Post: #1
Title: جيتـنا تقـدل يا( سلام ) .. مقاطع للوطن
Author: خضر عطا المنان
Date: 01-12-2005, 09:59 AM
Parent: #0
المقطع الأول :
من شـرايين التمنـي
ومن عيون طفلن بغني
جيــت تفتـش ويـن بـلـدنا
من صـرخة الأم البتبكي
ومن معاناة زول بيشكي
وآهـــة اللغبــش ولــدنا
جيـــــتنا تقـــدل يا ســـــــلام .
*************************************
المقطع الثاني :
من عيـون سـهر اللـالي
من جبال ..من قمة عالي
وبســـمة التربال صـمدنا
كـان طـــلوعـــك يا ســـــــلام ..
جيت تفتش وين بـلدنا
ويـــــــن بـلـــــدنا
شاقي درب الصخر تسأل
شــايل الشـوق للأهل
ولى وطـن كان عز سـندنا
والمـنـى الراجــنو قــــــدام ..
ياما بيك بلحيل فرحنا
لو معاكا يطيب جرحـنا
وفيـكانحضـن نور سـعدنا
ويـرقـص الكـل في انـســــجام.
*******************************
المقطع الثالث :
وأصـلو يادمعة جـدودنا
فاض أسانا وفات حدودنا
ونحــن بالمليــون شــردنا
الأمان فارق دروبــنا
وخيم الأسى في قلوبنا
ويـاما صـلينا وســــجدنا
فـي انـتـظـارك ياســــــــلام..
********************************
المقطع الرابع :
من أرامل ..من يتامى
من دموع وطنن تسامى
وعاش هناك فوق الغـمام
جـيتـنا تقـدل يا ســــــلام..
من دموع كل الغـلابا
ومن عرق ناسن تعابا
وحـلم عايش في المـنام
جـتينا تقـدل يا ســـــــلام..
من مخابيك .. من عدم
من خوازيق .. من ندم
فينا عاش .. سكن العيـون
جيتنا في الزمن الصعب
من محاذير .. من تعب
من مكايد .. ومن ظنــون
جــيتنا طـالع ياســــــلام..
***************************
المقطع الأخير :
جيتنا من وسط الركام
من هجير من دون غمام
ودمعة جـفت في المــحـــــاجر
جيتنا راكب الموج تقدف
ويا(سلام) لو كنت تعرف
أنت زينا جــيـت مهــــــاجر
رافع العـلم البرفـرف
ولونو لون زولن بينزف
عاش سـنين راجـيك وصــــابر .
** ** **
خضرعطاالمنان
كوبنهاغن/ الدنمارك
|
Post: #2
Title: Re: جيتـنا تقـدل يا( سلام ) .. مقاطع للوطن
Author: مصدق مصطفى حسين
Date: 01-12-2005, 12:52 PM
Parent: #1
يا سلام عليك إنت يا خضر
و يا سلام ...
هى فعلا دى أغانى ( الآن ) ،
يا ريت نسمعها من أجهزتنا الأعلاميه يصدح بها أحد العمالقه
فهذا هو التوقيت المناسب لسماع مثل هذه القيم و المعانى ،
بدلا من الربوب البنسمع فيهو اليومين ديل،
إديك ألف عافيه و يسلم فمك .
|
Post: #3
Title: Re: جيتـنا تقـدل يا( سلام ) .. مقاطع للوطن
Author: خضر عطا المنان
Date: 01-12-2005, 03:50 PM
Parent: #2
Quote: يا سلام
و يا سلام ...
هى فعلا دى أغانى ( الآن ) ..
فهذا هو التوقيت المناسب لسماع
مثل هذه القيم و المعانى ،
بدلا من الربوب البنسمع فيهو اليومين ديل .
|
فناننا : مصدق
بالفعل هذا هو وقت نشر قيم السلام ..
حتى لو لم يزل سلاما على الورق !!..
فالعبرة بقيمه وماتعنيه .
لك المحبة والتحية.
خضرعطا المنان
|
Post: #4
Title: Re: جيتـنا تقـدل يا( سلام ) .. مقاطع للوطن
Author: عماد عثمان
Date: 01-12-2005, 05:50 PM
Parent: #1
كم انت رائع ياخضر
تستطيع ان تخرج ما بدواخلنا
نيابة عنا وهذا هو حال المرهفين
ياريت نسمع مثل هذا الكلام
من اجهزتنا الإعلامية يتغنى بها
أحد الصداحين بدلاً من الهللويات
بتاعة اليومين ديل
لك خالص ودى وتحباتى
عماد كرنديس
معذرة :
تخريمة اليومين ده ما شايفك فى لقدابتنا
|
Post: #5
Title: Re: جيتـنا تقـدل يا( سلام ) .. مقاطع للوطن
Author: خضر عطا المنان
Date: 01-13-2005, 12:00 PM
Parent: #4
Quote: كم انت رائع ياخضر
تستطيع ان تخرج ما بدواخلنا
نيابة عنا وهذا هو حال المرهفين
ياريت نسمع مثل هذا الكلام
من اجهزتنا الإعلامية يتغنى بها
أحد الصداحين بدلاً من الهللويات
بتاعة اليومين ديل
|
عارف يا عماد صاحبك البشير مشى لأكثر من هللويةذاتها ..
