|
أوع تودى عربيتك لميكانيكى سودانى خصوصا اذا كان معرفة
|
نصيحة أقدمها الى الأخوة فى المنبر قراء وزوار أن لا يذهبوا بعرباتهم التى تختاج الى اصلاح الى ميكانيكى سودانى على الاطلاق وعلى وجه الخصوص لو عرف عنه أنه (شاطر) وما الى آخره ، اذ حدث معى شىء عجيب فقد احتاجت عربتى (سيارتى) الى (عمرة) كاملة ونصحنى الأخوة بالذهاب الى فلان الميكانيكى المعروف فذهبت اليه قبل عام كامل وجلبت العربة الى ورشته بونش كبير مستأجر فطلب مبلغ من المال لزوم قطع الغيار ، وقد وصل المبلغ فى مجمله الى 1800 ريال وصار يماطل ويماطل بحجج مختلفة ، والمصيبة الكبرى أنه من أصدقاء أحد أشقائى ويعرف كثير من معارفنا ، يعنى الراجل طلع (زولنا) ، فاستغل هذه المعرفة أسوأ استغلال ، وعلمت مؤخرا من المقربين منه أنه سدد الفلوس التى استلمها منى فى سداد ايجار المحل وشراء المقاضى لبيته ، وهو ميكانيكى فى غاية النحس والفلس
وبعد مماطلات استمرت لعدة أشهر قام بتسليمى عربة مقربعة تسير فى الشوارع بأعجوبة وهى كثيرة العطل والخراب ، وقال لى (مشى بها حالك) على بال ما يصلح سيارتى ، ومازالت سيارتى معه وسيارته القرمبع معى ، وتأتينى الأخبار من كل فينة وأخرى أنه قد بدأ فى تشليح سيارتى الواقفة أمام ورشته فى شموخ وصار يبيع قطعها ويصرفها على بيته وقد مضى على هذا الأمر عاما كاملا ، فما رأيكم دام فضلكم؟
|
|
|
|
|
|
|
|
Re: أوع تودى عربيتك لميكانيكى سودانى خصوصا اذا كان معرفة (Re: يازولyazoalيازول)
|
Quote: وعلمت مؤخرا من المقربين منه أنه سدد الفلوس التى استلمها منى فى سداد ايجار المحل وشراء المقاضى لبيته ، وهو ميكانيكى فى غاية النحس والفلس |
الأخ يازول تحياتي وكفارة لي مكنة العربية *شكلك كدا من النوع الصبور (ربنا يديمها نعمة عليك) *جملتك الفوق دي أنت حكمت بيها علي المكنيكي ,فلم لم تسحب سيارتك وتستعوض في ال1800 ريال,أو تحاول أن تطالبه بها في وقت لاحق_ولو جزء من المبلغ *طبعا ماكل المكنيكيين بينطبق عليهم كلامك دا وربنا يوقعك في واحد يحترم كلمته. *عام وأنت لا تتابع سيارتك عن قرب لماذا؟هناك بعض التقصير منك *لا أدري قانونيا بإستلامك السيارة المقربعة ربما ينطبق عليك أنك رضيت ببعض التسوية لاحقا. *بدأ تشليح سيارتك أخبار تأتيك بين الفينة والفينة ,من رأي من الفينة الأولي كان تذهب لتتأكد أو تحاسبه علي مانقص من إسبيرات السيارة ,أنا مافاهم إنت قنعان من العربية دي ولا إيه؟ *خل عنك الكسل واحسم إمورك فأنت صبرت مايكفي , ..وزيادة ................................................................................ أنا ماقلت إنك كسلان,قلت خل عنك الكسل الذي قد يكون لازمك لفترة ..آآآآآآآآ ماتزعل قصدي خير. ماحك جلدك مثل ظفرك فتول أنت جميع أمرك.حاول تكون لصيق لي أي مكنيكي تسلموا إصلاح سيارتك وإعتبرها فرصة تتعرف بيها علي سيارتك من الداخل.وشوية زيت وشحوم في اليد والقميص مش مشكلة, المهم ماتندم علي البيحصل ليك.أقدر المشغولية.
| |
|
|
|
|
|
|
Re: أوع تودى عربيتك لميكانيكى سودانى خصوصا اذا كان معرفة (Re: Eng. Mohammed al sayed)
|
والله صدقت
حصلت معى
سلمت عربتى لميكانيكى سودانى ليقوم بتصليحها لزوم الترخيص ولما رجعت له بعد كم يوم بعد ما قال لى انه صلحها , الحقيقه انا فاجأته فى الورشه , لم اجده ولم اجد عربتى ولما تلفنته ارتبك وقال لى انه ترك العربه فى سكن اخوه ولما ذهبت هناك ولى معارف قرب سكن اخوه قالو لى : انت عربيتك دى بعتها ولا شنو شايفين الزول ده راكبه صبا ومساء ويركنا جنبنا هنا , المهم استلمت العربه بعد ما تلفنته مره اخرى بغضب وقال لى انه ما عارف انه اخوه كان بركبها والادهى والامر انه طالب بمبالغ خياليه للتصليح البسيط , دفعت وامرى لله وقلت توبه.
