى عنايتك واتعديتك مشيت الخطوه اسابق جيتك واتحاشيتك عرفت الخوف الباعد بيتك وجيت ناديتك اتراجعت ابارى دريبك وتانى رجيتك واستنيتك اقرا حكايتك وما مليتك اتربعت طبقت وصايتك واتوصيتك اطوى الحجوه الفيها كنايتك وكم لوليتك اغنى حجاك الزرعو سقايتك واتحجيتك اسماء صديق الطيب الجنيد
اها فوق كلامك ده تانى بتقال كلام؟؟؟؟
|
Post: #9
Title: Re: اسماء الجنيد.... جيتى انتى
Author: waleed500
Date: 02-03-2005, 01:28 AM
Parent: #1
up
|
Post: #10
Title: Re: اسماء الجنيد.... جيتى انتى
Author: قرشـــو
Date: 02-03-2005, 02:02 AM
Parent: #1
الاخ وليد
لك الشكر على اللفتة الجميلة
الاستاذة اسماء رونق البورد بها يزدان ويزدهى وكلماتها الرقيقة دوما تعطر البورد وتجعله يباهى كل بوردات العرب ..
عودتها هى عودة الروح سيدى فالف اهلا بها وجيدا جات ..
|
Post: #11
Title: Re: اسماء الجنيد.... جيتى انتى
Author: waleedi399
Date: 02-03-2005, 03:18 AM
Parent: #1
ولـيد 500
جيت تاني عشانك وعشان ما تقول كمان جابني الدرب ولا جيت وهربت وعشان سوما كمان تقوم تديني دعوة تاني زي الاولى، جايك بــ:
لحـظـة شجـــن
رجفة قلم ..لحظات شجن انات دواخل ترتجى.. نفحات عبيرا مختزن رفات مشاعر تنتحب .. مركونه فى عمق الزمن.. تعبير انامل بالرسم لوحات تضم سهد الوطن.. وجع المسافات فى الدرب متكيه فى حيل الحزن.. رعشة قلب عايش هناك ودران بتاوق فى البدن زحمة احاسيس تبتهل ناجت غرام مليان فتن **** والنيل يقاوم فى الجزر امواج تصارع فى القدر يمكن يضاحك ضى قمر.. ويمكن يغازل غيم عبر .. حتى القمر ما بنتظر.. مرات يطل وهجو البسر مرات يسل سيف الصخر ذرات شعاع تكوى الفجر تلسع طيور فوق الشدر رجفات نجوم وكتين تمر تدفر حنين ضامى البدر.. والا البسيمات الفى الثغر محبوسه فى فاها البكر راجيه الصباح الكان بهر لمتين يطل لون المطر ولمتين يفوح نفس الزهر ويرجع يخط قلما يتيما
تحياتـي ..
|
Post: #12
Title: Re: اسماء الجنيد.... جيتى انتى
Author: waleed500
Date: 02-03-2005, 09:28 AM
Parent: #11
قرشووووووووووو خوالص تحياتى وينك يا رجل مدة طويلة ما شفناك واسماء الجنيد هى فاكهة البورد نتمنا ان تكون اونلاين دائما
399 وليد وجودك هنا بنور الحوش ما تجعلنا عايشين فى ليل... اكيد حبى
|
Post: #13
Title: Re: اسماء الجنيد.... جيتى انتى
Author: soma
Date: 02-04-2005, 08:35 AM
Parent: #12
حباب قرشو .. كيفنك يا عمدتنا ..كيف حالك وصحتك والعيد مبارك عليك يابا .. العفو لله والرسول .. طلتك بالدنيا والله يا عمده .. يعلم الله ديمه الشوق ليك ولى كلامك السمح ما ليه حدود.. كتر الف خيرك يا كريم التحايا ليك قدر طيبتك يا اصيل يديك العافيه يا ود ملوك النيل ..
*** وليد 399 حبابك اخو البنوت ياضل غشانا ما بفوت العافيه تبراك وين ما تفوت قول آميــــــــــــن شكرا وليد ..شكرا نيلين
*** وليد 500 جيتنا انت يا ود القبائل سندو قوى مو مايل والكرم فى وشيهو خايل يديك العافيه .. يا برقا لينا شايل الشكر ليك يا وليد سكر حواشات الجنيد واحترمنا ليك ديمه بزيد
|
Post: #14
Title: Re: اسماء الجنيد.... جيتى انتى
Author: waleedi399
Date: 02-04-2005, 10:47 PM
Parent: #12
Quote: 399 وليد وجودك هنا بنور الحوش ما تجعلنا عايشين فى ليل... اكيد حبى |
الرائـع وليـد 500 تسلم يا غالي .. هذه شهادة من اخ حبيب اعتز بها كثيراً.. ادام الله الود بيننا.. والتحية عبرك للاستاذة اسماء الجنيد.. التي صنعت جسر هذا التواصل بيننا ..
لكم خالص الود والتحية ..
ولـيـد
|
|