تماضر تحرم أخوها من حب البنات السمحات فى سودانيز أونلاين

يا جماعة والله معانا بنات هنا فى المنبر الواحد مكسر فيهم عديل من سماحتهم وظرافتهم وجمالهم وحلاتهم وعذوبتهم ورقتهم ، يزيدوا دلال وازيد تعذيب ، بس الواحد ما قادر ياخد راحتو ولا يفتح خشمو ، عارفين ليه؟ ، ياخ تماضر دى قاعدة تتاوق لى ساى ، ما مديانى فرصة أحب كلو كلو ، ونحن السودانيين ديل ما بنقدر نحب قدام أخواتنا ، عندنا فى السودان الأخت كأنها كائن آخر ، لا تخليها تحب ولا تنحب ولا تقعد تعاين ليك وإنت بتحب ، والويل والثبور و (الضبح) لو مجرد إكتشفت أنها بتحب ، والأخو فى السودان يجيد (النهير) و (الشخط) فى الأخوات ، ويقوم يمشى (يجكس) بت الجيران يعنى أنانية كده مبالغة

عشان كده بالله شوفو لينا حل ، يا نحظر تماضر من المنبر عشان نحب على راحتنا ، يا كمان (والكلام موجه للحلوات) تعالوا (نجكسكم) عبر الماسنجرات ، أحى أنا منكم ، وقد طفح الحب فى قلوبنا حتى فاض فى شكل بوستات فى الصفحة الأولى من منبركم العامر بحلاة الدنيا والعالمين ، ونحن عارفين أحلى من السودانيات الله ما خلق حلاه

بالله ورونا الواحد يحب كيف ، وأخته تنطط معاه زى الأرنب ما مدياهو أيتها فرصة؟؟؟؟

ولاّ كمان الورطة التانية الدخلت روحى فيها

صورة ابوى (الله يرحمو)

تخلى الزول يقعد (مؤداااااااااااب)

هشام يازول

بوريك بس ما تكلمها, كويّـس

Quote: بالله ورونا الواحد يحب كيف ، وأخته تنطط معاه زى الأرنب ما مدياهو أيتها فرصة؟؟؟؟

أنا ما عايز معاهـا مشاكل, تقوم تعمل بي (مسرحية).

هي براهـا مش قالت (نتزوّج) ؟

ياخي شوف, أول زول جاك يخطبها , طوالي وافق وأحلف بالحرام ختـم دمغـة

قول أنا أديتو وخلاص الموضوع دا منتهي,

كـدا (تخلص) منها نهائيا ما بتعتب البورد دا تاني,



العريس أول حرف من اسمـه

(لــ).


يلا سلام

أحمد الشايقي

يازول هووووووووووي
والله أختك عاقلة جداً
انت مفروض بعد كده تمسك ليك سبحة طويلة وتصلي على النبي

أحمد الشايقي
قال { لام } قال
دا يطلع منو يعني { لبيد بن ابي ربيعة }

يا أبحراز ، أنا الشى البعرفو ، السبحة زاتها مبنية على (الحب)

داير تلغيه ليه؟؟؟

أحمد الشايقى

برضو فكرة ، لكن اختى فقرية ، جنها تعاين لى وتقول لى فى الماسنجر (تقعد ساى ولاّ أكلم ليك المدام)

جنس دى الزول يحب معاها كيف بالله؟؟؟



والله الواحد بقى كان مشى السوق الشعبى وشاف ليهو واحده حلوة ، يتخيل ليهو بكرى ابوبكر ومنبرو وفقورية تماضر

يخوانا بمناسبة (تحرم) دى تعالوا أقول ليكم حكاية سمعتها أمس فى جده (بلد المحن)

قالوا فى جماعة عزابة فى جدة كانوا يوم الخميس مدورين قعدة رهيبة والعرقى مدور ومعاهم فنان والحلة كاربة وكلو شى تمام التمام وفجأة (العرقى) قطع منهم وكان لازم يمشوا يجيبو زيادة من (عنيكش) وطبعا الجماعة سكرانين لط وخايفين من التفاتيش حقت الشرطة نص الليل

قام واحد إقترح عليهم أن يمشوا تلاتة منهم ويقوموا يلبسوا لبس (الإحرام) بتاع العمرة ، ويمشوا يجيبوا العرقى ويجو

