الى شبابنا المهندسين أعداء الفيروسات والهاكر محتاج مساعده

دخل فايروس خطير على جهازى بالمنزل ، وهذا الفايروس يسمح لى فقط بالعمل لمدة دقيقتين أو ثلاثة على النيت يقوم بعدها باظهار رسالة مدتها ستون ثانية يقوم الجهاز بعدها باطفاء جهازى ، وكلما حاولت الدخول يحدث الشىء نفسه معى وأكون فى النيت لتلكم الدقائق المعدودة فقط ، ثم جاءتنى رسالة من أحد البرامج الموجودة عندى بالجهاز نصها:

1.your computer is affected by the MS04-001 vuluterability
2. It can be that dangerous computer viruses similar the Blaster worn infect your computer
3. Please update your computer with MS04-011 LSASS patch from www.microsoft.com website

وبالطبع حاولت الدخول لموقع مايكروسوفت وحدث الشىء نفسه وانطفأ الجهاز بعد انقضاء الدقيقتين ، اذ لا يمكن البقاء على النيت لأكثر من ذلك

اقترح على الأصدقاء عمل (فورمات) ، وهذا ما أخشاه ، اذ أن بجهازى ما يعادل عشرين قيقا من الداتا ، فكيف بالله أخسر كل هذا ، وفيكم الفنيين وفيكم المهندسين وفيكم الشباب الواعد القادر على عمل المعجزات ، فهل أطمع فى كرمكم بعلاج هذه المشكلة دون فورمات يا مهندسى السودان وعباقرة العالم؟

المهم أنا فى (لوصه) شديدة ، ولا معين الا الله ،

فساعدونى يا فنيي بلادى

كيفن تلوص يازول تضوق المرة
من فيروس سخيف لايوق يمرقك بره
أوع تخاف مادام أولادناالأحرار ولاد الحره
بملو الدنيا بى علومهم ويزيلو الضره

سلام يا زول
انا حافترض عندك ًWindows XP
كدى فى الاول اعمل الخطوتين ديل و بكره الله كريم
Disable system restore
clikc on Start
All programs
Accessories
Systems Tools
System Restore
بعدين
check on Turn off System Restore
الخطوه التانيه
open Control Panel
Administrative Tools
Services
rigt click on Remote Procedure Call(RPC
Properties
click on tap
Recoveries
غير كل الخيارات الى
Take no Action
سيكون عندك الان بعض الوقت للتخصل من الفايروس

النصرى

هشام

انا من شبابكم لكن ما مهندس

اسمع نضمي...وفكي الهارد ديسك....وغسلو ببنزين....وخليهو في الشمش ينشف....بعد داك.... اغليهو في موية حارة وصابون....ونشفو بالنشافة....وركبو تاني......



الكلام الجد

يا عزيزي خلي واحد ينزل لك الملف بتاع مايكروسوفت في اسطوانة من جهاز تاني او امشي محلات النصايب دي وحتلقى عندهم الملف المطلوب....وبعدين انت نزلو في الجهاز حقك....دا طبعا بعد خطوات النصري اخوي دااااااك

يعنى قصدك يا سجيمان ، الحقو أمات طه

شكرا يا احلى رباطابى على (التعويذه) بتاعتك ، بس أنا محتاج للكمبيوتر فيه بيانات هامة ، وسأعمل أيضا بنصيحتك الجادة يا دكتور

