الركب ركب والما ركب بظروفو

سلاااااااااااااامات .........اهلنا ........يطيب معناكم ... كيف عاملين ومشتاقين ... جينا .... مع السلام ... واحتفالات الناس - مش الحكومة - بتوقيع السلام وطى صفحة الحرب ودا وبدون حذلقات و(فلفسة )، كلام كويس وبداية يمكن تكون جديدة للجميع ... ويا جماعة - وشايف ناس لسه منقرطة - بالله فى زول عاقل مممكن لو باى منطق يقول السلام وتوقف (محرقة الحرب ) شى كعب وشين وبطال ... لكن نسوى شنو فى الناس البس عاوزة تكون وجعه يعنى لو الزول منهم ضربتو نزلة يشتم النظام ولو صحى قافلة معاهو يشتم السودان ولو فشل اى فشل ولو شخصى يسقطو طوالى على السياسة والجبهة والشيوعى والحركة والترابى والميرغنى وحركة يونيتا ..
وزى ما قال سجيمان .......كرهتونا وانا بقول بالله (فكونا ) قديتونا بمواقفكم الراقصة دى يجى اتفاق سلام تقولو ما كويس وثنائى ...التجمع يفاوض فى القاهرة تقولو دا عقد باطل ، جون قرنق يجى نائب الرئيس تشتمو الزول قبال ما يقول (بسم الله ) فى منصبو الجديد........ على عثمان يخلى منصبو وينزل للدور الارضى تقولو ليه .... شنى الحكاية يا جماعة يعنى اى وضعية ما عاجبه الناس دى ...؟؟؟ طيب اليحصل شنو يعنى كدى كلمونا لانو الظاهر الناس الرافضة السلام دى ناس سيوبر لو جات حكمت البلد الخرطوم تبقى جنة ونحن خلاص يمكن نكون شعب الله المختار !
يا اخوانا باركوها وقالو (النية زاملة سيدا ) وختو الرحمن فى قلبكم واصبروا ويا خبر الليلة بفلوس بكره شنو ....بلاش وملح . .. وخلو الناس تستمع شوية بالسلام الجاى اقلو ياخى الناس الفرقتها الحرب تتلمى مع اهلها كان فى الجنوب ولا الشمال والبلد تاخد نفسها شوية وتنجم وتترتاح ، وزى ما قال بعض الاخوة فى بوستات تانية هى الفرصة هسة قدام الناس كلها و(الحشاش يملا شبكتو ) والما عاوز خلاص (يقطم ) وما ينجه لينا الحدث السعيد دا .
بعيدن يا اخوانا شنو قصة الثنائية القدتيونا بيها دى مما من الله خلق السودان دا الثنائية دى شغالة وخشم بيوت فى السياسة وبلا بره السياسة ما الميرغنى الكبير مع الامام عبد الرحمن جرو المرحوم الازهرى (خمسين ) بلقاء السيدين الشهير ونميرى عمل ثنائية مع الشيوعيين لغاية بعد داك ما ختوهو قرض بعد انقلاب هاشم العطا والجبهة عملت ثنائية فى زمن نميرى زاتو مع حزب الامة والشريف حسين الهندى الله يرحمو ضد مايو والشيوعيين نفسهم ، وماشيين بعيد ليه ما هسه د.تيسير محمداحمد عمل ثنائى (النغم ) والبطش والجبروت مع اسياس افورقى فى زول قال بغم والشيوعيين زاتهم هسة ما عاملين ثنائى مع الميرغنى وكلو الناس (اتنين اتنين ) فى اى حتة مالكم ما جطتو بس خلاص لمن قرنق عاوز يعملها مع على عثمان خلاص القيامة قامت يعنى لو هسه كانت ثنائية الحركة الشعبية دى مع اى فصيل تانى كان نصبتو ابو الوطنية وابو النضال وابو الزفت زاتو .
يا جماعة دا اتفاق سلام فخلوهو يمشى لى قدام فهو على الاقل حقن الدماء زى ما قلنا بعدين الناس البتعيط وتجعر دى ما افهم من ملايين السودانيين بالداخل من حلفا ولى نمولى ورمبيك الرقصو وغنو للسلام واتكيفو وهسة بيدلعو جون قرنق وبيسموه (عمك ) وفى روح سمحة بين الناس والعامة مش زى ما بيصور لينا بعض المثقفاتية هنا بانو دا اتفاق ثنائى وشمولية جديدة وشركة قابضة وشركة ما عارف شنو ما الاتفاق دا انجز بعلم كل القوى الناس الجنب الحكومة دى خلوها طيب الناس فى التجمع دا جون قرنق مش معاهم ولغاية اخر اجتماع لو هو ما جا ما بيفتتحو جلسة ! طيب العزل السياسى هنا وينو فاذا جون قرنق كان بس مستغل الشيوعيين والاتحاديين وبعدين يفكهم عكس الهواء دى ما مشكلة السلام ولا الاتفاق ولا على عثمان ولا فرحة عيد السلام العاوزين تخلو لينا اعرج لانكم ما حضرتو ما شاركتو .
المهم ........الناس (مضت) و دى مرحلة جديدة فطس فيها المشروع الحضارى قام بعاتى نهض فيها مشروع السودان الجديد بقى (كضبة ) كلو عادى المهم فى مرحلة جديدة والركب ركب والما ركب بظرووووووووووووفو

