Post: #1
Title: سألته عن فؤادى
Author: يازولyazoalيازول
Date: 03-18-2003, 03:03 PM
Parent: #0
سألته عن فؤادى وعن سبب هيامه
أجابني ما هو عارف
عشقته وجماله نظمته فى فنونى
جفانى صدى عنى تركنى لشجونى
اذا تلاشى صبرى وترعرت جنونى
واذا أنبرى فؤادى لعهدى ما بخالف
حبيبى يا مدلل بحق صفا كمالك
حرمتنى وصالك وملت عنى مالك
أنا صريع محاسنك وانا أسٍير جمالك
تعال شوف تعال زفيرى والعواطف
يا فرحة الحزانى ويا زينة المواكب
يا ربرب الخميلة ويا زهرة الكواكب
زمانى جار معاك وهاهو لى ناكب
بعدك الصلانى يادرة المعارف
جمالك المكمل لهانى عن سواك
وتيهك او دلالك رمونى فى هواك
حبيبي أنت ومين يكون دواك
أظن عفوك عنى ورضاك لى يوالف
أهوى الذى ضنانى وغزانى بى نباله
ولا سأل فى حالى ولا خطر بباله
يرانى أو أراه وأقيف ذليل قباله
واقوله أنت سيدى وفيم عنى صارف
محمد على الأمى
|
Post: #2
Title: Re: سألته عن فؤادى
Author: اساسي
Date: 03-18-2003, 03:28 PM
Parent: #1
في لقاء جدة الاخير علي شرف ديك الجن كان محور النقاش عن اغاني الحقيبة كان في معيتنا الشاعر المرهف الطيب البرير وقد دار نقاش وطرحت اراء مثيرة للجدل
اعجبني الهجوم الضاري من الشاعر علي اغاني الحقيبة واحتكاريتها للساحة الغنائية السودانية لفترات طويلة حتي انها تعدت علي حقوق بعض النمازج الغنائية الاخري باعتبارها المرجعية القياسية الوحيدة للفن الغنائي السوداني مما يجعل لها قدسية مطلقة في تعاملنا معها حتي انها اصبحت فوق النقد نفسها ولم يكن النقاش مطلقا فقد تم تفنيد كثير من القصائد بواسطة الشاعر المرهف وتحليلها من الناحية اللحنية ومن باب المفردة المستخدمة وطريقة الاداء ووضوح الكلمات والتطريب والمنوال الواحد الذي جرت عليه والذي يشبه اناشيد المدارس منه كغناء تطريبي ذو بحور موسيقية متكاملة
طبعا طال النقاش وتشعب كثيرا وقد اعجبني جدا هذا الهجوم الضاري علي الحقيبة واستمتعت به جدا اخي يا زول وكم كنت اود ان تكون يومها موجودا لتدافع عن هذا الفن الذي اري انك تتبناه في انزالك لنمازج كثيرة منه في البورد محتفيا به وكم كنت واثقا انه كان افحامك حتميا حينها
|
Post: #5
Title: Re: سألته عن فؤادى
Author: يازولyazoalيازول
Date: 03-19-2003, 07:58 AM
Parent: #2
الأخ الحبيب أساسى
طبعا لم أكن لأسكت عن هجوم كهذا الذى قام به شاعرنا الطيب البرير لأنبرى دفاعا عن الحقيبة وألحانها وكلماتها الخالدة وأتمنى أن تجمعنى به الظروف لإزالة أى لبس عنه
شكرا أخى على المشاركة ونحن مشتاقون لطلتكم البهية ومشاغباتكم ومنافحاتكم الذى يمليه عليكم شبابا نديا
أطال الله عمركم
|
Post: #3
Title: Re: سألته عن فؤادى
Author: Abdalla Gaafar
Date: 03-18-2003, 08:31 PM
Parent: #1
يازول
ياسلام عليك يازول يازوق
وياريت بي صوت ابوعلي
يديك الغافية
عبدالله جعفر
|
Post: #6
Title: Re: سألته عن فؤادى
Author: يازولyazoalيازول
Date: 03-19-2003, 08:01 AM
Parent: #3
أخى عبداله جعفر
كانت لتكون أكثر من رائعة بصوت أبو على ولكنى أفضلها بصوت الجابرى الذى يذيبك وجدا وحنانا وشجن ويملأك تطريبا ليحلق بك فى سماوات ابداعاتنا السودانية
رحمة الله عليه
|
Post: #4
Title: Re: سألته عن فؤادى
Author: singawi
Date: 03-19-2003, 05:36 AM
Parent: #1
ريسنا الحبيب
طمني ياخوي
الحاصل شنو
ما يكن ضرس ولا حاجة
بس اختيار عسل
كان لميت فيها بجيبها ليك صوتها
أساسي
ويييييين الناس
تحياتي
|
Post: #7