وقد كان ، مشوا وجو من غير ما زول يسألهم ، ورموا البشاكير ودوروا الشربة من جديد

جنس ده يسموه شنو؟؟؟؟؟

Quote: أحمد الشايقي قال { لام } قال دا يطلع منو يعني { لبيد بن ابي ربيعة }

لا يا أبوحراز

دا ما لبيـد,

لبيـد أنا عشان عايز (ألبـد),


بـس العريس حرفـه (الـلام)

لأنه كاتل الجدادة و(لامّي) بيضـها,


عرفتو مين؟

مساعدة من صديق , لانك صديقي يا أبو حراز,

هـو على وزن (وائـل) , كدا بس مقلوبة,


تخريمـة:

أنت ليه مهتم كدا تعرف العريـس اللقطة دا؟؟

تكوووووووون؟؟؟؟؟



أبو حراز (أنا بتاع مشاكل أوعاك)


قال باكستاني قال.

ياخ لؤى ده شافع ساى



أنا أديتو بتى

ما يجى يداقر لينا بطريقة تانية كمان

هشام يا زول
سلامات

Quote: ياخ لؤى ده شافع ساى أنا أديتو بتى ما يجى يداقر لينا بطريقة تانية كمان

هووووووووي يا زول
هسّع الشّايقي دا قال لؤي ؟؟؟
الشّايقي قال أوّل حرف من إسمه لام
وقال زي وائل كدا لكن مقلوبة
مش إمكن قاصد صدّيق رحمة ؟؟؟



طيّرتوها وقعدتو

ـــــــــــــــ

انا في البعيـد مشتـاق لهمسة من الوطن يـا نسمة
[email protected]

هشام يا زول قبل أسبوعين كنت في جدة وحضرت مناسبة وندمت جداً إني ما لقيت فرصة لدعوة بورداب جدة لتلك المناسبة لأني سافرت فجأة من الرياض في نفس اليوم وما لقيت طريقة أيضا للإتصال لعدم معرفة تلفوناتكم.. المهم فرصة وفاتتكم .. كانت حفلة معتبرة وسهرة حتى الصباح.
المهم خلينا من الجكيس والبنات الحلوات وقول لينا كيف تماضر تجي تطوف في عدد من دول الخليج وتفطنا نحن ناس السعودية خاصة ناس الرياض..
وبرضنا كنا محتفلين بيوم المسرح العالمي زي ناس الخليج.

حبيب بلدو

ياخ والله ضيعت علينا فرصة حلوة عشان نقابلك ، لكن زى ما بيقولوا الجايات اكتر من الرايحات ضرورى نشوفك المرة الجاية ، ده من ناحية ومن ناحية تانية دخول تماضر (كإمرأة) للسعودية لازم يكون معاها (محرم) والقوانين إياها الإنت عارفها ديك ، دى بيحلوها كيف من جنس العُقد دى؟

آدى كل الحكاية

الأخ هشام
تحياتي

Quote: ياخي شوف, أول زول جاك يخطبها , طوالي وافق وأحلف بالحرام ختـم دمغـة

أنا لها والله...حرم جيتك عديييل وداقي سدري..وليك على مش أمرقها ليك من المنبر دا..أجيبها هنا وتاني كان عاينت ليها عشره سنين ما تشوف وشها..ولا تعرفها..بس خيمه سوداء وماشيه...ويا حرمه أقعدي في بيتك..وهذا حرام..وهذا مايصير..والإنترنت ممنوع سدا للذرائع..أها قصرت معاك؟؟؟؟
بس إنت قول خير...عشان أرسل ليك توكيل للعقد..أعقد لي عليها وبعدين شاورها..كان قبلت الحمد لله..وكان ما قبلت بجيبها (بالطاعه) لأني خلاص بكون عاقد عليها..بس أسمع...ما تكلمها بالكلام دا..دا كلام رجال..خليهو بيناتنا..منتظرك..تحياتي

الزاكي

يازول أنا من ناحيتى أديتك تب ، بس لازمن من مشورتها ورأيها هى ، لأنو الشغلة دخلت فى الشريعة ، ومسائل العرس دى مزحها جد وجدها جد