أخونا حامد
سلام يا اللخو
أها إنت راكبة بتذكرة وحاجز مقعد ولا مسطح..

يا وراق انا هين ما زول اغبش وبس بشجع اللعبة الحلوة زى زى ملايين السودانيين لكن ودا راى شخصى انت عارف لو الحركة والحكومة قدرو يحصلو على حضور فاعل من حزب الامة فى المرحلة الجاية دى باقى الناس دى (السطوح ) بيكون ما فيهو طريقة ليهم
شكرا على المرور يا سمعه

Quote: انت عارف لو الحركة والحكومة قدرو يحصلو على حضور فاعل من حزب الامة فى المرحلة الجاية دى باقى الناس دى (السطوح ) بيكون ما فيهو طريقة ليهم

بس يا محمد ماهو ده الكلام ذاتو اللي إنت ما دايرو وهو تحويل الإتفاق من ثنائي لإتفاق قومي يستوعب كل الفعاليات السياسية.. غايتو نحن ما دايرين منصب بس في أشياء مهمة لازم كل الأحزاب تشارك فيها ومنها على سبيل المثال صياغة الدستور..

محمد حامد جمعة

ياخي كلامك دا ما كان سمّح نسفتو بي

Quote: لو الحركة والحكومة قدرو يحصلو على حضور فاعل من حزب الامة فى المرحلة الجاية دى باقى الناس دى (السطوح ) بيكون ما فيهو طريقة ليهم

اها انا القدامك دا من باقي الناس الساي...يعني القطر فاتني؟ انت قايل السودان
دا هو الحركة والمؤتمر وحزب الامة...في ناس غبش كتااااااار ما بعرفو اي طرف من
الاطراف دي وعمرهم ما صوتوا لي زول ولا حاربوا مع زول...مايكرفونات التصويت كانت بتجفل عنمهم ولامن
يمشوا يقلبوهن صادات يجوا يلقوا الخيم اتفرتقت والجمعية التأسيسية شغالة في
الرادي... دحين ديل خلولهم فرقة قطركم دا ما بدوّر بلاهم تب....

وتبريكاتنا بالسلام ربنا يدوّمو ويصفي النفوس بركة راجل كدباس

يا نزار ................... سلامات كميات
السلام ما اصلا سندو ودعمو وشيك صرفو النافذ ياهو فى ايد الغبشس لكن انا لما حددت ناس سيايين بعينهم وكتل حزبية قصدت ديل فى مقابل الناس الهايجة ساى وتلقى انصارهم خمسة ولا ستة نصهم قاعد بره

في ناس يامحمد حق الركوب ماعندهم
والشعب دا مفوضم تحت تحت كدي ارفضو اي حاجه حتى لوكانت انتخابات تحت رعايه دوليه
مش حاجه تحير

Quote: فى زول عاقل مممكن لو باى منطق يقول السلام وتوقف (محرقة الحرب ) شى كعب وشين وبطال ...

يا أخونا محمد جمعة ... ياخ الحرب دمرت البلد ...

ولقداااااااااااااااام سلاااااااااااااام وأمان ...

يا سمعه
يا ريت الناس تشارك كلها وانا ما بقول الناس ما تصوب وتصحح اى اخطاء فى الاتفاق لانو جهد بشرى فى النهاية لكن من حيث المبدا لازم اى زول يخت انو عندو حق بناء ودعم ومساندة للسلام ودعم التحول الكبير الجاى على البلد لكن القاصدهم انا الناس البس واقفة فى محطة (ما دايريين ) بتاعة استاد الكورة ديك وديل الحمد لله السيد الصادق ما منهم والرجل (حريف ) اثق فى انه سيكون كالعهد به صاحب حضور مميز فى اول منازلة انتخابية

