بلا أساسى بلا لمة

يا جماعة اساسى ما كوز ، اساسى إنسان سودانى جميل ، جيله يختلف عن جيل (الفطاحلة) ناس بناديها وشانتير ، وما شاف السودان بالطريقة الشافوها ناس الجيل السابق ، أساسى بيفتكر أن الحكومة الحالية هى أفضل خيار للشعب السودانى فى إنتكاساته المستمرة منذ الإستعمار ، اساسى أجبر للذهاب إلى الجنوب مع قوات الدفاع الشعبى ، وعندما ذهب إلى الجنوب لم يقتل أحدا ولم ينشن بندقيته نحو جنوبى أو حتى قط برى ، اساسى لا يقتل ، أساسى ممتلىء حيوية وفكر وأدب ، وهو يفهم تماما ما يدور حوله ، أساسى صاحب قلم سنين وفكر ثاقب ، إذا كان هو كوز كما يدعون فهو لا شك مكسب كبير للكيزان ، معرفتى اللصيقة به فى جده وفى لقاءاتنا السابقة المتكررة سوى على مستوى بورداب جدة أو على المستوى الفردى عندما يزورنى فى منزلى أو أزوره فى منزله وجدت إنسانا جميلا غير أساسى الذى يراه راشد الحاج أو دينق أو هشام هبانى ، اساسى سودانى جميل مثله مثل من ذكرت من الأحباب ، اساسى أمام ورطة وقع فيها جيل كامل ، اساسى يصلى ويصوم ويأكل الويكة ويسمع الغناء ويهز فى العريس وإمرأته تتدخن مثل سائر نساء السودان ، اساسى له رأى فى حكومة الإنقاذ وفى الحكومات السابقة وفى مشكلة دارفور وفى مشكلة الجنوب ، وآراءه واضحة للعيان ، وحتى النضال والمعارضة أساسى يرى أنها لا تكون عبر الكيبورد بقدر ما تكون فى الموائد المستديرة للتفاوض أو فى الخنادق وقوة الرصاص ، أساسى إنسان جميل ووديع بكل المقاييس ، لا تمله أبداً إذا جالسته أو حاورته فى الحقيبة وفى الفلسفة اليونانية أو فى موسيقى جيمس لاست ، هو مثقف ويعرف الكثير عن برشلونه وعن عالم الفلك وعن الإجتماعيات ، أساسى كتاب متحرك يحوى الكثير من الجمال والفنون والآداب ، اساسى سودانى أصلى جاءنا من برى النضال ، وهو كادح مثلكم يرغب فى إكمال زواجه وتحقيق أمنياته الشخصية له ولبلده ولأمة الإسلام ، أساسى ليس متطرفا ولا قاتلا ولا مثليا كما يدعون ، أساسى ممتلىء رجولة وحيوية وطيبة سودانية خالصة لمن يعرفه عن قرب ، أى أنه من النوع الذى يمكن أن تأكل عشاءه أو غداءه ويكون فرحا بذلك ، اساسى يحلم مثلكم وينام مثلكم ويعمل مثلكم وقلبه على الوطن مثلكم ، اساسى رجل ظريف وصاحب بديهة وذو شخصية مرحة وفكهة ويعرف النكتة طائرة ، اساسى محاور ممتاز يمكن أن يحاور البشير ونقد والترابى والصادق المهدى ويقول رايه فى شجاعة وجسارة ورجالة لا تحدها حدود ، اساسى من ابنائنا الذين يجب أن لا يضيعوا من بين ايدينابل واجبنا أن نحافظ عليهم ونمنحهم قدرا من الثقة والإحترام الواجب ، أساسى عسل وسكر عديل ، والماعندو صاحب زى اساسى احسن يفتش ليه صاحب