الأخ النصرى

فعلا عندى
windows xp

وسأقوم بعمل الخطوات المذكورة حال ذهابى الى المنزل وسأوافيك بالنتيجة مباشرة

تشكر على التجاوب السريع ، الله لا يحرمنا منك يا باشمهندس

الاخ ود شيخ الدين
لو انت حصل لك مثل هذا وين ابواتك ما نجدوك

اولا ايش اشتراكك على الانترنت وعلى اى شركة ونوعية جاهزك منزلى ام على شبكة المكتب
هذا فيروس اسمه plaster كان ظهر قبل 3 شهور على بعض مزودى الخدمة فى المملكة
ومنها شركتنا اول نت....لو عندك نورتون محدث او مكافى قبل ان يحدث هذا كان غناك شر هذه البهدلة...
اسى تعمل الاتى....
تاخد الجهاز الى اقرب محل كومبيوترات فى شارع خالد ابن الوليد ةتقةل ليه عاوز انزل برنامج
fix plaster
وبعدها تنزل برنامج مكافحة الفيروسات نورتونnorton ver 2003 او برنامج مكافى اخر نسخة
وبعدها جهازك سوف يواصل النضال الكى بوردى من غير فرمطة...ولو كنت معنا فى الرياض كان ارسلت لك احد العيال فى البيت وانا بدفع لهم حق الزيارة طبعا لانك من مشايختى وماخد عليك الطريقة...
اها الجماعة وصلو ام لسع
ولك ودى
معليش شفت بوستك متخر

أبشرك يا ابقوته أن ابواتى لحقونى والدليل ردودكم الفنانه دى ، ما ياهو ده اللحقان زاتو

ثانيا الجماعة لسع ما جو (عزوبية الخلا يا ابقوته) بجو بكره

ثالثا ، صدقنى حا اجيكم فى الرياض قريب عشان أكحل عيونى بى شوفتكم يا أديب ، وسأعمل أيضا بالنصيحة بس خلينى أشوف خطوات النصرى وسجيمان بالأول ، وعلى فكره أنا ساكن جمب خالد بن الوليد فى اسكان الشرفية ، ياريت كمان انت تشرفنا بزيارة ، وأرفع لينا بوست القصائد ما تطنش بالله

هو هو... ياهشام ما دام جاهزك منزلى وعندك win.xp
والدليل على ذلك اذا شغلت الجهاز بدون انترنت ما بكون عليه مشكلة
او لو غيرت الشركة ممكن يشتغل معك اذا لم يكن مزود الخدمة
على مودوم واحد من شركة الاتصالات مع الشركة البهدلت جهازك ....يعنى لو جبت بطاقة نسمة
ممكن تشغل معاك اذا لم يكن هى نزود الحدمة الاول.. قول للهندى او البنقالى جهازى لما يشبك على الانترنت بتجى ليه هذه الحالة الهستيرية...هو بعمل بحث للplaster عن طريق fix plaster وبعمل له حذف وبنزل ليك اى مكافح فايروسات....
الشرفيه...اه ياهشام اعشق حواريها نزلت بها 20 يوم وانا جائى من الهند
واتنى 20 يوم وناجى من السودان وكنت عاطل قبل اجى الرياض....
حيث لا رياض لا قوافى الضاد
كنت نازل مع ابن عمى شغال فى السوق السعودى....وكنا مرة تغدينا مع محمد
الكربل اكيد بتعرفه لانه من ناس ام درمان وحزب امة متعصب من الجيل القديم
هو ما بعرفنى شديد لكنه من بلدياتى....اسى كل ما ازور جدة لازم اغشى الشرفية
واحوم فيها واتابع الدافورى.....بشقف اشعر كان فيها لمسة من لمسات حارات
الثورات..ما عارف ليه...
ولك ودى

الأخ هشام

لحظة لو سمحت .. مع إحترامى للجميع ، ماتعمل restore للجهاز ولا حاجة ، المسـألة فى غاية البساطة .. ممكن ترسل لى إيميلك على بريدى أدناه ؟؟ كل الوُد


ـــــــــــــــــــــــــــــــــــــــ
[email protected]

أبقوته:

والله حكايتك حكاية مع الشرفية ، وضرورى نشوفك تانى فيها واليوم داك حا أعمل ليك قصيدة شديدة بس انت تعال

لؤى:
راجع ايميلك وشكرا مقدما يا أمير

هشام
سلامات

اخوك ما خبير ولا شيئ ... بس مشكلتك دي حصلت لي قبل حوالي 3 شهور والحمد لله حليتها ... وغالبا حيكون أحد الفيروسين ( Sasser او Blast ) والدوائين بتوعهم موجودين في جهازي وممكن ارفعهم ليك في النت عشان تنزلهم في أي جهاز تاني وتحفظهم في فلوبي وتحل مشكلتك باذن الله ... وطبعا دواهم موجود في النت كمان.. وحاشرح ليك الطريقة

