إلى شنتير ومن يهمهم الأمر سلام

عزيزى شنتير

تحية إعزاز و إجلال وتقدير و مودة

كثير من الذين يكتبون فى هذا المنبر المطلق أعرفهم منذ فترة و أنت واحد منهم.
عرفتك يوما فى بوست الترحيب بالدكتورعبد بولا حين لثم حاسة شمى دعاش من البطانة و عطر فواح من سيرة سيدى عبد الله حمد ود شورانى وكأنى أحسسته مستوحشا هذه التكنولوجيا, مستعجلا الرحيل بحنين دافق لمخلوفته و سنام هرعه وهو يقول:
نار فلانة الفى ضميرى سكنتى
قبالك براي مطعون وسايقه مكنتى
التاكسى البلف بى شارع الاسمنتى
هرعى المتلو يامخلوفتى منو أزمنتى
و قد بعثت داخلى حنين لكل السادة رضوان الله عليهم; أحمد عوض الكريم أبو سن الحار دلو , ود السميرى, ود الشلهمة, ودجماع, يوسف ود عبشبيش, الزين ود إبراهيم, عطا المنان ود مقوت و الصادق ود آمنة أو أب آمنة وقد ساءلت معه الريح فى ذلك اليوم:
عربا ليا يا ريح ما بتجيبى أخبارهن
قلت لى مبسوطين و زينه ديارهن
ياحليلهن كتير بضاروا من شين جارهن
و بعد الهجعة للضيفان بتوقد نارهن

فأنا ها هنا فى منافى الزمان و المكان أدعوك و كل من يريد أن يسهم لتأسيس بوست لشعرنا القومى السوداني من جميع أنحاء الوطن وبكل اللغات السودانية مع توفير الترجمة إن لزم ذلك .

لك منى محيطات من الشكر

بلةsicot

خالص التحايا00
Balla Musa
من اجل شعرنا 00
ومن اجل شانتير 00
فوق00

فوق لشنتير وموسي ودبلة الضكير

سيف مساعد
ليك التحية
إن شاء الله بعد العرس تجي تدوبي معانا


بلة sicot

الاخ معتز

لك التحية و غرة الاحترام

قلمك عفيف و كتاباتك رصينة و مفيدة و أداوم على قراءتها.


بلةsicot

بوست .... مختصر مفيد انا بدعم كل ما جاء فيه وبديكم جدعه ورمية تتمثل فى التزام منى بنسخ مجموعة اشرطة كاسيت لشعر (دوبيت ) عجيب ورهيب ، تسمعو تشنق طاقيتك وتتدرق فى الواطة انا عندى الاشرطة وبمشى محل اسطوانات يحولوها لسى دى وبجى هنا تعلمونا طريقة الانزال يا ارسلها لى زول ينزلها
شن قولكم

محمد حامد

سلام مربع و راجينك ما تأخر .


بلة sicot

بله موسى للرجال خوسى
ياخوى تدعو شنتير ولا ما تدعوه
تطلع شاعر ولا ما تطلع
من البطانة ولا الشكرية
دا كله ما قرضى
لكن الهامينى
من وين جبت الاسم دا
انا اسمى احمد الصديق بله موسى
شفت كيف ياجدى
جاى داخل على طووووووول
وواحد من احفادك قاعد وانت ما جايب ليه خبر
مرحب بيييييك
وبالله انت طولت هنا وانا ما شايفك
وانا حارس البورد زى مويه القمح
محلصك
احمد بله

عووووووووك خبت ابوقوتة وماشي لي جوة

حفيدى أبقوتة

إنت طيب و عقابك نعلو عافية

أها ما دام حفيدي تم النمة دي باقي حقت جد جدك الزين ود ابراهيم;
يا اب حلقة الرحيل عز العرب من يومو
قوم خترنا فوق بلد الطرية جسومو
................................
....................................