ياخ خلاص ، بلا أساسى بلا لمة

هشام

شيل شيلتك

من الليلة انت كوز

اساسي ما كوز ، اساسي كوز

اها من الليلة اضيف اسمك لقائمة الدبابين و اتباعهم

شيييييييييييييييييل شيلتك ..ز يدكم معانا ما بتحلك بعد ده

يا فيصل شفت كمية الوداعة الفى صورة بتك الحلوة دى ، والله تشبه وداعة أساسى

يا فيصل أستاذنك فقد حفظت صورتها فى جهازى

ربنا يحفظها ليك ، ومن هسع حجزنا البت دى ما تمرق من عائلة شيخ الدين

بعدين يا فيصل لو بتك دى كوز ، يكون اساسى كوز

فيصل ، الله يديك العافية ويحفظ ليك الأمورة

تسلم

Quote: يا فيصل شفت كمية الوداعة الفى صورة بتك الحلوة دى ، والله تشبه وداعة أساسى بعدين يا فيصل لو بتك دى كوز ، يكون اساسى كوز

والله يا هشام دا شغل تجرح وتداوي
اسع الله يمرقني من صقور البورد ديل ساكت

هشام

البنية مبروكة عليك

Quote: يا فيصل شفت كمية الوداعة الفى صورة بتك الحلوة دى ، والله تشبه وداعة أساسى يا فيصل أستاذنك فقد حفظت صورتها فى جهازى ربنا يحفظها ليك ، ومن هسع حجزنا البت دى ما تمرق من عائلة شيخ الدين بعدين يا فيصل لو بتك دى كوز ، يكون اساسى كوز فيصل ، الله يديك العافية ويحفظ ليك الأمورة تسلم

الله يعرس لي بعدد ما ذكرت اسمي قول امين

تحياتي

هلا هلا شهادة عمدة بورداب جدة
والله يا هشام بعد الكلام دا داير لي بدلة زي حقتك دي

يا عمو هشام سلامات

Quote: يا فيصل شفت كمية الوداعة الفى صورة بتك الحلوة دى

طبعاً خطر في بالي تعليق على النقطة دي لكن أنا زول خواف وما بتاع مشاكل ولساني ما طويل ذي أساسي ... لكن قطع شك أساسي ببديهتو القلتها دي حيكون عرف التعليق شنو.


والله يا عمو هشام لو ما كنتا متأكد انو اساسي مفلس ومقطع كنتا قلتا ليك شكلها العزومة امبارح كانت كاربة

اها زي لسان بدري ( الطحنية ) دا زاتو البنخاف منه ومن طولة لسانه
عليك الله يا زول شوف الوداعة هنا وتقول لي اساسي وديع؟
وديع الصافي يا هشام؟

فيصل
أساسى
بدرى

أحبكم موت

لكن احب بت فيصل أكتر منكم يا عواليق

جميل ياهشام تعريفيك للاخ اساسي بتاع الشبك والمشاكل
انا مصدق كلامك عن اساسي بحكم قربك منه ممكن يكون هو ماكوز منظم
لكن كونه يحمل افكارهم دي مافيها شك
ومرحب باساسي الكوز اللامنتمي اذا جازت التسمية

أبو يسرا

أديه فكر مقنع وهو يتبعو

أبو يسرا ، من ناحية كوزنة اساسى فهو ليس بكوز ، أما من ناحية فكرهم فدى عايزة مفكر جديد ومقنع مش بس لى اساسى بل لى كل سودانى

تسلم يا ابويسرا وتسلم يسرا كمان

عوووووووووووووووك

بتي يا حليلها

ده كلام ده


اساسي
انا عرفتها و عملت ليها باااااااااااااااااااااااااص

تقوم انت تقنطرها تاني

فيصل

إيدك معاى فى موضوع اساسى ده

Quote: أى أنه من النوع الذى يمكن أن تأكل عشاءه أو غداءه

لا حولا
اساسي البنعرفو ولا واحد تاني
اساسي لو اعطاك بونية
أجعص اخصائي عظام ما يعالجك
وتقول ناكل عشاه ولا غداه
إلا يكون سندوتش اخطفو واقوم جاري
اوعك من دي
هشام اخوي
يا لذيذ يا رايق

