عشرة فوارق (مجنونة) بين الرجال والنساء

هنالك الرجال الفطاحلة ، ولا توجد (فطحولة) واحدة بين النساء
هنالك الرجال الجهابزة ، ولا توجد (جهبوزة) واحدة بين النساء
هنالك الرجال العمالقة ، ولا توجد (عملوقة) واحدة بين النساء
هنالك الرجال الثائرة ، ولا توجد (ثرورة) واحدة بين النساء
هنالك الرجال المتأهبة ، ولا تجد (تأهوبة) واحدة بين النساء
هنالك الرجال المشمرة ، ولا توجد (شمرورة) واحدة بين النساء
هنالك الرجال الناطحة ، ولا توجد (نطحوحة) واحدة بين النساء
هنالك الرجال الساخطة ، ولا توجد (سخطوطة) واحدة بين النساء
هنالك الرجال المشرئبة ، ولا توجد (شربوبة) واحدة بين النساء
هنالك الرجال المنطلقة ، ولا توجد (طلقوقة) واحدة بين النساء

يا هشام شيخ الدين

انت خليت الحاجات الكان نفسك فيها؟

كذلك لا توجد مراة واحدة تشتهي ان تركب كارو ولا ان تسف

لا يا نزار ، ما خليتها ، بس أحققها كيف؟؟؟ نفسى أركب كارو ، وتمشى بى الهوينى ، وأكون ماسك السوط وخاتى لى شوال قاعد فيه ، وماسك اللجام ، والكارو طويلة بى وراى (أربعين قدم) والحصان كبجك كبجك كبجك ، ولما يرخى أمحطو سوط ، واقول ليه (جى جى جى جى ) بى خشمى والهواء يكون عليل ومرة مرة كتاحة كده ، ولابس عراقى وسروال وطاقة حمراء ومقنطر السفة (مع انى عمرى ما سفيت ولا سقت كارو) بس النفس يا نزار ، أسوى شنو؟؟؟؟؟


بعدين مالك طلعت لى من الموضوع يوم واحد لاقيت ليك امرأة (فطاحلة)؟؟؟


دى لو لقيتها ، بركبها معاى فى الكارو ، وأكورك بى طول حسى امرأة (فطحولة) نادرة راكبه معانا

النفس كافرة...نعم لكن مالها نفسك دي بتتمني في حاجات ما جربتن

اما الحريم الفطاحل ...لاقني بالكوم....كتااااااار يا هشام...

عندنا تالا الشمال الغربي حريم المراة بي عشرين فطحل..وكدي خليني اجيك راجع اوريك فطحلتهن

والله الفطحلة عندكم!

شكرا يا ايمان ، انتى برضو (فطحولة) كبيرة جدا

موضوع الكارو والسفة ده شنو؟؟
شفتو الثقالة والفضول؟

هسي عايزين لكم فحطولات اكتر من شيري وبت قضيم وتماضر واشراقة و... و... وقائمة طويلة من بنات البورد

بت قضيم:
موضوع الكارو دى لخبتة ساى من نزار ، انتى جنك شمارات كده مالك؟؟؟؟

الجندرية:
الله يفتح عليك
انتى الوحيدة الفهمتى قصدى يا (فطحولة)
ففى النساء يوجد الفطاحلة والجهابزة والعمالقة ولكن اللغة العربية لم تنصفهن حقهن

بس آدى كل الحكاية

يا هشام

فطحل طلعت معناها زمن سيدنا نوح ,,,زمن الحجر كان طين...والمركب بتشيل اتنين اتني وهي بكسر الفاء اما بفتح الفاء فهي اسم رجل والعهدة علي لسان العرب.. فهل في زمن سيدنا نوح كان في شيري وبت قضيم يا الجندرية؟؟؟؟؟؟

لا يا نزار ، ما هم ديل زاتهم ناس شيرى وبت قضيم والجندرية واشراقة ، أحفاد الركبوا فى سفينة نوح

انت الوداك تبحبت لسان العرب شنو؟؟؟؟

أوع تقرص

يا هشام عشان تشفوف حتي لغتكم لغه ذكوريه لوووووووووووووووووول في ثائره اكثر من بتنا رودا ولا هميمه اكثر من دريمز وبنات العباسي وهاله قوته اما تماضر ديك فايته الجهابزه والفطاحله مسافه وحتي الساخطات فينا وخلينا ليكم المسخوتين اما المنطلقين دي خليناها ليكم انتوا براكم لووووووووووووووووووووووول

وهذه واحدة عظيمة من كثيرات

"قد سمع الله قول التي تجادلك في زوجها وتشتكي إلى الله والله يسمع تحاوركما" (سورة المجادلة)

يا خالة دوما ، وين انتى؟؟؟ ياخ والله مشتاق ليك عديل ، وفضلت أسأل عليك البوستات ، وأفتش ليك فى كل ماسنجر تائه ، وكل ايميل بدون عنوان ، وما خليت ويب سايت ولا قوقل ولا براوزر الا سألتو عنك

مرة يقولوا لى شافوك فى الهوتميل ومرة فى الياهو ، ولما أدخل أعمل سيرش وأكتب (دوما) ألقى زى مليون موقع ، بس انتى مافيهم ، وده نموذج من المواقع اللقيتها:
هدوما
قدوما
جضوما
أم دلدوما
كضوما
نضوما
دومات ود حامد
ام دوم
كد الدوما
كلتوما
دوم الحال من المحال
العقد المنضوما


ياخ انتى وين؟؟؟
عليك الله ما تغيبى ، عشان ما تمسخى المنبر

وبعدين يا خالة أنا لما كتبت البوست ده فكرت فى اثنين من (الفطاحليات) ، انتى ورودا وقلت بالله شوف اللغة الذكورية دى ظلمتهم كيف ، وزعلت من لسان العرب ومن سيبويه وفطاحلة الرجال والقواميس وقلت ليهم حرام تنسوا (فطاحلة) النسوان

دور نقاس ، أؤيد بشدة على (فطحلة) الحاجة دوما