يخوانا والله العظيم مشتاق للحاجات دى

أركب كارو من الثورة لحدى ودنوباوى ولابس عراقى وسروال وسائق أنا وأعمل بى خشمى (جى جى جى جى)
أدوبى
آكل أم فتفت كاربة بى شطة وليمون وأتى
أدنكل سفة كاربة فى حوش كبير بالليل فى ليلة مقمرة (علما بأننى لم أسف فى حياتى)
أسك لى حرامية فى الثورة بالليل
أطلع فى مظاهرة بى بمبانه
أنوم لى الصباح فى عنقريب جلد
ألبس لى سكين فى ضراعى
أقيل فى راكوبة فى الخلاء وزادى كسرة ناشفة وملاح كول والمطرة بى برة صابة ومرة مرة تنقط جوة الراكوبة
أمش بى كرعى من الفولة لى لقاوة
أجى داخل البيت ألقى تماضر بتلعب لعبة البنات ديك البنططوا فيها بالكرعين
أركب لورى شاحن عيش بى فوق العيش ماشى الأبيض
أتوضأ فى ترعة
أطلع الخلا بالإبريق
أنوم فى قبب أبحراز لحدى الصباح
أحضر العيد فى القنابيل
آكل قراصة بى عسل وسمن فى قطية فى القضارف
أمشى فى جدة بدون اقامة
أفطر لى مع نسوان فى بمبر فى تكل فى الدلنج
ألعب دافورى بى كرة شراب فى شندى
آكل حبة من طين القضارف العجيب داك
أطلع جبل توتيل
أشرك لى قمرى فى الغرب
يجظرونى من البورد ده عشان خلاص كرهان روحى

النبي ما نفسك يدقو ليك خروج بلا عودة

آآآآى والله ، قرفت خلاص يا ميادة ، حالة تجنن

Quote: النبي ما نفسك يدقو ليك خروج بلا عودة

عاد دي بالغت فيها..يا ميادة..وكأني بك كنت بتسمعي في هشام وهو بيقول الفي نفسو وانتظرتي لما كمل وقلتي الفي نفسك...

هشام كل ما طلبت ممكن بما في ذلك لعب تماضر سكج بكج هذه عند اهل العوض عندكم ما عارفها شنو؟ فهي يمكن ان تلعب لك ذلك علي مسرح سودانيز اون لاين شهر سبعة القريب ده ان الله مدّ في الايام .........الكارو في..والسفة في..والسكين في..والعراقي في..والابريق في..والخلا في..والحرامية في..والحيشان في..والضلمة في..والكسرة في,, والكول (يخسي) في..والقمرة في..
ولقاوة في..واللواري في..والشحنات في..والقيزان والخيران في..

وستات الشاي في الرواكيب في..بس كيف انا وانت وميادة ندق خروج بلا عودة..علي العموم انا ماشي قريب كلهن بسويهن ليك الا الكوّل ده ما معانا..وازيدك واحدة بمشي اندق في حفلة بن بن في العمارات كان عندو سوط

هشام

انا من كنت بمشى على اربع بحب اطلع برا الشارع لما اتعلمت المشى شاقيت بامى كتير كل يوم قابضانى من اخر الحلة ولما فطمونى كل يوم تلقانى غاطس فى الترعة وابعشرين وملابسى مليانة طين بحب لعب الشوارع باكل كل شى سندوتش حتى الكسرة بحشيها بملاح الويكة عشان اضمن خروجى من البيت..على الحالة دى لما دخلت الابتدائى شنطتى كل يوم بتجى مع احد زملائى لانى بكون مشيت الجنينة او السوق او الحواشة
بعد نهاية الحصص درست المتوسطة فى داخلية العالى داخلية قبل امشى الهند كنت بمشى مصر كل 15 يوم تاجر شنطة بعدها مشيت الهند عشان الجامعة 6 سنوات دراسة وفنكهة ومتعة وعسل لانى طالب تاكل الهم فوق غيرى ممكن اكون مفلس 6 شهور لكن بكون مبسوط وبعدها جيت السعودية وودى 5 سنوات ...بس امى مازالت معلقة فى كلمة واحدة... ياولد ما تلعب فى الشارع فى العيد دا قابلتها فى مكة اول كلام قالته لى انا ما قلت ليك ما تلعب فى الشارع شوف لعب الشارع دا عمل فينا شنو يا هشام كدى شوف التوقيع حقى دا مش بناسب مشكلتك دى...انا نفسى اعوم فى
الترعة حتى لو جابت لى بولهارسيا
وتسلم