من حسنات السلام
قولوا واحد

Quote: افادت مصادر مطلعة عن لقاء جمع الصادق المهدي بمبارك الفاضل واحمد المهدي بدولة الامارات المتحدة امس بغرض توحيد حزب الامة القومي الا ان عبدالرسول النور امين شئون الجنوب بحزب الامة لم يؤكد او ينفي معلومة اللقاء الذي جمع القيادات الثلاثة وكشف عبدالرسول النور عن اتصالات ولقاءات مكثفة تمت خلال اليومين الماضيين لتوحيد حزب الامة القومي ورفض في تصريح خاص لـSMC الكشف عن هوية القائمين علي امر اصلاح الحزب الا انه قال انها قيادات تتمتع بثقل سياسي وجماهيري وذات وزن سياسي داخل الحزب . واشار عبدالرسول النور الي انه تم الاتفاق بان تتم اللقاءات والاتصالات الخاصة بتوحيد الحزب في سرية تامة ودون ان يتم عزل فرد وقال ان الجهود ستتجاوز المحاسبة والمساءلة ومرحلة البكاء علي الاطلال علي حد تعبيره . واعلن عن برامج الحوار وقال ان الحوار قائم علي تأسيس حياة حزبية تقوم علي اسس حزبية اهمها تحديد الرؤية السياسية الواضحة والاتفاق علي الية لتحديد متخذي القرار وكيفية انعقاد مؤتمرات الحزب واختيار قيادات لتولي المسؤولية خلال المرحلة المقبلة

محمد حامد



تحايا

يا زول صدقت والله ... وهسة كل الناس بقت تشوف ليها طريقة تلملم اطرافها فالاتفاق يشكل ارضية وملعب جديد وثابت ومخطط والتحكيم فيهو اجنبى وبعد وشوية بتدور والزول البيمرق خسران ما عندو طريقة يهتف التحكيم فاشل

الأخ محمـد حامــد جمعــة،

الواحـد سعيــد جـدا انو الدمـاء حقنت، وغلت يـد الجبهـة التى امتدت لتقتيل الشعب وسـومـه العـذاب، ويعود الفضل إلى ذلك، بعـد الله، إلى الموجهـة المستمــرة التى لم تعـرف الإستكانـة أو الخوف من عصـابـة الترابى وعلى عثمـان محمـد طــه، حتى تدخل سيـدهـم الذى يكنزون الذهب والفضـة فى بنوكـه!! وقرصهـم فى أذانهـم حتى أذعنـوا ووقعـوا على السـلام وحقن الدمـاء عن يـد وهـم صـاغـرون.. وما هـو مقبل عليهـم من الحسـاب أكبـر من هـذا.
فأنا شخصيـا سعيــد بما حـدث فى هـذا الإطــار.. ولست ممن يقول أنـه "شئ كعب"

والســلام

ابو الريش تحياتى
تخريمة
ياخ كنت اود الوقوف على بعض منتوج اهل الفكرة - للاطلاع والمطالعة خاصة ان لهم رؤى فلسفية تغرى بالقراءة (الالتزام دا نخليهو شوية ) فعاوز خارطة طريق لمواد بخلاف ما هو منشور فى الموقع خاصكم
تحياتى مرة اخرى ........ ملحوظة : متذكر اسئلتك

الأخ زول ساكت
سلام وتحية
تصويب صغير:
عبد الرسول النور ليس له وضع في أجهزة حزب الأمة الرسمية وليس بالمسئول عن قطاع الجنوب بالحزب (ده كان زمان). بل أذهب بك أبعد من ذلك فإن الرجل بعيد في الوقت الحالي عن حزب الأمة.. لذا وجب التنويه.

تخريمة: غايتو ناس الأس أم سي ديل كضابين كضب يا ناس ويا أخونا محمد حامد جمعة إنت شغال مع الناس ديل بالله أديهم حصة عصر وخليهم يصححوا معلوماتهم.

يا وراق
لكن بالمناسبة المعروف فى الوسط الصحفى انو (عبد الرسول ) ما استقال او فصل من الحزب وبالتالى فان وضعيته تظل قائمة وبوصفه الحزبى ذلك لكن ساخذ ملاحظتك فى الاعتبار

أخونا محمد أنت راجل صحفي مفروض تسعى للمعلومة الصحيحة.
نعم عبد الرسول النور كان رئيس قطاع الجنوب في الحزب ولكن ذلك كان قبل قيام المؤتمر العام السادس، وبعد قيام المؤتمر هناك أجهزة جديدة (مكتب سياسي، تنفيذي)، فالأخ عبد الرسول لم يكن عضواً بالمؤتمر العام ناهيك أن يكون عضو بأحد الأجهزة المنبثقة عن المؤتمر. وبالتالي لا صفة رسمية له في الحزب وليس له الحق بأن يتحدث بإسم الحزب وهو يعلم ذلك لكنت البيقنع ناس (الأس أم سي) منو.