ده نمرة واحد

نمرة إتنين

باقى ليك تماضر دى بتدمدم بعد ده؟؟؟؟

وختاما

تسلم يا نايل ، نحن لاقينك وين؟

أحمد الشّايقي
سلامات

Quote: بـس العريس حرفـه (الـلام) لأنه كاتل الجدادة و(لامّي) بيضـها, عرفتو مين؟ مساعدة من صديق , لانك صديقي يا أبو حراز, هـو على وزن (وائـل) , كدا بس مقلوبة,

عليك الله يا الشّايقي هسّع مع إنفلونزا الطّيور دي ألم بيض الجّدادة كيف ؟؟ بعدين هي تماضر ذاتها ما أعلنتها عدييييييل وعينك يا تاجر قالت ما يلزمنا ، خلّيني في حالي ياخ أنا الشّاكوش عامل لي روح معنويّة زي ما قال عادل إمام ..



قال لبيد قال

ـــــــــــــــ

انا في البعيـد مشتـاق لهمسة من الوطن يـا نسمة
[email protected]

Quote: بالله ورونا الواحد يحب كيف ، وأخته تنطط معاه زى الأرنب ما مدياهو أيتها فرصة؟؟؟؟

هشام يا زول

والله ضحكتني بجد عارف قصتك دي ذكرتني مقولة القطر فيهو مفتش





مودتي واحترامي

يا إنعام ، هو مفتشنا زاتو مفتش نصاح؟؟؟؟

ياخ دى عندها أكتر من عشرة ألف مشاركة ، يعنى لوغمزت بى قعر عينك ساى ، المفتش بشوفك

تسلمى يا إنعام

هشام
ما عندك حل غير تقوّي عينك ، وتخلّي قلبك حجر ، وتعمل ما شايف ،،، زمان كان عندنا لعبة اسمها ( عاما ، عاما ) ، واللاعب الأساسي يغمض عينيه ويحمل في يده عصا يلوح بها في كل الجهات ، والآخرين يحاولون النيل منه وهو يهددهم بعصاه ، ويردد ( عاما عاما ما بشوف بخبط الصوف ) ..
شوف زي الخبط ده :

بريدك

والله يا ودقاسم ياها زاتها عاما عاما

وأول عكاز خايفو يقع فى جضوم واحده نايرة كده (نقطعها فى حشانا ساى)

بعدين ياخ نوع بوستاتك دى ما ياها دى زاتها الأوحت لينا بى جنس ده

تسلم يا ودقاسم

Quote: بس لازمن من مشورتها ورأيها هى

مشورة شنو يا هشام ياخوي؟؟؟ باقي لك القمره بتقبل بي أبوالجعران؟؟؟
إنت كان داير تبدا بالشوره قول ياكا الما لقيت الجو فاضي عشان تحب..بعدين إشمعني الشوره دي تبقى على أنا المسكين؟؟؟ كم حيكومه جات عدمتنا النفس وما شاورتنا؟؟؟..الله ينعل أبو السياسه هسع الخلاني خرمت عليها شنو؟؟..ثم أنا مالي ومال السياسه؟؟؟ خلينا في عرس أبو الجعران للقمره.. شوف إنت ياتخت تماضر أمام الأمر الواقع..ويا تختها أمام الأمر الواقع...يا تعمل نفسك ما شايفها مبارياك في المنبر وتحب زي وقدر ماك داير..ويا كمان تخليها تصحي تلقى نفسها معقود عليها وعليها التنفيذ...أما حكاية الشوره دي أنا والله ما مطمئن لنتائجها..بس..يا أدني أختك ويا كمان قولي رافض..أرقد عافيه

يا نايل والله العظيم الزيك ما برفضوه ، أريتك (ابوالجعران) السرور

بعدين إنت عايزنا نعرس ليك (خنفسانة) ولاّ شنو؟؟؟؟

تماضر محرمانى الريدة يا نايل ، أخير افكها عكس الهواء واشوف ليها أبوالجعران ولا ابوجلمبو واصلها الشغلة بايظة عشان أتفرغ لى رقبتى دى