الاخ هشام

Quote: أمشى فى جدة بدون اقامة

دا الطريق الدوغرى لتحقيق الحاجات المشتهيها

الاخ هشام

Quote: أتوضأ فى ترعة

إلا الترعة عشان البلهارسيا
والحقن الكريه ديك( يوم وراء يوم)

هشام

ما نفسك فى سكة كلب كاااربة كده وراء محمود سعيد

يا زول
ربنا يهون قواسيك ويديك الفي مرادك

نزار
قلت لي ماشي قريب
وحتعمل ليازول حاجاتو
طيب ضيف عندك
اشرب لي جك شربوت بااااااااااااااارد
و دلدل كرعينك في النيل الازرق

Quote: أدنكل سفة كاربة فى حوش كبير بالليل فى ليلة مقمرة (علما بأننى لم أسف فى حياتى)

يا زول انت متاكد
loOoOOoOoOoOooOoooOolz
اضف الى ذلك يكون جنبك راديو صغير وفاتح صوت العرب وتكون قد تعشيت بي بوشا مدنكل
وكمان يكون في صوت حفله جايي من بعيد دا زي زمن ما كانت الحفلات بتبدا نص الليل
ويمكنك استبدال السفه بي برنجيه و لو خليتا بكون احسن

كل الود والتحايا

يا الجندرية...

امانة ما اشرب شراب..وامانة ما اعوم عوم دلديل كرعين شنو البحجزني
اما الشربوت..من جردلين وانتي طالع....وشيات جمر تقيلة.... هنا الفحم ما بولع..امانة هناك ما بقج قجة....السنة الفاتت ضحيت هنا
اللحم طعمو خشب خشب..والمرارة والكبدة والفشفاش الجزار جدعن فتت عيني تعاين..ولما قلت ليه ليش جدعتهم ..قال لي هذي كجرة الجيمch يعني وساخة>>

وافتح ليك الشبابيك لا حدهن ولا مروحة ما تشتغل.. والشربوت والكتشية تدور..والناس تنعس نصة نهار بلا هم

يا زول عليك الله بعدين سوقني معاك

تقعد حنبحبوبتك العصرية

وهي بتسوي في الجبنه

ومولع سيجارة يجي جدك داخل تطفيها في راحة ايدك

وتكون لابس مركوب احمر بالاتجاهين وسروال طويل ضرعو للواطه

ومشنق الطاقية الحمراء وتاكل العكاز في كتفك

راجع ليكم يا أحباب

تعرف يا هشام
أنا نفسي أكون واقف جنب غنمي في سوق أم درمان قبل الضحية بيومين وتجي انت بعربيتك الما خمج وأغشك وأبيع ليك خروف سديس وأقول ليك ده تني ،
ونفسي أنا وميادة الاتنين ندق خروج نهائي ، وتجيني بالسوق في عربيتها وتقول لي عليك الله ارفع لي الخروف البيج داك ، وتدفع بدون كلام ، وتمشي في البيت تلقى الخروف كبدتو مهرية .
وطبعا لا انت لا هي ما بتكونوا عارفين إنوا سيد الخرفان ده ودقاسم ،،

كر علي والله حنيت عليكم يا ناس الاقامه والكفيل اريتها عيشه الشوم المرقتكم من الرد واهل العز ويا ربي السودان متل زمان؟؟؟ واهلنا لسه حنان؟؟؟ والجنا جنا الكل!! ولسه الديوان مفروش والباب فاتح للضيفان ولا طبلوا الحيشان وقسموهن دا للرجال ود للنسوان. لسه عرسنا سيره حنه وضريره ولا بقي يسوه ام غمتي ويدسوه كانه جريره ؟؟؟
لسه عيدنا متل زمان بعد الصلاه يجوك كارات كارات العيد مبروك عليكم والسنه الجايه في عرفات ولا كل زول صلي وسلم عجلان عجلان ودخل البيت كرب قفلوا والضحيه قسموها كيمان كيمان وادوها الديب فريزر كرامتوك لي رقبتوك . يا ربي لسه الناس بتلاقيك هاشه وباشه؟؟ ولا يقولوا ليك مصافحه النسوان حرام ولباس التوب السوداني ماحشمه ياحباني ابكوامعاي سودان الطيبه والعزه والرحمه . ناس حرم مدفوعه والكلفه مرفوعه