يا حمزاوى

ما تغرك (النفخة) دى ،

ده طيب وما (بعضى)

Quote: بلا أساسى بلا لمة

عرسو تما
والله يا اساسي بتعرف كيف تصوغ الكلمات وتعبر عن احلامنا وافكارنا احب كتابتك جدا واحب كذلك ان التقيك
بعد اذنك اخي الزول ادنيني فرقة معاك في بت نوبي
والله يا نوبي وما طالب حليفة بتك قطعت فيني شئ ما عارفه لكن كدة زي التقول دعاش
ييياه تذكرني بشئ ما مدفون لا ادري ما كنهه اقول خلاص لقيتو يبقي ذي الشعاع ما بتمسك ......تحملي للسودان للاهل ....او احتمال تذكرني نفسي..لالا لا استطيع ان اصف شعوري سوي ان كلما اراها (اي الصورة)اشعر بكل شئ جميل حتي تدمع عيناي
ولو كان يوسف كبير شوية (سنة وحبة شهور) ما كانت بتتحل مني بفقرا... بالضري ...باي حاجة

كل الجمال والامنيات الحلوة لها ولاسرتها وربنا يدها الفي مرادها

اتسمح لي بان احتفظ بصورتها في جهازي

اختك ام يوسف وفي رواية اخري بت عجاج

jaja

والله العظيم نفس الشعور إنتابنى تجاه هذه الصورة لحدى ما أبوها إتعقد

تسلمى يا جاجا ويسلم كل طفل سودانى بل كل طفل فى الدنيا كلها فهم ملائكة الرحمن

وشكراً للمشاركة

فيصل: أمش بخّر الشافعة

عينى باردة

بت عجاج

Quote: والله يا نوبي وما طالب حليفة بتك قطعت فيني شئ ما عارفه لكن كدة زي التقول دعاش ييياه تذكرني بشئ ما مدفون لا ادري ما كنهه اقول خلاص لقيتو يبقي ذي الشعاع ما بتمسك ......تحملي للسودان للاهل ....او احتمال تذكرني نفسي..لالا لا استطيع ان اصف شعوري سوي ان كلما اراها (اي الصورة)اشعر بكل شئ جميل حتي تدمع عيناي ولو كان يوسف كبير شوية (سنة وحبة شهور) ما كانت بتتحل مني بفقرا... بالضري ...باي حاجة

حلالك يا بت الشيخ


و بالمناسبة

البت دي ما بتي جد جد

و البت دي ما سودانية

أثيوبية 100%

و كاسره فيني ضلع ( بضم الضاد و فتح اللام)

اتضح اني ما براي

الله يجازي دكين هو صاحب الفضل في اني اغير الصورة

اي زول داير يحفظها يحفظ الصورة

و لكم الود جميعا

ام يوسف ربنا يخليو ليكي

Quote: البت دي ما بتي جد جد و البت دي ما سودانية أثيوبية 100% و كاسره فيني ضلع ( بضم الضاد و فتح اللام)

كده عقدت الشغلة

إنت ميييييييييييييين؟

تعرف يا فيصل (إنت مين) دى ذكرتنى حكاية طريفة ، كنا جالسين مرة مع والدنا رحمة الله عليه ويوجد معنا بعض الضيوف ، وكان الوالد عليه الرحمة أنصارى على السكين كما يقولون ، ولا يرضى أن يسمع أى كلام قبيح عن الصادق المهدى ، وكان أحد الضيوف لا يعرف هذه المسألة ، والحديث كما تعلم ذو شجون ، فانبرى المجلس يتكلم حديث السياسة ، وهاجم الضيف الصادق المهدى وقال فى حقه كلاماً شائنا أمام الوالد ، فما كان من الوالد إلا أن صاح فيه بأعلى صوته:

إنت ميييييييييييييييييين؟؟ وبعدها مباشرة طرده من البيت ، وكان الشخص الوحيد الذى يطرد من منزلنا طوال فترة حياة الوالد عليه الرحمة ، فلذلك لم أجد ما أكتب الآن ، غير أن أقول لك:

