Post: #1
Title: زنقة كلب فى طاحونة
Author: alfatih
Date: 01-13-2005, 06:14 AM
Parent: #0
زنقة كلب فى طاحونة
الباب متاكا بحزمة شوق
طّير صفير الريح شبابيك الغرام والذوق
دكاها دك
شلّت بين مساماتا الوهج
تقول شنو ...
ما الباب البوهية طارت من سواعدو
اذا اردت ان تفتح ليك طريق
انقر شوية على الحريق
الشدر كان نشفت عروقو
برضو بيكون حريف
فى دخول البيت بريق
قال ذلك النجار
القعد جنب الباب وفيهو احتار !!
دة شنو دة ؟
يكون شمار ؟
طارت نتوءات القماش هناك
واحد قال شوف الحمار !!
مزنوق بالمخدات
وفى رواية اخرى ... اللبدة كانت فى السرج
مرق الحزام تحت الجيوب
مرق الحرام تربط بيهو اوتار القلوب
ما شال نفس من الصباح مشدود وتر
من الصباح دنقر خشيمو على التعب
يسوى شنو ؟
ما الكلب مرق طيران دافرنو تر
ريحة اللبد مشوية بشوية شدر
ياخ ما تقول افتح المتاكا القبيل !!
قول اى حاجة ..
قول الجاز عطّل عضمة شليل
او كأنك ماشى زى ما حاسى بالشئ التقيل
هوهو ... جر يا ...
ما بفلعك ... لا تخاف الفلق بالمنجل التحتك
لا شفت عضمة سوبر ماركت زمان
لا اكلت من وجع الفتافت ... بختك
كلب زى المخدة من الريش الشايلو عندك
شفت كيف ... !!
اسرج معاى حمار الوحشة لقدام
شفت زيف ... !!
اركب ولا تعاين للخشوم الكحة فرتقت اسنانا حرف حرف
شوت حريف ...
صنقع للشبابيك المكهربة بالرتاين فى الخريف
ياخ انا قلت ليك امرق من الطاحونة وتعال
وتاكى معاك الباب براحة
ألبس سفنجة الزهج المخرومة حتة نعال
لفلف عيونك من الشمس
باللبدة او الحزام الناكرو الحمار ... لبستو ؟
شال ؟
ما شال .. ما قصدت شال يشيل
القصد يا كلب الشال المغتغت فى الصقيع
جر ... جر .. انا قدرك يا شنيع ؟
هو هو بعيد قبل ما اكلم ليك حمار الوادى الوديع
امشى تكلم شنو ؟
الحمار مسروج فى سهلة ربيع
الحمار داير يعرس فوق مرتو اربعين بص سريع
كمسارى المحطة نزل براهو قبل ما المشوار يضيع
افتح الباب يا ... لضيع
ما قلنا الباب متاكا ... يعنى مخرم بشاكوش رفيع
ازميل بينطق طرنقاع .. فقع ودق ...
غزلان قطيع
يا سيد الطاحونة هوى ... حمارى ما وقع فى عينك ؟
انت زول بليد ؟
الحمار دة اذا وقع فى العين ... العين دى كانت كويسة وكت دة ؟
|
Post: #2
Title: Re: زنقة كلب فى طاحونة
Author: حبيب نورة
Date: 01-13-2005, 06:20 AM
Parent: #1
الفاتح
الله يضرّك!!!!!!!!!!!!
|
Post: #3
Title: Re: زنقة كلب فى طاحونة
Author: alfatih
Date: 01-13-2005, 07:00 AM
Parent: #1
حبيب نورة
يا انت يا كل الامان
ربنا يلمنى فيك والممسوخ هناى
غايتو ... الحب مشاعل محمولة جوا
بس ما تقول لى اولمبياد
ياخ الغنية دى بحبها حب
اهداءك بشبهك
|
Post: #4
Title: Re: زنقة كلب فى طاحونة
Author: معتز تروتسكى
Date: 01-13-2005, 08:24 AM
فتحوح00
زنقة سخل فى تكل كيف؟؟!!!
|
Post: #5
Title: Re: زنقة كلب فى طاحونة
Author: alfatih
Date: 01-14-2005, 07:09 AM
Parent: #1
تروتسكى
السخل الجماعة قالوا دايرينو للعيد فى رحلة فى البان جديد
وبرضو فى رواية اخرى عملوعو فروة للتسبيح
بس اوعك تمشى لحبيب نورة يوم العيد
|
|