خلاص يا زول ......علم
ورحم الله امرئ اهدى الينا عيوبنا

اسماعيل الرزين
شكراً على التوضيح


وان شاء الجماعه الكضابين ديل المره دي يصدقوا
قول آمين

حبيبنا زول ساكت

Quote: وان شاء الجماعه الكضابين ديل المره دي يصدقوا قول آمين

آمين يا رب

شنو يا جماعة ما نرجع للنص الاساسى
خلاص ... قلنا امسحوها لينا فى وشنا

أخونا جمعة

تعرف أنا والله الاتفاقية دي فرحت بيها فرح... يومين انطط من الفرح... و من الفرح اضحك لمن خوفت الضحك يشرطني

ياخ السلام دا حاجة سمحة بالحليل.. و الحرب شيتن شين... كملت و ليداتنا و دمرت البلد .. الله يجازي الكان السبب

علا بعد فرحي دا كلو دحين في رايك انا موني مسيكين.. من ما ولدونا الحيكومات تفرحنا قايل كيفن?!... اها النحدسك.. الحيكومة بالوال تعمل لها شيتن كعب و بعد ما الشي العملتو دا يعزبنا و يفرم حشانا تجي الحيكومة توقفو و تعملها احتفالات و هيلمانات ... و نجي نحن نفرح و نطط و نقول بلا و انجلا
و عاد طوالي نحن فرحانين بالبلا الانجلا...


علا فرحانين كيفن عاد آبنفرح!!!!




!

دا ضرب الهم بالفرح .......شى كويس

Quote: افادت مصادر مطلعة عن لقاء جمع الصادق المهدي بمبارك الفاضل واحمد المهدي بدولة الامارات المتحدة امس بغرض توحيد حزب الامة القومي الا ان عبدالرسول النور امين شئون الجنوب بحزب الامة لم يؤكد او ينفي معلومة اللقاء الذي جمع القيادات الثلاثة

ما حصل..

اضافة واجبة:الامام الصادق المهدى حضر بدعوة من خكومة دبي للمشاركة فى مؤتمر شح المياه فى الوطن العربي بينما حضر كلا من السيد مبارك الفاضل و السيداحمد المهدى لمناسبة زواج ابن شقيق مبارك الفاضل وهو يحيي الفاضل عبدالله الفاضل وكانت المناسبة فى العين ولحظة وصول مبارك الفاضل للامارات لحظة مغادرة الصادق المهدى لها

يعني يا لنا بت عم مهدي ناس smc ديل طلعوا فشوش ساكت.. والله عالم غريبة..

اخونا ود جمعة......
تحية وتقدير على اهمية الطرح من ناحية التوقيت والموضوعية ..انا عجبنى الكلام ومبرر عجبى انك سبقتنى بشوية ورسلت الموضوع , واتعشم ان يكون لى اجرى فى النية والاجتهاد وحتى لايفوتنى القطار ارجو ان تسمح لى ولو فى عربية الفرملة ان ارفق معك الشحنة دى وانا عارف العفش فى قطار الهم على مسعوليتى .. وبضاعتى كالاتى..
يوقع النائب الأول لرئيس الجمهورية على عثمان محمد طه ، ورئيس التجمع المعارض محمد عثمان الميرغني في الأسبوع الأول من فبراير المقبل على الاتفاق النهائي بين الحكومة وتجمع المعارضة.وحددت الاجتماعات المشتركة بين اللجنة السياسية لوفدي الحكومة والتجمع ، التي أنهت أعمالها أمس الأول في القاهرة ، يوم الجمعة المقبل موعداً لإستئناف المفاوضات بين الجانبين.
وأبلغ عضو وفد التجمع المفاوض الدكتور الشفيع خضر «الصحافة» ، أن اجتماعات اللجنة السياسية حققت تقارباً كبيراً في وجهات نظر الطرفين حول القضايا الخلافية ، ورأى أن الجولة المقبلة للتفاوض ،التي ستبدأ الجمعة المقبل وتختتم بالسبت ، سيتم التوصل فيها لإتفاق حول النقاط الخلافية. وكشف د. خضر عن اجتماع لهيئة قيادة التجمع لإجازة الاتفاق قبل أن يوقع علىه النائب الأول ورئيس التجمع في الأسبوع الأول من فبراير المقبل.
ويشار إلى أن القضايا الخلافية بين الحكومة والتجمع انحصرت في معالجة أوضاع قوات التجمع ، ونسب مشاركته في السلطة ، ولجنة صياغة الدستور.
وعلمت «الصحيفة» أن احتفالاً كبيراً مماثلا لما تم في نيروبي أخيراً سيقام بالقاهرة، احتفالاً بتوقيع الاتفاق النهائي بين الحكومة والتجمع المعارض.
اهه ياشباب الخوف و الخلاف حول الثنائية تانى لزومو شنو؟!.....