مشتاقه لي
يوم يكون اجازه واصحى متاخره الساعه عشره القى امى او
حبوبتي ما بتفرق بتعوس في الكسره اقوم اسخن طبيخ الرجله البايت من امبارح وا رمى فيهو كم طرقه كسره
حاره واقش بيهم الحله واخت عليهم شطه حمرا وافطر بيهم مع الحبايب

هشام كدة حا تخرب طبعنا

الله يكفينا شر الوحــم. بس وحمكم مُعْدي
أنا مشتهي لي نومة تحت شدرة أراك جنب أب رخم .. في نهار سخانتو تقلى الحبّة .. حتى لو أزرع الشدرة دي براي .. وما يكون معاي غير سعين كديس فيه باقي شربة شربتين
الجن بتداوى

وانت سايق الكارو يا هشام لما تجي ود نوباوي جنب جامع الشيخ قريب الله وقدام الخور داك انا نفسي اتشعلق في الكارو بي ورا
بس عليك الله ما تديني شحطه بي راس السوط وافضل متشعلقه لغايه شارع الهجره اقوم اشتري تسالي اسود من الراجل الخاتي عربيتو في شارع الهجره داك واجي راجعه البيت حفيانه

يا جماعـة إنتو جنيتـو واللا شنـو

nazar hussien
اذا ما بتأكل (ملاح كول) فممكن نعوضو ليك ب (ملاح تقليه) بى كسرة حارة وشطة لون ، والملاح بوخو يلوى وتقرمش ليك معاه (حتة بصلة) وبعدتشبع تمام تضرب ليك (كباية شربوت) بااااااااردة
أها برضو قول لى ما باكلو.

abuguta

Quote: امى تنادينى:- كنت صغيرا اسبح فى الترعة العب بالحصى خرجت من بيتى فدخلت فى غربة تايه الخطى

توقيعك ده كفاية يا أبقوتة ، يلا تعمل نعمل باقى الحاجات سوا

دور نقاس
الله يكفينا شر البلهارسيا وحقنها الكريهة ، تعال يا زول نعوم فى البحر عدييييييييل

sentimental
(سكة كلب) زمان الكلاب كانوا بيسكوك ولا شنو يا شقى الحال؟؟؟؟

الجندرية
ربنا يديك الفى مرادك

ايهاب
ما احلى العشا ب (بوش) أو حتى (كلنتون)

كبسيبة
أرح سوا (وفى الحالة دى انت سوق الكارو)

abas
ما أحلى الجلوس جمب الحبوبات (ياحليلهم)

ودقاسم
عاد أنا قريبك ماظنيتك تغشنى فى (السعية)

doma
يا حليل السودان زمان ، زمن الأصالة والبساطة والحياة الرخية ، لكن برضو أبشرك فى حاجات كتيرة موجودة ، ما انتهت ، أقصد (حبة قيم كده)

Rawia

اتشعلقى زى ما دايرة يا راوية ، لكن فى الحالة دى ما بديك (محطه) بالسوط ، بالعكس بقعدك جمبى فى الشوال

Abd-Elrahman Sorkati
نحن طبعنا خرب من ما سبنا السودان ، شوف هسع بنتشهى كيف (رغم الانقراض لمعظم ما تشتهى الأنفس)

ٍShinteer

كلو عرفناه ، بس أبرخم وسعين كديس ديل والله صعبات شوية
شنتير ، أصالتك دى زاتها بقت (منقرضة) ، يا حليلكم يا الفراس

Abureesh
هو البيشتهى يسوى حاجات فى بلدو يقولو عليه (جنا)
اليقولو

شكرا لجميع الأحباب على مشاركاتهم الطريفة

يا هشام تقلية تومها يلوي وكسرة رهاااااااافة...ومن الصاج
ما بتخلي لي الشربوت فرقة...ولا حتي ثلث لنفسي...
والشطة ليش لون..والله بعد هذه الشلهتة لن ارضي بغير قبانيت

لا لا لا يانزار ، دى غلطة مطبعية ، أنا قصدى (ستة ليمون) تقو لى (قبانيط)

الله يقدرنا خشمنا

يازوووووووول انا كنته قايلا روحــــــــي براي اتاري لسه في ناس فاكره وماناكره
العجب حقت المطره دي اموت وامشي السودان في الخريف.............
لك التحايا
نوف

أما أنا يا زول .. انت يا زول
فأنى مشتاق لشئ واحد :-

ان تعود بكم الايام الخوالى لتلك المدينة الآثرة فتجتمعون على احد أعمدة نورها الذى (بق) لوقت محدد فى تلك الأيام , ثم يبدأ الصحاب فى الدردشة ويسيل الابداع .. وفجأءة يدندن لكم أحد الصبية من أقرانكم - بعد أن يكون قد أجاد اللحن - :-
ليت لي يا مريه
ازميل فدياس
وروحا عبقريه

..........

