يضربك الضريب ، يسد نفسك ، الصلعة المقابلة الحر ، بلاء يخمك

يمتاز السودانيين بنوع غريب وعجيب من (الأدعية) وهى متداولة بين النساء والرجال
على السواء ، ولها موسيقى وأوزان معروفة مثل الوارد فى العنوان

أوحى لى الأخ عادل البدوى ، عضو المنبر ، بهذا البوست فى الرد التالى:

Quote: سلامات يازول يازول وأمسك عندك: حَمْرَا: زول داعاي جِنِس مداعاة مرَّة داعى حمارتو قائلاً: حاو...حاو تَحَوِي السما قَرَبَة* مَزَرَّط: داعاه حَمْرَا قائلاً: مَزَرَّط تزرِّط ال(مافي داعي نقرف الناس دي ساكت) علي ريقك. مَظِير: شحدَ مظيرٌ حَمْرَاءَ سَفَّةً فقال حَمْرَا: تَسِفَّها (عقرب يعني) ضَنَبَا شِبِر. شَلْهَتَة: نَسِيَتْ إحداهُنَّ لقبه (اسمو داك خليهو رايح في غضب الله) فقالت: يا بَشْتَنَة يا ولدي ما تفَوِّتْني. شِليل: داعاه حَمْرَا قائلاً: شِليل يشيلوك (جنازة يعني) ويقفِّلو نخريهم (والمعنى واضح). الحوت: داعاه حَمْرَا قائلاً: ما تْحِتَّ الآتو دا آلحوت يِحِتْ صَفَقْتَك (شُفْتَ الابداع دا كيف نظام كل زول في الدنيا دي عندو صفقة لما تصفِّر معناتو مِرِض ولما تِنْحَت معناتو، إنا لله وإنا إليه راجعون، اتْلَحَس). ياخ ما تفتح ليك بوست مداعاة خلِّينا نِتْفَشَّ في الناس دي. * وَرَد في لِسان عَرَبْنا أنَّ القَرَبَة ضربٌ من ضروب ركض الحمير وهو فيما يبدو الأسرع ويليه الحَرَارَة ثم الجَكَّة وربَّما أنَّني عَكَسْت المسألة لكنَّه، في النهاية، "حميري" فألعب به.

فهل نطمع فى مشاركاتكم لزوم التوثيق

يوثق عضامكم

فى حب الوطن

يازول يازول أقيف بي صِحَّك إتْ؟!، أكان كدي بِلَّ الرشوة بي ديل لامن أجيك صادِّي:

- أقيف تقيف مناحتك. أقيف تقيف علي إضنيك.
- أمِش تَمِش دا والبِهِل. أمِش تَمِش لي الحول. أمِش تَمِش فوق كِرْعيك*. أمِش تَمِش لامِنْ تَكْمَل.
- أقعد يقعد صَقْرَك.
- أرقد ترقد رُقاد أهل الكهف.
- أشرَب تَشْرَب الشِربَتو حميرا (ما معروف شِرْبَت شِنو لكين الشِرْبَتو لحقها أمات طه).
- أُكُل تاكل الحِمِت رِمِت (ودا شنو ما عارفو ويا ريت العارفين يورونا)
- هَتْ التراويح التَقُص ضَهَرَك**.

* المشي هنا غير المشي المعلوم.
** قالها أعرابي لجمله بعد أن إضطرَّ (الأعرابي طبعاً) أن يصلي صلاة تراويح لا ناقة له فيها ولا جمل.

عادل البدوى

Quote: ياخ ما تفتح ليك بوست مداعاة خلِّينا نِتْفَشَّ في الناس دي.