جدك بلة

مكرر

ديارى عزيزة وحنينات جميع حرومو
ماتعربد كتير بانت مع التريا نجومو

دا شنو يا ابقوتة يا ولدي السواقة البى إهمال دي.
أمانة عاد جدك الزين مو زعلان منك جنس زعل, لما قتلو شيتك السويتو دا قام لاحدى طوبة قبرو صقعتو في راسو.
إنت ياولدى بتدور تلحق أيمن دقلة?


أنعدل يا صبي و جيب نضم جدك الزين زى ما قالو.

جدك بلة

UP

كدى شوف النضم دا
وبعدين نتم النمة


بعد سنين طالت من يومك يالحبوب....
كبرت خلاص وعرفت خلاص
وصحيت يادوب....
سلكت طريق وضللت طريق
وانا ما عارف المكتوب....
بين تاجورى وام حماد
وعيدا للفكى عبد الله
وشدير على والسيال
البين الرمال مسكوب.....
بقيت انادى فى الحاحاى
والهاواب القريب والناى
وارصرص فى الحجار والطوب.....
وطلعت فى قوزا لمحمود
اى ياناس قطينة النيل
ياناس الجزيرة انجيت
انا بسعالكم عن زولا كان
من جمالة الشيل
وكان اسمه محمول فى العيون وقلوب.....
ياشيخنا عبد الله
وياشيخنا العبيد ابقوتة
ياعمدة جنى سليمان
الحكمت بين بحرين
واسمك عند الترك مرهوب...
وتمرغت فى رمال قوزنا الطويل
وشربت من مجعة ام طير
كاكن فيها وزازين اب حبل
مع جعار بنات خضرة
واشوف بهما هناااااااااااك لاقى
وكرا فى الخلاء منصووب....
وممرت على شيخنا ودبلال
ولمحت قببا لود بساطى والصديق
الكانو فى الشروق وغروب.....
اقول ياناس دحين ياناس
دحين كان فيكم زولا بعرف
جدى بله ود موسى ود عشكوب....
وشكاراتو سمعن قولى قامن من الترب
مارقات ضربن ثكلى راسه عديل
تسمع ويييينك وتسمع ووووووووب....
قالن منو النمة للحردلو
ويغنى الليلة فى الدوباى
وقال فى جدو قوافى عديل
متل قصائد المجدوب....
عشانك ات ياجنى
جيتنا من الخلا والصى
عشانك انت يالحبوب
بنحدثك عن مكارم العشكوب....
كان جدك السواى
وكان جدك العطاى
بقزقز للهوامل الشاى
عشان انت ما قدرو
ولا بتعرف جلال قدره
وينك انت من سدره
البحر الموسع مجره
بس كل القلنا فيه
كلام مكضوب
اسعال بحر اللبيض الفياض
عن زولا فضايلو عراض
كان بلبس البياض
وكان اكله كله بياض
دكك بقره لليلة قاعدة هناك
بنات خضرة بتلد تيمان
اللبن غرق الوديان
متلابا تقول غزلان
ماربطوه فى حيشان
وما نفخوه وسوه عبوب....
وناس حبوبة فى التكل
قاعدات يجمعن فى الفرص والروب
يسون فى ملاح ويكاب
يخلطن عليه طحين اللوب....





القصيدة طويلة ياخوى
وانا فى الدوام
كتبتها فى الهند

أبقوتة سلام

كلامك جميل وما زلنا راجين منك الكثير.

أرجو أن تحدثنى عن جدك بلة موسى.

لقد أسمتنى والتى العزيزة على خالى الأعز و عندما جئته شاكيا من هذا الإسم وجدته يسخر من أسماء زماننا و خصوصا إسم هيثم.

لك الود وربنا يكف عين الكفيل منك
جدك بلة

اهلا بي بله

حبابك عشرة


نرحب بك لحدي ما يجيك شنتير

د. عادل
لك التحية من شندي حتى أبو حمد

شنتير دا باقى لى راكب المحلى لكن بنرجاهو
كدى ماتناغمو لي.
بعدين مسعول من الخير , إنت أهلك الرباطاب دحين ما عندهم شعر قومى?