ليت لى يا زول قدرة على ان ارجع صدى تلك السنوات الآثرة , كى احكى كما( حكيت انت لنافى بوست ما ) أن من ابدع لحن هذه الاغنية الشجية - وهو عضو بينناالآن - قد لحن هذه الاغنية من تحت نور العمود الذى كنتم تجتمعون حول شعاعه فى تلك السنوات بود نوباوى ! , فى الواقع نريد معرفة ادق تفاصيل هذا اللحن العذب ! .. نعنى قصته ! .. كيف واين تحصل على القصيدة ..كيف وصل اللحن الى الاستاذ حمد الريح .. هيا .. فليدخل أحدكما .. اما انت او من صاغ هذا الحن الشجى .. ولكما معا كل التقدير .. يا مريا !

يا دكتور حسن
ويا هشام

حدثونا عنها بلاهي عليكم

Wad-Omi
ربنا يحقق الأمانى وتلتقين بالسودان مع أهلك تحت زخات المطر ، قولى آمين

حسن الجزولى:
أم درمان (تهد) ريحتها فى الزول وتبقى معه أبد الدهر ، وعمود النور له اشعاعات صوفية ، تجلب معها سعادة الدارين ، فهو منتدى أبناء ام درمان فى الستينات والسبعينات ، يجتمعون تحته لعقد الاجتماعات (العفوية) لتنظيم البرامج ، ويتم فيه التلاقح الفكرى وتصل فيه الأرحام وهو مفيد لازالة آثار أى نكد (ولو لم يكن موجود النكد أصلا) ، وتسكب فيه الألحان وترسم اللوحات وتجتمع فيه القلوب العذارى (عذارى الحى)

الملحن هو الصديق والحبيب / الفاضل عبدالقادر عضو المنبر والمقيم فى الأمارات ، صاحب القلب الشفيف ، والحس الطاهر النقى ، الذى يجذبك اليه جمال الخلقة والأخلاق ، ونعومة المشاعر والأظافر ، فينسكب حديثه لحنا شجيا ، لا تسمعه سوى أم درمان ، فكانت (يامريا) احدى روائعه ، فصار اللحن خالدا يبقى ما بقينا ، وسوف أحدثه (شخصيا) (عشان خاطركم) لافراد بوست خاص بهذا الموضوع ، فكتابات الفاضل والله (لحن) فى حد ذاتها ، وياليته لا يخيب رجائى فى هذا الأمر

جزيت خيرا يا ابن ام درمان ، وأريتك (حسن) السرور ، كما تقولها امدرمانية (مرت) من أمام العمود

يا نزار (سمح الغنا من خشم سيدو) ، برغم أنى لم أتمكن من سماع الأغنية التى أنرلتها هنا

pls try again

وكمان لو ختمتها بي جريه
واحد قف دفار ونزلو منو حيوانات مفترسه كل واحد شايل خرطوش مويه اسود ( جابر جاك)،،
تسمع، دا واحد اقبض اقبض
وانت شتات ما تقيف الا في القضارف

سجيمان

مالك دخلت وخرجت بى (صمة خشمك)

ود شندى

أعمل حساب الكشة

‌اميـــــــــــــــــــــــــــــــــــــــــــــن

خلاص يا زوول انتا وراويه بعد ود نوباوي واكل التسالي اقطعوا الكبري المودي على بحري

كبري شمبات تلقوني جمب المؤسسه اتشعلق معاكم ونمشي لي خالتي جليله في الحر داك بي شارع

المدارس واكلكم دندرمه على حسابي بس بعد ما اسخنكم بي شطه بدققه مع تبش وكان قيلنا في كارووك

داك اعشيكم حلاة عشوه من خالتي زينب بتاعت الكوارع واليوم داع عييييييييك نشوف ليك هشام يمصمص

في الكوارع ويقول عااااااااااااااااع ....


ام العنود

النجمة المبالغة زاتها

بس يا ترى الكارو بخلوه ينط كبرى شمبات؟

تعالى لينا جمب بيت أزهرى ، الحصان فتر وما تنسى تجيبى معاك الكوارع ، عاااااااع ، بس فى السودان قالوا الكوارع بياكلوها (فى الضلمة) صحى؟؟؟؟

دى ماالجنة عديل كدا ياهشام!!!!!!!!!