فشفاشك بالفقعة

يا عادل لكن الدعاء حقو يخلوه ليك

يا زول
اختا درب ود البدوى الكديد ده بلحقك امات طه
العريبي ده مسلط و وبهضرب زى الواقعو من جمل

Quote: أُكُل تاكل الحِمِت رِمِت

هسه جنس مداعاتو دى سمعت بيها

عصام جبر الله

ياخ صاحباك داعاى دعا

هو رباطابى ولا شنو؟؟؟؟

الله يكفينا شرو

وفي رواية أخرى:
- أبنيني اللشق حنكك
- يضربك الضريبي
- الغزالة التغطس حجرك
- تجيك الطاويــة حبالها
سوف أعــود

يا حلاوى ، أبنينى دى سمعناها كتير ، بس ما فاهمنها ، ممكن تشرح؟؟

ابنينى build me

العزيز زول يازول
أبنيني مرض قديـم ومعروف يصيب البهائم وينتج عنه انتفاخ البهيمة حتى تستحيل كالبالونة. ثم تمــوت والله أعلم

أشكرك يا حلاوى على التوضيح

طلعت شيخ عرب

يا حلاوى ، أوع يكون (أبنينى) ده (جنون البقر) والجماعة ما ناقشين

مالك يا اخوي قمتا تدعي ..ماقلنا ليك المرحلة الديكية .......بيجي بعدها المرحلة

الانت فيها دي الله يستر بعدها بتجي الحالة كم ؟1000

خضر بالودر

ان شاء الله القاصدنى ينضرا ومايضوق المسرة !!


ياربى يموت عدوك والمابشبهوك

تر لى غادى يترك الترا تور ام جر !!


وهكذا !!

نادية تشكرى على المشاركة

ونطمع فى المزيد من الدعاوى النسوية

سـلام، تعجبني أنواع الدعا أو المداعاة الما مفهوم ليها معنى، زي بتاعت ( الحِمت رِمت)، والظاهر إنو الأخ ود البدوي دا (من عندينا) برضو، وبرضو عندنا:
يِـرمي عليك سـاعةً أو في رواية طُرقاعةً (يعني صاقعة)
واحد مزارع عندنا أحضر مبيد حشرات مشهور واسمو الشعبي (القايم زُت)، وفي اليوم الذي رش به خضارو حصل أن دخل بالليل عدد كبير من حمير أهل الحلة في المزرعة ما أدى لهلاكها كلها، فبقى الناس يقولوا ( تـاكل الجابو موسـى)
ونواصـل..

الصاقعة الشمسها فاقعة

العين بي حسين والعملية سنتين

سافر سفر البن الدق وحرق

يا عريس طلعت داعاى

Isa

ذكرتنى حكاية المرأة فى ودنوباوى التى حلمت بالمرحوم موسى يأتيها فى النوم وهو راكب بص كبير وقال لها أنه سيملأه بناس ودنوباوى ، وحدثت بعد هذه الرؤية وفيات كثيرة فى الحلة وكانت المرأة تقول (وحات الله شفتو راكب فى البص) ، فصار النساء يأتينها زرافات ويسالنها (عليك الله أنا شفتينى فى بص موسى؟؟؟)



تسلم على المشاركة

القــر اللنفخــــــــك

الحلاوى

القر (بضم القاف) وهو البرد

طبعا الشرح للسغمبتونيين

الجن التعزلو على مقاسك
حلاية النخرة
سكرة ينِي الطرش الكلب
الحمى اليتبنوها بالعود
تصبح قرد
النعامة التزوزيك

وبجيكم صادة

دان دان عقرب القيزان التفرق الأم والأخوان
= تقشقش أهلك

يا مسافر

لا اله الا الله

إنت خطير

سلامات يازول يازول،

على سبيل التحيَّة ل "بلى يَخُمَّكم" المحفوظة حقوقها لفرقة الأصدقاء، متَّع الله أعضاءها بالعافية، نقول:

- كان جِدي، رحمة الله عليه، إذا نادانا وأجبناه ب "هوي" يداعينا بالقول: الهوا التبلعك، قول نعم، النعامة التزوزي بيك. (الهوا=الهاوية والله أعلم)

- وكان إذا أجبنا على سؤال ب "لا" يداعينا بالقول: يلوي حَنَكك وأكان لولحنا راسنا يداعينا: ما تلولِح راسك اللولاحة التلحقك أُمات طه.

- أما إذا أجِبنا أحدهم (ما نقدر نقولا قِدَّام جدي) ب "أبيت" وسمعها، على طول يلحقك ب: أبْبَبُّو (ودي ما عارفا شنو هو ما كتَّر خيري القِدِرْتَ كَتَبْتَها!)