إنت مييييييييييييييييييييين؟

وإذا لم تكن بنتك ، فبنت ميييييييييييييييييييييين؟؟؟؟

تحياتى يا فيصل ، وربنا يحرس بنات الحبش اللهلوبات من قولة تيت

يعني يا هشام طردتني من بيتك

و انت برضو مكسر في بنات الحبش


سمح يا زول

بالعكس يا فيصل ، البيت بيتك ،

بس جيب البت وجيب معاك أمها

وكترو لينا من الجبنة

أحى أنا من الحبش

هشام قريبي

يعني أساسي دا طلع زول ساي ..



يا أساسي ..

الكلام دا قبل العرس ولا بعد العرس ..

وإنت يا معتصم رأيك شنو؟

زول ساى ولاّ كوز؟؟؟

زول ساي بمكنة كوز ..




بعد الكلام السمح القلتو دا يا قريبي ..
في كلام تاني ؟

هشام

Quote: بالعكس يا فيصل ، البيت بيتك ، بس جيب البت وجيب معاك أمها وكترو لينا من الجبنة أحى أنا من الحبش

كان لقيت بكلمك

يا كضاب

كان لقيت بتعمل (نايم)

Quote: أحى أنا من الحبش

أساسي طلع حبشي ولا شنو؟!!

أعمل ليهو شنو يا بدرى زولك اللايوق ده



وإنت كمان يا بدرى سمعت ليك بى كوز حبشى

الأخ العزيز هشام ...

سلام ...

أتمنى انو الناس كلها تكون مثلك ..انت رجل أصيل ..
تحياتي عبركم للاخوة المتداخلين وللاخ أساسي ..

ربنا يحفظكم

والله يا اخوانا الاطراء دا سمح بالحيل والنفس ما بتاباهو
لكن الرد عليهو صعب تب
غايتو انتو كسروا تلج وانا بكبر الحفاظة

أساسى

الظلم الكبير الوقع عليك هو الخلانى اكسر التلج

يازول كبّر حفاظتك ساى ، لأنك تستاهل جبل التلج الكسّر تايتنك

خالص التحايا
العزيز هشام..
تعرف يا ابو الشوش
انا يُخيل لى اساى ده ما كوز ولا شابه وكان بقت على الالزاميه دى مايهو كلنا خشينا بعدين هو زول دفعه شكلو عزة السودان الاولى...
نعم يُخيل لى انو مازول كوز لكن الناس دى دايره ليها تختته تنشن فيها وتفرغ فيها العبارات البتقولها وتسوقها واساسى كان اذكى منهم لمن حاول يقنعهم انهم ماكوز ماصدقو خلاص مشاهم على الحاله دى ..وخلاهم يسوقو بضاعة خسرانه
ودى طريقه قاعد احب اتعامل بيها لمن يتعامل معاك شخص على اساس انك غبى ..
لو حسيت هو عايز يتمسك بى كده فخليهو يعيش كده ويفترض فيك الغباء
فى النهاية انت اذكى منو ...
عموما ده تخمينى ودائما تخميناتى لاتقع ...

والتحايا النواضر ليك وكل الشباب هنا..

كلامك صح مية المية ، وأسأل مجرب

ياخ أساسى عايش معانا فى جدة وهو زول رائع جدا وراقى جدا وما كوز

ليه الناس ما دايرة تصدق ، ماعارف

تحياتى يا ملك

أشكرك يا رضا ، وإنت كمان امدرمانى أصيل

بالجد بيعجبنى حبك لى امدرمان وناس أمدرمان

عنصرية يعنى

بس عنصرية محببة إلينا جميعا

وكتر خيرك كمان وكمان

شكرا كوستاوى

مجرد مرورك اسعدنى

السلام عليكم

ازيك يا اساسي يا وديع


وديع و في حقو كعب كمان ههه
غايتو كوز ولا كورية دي ما مهم
المهمة العسولة دي
ايه رايكم عندنا هنا واحدة سوداني على حبشى..غايتو ما شاء الله
و ادوها الضحك دا سااااي
الله يحفظها و يخليكم.