منتظرك و ما تقول لى زى أبقوتة بلة دا إسم جدك
تسلم



بلةsicot

UP

UP

العزيز عزة مَن أَحَب مِن الفحول اليتامَى .. الذين أتـمـثّـلهم كلما غشيني طيفٌ من الإحساس بالضعف أو إحساسٌ بالغربة التي عُقِدت سرّتها بسرة كل أبناء جيلي المايوي فولدنا غرباء. هام سوادنا الأعظم على وجهه، واستغاث أمثالي بأوتاد القلوب الواجفة من قبيل: ود كاكوم عقيد الزايلة والصادق ود آمنة .. وتاج الـمُرْغُماب ود شوراني .. وقريببي نسباً وروحاً الولي الصالح السفيه الطيب ود ضحوية ومن والاهم بثبات إلى يوم الدين. رضي الله عنهم أجمعين وغفر لهم ما تقدم من ذنبهم إن أذنبوا .. ولا أظنهم مذنبين بقدر ذنوب من قننوا الفساد والإفساد وركبوا ظهور العباد بسلاح الخبث والقوادة، والفهلوة المدرسية.

العزيز بلة ود موسى .. والله لم أر بوستك هذا، لأني لم ار البورد خلال الساعات الكم وعشرين الفائتة، لكني علمت به من صديقتي دومة الصينية (رد الله غربتها). وأوضحت لها إني "مَـتابَك" بمشغوليات لا يعلمها إلا الله، أقلها إمتحان سخيف لم يتبق من موعده سوى اسبوع واحد أحد. إلى متى سنظل عبيداً للامتحانات؟.

كانت لنا ساحة عامرة بهذا البورد، وانفضّ سامرها: أهل العوض ونزار حسين وسنجاوي وياسر محجوب محمد صالح .. و .. و … و .. إلى آخر أهل الله النبلاء.

اختصاراً يا عزيزي بلة ود موسى .. أنا مزنوق زنقة الكلب الأكل البيض، وقزقز بالدريش. لكن لك مني "سبَنْدِيّات" من المعلوم المخزون في "مطاميراً حريص حفّارْها". وتاني ما بقدر .. الزنقة حاصلة .. و"المجاز" مو مستعدل.

ود إريقِط .. بطحاني مولود سنة أربعة، حسب روايته عن نفسه. ولا أدري أهي سنة أربعة هجرية أم ميلادية!!!. ود إريقط من مبدعي و"مبدّعي" الشعراء المجهولين، ومثله رأيت في السباغ (الـعِـدّو زاكي شرابو) رجلاً من مجهولي عيال شكير متخصصاً في حفر المطامير (يعني حفار حريص) .. وكلاهما (ود إريقط والشكري حفار المطامير) مجهول، ولا يعلم سرهما إلا الله الذي وضع فيهما سره، ولا يبحث عن سر الله في خلقه إلا القليل من بني البشر .. قليلي الشغلة زيي كدي. ود إريقط (رضي الله عنه) مازال على قيد الحياة رغم إصراره على أن ميلاده كانت سنة أربعة. ذهب ود إريقِط قبل خمسة أشهر، أو أقل، إلى منطقة الزاكياب، شمال الخرطوم بحري، تلبية لدعوة من صديق مشترك بين كل أهل الله من همباتة ومحبي همباتة وحيران همباتة وشعراء وفقراء وصالحين باطنيين وبطانيين. استغل صديقنا المشترك وجود ود إريقط بمنزله واتصل هاتفياً بعمّي أحمد، الموجود بالولايات المتحدة الأمريكية (الله لا بارك فيها). ودار حوار، بين ود إريقط وعمّي، لا أستطيع سرده هنا لأنه لا يمكن كتابته بأي لغة مكتوبة. استعرض ود إريقط في تلك الليلة مقدراته الشعرية "الغميسة" وأفحم عمّي إفحاماً كاد أن يدفعني إلى الشماتة في عمّي؛ الذي أعتبره آخر من تبقّى من مخلوقات الله البشرية غير الملوّثة. أيْ وحاتك آ بلة.