المهم ... اذا مشكلتك لسع ما اتحلت اديني خبر ... وربنا ييسر

عبد المجيد

الأخ الحبيب عبدو

المشكله مازالت قائمة ، على كل لؤى وعد بارسال الحل عبر الايميل ولم أفتح ايملى بعد ، ولكن يا عبدو ولتعميم الفائدة أرجو انزال البرامج المذكور حتى يستفيد أعضاء وقراء المنبر ، وأسأله تعالى أن يجعل ذلك فى رصيد حسناتك يوم لا ينفع مال ولا بنون

عووووووووووووووك يا سراي الليل يالبت شدو الحيل ياراكبين الخيل يالبت عدلو الميل لي كمبيوتر هشام. عارف سحرو دي الصورة السمحة دي جابت ليك العين ما قلت ليك سجيمان رباطابي عينو ترمي الطيارة خليهو كمبيوترك.
والله قصة غريبة انا جهازي كمان بقي يقوم بي نمرة واحد والله بس ذي الهوستن القديم كركركرك كوووووووووووور حتين يرفع لي فوق
الله يشفي كمبيوترك

Quote: سلام يا زول انا حافترض عندك ًWindows XP كدى فى الاول اعمل الخطوتين ديل و بكره الله كريم Disable system restore clikc on Start All programs Accessories Systems Tools System Restore بعدين check on Turn off System Restore الخطوه التانيه open Control Panel Administrative Tools Services rigt click on Remote Procedure Call(RPC Properties click on tap Recoveries غير كل الخيارات الى Take no Action سيكون عندك الان بعض الوقت للتخصل من الفايروس النصرى

كلام الاستاذ النصري ..
هو الاجراء الصحيح ..
ولكن ليس معناه زوال الفايروس ..
وبتحتاج لبرنامج ازالة الفايروسات ..
ويكون نسخة محدثة من الانترنت ..
وليس لموقع مايكروسوفت اي دخل في الامر ..
كل ما يحدث معك .. هو عبارة عن اجراء يقوم به الويندوز ..
ويمكنك تعديله بحيث لا يقوم بهذا الاجراء ..
كما اوضح لك الاستاذ النصري ..
ومن ثم ازالة الفايروس ..


انت ما تضرب تلفون ..
لزومه شنو البوست ..
كملت الباندوث .. ياخي ..

العزيز هشام


تاخد الفقرة التانية من النصرى

الخطوه التانيه
open Control Panel
Administrative Tools
Services
rigt click on Remote Procedure Call(RPC
Properties
click on tap
Recoveries
غير كل الخيارات الى
Take no Action


وبرضو تعمل الخطوة دى من ابوقوته

تاخد الجهاز الى اقرب محل كومبيوترات فى شارع خالد ابن الوليد ةتقةل ليه عاوز انزل برنامج
fix plaster
وبعدها تنزل برنامج مكافحة الفيروسات نورتونnorton ver 2003 او برنامج مكافى اخر نسخة
وبعدها جهازك سوف يواصل النضال الكى بوردى من غير فرمطة...

سيف مساعد:
نديهتك دى تطلع الأمريكان من العراق دى نديهة نصاح (بفتح النون و الصاد)

حميده:
ياخ انت ما تجينى فى البيت وتحل لى خالك المشكلة دى ، عليك الله تعال

ترهاقا:
شكرا يا ترهاقا وسأعمل بالنصيحتين

هشام

سلامات

الدواء والسامان كله في الموقع ده
http://securityresponse.symantec.com/avcenter/tools.list.html

اذا نفرات بعد ما يسوي ترتيب .. انت خبر انا .. انا يسوي ترتيب بعد ... كلو نامونا انا يخبر انت

جرب دواء لؤي وأديني خبر .. بس انصحك انه أي دواء تستعمله وانت في ال Safe Mode

شكرا يا عبدو

اليوم الخميس حا اتفرغ للشغلانة دى

بس عايز أسألك

انت قلبت باكستانى ولا شنو؟؟؟؟

الأخ هشام

لم تصلنى رسالتك الأولى حتى الآن ولكن وصلنى قبل قليل ردّك على رسالتى ، وسأبقى فى إنتظارك لحل المشكلة والتى لاتحتاج لسوى نصف دقيقة .