تسلم يا نايل ، والريدة هى سر العمر الطويل وسر السعادة الأبدية ، بس بشرط تكون فى العلن ما فى السر ، ريدة السر دايمن بتبقى خبيثة ، ودى ما بتشبهنا

تحياتى

انت ما خايف من تماضر الخايف منه انا عارفو وتماضر عارفه...انت خايف
من هناية واخواتها.....وبعدين فى عمر زى ده يا هشام مفروض تمشى صلاة
الجمعة من يوم الثلاثاء...الله كريم عليه يا تمضورة،،،

يعنى عايزنى فى عمر زى ده يا صديق كلما أشوف حاجة حلوة أقول (معاذ الله) واقوم أستغفر عشان شفت شى جميل وأمش صلاة الجمعة من يوم التلاتاء ، يعنى الحب البيحس بيه الزول الخلقو الله ، والحب زاتو الخلقو الله والجمال الخلقو الله ، بقى عورة وعيب وكفر

يا ناس ده كلام ده

ياخ أنا قلت ليك بحب ، حب ساى يا صديق ، إنت جنيت ولاّ شنو؟؟؟؟

Quote: والله معانا بنات هنا فى المنبر الواحد مكسر فيهم عديل من سماحتهم وظرافتهم وجمالهم وحلاتهم وعذوبتهم ورقتهم ، يزيدوا دلال وازيد تعذيب

يقول برنامج تحميل الصور الفوتغرافية أن

أحدث صورة ليهن قبل عشرين سنة


بطل الجرسة

وخليك أسد

يا قرجة ، يعنى قصدك بغشونا ساى بى صور معتتة وقديمة ليها عشرين سنة

ياخ بالغت والله

ياخ دى صور حديثة وفورية يا قرجة الشغلة كلها بقت ديقيتال وتنزيل فورى فى الكمبيوتر

يا قرجة (من غشنا ليس منا)

وبعدين اسمع ، عشرين سنة عشرين سنة ، خلينا نحب بأثر رجعى ، أصلو الشغلانة كلها بايظة

هشام ياخى هم يتشرفوا لما انت تحبهم وعليك الله ما تخلى الحب
وزى ماقال الجاغريو
والحب غذاء الارواح كل جيل يسلموا جيل
وبعد انتهاء الارواح فى قبرى ليهو سكون
يا سيدة شباب الكون ومدينة احلامى انا بالغرام ممكون

أيوة يا صديق

أهو ده الكلام (النجيض)

يازول يا زول
ما احسن ليك تجىء بالدرب العديل اصلو انا خايف عليك من انفلونزا الجكس
تحياتى

يا بلدى يا حبوب

أوع تكون دى زى إنفلونزا الطيور؟؟؟؟



والماسنجر بجيبها برضو؟؟؟

Quote: بالله ورونا الواحد يحب كيف ، وأخته تنطط معاه زى الأرنب ما مدياهو أيتها فرصة؟؟؟؟

بما أنك إتعرضت لكمية كبيرة من السماحة في الدم من بنات البورد وخوفاً من الجلطة عليك بالتعامل مع بدرالدين شنا لمدة إسبوع حتى تنزل كمية السماحة ويحصل بلانس

وأنا لاقيك وين يا بدرالدين؟؟؟

بس أمسك منى البت الفقرية دى ، ما مديانى راحتى

لـؤي

سلامات جاتك,

Quote: عليك الله يا الشّايقي هسّع مع إنفلونزا الطّيور دي ألم بيض الجّدادة كيف ؟؟

ما لينا علاقة بي أنفلونزا الطيور,

لانه لو في (ديك) قام بمهمة لم البيض,

يبقى زيتهـم في (بيضـم)

Quote: بعدين هي تماضر ذاتها ما أعلنتها عدييييييل وعينك يا تاجر قالت ما يلزمنا ، خلّيني في حالي ياخ أنا الشّاكوش عامل لي روح معنويّة زي ما قال عادل إمام ..

أتوسـط ليك, ؟

بـس قول أتعابي شـنو؟

أتعابي

(تتوسـط لي)


اتفقنا؟

أحمد الشّايقي
وجاك سلام

Quote: أتوسـط ليك, ؟ بـس قول أتعابي شـنو؟ أتعابي (تتوسـط لي) اتفقنا؟

باللهِ ؟؟؟
يعني من قبيل إنت حايم بيجاي ومستلم البوست دا لشئٍ في نفس (شيقوق) ؟؟ لا كان كدا أنا ما بتكلّم معاك ، وتماضر عندها أخوها أهو قاعد يحمّر ليك ، أها أثبت ...