قال ود إريقط في تلك المكالمة، من شعره:

فَـلّاخ العـتامير .. الكَبوب .. الكافِر
لَـحَـض الـجُدْوة .. واتضمْضم بعد مو وافِر
شِدير خور الـسقانيت أب رُمالاً دافِر
جـاهو يْحاكي رقّـاص الطنابْرة الـضافِر
--
رابْـطو القـاضي من دَرَتو .. وْمِتادِن وِدّو (وتْدو)
حـالِف سيدو لـ وَلْدة نِـياق ما يْـهِدّو
عنْدْ سوق أم حُفافة بْسوّي عادة جِدّو
كايِس رَضْوَة الـ مِن تَـبَّ كايِد نِـدّو
---
قالوا فلانة يا أب راس بالبطايِن خَــتّـت
مِـتْـماسِـك سَدُوها على الـعِـليو الـ نَـتّت
فُـجّـيـج بَـرْطَـم الفم الزكي الـ ما عَـتّت
أمسيت مِـنّو فوق نار القَـميرة مَـقَـتّت
----
انتهي كلام ود إريقِط آ خيري. ويشهد الله أنني دخلت في حالة (يعني في حالة يعني) بعد أن أسمعنيه عمّي، الذي وجب عليه الرد على كلام ود إريقط. وقد قَبِل عمي التحدّي .. وردّ على ود إريقِط بما يلي يا شيخ الإسلام. والواجب يقضي بأن يكون الرد من نفس الموّال (المنوال) ونفس "القاف" ونفس النفَس .. فتأمل ماذا قال عمي:
عمي أحمد بن عبد الله، رضي الله عنه كمان وكمان، قال:-

حَـبَـشي أمّـات خِدود الـ بـ هَـويدو مْـقافِـر
صَـنْـدَد .. عاني صَـنَـقاتاً بِـجيهِن طافِـر
قَـطَـع الوادي .. واديه الـ بِـجيه مْـسافِـر
قود هِضْليم .. وفور بُكْسي .. وْتِـعِـنِّـد حافِـر
---
أدْرَتْ .. وشَـتَّـى .. وانْـكال بالـحِبوب لا حَـدّو
سَـرْجو اتـحَـدّر .. الماهْـلْ الوِسادة مَـشَـدّو
بِـمْلا جَـرايْـدو في الناقة وْخَـلاهُ بْـقِـدّو
كايِـسْ رُضْـوة الـمِـتْـل الجواهِر خَـدّو
---
قالوا فلانة يا العيص فوق لِـوَيِّـن شَــتَّـت
رادّة عَـفاهُ شَـقْـراةً رَوينْـها أتْـشَـتّـت
عَـمْـرَة مَـجْـلِـسا الـ ليه النفوس أنْـحَـتّـت
كَـشّـف سِـرّي دون خاتري وْدَسايْـسو انفَـتَّـت

وكما قال مولاي أهل العوض وشيخي نزار حسين: الموت لا تخربو بالفرفرة. يعني الشرح ببوظ المسعلة .. لكن إت في نظري الكلام ده ما بِغباك .. وماك داير شرح .. وأكان درت .. ما في اعتراض.

يازول الليلة رجعتني تاااااااااااني للمُراح .. والعرجاء لمراحها .. لكن والله كما قلت لك .. مزنوق مزنوق مزنوق.

وتقبل مني خالص العفو .. والمحبة .. والخوة .. مي خوة قِرِش، لله.

شنتير .. في لحظة مزاج مو مستعدل.

وإلى اللقاء في مكانٍ آخر.