كل الوُد


ـــــــــــــــــــــــــــــــــــــــ
[email protected]

كلك ذوق يا لؤى ، أشوفك بعدين

المهكور العزيز هشام

لقد تم هكرك بواسطتى يا عزيزى

الدليل" اننى وجدت "سوفت ويرا شحمانا من حضرتكم يدعونى فيها لمعلومات اسريه معينه...ملاتها وانا "عاملة فيها " خلااااااص...بتساهم فى رصد تاريخ الاسرة..وارجعتها لك بكل عوارة ....وكان ما كان

الا اننى مدبجة يا شقيقى ...لا تهزنى الريح بعد ان لعبت بى الزوابع

هاهاهاها....
ماكان ارد ...تجدنى اسفة ...كان يمكن ان اغنى ...


هكرونى فى حبى انكرت ما رديت


واصهين...
واعمل بالمثل القائل
لكن ....لا يهكر المؤمن ...من "رد" مرتين ...

مزروبين ...مزروبين ....بالمصطفى

لك حبى وللعيال وام العيال

ولجميع من ساعدك المحبة

ذكرتينى الأغنية بتاعت:

كده كده يا التريلا

عشان كنت عايز أقول ليك (كده كده يا تماضر)

لا يا تماضر ، الرسالة صحيحة ، لأنها جاتنى أنا زاتى و(قالوا لى) رسلها لى أصحابك ، وجات ردود ومن ضمنها ردك الجميل كعادة كل شىء جميل ياتى من (نواحيكى)

ومن ديك وعيييك ، فيروز العدو الجانى ، والله يستر على باقى أصحابى ما يكون عاداهم

المهم المشكلة اتحلت ، وكانت سبب لأسمع صوت لؤى (شخصيا) بالماسنجر وكانت سعادة لا تعادلها سعادة لدرجة اتمنيت يجى الفيروز تانى عشان أسمع لؤى كمان وكمان

والشكر الجزيل لكل من ساهم برأى أو بدعوة صالحة أو بايميل وتسلموا يا أحبه

Quote: المهم المشكلة اتحلت ، وكانت سبب لأسمع صوت لؤى (شخصيا) بالماسنجر وكانت سعادة لا تعادلها سعادة لدرجة اتمنيت يجى الفيروز تانى عشان أسمع لؤى كمان وكمان

الأخ الحبيب هشام

انا الذى سعدت بسماع صوتك هاشّاً باشّاً .. أشعرتنى ياعزيزى الحبيب وكان إسمى الحقيقى هو لؤى شيخ الدين جبريل ، وليته كان لأفخر بأخوّتك لى والتى أفخر بها رغم إختلاف الأسماء ..

دمت ودامت مودّتنا

ـــــــــــــــــــــــــــــــــــــــ
[email protected]

Quote: لؤى شيخ الدين جبريل

بالله شوفها خايله كيف

أقسم بالله العظيم يجينى ولد أسميه لؤى عشان يكون:

Quote: لؤى هشام شيخ الدين جبريل

بعدين يا لؤى ما عندك طريقة أنا أكون:

Quote: هشام شمت

هشام الحبيب

بينى وبينك فعلاً خايلة .. وياعزيزى يشهد الله أنزلت دمعى بكلماتك التى تنفذ إلى القلب فتحوّله إلى وردة لاتعرف غير الحُب ..

عندك مليون طريقة تبقى هشام شمّت لكنّى عزيزى أريدك هذا الهشام شيخ الدين كما انت ، ولأصير انا لؤى شيخ الدين ، فانا أفخر بهذا الإنتماء ..


لك كل الحُب والإحترام


ـــــــــــــــــــــــــــــــــــــــ
[email protected]

تسلم يا مرهف