لاحظ أنا لِسَّع ما جيتك بمداعاة حمرا لأني منتظر أنزِل بيها بدون تعريجة وعلى ذكر أنزل، داعا حمرا أحدهم نَزَل بحداشر في الكنكان قائلاً: نَزَلْتَ؟ ينزل ليك "الدبَّاي" بالهوج. "الدبَّاي"، ضيفو بالله للأسماء الغميسة، رجل مشهور بالغطس في النيل لإخراج جُثَث الغَرقى...شُفْتَ الابداع دا كيف؟ وتقول لي تمثلات الكتابة وموت المؤلف وما عارف شنو؟ طالما ناس حمرا ديل ما معروفين المؤلف ياهو الشِبِع موت. يديك العافية يا زول على هذا التعريف وغيره.

تحيَّاتي.

عادل البدوى

جدك كان صعب شديد



زدنا بالله عليك

إشراقة حيموره

سمعنا بسكرة ينى ، بس الطرش الكلب دى جديدة

يا زول...
الطرش الكلب دي إلا أشرحها ليك في المسنجر!!!!

سمعت بي (السكر اليدردقك في الخور)؟؟
تدخل عليك بالساحق والماحق... والبلا المتلاحق
يحقِنوك الجردقة
جوع بت البرقي الشوت رحطها
يكسر رقبتك ويسقيك مخها

يضربك دابى الجزيرة لا حنة و لاعديلة لا سيرة و لا ضريرة

و الله يا هشام زماااااان واحدة دعتنى زى ده أنا خايف منها ليومنا دا
باقى لى بس دابى الجزيرة،

نفتش و نجيك راجع،،

عبدالرحمن عزاز

دى دعوة فظيعة

لكن أبشرك ، ما تشيل هم ، فمثل هذه الدعوات لا تصعد للسماء
لأن السماء لا تقبل إلا كل طيب ، وهذا يعتبر من اللغو ، أكرر
ما تشيل هم فربك أدرى بقلوب ونوايا الناس من أن يقبل دعوة
كهذه

تسلم يا أخى على المشاركة

إشراقة

مبالغة مبالغة مبالغة

الله يديك العافية وفى انتظار الشرح فى الماسنجر

أعملى cut $ paste لإسمى:

يازولyazoalيازول

شكرا

المنادة المقرونة بالدعاء

محمد الحمي اليوت من يشوفك يقول اخير امس

عبالرازق الزرقة الضبانا يغطي عين الشمش

جلال الجلة البارودا يغلي

سيف السيف الجفيرو حرير

محمود الحمي البهبشوها بالعود

امشي تمشي فيك النجمه... اقعد يقعد نصك... قوم تقوم قيامتك... (افتتاحيه وكده)
يضربك الضريب شقاق العناقريب... اسكت سكت حسك... يشيلك الشال امي ديك

محمد محى الدين

حالتو دى افتتاحية

مبالغة لكن

بعدين (الضريب) ده شنو؟؟؟؟

أبراهيم عدلان لاشك أنك ود عجائز

تسلم ياخى

الليلة جيتكم


تجيك الجاتني في حبوبتي
الصاقعه التقع قدرك
ادخل تدخل فيك نصلا بلا عود(دي الحربه)
تمشي لي اضنيك
النجمة التخفسك
الحمى الدكاترتا يسنتتو

بجيكم تاني...............

الاخ يا زول
تحياتي

الامهات السودانيات ربنا يديهم العافيةويطول عمرم متخصصات في الموضوع دا
بس اتخيل لو الدعوات دي بتتحقق لكان نصف الشعب السوداني
مكسر ومرضان وحالته بالبلاء والنصف الاخر في خبر كان

طلعتي وين تطلع روحك
قومي تقوم قيامتك
اديني موية ابومي يشرطك
ماتجي...تجيك الطاوية حبالها
الرقدة الما منها قومة

اقعدي يقعد نصك...اي تصاب بالشلل والنصفي منه تحديداً حمانا الله

وتنوم السهر...دعوى بالإصابة بالأرق والسهر

تحياتي

العقرب التمكك (تمصك)