قال يتوسّط قال

ـــــــــــــــ

انا في البعيـد مشتـاق لهمسة من الوطن يـا نسمة
[email protected]

(وجه يوريك العين الحمراء)



لوووووووووووووووووووووووووووووووووووووووووول

هشام

Quote: (وجه يوريك العين الحمراء)

كدي أوّل حاجة شيل لينا صورة الحاج دي الله يرحمُه عشان نعرف نهرشك .. قاعد متلبّد لي وراهُ ..

ـــــــــــــــ

انا في البعيـد مشتـاق لهمسة من الوطن يـا نسمة
[email protected]

تعرف يا لؤى ، فعلا لقيت ليك نفسى لابد وراء الحاج الله يرحمو

اقول ليك سر ، والله لى هسع خايف منو

ربنا يحسن إليه ويكرم مثواه ، فقد كان رجل (والرجال قليل)

والله هذا أحد الرجال فى السودان يا لؤى ، ونحن جمبو ليس إلا (هزاليل)

دنيا

الغالي... هوشي مِنّه

شوف يا حبة..

اسحن حاجة انك تسوي زي اخوك..
تدخل تووووووش بدون رتوووووش وعينك قوية
تفلق الحجر.. تحب ؤتتغزل ؤ.. تملا بطاطيرك
واكان زروك.. تتمسكن وتعمل فيها حِميل
وانو العتب واللوم على النك نيم

عارف..

ياما اخوك زردوهو في ملفات ضيقة
وانتا عارف زرزرة المحس (الله لا يوريك)
ماكن اهلنا العارفين ببواطن الامور قالو
(الحنك السنين يمرقك من السكين) نجرة طيفورية



وتعالني عندي ليك شربوت كارب

انت مشكلتك هينه ...اني عندي الدي اطال الله عمره ,يقراء اي حرف اكتبه هنا وبعد داك هاك ياتلفونات ..ايه ده ياوالد ..

i wanna change my username badly lol

محب ، مصيبتك مصيبة ،

الحب والمقص والحب الدس دس

أقول ليك حاجة:

تعال نتبادل اليوزرنيم

والله ندوخ ليك السودان كلو

قال تماضر قال

طريقة طيفور فى الحب والسرور

ياخ دى طريقة ما حصلت ، وأنا من اليوم من اتباعك ، وخصوصاً

Quote: وتعالني عندي ليك شربوت كارب

بجى ونص

بسيطة. انت وريني عينك على مين وأنا بحب ليك بالواجب.

غردك مقضي تب. أشِّر لي على الهدف وأبعد. وبكده تكون اتفاديت ملاوزات أختك وخدمت ليك زول عنقالي. وفي ميزان حسناتك.

شنتير والله ما قصرت تب ، بس الواحد بقول ليك منو ولاّ منو

كلهن منجضاتنى

شى واحدات كده ليهن كضيمات وواحدات مغرودات وواحدات صاحى كالنعسان وواحدات جيد الغزال جيدا ، وعيييييييييييييييييك

يا جماعة وطوا صوتكم

البورد فيه بكا

الا رحم الله الفقيد محمد اسماعيل الازهرى




"هشام استنى لى البخوفوك جد ..انا هينة"

الحبيبة تماضر

جمعتنى بالراحل محمد إسماعيل ألأزهرى ، أجمل وأحلى أيام بمدينة جده أبان الثمانينات وكان يحضر إلينا بمعية الأخ الحبيب والصديق الأمين الهندى ، وكان الأمين وقتها موظفاً فى بنك التنمية الإسلامى ، وكان الفقيد فنانا واديبا وسياسيا بكل معنى الكلمة فقضى بيننا أحلى وأجمل الأيام ، ولقد تالمت جداً لفراقة ووفاته التى أتت فجأة ومباغتة للجميع ، كعادة الموت الذى هونقّاد يأخذ خيارنا هكذا بغتة دون مقدمات ، ليمتحن الله صبرنا ولنتحتسب موتانا عنده عز وجل