Title: Re: سألته عن فؤادى
Author: يازولyazoalيازول
Date: 03-19-2003, 08:02 AM
Parent: #4
سنجاوى
أظنه ضرس العقل
|
Post: #8
Title: Re: سألته عن فؤادى
Author: Tariiq
Date: 03-19-2003, 08:26 AM
Parent: #7
سلام للكل ولى ناس جدة الرائعين والتحية للريس يازول ونشكره على اتحافنا بهذه الاغنية الرائعة واكرر الطلب بان نسمعها
العزيز اساسى
كيف الحال،وشنو الحكاية ما بتكلمونا بى قعداتكم دى ولا عشان يعنى عمدتنا قرشو عامل اضراب الايام دى!!!!ط
مع تحياتى
|
Post: #9
Title: Re: سألته عن فؤادى
Author: هدهد
Date: 03-19-2003, 10:45 AM
يازوول
التحيات النواضر
والتحية لمدن عينك
كم اشتهى قعدة معاك بلون من لوحة
واستمعت بك يوما ما وانت تضيف الى عينيك راداراَ لتوسيع الرؤيا وكشف الشفبف
اشتاقك رغم لومي معك فأعذرني
والله ماني عارف
لك المدى
وعميق الود للاسرة
|
Post: #11
Title: Re: سألته عن فؤادى
Author: يازولyazoalيازول
Date: 03-19-2003, 03:21 PM
Parent: #9
أيها الهدهد الجميل
وأنا أيضا أشتاقك
|
Post: #10
Title: Re: سألته عن فؤادى
Author: يازولyazoalيازول
Date: 03-19-2003, 03:20 PM
طارق
لا شكر على واجب
|
Post: #12
Title: Re: سألته عن فؤادى
Author: omergoda
Date: 07-06-2003, 08:01 PM
Parent: #1
يافرده ياحبيب الطفوله والعمر كله تسلم
|
Post: #13
Title: Re: سألته عن فؤادى
Author: Zongiya
Date: 07-06-2003, 08:38 PM
Parent: #1
..
.
من اجمل اغاني الحقيبه القابلتني برضو
الكلام ده كيف جميل..ومعبر و شفاف...
اتذكر في اجازه كانت بت بتغنيها ناس الحله كلهم اتلمو..
تعيد و تزيد
تحياتي
|
Post: #14
Title: Re: سألته عن فؤادى
Author: shatat
Date: 07-06-2003, 10:06 PM
Parent: #1
صفوة جمالك صافي الماء على البلور
ينعم صباحك خير ويسعد مساك النور
نور جمالك بان لانور شموس لا بدور
فقت المعاك في الجيل فقت المعاك في الدور
يالفي علاك بعيد وسماك سابع دور
ذقت الهلاك ياملاك في هواك هلاكي بدور
يا فرحة المحزون يا نفثة المصدور
مرآك يزيل الهم ويمحي الاسى الفي الصدور
اسمح اتلو سناك والدور يفاخر الدور
ويفوح نشيدي الفيك زي نفحة الريفدور
انا في شقاي ولهان يالفي النعيم مغمور
فرش القتات ياجميل سم تساوي جمور
يرضيني ما يرضيك والناس امورها امور
محال اسيبو هواك اذا السماء تمور
بين القلوب ميزان صفا وزنها المعبور
قلبا يميلو الحب وقلبا يميل مجبور
شخص الوفا المفقود ولفقده ماني صبور
طرفي السهير يا سمير للنوم يضره ضرور
وعذابي لو سراك طبعا اكون مسرور
اوعد جفوني غميض والطيف يزورني مرور
افرح واقول يا ليل واشرح واحاكي سرور
...............عبيد عبد الرحمن
اهديها ليك ..الغالي يا زول ..ولكل الاحبه في
ملتقاك ..طبعا ..الكلام كتير ..بجيك صادي
مع خالص الود
فتكم بعافيه
اخوك ..شتات
...................
|
Post: #15
Title: Re: سألته عن فؤادى
Author: SAMIR IBRAHIM
Date: 11-06-2003, 11:16 PM
Parent: #14
مفراكه...
ياريت لو واحد ينزلنا لينا الاغنيه.......
|
Post: #16
Title: Re: سألته عن فؤادى
Author: يازولyazoalيازول
Date: 11-10-2003, 10:57 AM
Parent: #15
مفراكة يعنى شنو؟؟؟؟
|
Post: #17
Title: Re: سألته عن فؤادى
Author: الجندرية
Date: 11-10-2003, 02:34 PM
Parent: #16
صحي يعني معقول مافي زول عنده امير العود ينزل لينا الغنوة دي ؟
|
Post: #18
Title: Re: سألته عن فؤادى
Author: tmbis
Date: 11-11-2003, 10:05 AM
Parent: #17
|
|