تمرق مرقة الدخان

الجن اليعلق قربو فيك

شماشى (دعواتك) فظيعة شديد

الله يكفينا شرك

tasneem

الأمهات الله يديهم العافية

صدقينى هذه الدعوات (لا تخرج من القلب)

وبعدها يحسون بالندم ، وتبدأ مرحلة (البلبصة) و (الصلح)

لا تخافى من دعواتهم ففى واقع الأمر هم يخفون الدعوات الطيبة
الصادقة كعادة السودانيين فى إخفاء الحب ، ولا أدرى لماذا

تسلمى

زول ساكت

إنت برضو ود عجايز

سلام يا شباب

عندنا اذا ضحكت بقولوا ليك

تضحك براهم ويعجبك خلاهم

يعني يخلس خشمك فاضي من السنون

الصاقعة التخلى مكانك حفرة.










ياجماعه والله وما طالبنى حليفة ...الدعوه دى بكتب فيها وبحس بجردل ملان طوب بنزل بى حبل فى حجابى الحاجز

ياخ ده شغل عنيف بصورة ما اعتيادية.

تماضر

شفتى جنس (النجاض) ده كيف؟؟

على فكرة السعوديين (وخصوصا النساء) داعايين بنفس المستوى
ودعواتهم خطيرة فوق ما تتصورى وبلهجتهم السعودية وتستخدم
بنفس طريقة دعاء النسوان فى السودان وبعد مرات فيها اختصارات
مثل (وجع) ، (بالحُمى) ، (بالمرظ) ويقصدون المرض وغيرها الكثير

حاجة فعلا تقطع النفس

تسلمى يا أختاه ، وربنا يكفيك شر كل دعوة قبيحة ويحميك من (الصواقع)

قولى آمين

abas

الدعوة البتحتت السنون لا شك خطيرة ، يكون ضاربو كلاى

الله يجازي محنك يا قطوع الطاري

طارق جبريل

(شكلك ود عمى) أنا هشام جبريل

تشكر على المشاركة

وصورة (الأمورة) حلوة شديد ، ربنا يحفظها ، وأوعى تداعوها

كيف تبدأ المرأة السودانية (دعوتها)

طبعا ، تسبق الدعوة ، تكشيرة فى الوجه
ثم تعض المرأة على اصبع السبابة (تعضه جد جد)
وفى نفس وقت (العضة) ، تقول (أحىىىىىىىىى)

ثم تطلق الدعوات حسب آخر كلمة قيلت

Quote: الصاقعة التخلى مكانك حفرة

زي مصنع الشفاء يعني؟؟؟؟؟

لا دى فظيعة يا شماشى

يضربك الضريب شقاق العناقريب نحن في العيد وانت في التعب الشديد ...



اقفل الماسورة ينقفل حلقك ان شاء الله ...



تعال اكل ان شاء الله تأكل الزغنبوت


الطرش اليقدد اضنيك ...



تشرب السم الهاري


ختها يختوك في ود اللحد


البس تلبس الشوك ..


اشرب تشرب الباردو يغلي الحجر ..


قوم علي حيلك تقوم صابق النبي ان شاء الله ..


ارقد ترقد جنب حبوبتي ان شاء الله



شوية وبجيكم صاد ...



ود الباوقة

ود الباوقة الظاهر الدعا السوداني ضرب من ضروب الفنون اللغوى

Quote: هَتْ التراويح التَقُص ضَهَرَك

رايحة لي ضحكة ولقيتها هنا. لسع يا عادل الجن الحميد ده ما فارقك؟ الناس ديل بديعين ومبدِّعين، وأنا عندي معاهم علاقة حب قديمة وبلاوي أخرى محبَّبة. تتذكَّر يا عادل قصة صاحِبنا القال لناقته: والله أقوم أكشحك بركعة واحدة ألحِّــقِك الخَتَروا؟.

وتشكر يا ود شيخ الدين يا رايق. وأخونا عادل ده آفة من آفات البشر.

شنتير الصديق الصدوق الصادق القاعد فى حافة الدنيا وسط الزلازل والمحن

الله يحفظك ، قول آمين