الحقيقة ، بعد نشر خبر وفاته ، لم أدرى ماذا افعل بمثل هذه البوستات التى بها الكثير من المرح والضحك واللهو البرىء والذى لا يتناسب أبداً وعظمة المصاب الذى حلّ بالشعب السودانى قاطبة ، ففكرت فى التوقف عن الكتابة فى المنبر حداداً على المرحوم ولمدة ثلاثة ايام بلياليها ، ولكنى عدلت عن رايى لما علمت أن الحياة مستمرة وأن الحزن والبكاء والحداد لن يعيد إلينا الفقيد ابداً والأولى بنا أن نستمر فى حياتنا المعتادة ولا نتوقف عن السير ، حتى يكتب الله امراً كان مفعولا ،

يا تماضر ، لا نملك الآن إلا الدعاء للمرحوم أن يرحمه المولى عز وجل ويدخله فسيح جناته ، فحياة الإنسان الحقيقية تبدا بعد فراقه الدنيا الدنية ، وهنالك يكون ما قدمه فى حياته الدنيا هو خير الزاد للحياة الآخرة فإما نعيم ابدى دائم وإما شقاء لا ينتهى ابداً ولمعرفتى بالمرحوم وإلمامى بمدى سعة رحمة الله ، فإنا نحسبه فى روض وروح وريحان عند مليك مقتدر ،

تماضر ، الآن خففتى عنى ألم فراقه ، ولا تنسيه يا أختاه فى دعائك ، وأعذرينى إن جاء مزحى ومراحى فى توقيت عصيب وليعذرنى القراء على ذلك

وإنا لله وإنا إليه راجعون

سلام


عارف يازول الشرك بتاعك ده فاشل.....

ولا واحدة من السمحات القلتهم دخلوا هنا ...

ده زول (بغران) ساى من السماحة دى



ما عاش اليفرق بيناتكن يا أجمل بنات منبرنا

عمر عبدالخالق سعيد:

أوافقك الرأى فى أن بنات منبرنا من خيرة بنات السودان وأجملهم ، أما ما كتبته أعلاه فهو إحقاق للحق وإعتراف بجمال البنات هنا ، والبنت يا عمر تبقى بنت ، وكل البنات يحبون الإطراء والدلال والدلع ، وهذا ما كنت احاوله هنا ، كنت أرغب فى أن أقول لهم أنتن جميلات ولطيفات ومؤدبات ، ولكنى قلتها بالطريقة التى احببتها وهى طريقة الدعابة ، فأرجو أن لا تسرح بعيداً بخيالك فأنا إنسان متزوج وسعيد جداً فى زواجى ولى ستة من البنات والبنين ومعظمهم يدخلون ويقرأون ما اكتب ، هذا غير الإخوة والأخوات الاشقاء وبناتهم واولادهم

يا عمر ، نحن هنا فقط نداعب ونلاطف الآخرون ، بالطريقة السودانية كنوع من التغيير ورفع المعنويات وإسعاد القراء ، والله على ما اقول شهيد ، ولا يمكن ابداً أن أكون ساعياً لجلب الفرقة للبنات الذين لم يأتوا للبوست

يا عمر نحن أكبر من كل هذه الترهات

يا عمر ، تحياتى وتقديرى وارجو أن أكون قد اوضحت وجهة نظرى لك وللجميع

وشكراً

Quote: يا عمر ، نحن هنا فقط نداعب ونلاطف الآخرون ، بالطريقة السودانية كنوع من التغيير ورفع المعنويات وإسعاد القراء ، والله على ما اقول شهيد ، ولا يمكن ابداً أن أكون ساعياً لجلب الفرقة للبنات الذين لم يأتوا للبوست

اخي العزيز
انما دخلت من هذا الباب

واحترامي ليك وللاخت تماضر وكل الاسرة الكريمة
هو احترام الاخ لأخوه ولك العتبي حتي ترضي عني

_____________________________________
.........

كل الرضى يا عمر

إنما قصدت بشرحى لك ، الشرح للذين لم يفهموا مقصدى ،

تخريمة:

هل أنت ايضاً تحب الجمال؟؟؟؟