سواها رقيص راسو عديل : مرة كاروشا !!! ومرة رقبة عديل !!!.
طبعا دا انعكاس طبيعي لما تردده أجهزة اعلامو الانقاذية !!!.
الله يديك العافية .. ومشكور لهذه الطلة البهية ياود كرنديس .
وبمر عليكن في لقدابتكن ان شاء الله .
خضرعطاالمنان
|
Post: #6
Title: Re: جيتـنا تقـدل يا( سلام ) .. مقاطع للوطن
Author: ست البنات
Date: 01-13-2005, 12:21 PM
Parent: #1
ومن خوازيق من عدم !!!
الخدر وليد عطا المنان ،
ربى يخليلك أيميمتك ،
والله ياسع ايامك ويغتيكا !
عليك الله كترلنا من :
من خوازيق من عدم
من خوازيق من عدم
من خوازيق من عدم
من خوازيق من عدم
وناطرنك فى اللقدابة ، وجييب معاك أخيانك عبد الرازق ، وعبد اللطيف ،فيحال حديسون زيين بالحيل !
ست البنات .
|
Post: #7
Title: Re: جيتـنا تقـدل يا( سلام ) .. مقاطع للوطن
Author: خضر عطا المنان
Date: 01-13-2005, 02:51 PM
Parent: #6
Quote: الخدر وليد عطا المنان
عليك الله كترلنا من :
من خوازيق من عدم
من خوازيق من عدم
من خوازيق من عدم
من خوازيق من عدم
وناطرنك فى اللقدابة ، وجييب معاك أخيانك عبد الرازق ، وعبد اللطيف ،فيحال حديسون زيين بالحيل !
|
والله يا ستهن قدر ما كترت من (خوازيق من عدم) دي لقيتها ما تساوي قطرة في (بحر
الخوازيق ) الغرقونا فيها الجماعة ديل !!!!.
لا ولسه صدقيني الخازوق الكبير في الدرب !!!!.. ودا حيبين لما تحين لحظة الحقيقة
وهي حقيقة بداية غروب شمسهم وتفكيك دولة ( العز والجهاد والشهادة والاسلام .. وبنات
الحور العين وعرسان الشهادة في سبيل الوطن !!!) .. شفتي عليك الله يا ستهن السودان دا
مسكين كيف ؟؟؟.
اها...أنا في طريقي ليكن في لقدابتكن ديك وحتما بجيب اي واحد من الشباب ديل ألقاهو
فوق دربي ..
الله يديك لامن يرضيك .. والعافية التكسيك من راسك لى رجليك .
خضرعطاالمنان
|
Post: #9
Title: Re: جيتـنا تقـدل يا( سلام ) .. مقاطع للوطن
Author: Muna Khugali
Date: 01-13-2005, 03:01 PM
Parent: #7
من دموع كل الغـلابا
ومن عرق ناسن تعابا
وحـلم عايش في المـنام
one day we will make the true peace
Muna
|
Post: #10
Title: Re: جيتـنا تقـدل يا( سلام ) .. مقاطع للوطن
Author: خضر عطا المنان
Date: 01-13-2005, 03:47 PM
Quote: من دموع كل الغـلابا
ومن عرق ناسن تعابا
وحـلم عايش في المـنام
one day we will make the true peace
Muna
|
العزيزة : منى
حتما سنلتقيه سلاما حقيقيا يعود في رحابه كل طائر
أخذت ريح الأنقاذ على حين غرة عشه لتجعل منه ( شجرا
يؤذن في الجنوب !!!!!) .. أنها تخرصات انقاذية بلهاء
واسلام ترابي موتور ومهووس ومعتوه مسربل بالغباء!!!!.
وهل كان أهلنا في الوطن أغبياء ؟؟؟؟؟؟؟؟؟؟.
مشكورة ياأخت الشهيد .. فمصطفى يا منى هو واحد من كوكبة
ستظل شعلة تتحدث لنا على مر الأيام والسنين عن شباب كم
هانت عليهم هذه الحياة من أجلنا جميعا .. فكانوا هم من
دفع روحه ثمنا وروى بدمه أرضا من أجل هذا اليوم الذي
بدأت الآن ملامحه في التبلور والقدوم .
لك مودتي .
خضرعطاالمنان
|
Post: #8
Title: Re: جيتـنا تقـدل يا( سلام ) .. مقاطع للوطن
Author: هشام مدنى
Date: 01-13-2005, 03:00 PM
Parent: #1
اخوى الغالى خضر
ماتنسان انا تحت الجبل من سنيين
Quote: جيتنا من وسط الركام
|
عارفك اصيل ودقبائل ما بتنسا رفقاء الطريق يا ود عطا المنان الاصيل
|
|