الاخ محمد -سلام

اثناء اعوام الدراسة بشبه القارة الهندية مطلع التسعينيات كان عندما يحتدم النقاش مع بعض اعضاء الاتجاه الاسلامي وعندما يعجزهم المنطق ظلوا يرددون مقولة حمقاء اظن قد قالها الزبير محمد صالح وهى (قطار الانقاذ ماشي والبقيف قدامو بطحنوا) وكنا نقول لهم الحكمة الخالدة (اذا دعتك قدرتك الى ظلم الناس فتذكر قدرة الله عليك).
ارى في عنوان بوستك هذا قبس من ما قاله الزبير برغم ان مضمون البوست لا يخلو من ((تحنيس ))للناس بالركوب لكن الى اى اتجاه الله اعلم , يا اخي قضية بحجم مشكلة الجنوب لا يمكن التعاطعي معها بهذا التبسيط المخل على الرغم من ان السواد الاعظم من السودانيين رحبوا بالسلام ووقف الحرب لكن من حقهم ان يبدوا تحفظاتهم تجاهه طالما انهم لم يكونوا عنصر مؤثر في التفاوض وما تمخض عنه ولماذا هذا القلق من جانبكم طالما ان الما عايز يركب بظروفو.
مع خالص التحايا

الاخ محمد عبد القادر .........سلااااااااااام
انا قلت الركب يركب وما يقول لينا ليه ويملانا فقر ونظريات والما ركب برضو على كيفو وبظروفو و(شرحو ) والمهم المسالة ماشية ركبت بظروفك ومنطقك اوكى ... ما ركبت بظروفك ومنطقك ... اوكيات .... كميات ..........وبس

يمكن ان اركب فقط اود ان اضمن ان المكان غير
نجس لزوم اداء الاوقات الخمسة باطمئنان

ربك يسهل

الاخ محمد جمعة
كيف الحال والاحوال لعلكم بخير


اخي ربنا يبارك فيك على مجهوداتك وعلى اخلاقك العالية هذه




الماركب اكيد الظروف حا تجبروا انو يركب




كيمان تحيات

يعني سلم تسلم واقتلاع النظام من جذوره راحت شمار في مرقة ,خلاص المؤتمر الدستوري الجامع يا ناس القطر الماشي

سلم تسلم راحت شمار فى مرقه ساكت ..........المرقة ما لقتا .... بالمناسبة يا سيف شكرا على المرور اول مرة اشوفك فى بوستا لى ........شكرا كتير

طيب يا محمد جمعة أخوي .. معارضيين الكي بورد ديل ... يصطحوا ولا كيف ..ههههههههههههه

بالمناسبة بقرأ ليك كتير ما بداخلك خائف يقولو شغال معاك في سفارة الرياض

سلاااااااامات
ابو السيوف .......كيفك
قلت لى خايف يقولو شغال معاى فى الرياض ....... يا ريت اقدر انا اشوف الرياض حقتنا الورا المطار وشارع المشتل
كتر الطلة ....... وارمى لينا ما تيسر فى بوستاتنا

عزيزي محمد حامد : أحييك وأحيي حكومتكم الجابت لينا السلام، وده انجاذ ضخم وتاريخي ونحن بنقول الكلام ده بدون اي حسد، ونتمني ان يسير بنا هذا السلام نحو سودان جديد يهتم بقضايا المهمشين وقضايا الهامش والمركز ، وقضايا التنمية المتوازنة والمستدامة، والمشاركة السياسية للجميع حيث رفع اساطين الطائفية والكهنوت هذه الايام شعار (الثنائية) لضرب الاتفاقية، فالتحية لحكومتكم ولكل وطني غيور غير منحاز وغير متعصب والانتخابات القادمة ما حا تكون انتخابات احزاب حا تكون اتخابات المستقلين الاحرار اصحاب الكفاءات والقدرات في كل انحاء السودان ، ولتذهب الاحزاب الطائفية الى مزبلة التريخ لانها لا تساوي ثنمن الحبر الذي كتبت به اسماءها، فلم يجني اتباع هذه الاحزاب غير اسماءها من شيء ( فهم الشاهد والضحية)

كلامك كلو فى محلو ........صدقت