شيخ العرب
اقطع ضراعى كان كنت فاهم حاجة
علا قول لى ياشنتير عمك دا فى امريكا
وبعرف كلام زى دا... علي الطلاق راجل
اسع نخليك تجضم نضم الخواجات
ما دام جضمت نضم العرب
اها يا بله شنتير قال قولو....كدى ورينا نمك
من البحرى القجرى
ولقدام

أب قوتة
حبابك عشرة

يا ابحلقة الرحيل عز العرب من يومو
قوم خترنا لى بلد الطرية جسومو
عيب ود الفراش كان يمشى فى البتلومو
عريان العرض ما بسترنو هدو


بلة

سلام يا يا زميل..


وسلام لشنتير

انا جيت اسلم
وأخت طوبة دومة لما يفك أسرها

كيفك يا دفعة

إنت ما بختو معك طوبة إنت معاك بركات جدك أوسلى - ينفعنا بى جاهو عند بوش.

بلة

الغلى شنتير
لك التحية محمولة مع أرواح كل الذين ترنموا و نموا للجمال و الرجولة والفحولةو سوامق الأدب.
العزيز لك المودة و نحن نلتمس المعذرة للهلال عند غيابه لأننا نعلم أنه يضئ في مكان آخر, ولا نزال فى الإنتظار لأننا برؤيتك نبدأ أصدق العبادات و نختمها.
شنتير الفحل الإمتحان تب ما تقصر فيه نحنا ملحوقين , وهناك تمثل فيه روح جدك ود ضحويه و أهلك تماسيح أم رهو وعمك أحمد ود عبد الله.
عندما ذكرت عمك أحمد فى أمريكاو بهذا النظم الفريد خطر بذهنى ذلك الطود الأشم بأرزونا والذى جعل من مرابعها بطانة أخرى صاحب الصوت الشجى و الكف الندى سيدى أحمد الفرجونى رضى الله عنه. وإن لم يكن هو فهذا يعنى أن بأمريكا الصفا و المروة و بينهما نشد الإزار و الرداء عند الشوط السابع , وإن كان هو فندخل عليه من باب السلام و نحييه عند بداية كل شوط.
فى رجاك عندما تحضر سأحكى لك ما قاله معتز أبو سن من زعل الشكرية من إبراهيم العبادى...
وهل كان العبادى أبو الطيب ذاك الزمان يتصيد السمينة و يتكسب من الشعر?
كانت لنا أيام فى البالتوك مع أخونا جيلانى و شوقى و بت الخليل تمثلنا فيها المسادير وكل منا يركب أصهب خياله ونتحى به إلى التاية بت الأمين فى وداب صفية ...

تحياتى لمن ذكرتهم نزار وأهل العوض و محجوب و كل النجوم المنيرة.

أشوفك بى عافية و نحنا بنتحري الرؤية

بلة

كمل مقييس صبو منزل صاد
و كل ما اقول أكمل فيك أقبل صاد
الدرعة ام سلاحا للقلوب حصاد
طرفك كا المها مدفع نهودك صاد

كمل فيك مقييس صبو منزل صاد
و كل ما اقول أكمل فيك أقبل صاد
الدرعة ام سلاحا للقلوب حصاد
طرفك كا المها مدفع نهودك صاد

UP

حبابك

بله ودموسى

شنتير حبيب وقريب

والزاد فرحنا اب قوته معانا

سلام جاكم ..
عييييييييك من السُباغ أب عِداً زاكي شرابو ..
وعيييييييييك من حَـبَـشي أمّـات خِدود الـ بـ هَـويدو مْـقافِـر..

دا بوست عَدَلة راس ..بوستيكم دا ماني فايتو تب ..

* شنتير؟؟ امتحانات؟؟؟؟
عِلا يا اخوي (زنقة الكلب الأكل البيض، وقزقز بالدريش.)..دي كيفنها كمان؟؟؟

وتحايا كثيرة لصاحب البوست ..ومرحبينا عندك ..

اقعدوا عافية

قيسان

قيسان
مرحب بيك حباب خريفنا الجانا
فى رجاك شد الزمل وتعال