شكرا يا سعد الدين

أساسى إنسان جميل

أظنك عايز تقول كده

بعدين وين صورة البت الهجين؟؟؟



تسلم

يازول 00 إنت الليلة شارب ليك حاجة وللا شنو ؟؟
قال تاكل عشاهو قال !!!
والله المخلوق دا ياكل عشاه وياكل عشاك ويقبل عليك ياكلك انت
بعدين بالغت عديل في حكاية انو { زوجته بتتدخن عادي زي النسوان }
هو صاحبنا قاعد ساي عزابي
والله كان عامل ليهو حفرة دخان في البيت الاكان بيعمل فيها { المندي }
قال شفع الطلح قال !!!

ههههههههههههههههههههههههههههههه

تعرف يا ابوحراز اساسى ده رغم السمنة الزائدة ، إلا أنه فى غاية الرقة ، وطبعا دى حكمة إلهية يعنى لو كل زول سمين كان قوى ما كان فى زول بيحكمنا غير السمان

السمان ديل ناس مساكين شديد ، بس إنتو ساى بتخافوا منهم يا ابحراز ، خليك راجل

بعدين مرتو بتتدخن أو ما بتتدخن ، ده شأن عائلى

ياخ قطعت مصارينا بالضحك

الله يجازي محنك

الأخ الصديق هشام
شكرا لهذا البوست الذي يجترح - بالضرورة - حوارا حول هذا الجيل، جيل الأخ أساسي. ولابد لي - كمعارض - أن أقر بشفافية، أنني أتصدى ببعض الحدة لبعض الاخوة والاخوات في "الضفة الأخرى". وربما لا يكون هؤلاء فعلا في "الضفة الأخرى"، إذ أن هناك "جزرا" بين "هذه الضفة" و"تلك التي تقابلها". ولا أنكر كذلك، إنه في مقابل فساد السلطة الحاكمة الآن، وبطشها وظلمها الشديد، فإن هناك أخطاء مريعة ارتكبتها - وما زالت - أحزابنا المعارضة، بل ونحن كمعارضين، في هذا المنبر وفي خارجه. وليس من سبيل للانكار بأننا كلنا ساهمنا بنسب متفاوتة في اشاعة جو عنفي مؤداه كارثة في بلادنا.
الصحيح في نظري، وكما نبهني اخوة أعزاء، أن نتفهم منطلقات الأخ أساسي وغيره من الاخوة والاخوات، ونحاورهم حول شتى أمور الوطن. صحيح أن بعضهم يخفي عن عمد توجهاته السياسية الداعمة والمساندة للمؤتمر الوطني تحت دعاوي "الحياد". لكن التعميم لا يجوز، فهناك شباب وشابات حاصرتهم هذه الظروف كلها، وتكونت قناعاتهم، وتوجهاتهم، بناء على تلك الظروف. علينا أن نحترمها، بل ونشجعهم على نقد التجربة السياسية كلها ، بوصفهم غير سياسيين، لكن يعنيهم - كما يعنينا - أمر الوطن. ملاحظتي على الأخ أساسي، إنه ينجر أحيانا لخطابات حادة. أتمنى عليه أن يكشف عن "الوجه الجميل" لشخصيته. يقيني أن لكل منا وجه جميل وآخر قبيح. علينا أن نبرز قدر جهدنا الوجه الأول.
لك يا هشام وللأخ أساسي احترامي ومحبتي

ولك مثله أخى الصغير واستاذى الأديب خالد عويس

لله درك يا خالد فقد قلت واوجزت وابنت كعادة الكتاب والأدباء وأرجو أن يتفهم الناس مغزى حديثك الشامل الطيب الواضح المعالم وأن تستفيد منه الأجيال

تحياتى يا استاذ فقد إزدان البوست بوجودك فيه

أخوك هشام