| |
|
|
|
|
|
|
Re: أوع تودى عربيتك لميكانيكى سودانى خصوصا اذا كان معرفة (Re: يازولyazoalيازول)
|
Quote: ومازالت سيارتى معه وسيارته القرمبع معى ، وتأتينى الأخبار من كل فينة وأخرى أنه قد بدأ فى تشليح سيارتى الواقفة أمام ورشته فى شموخ وصار يبيع قطعها ويصرفها على بيته وقد مضى على هذا الأمر عاما كاملا ، فما رأيكم دام فضلكم؟ |
اخير ليك رجع القرمبع وحصل باقى عربيتك دى لو فضل فيها باقى
الحقه قبل ما تبقى فكة
وبالمناسبة ما المكانيكى بس حتى بتاع الموبايلات على بتاع الطبلية على تاجر السوق لو اشتريت منو ورجعت ليهو وقلت زبونى بلبعك لبع شديد
| |
|
|
|
|
|
|
Re: أوع تودى عربيتك لميكانيكى سودانى خصوصا اذا كان معرفة (Re: garjah)
|
سلام يا زول
حدثت لي قصة مقاربة قبل كم يوم , في جماعة أصحابنا وصفو لي مكنيكي سوداني وقالوا انو شاطر وزول كويس , قمت مشيت ليهو رغم انو يبعد عن مكان سكني حوالي تلاتة ساعات , وفعلاً لقيت الراجل زول طيب وود ناس وبعد شوية كالعادة طلعت بعرف سلسفيل أهلو والراجل طلع ذي القريبي , المهم , رفع العربية في العفريته وعاين ليها بي تحت , وبعد شوية جاني وفي عينيه نظرة أسى عميق وقال لي أنو العربية دايرة شيالات وضراعات وشكبزورات ,,,ولستة طويلة , وبعدها قال لي انو التكلفة حتكون خيالية , نصحني انو ما أخسر فيها وأمشي بيها حالي لحدي ما تنتهي ,, يوم الجمعة الفاتت مشيت للمكانيكي الامريكي الجنبنا , وأديتو اللستة بتاعت صديقنا السوداني وقلت ليهو ممكن تكلف كم ؟ , فسألني عن علة العربية , فأخبرته بالعلة , فقال لي انو العربية محتاجة لي اسبير واحد لا علاقة له بما في هذه اللستة الطويلة , وان عملية اصلاحها لا تتجاوز النصف ساعة , بتكلفة كلية لا تتجاوز المائة دولار , وفي كلامنا داك اتصل جاب الاسبير وسلمني عربيتي في أقل من ساعة .
| |
|
|
|
|
|
|
Re: أوع تودى عربيتك لميكانيكى سودانى خصوصا اذا كان معرفة (Re: يازولyazoalيازول)
|
تعرف يا زول : نحن عندنا مشكلة في إنو نحن بنعتقد دائماً في إننا أحسن ناس في أي حاجة !!! يعني مثلاً بنحس إنو أي ميكانيكي من أي جنسية تانية ما بيعرف للمكانيكا دي أي شي ودائماً بنرسم لوحة للمكانيكي السوداني إنو شفت ومفرتق العربية دي قطعة قطعة !!! ويقولوا ليك تعرف التايوتا دي بس وديها لي سوداني غيرو ماف زول بيعرفا ليك !!! والأغرب إنو الفلبينين ديل شطار شطارة السنين وصادقين مع الزول !!! والأعجب إنو ممكن تلقا ليك هندي خطييييييييييير في المكانيكا !!!! ليييه بنشوف إنو ممكن يكون في مصري فنان في المكانيكا !!!!!!!! وكمان بنشوف إنو من سابع المستحيلات إنو ممكن يكون في رواندي مثلاً شاطر في المكانيكا !!! طيب باقي الشعوب دي القاعد يصلح ليها عرباتها منو ؟؟؟؟؟؟ حصل معاي موقفك ده بي الكربون وإشتريت عربية زوبة وقالوا لي دخلها عمرة والغريبة دفعت فيها 2000 ريال للعمرة وبعد العمرة مباشرة سيحت مكنة !!!!!!!! والغريبة إنها قبل العمرة كانت زي الحلاوة ولكنها نصيحة الميكانيكي السوداني !!! وهو برضو معرفة .... والأعجب إنو قريب صحبي شديييييييييييييييد .. انا تاني غايتو عربيتي بوديها لي مكانيكي يكون يوغندي !!!!!
| |
|
|
|
|
|
|
Re: أوع تودى عربيتك لميكانيكى سودانى خصوصا اذا كان معرفة (Re: عمر الفاروق)
|
العكس تماماً .. جنبنا واحد سوداني و دنقلاوي كمان و للمصلحة و جرجرة الزبائن إسمو ( ساتي ) .. ساتي زول صادق و أمين و كلامو ما كتير .. أي نعم هو كهربائي سيارات .. و المحل بتاعو أصلاً بنشر !! لكن لو جيتو ما تمرق منو إلا و إنت مبسوط .. لو في مشكلة ما بيعرف ليها حل أصلو ما بينظِر ليك .. يسوق العربية لأقرب ميكانيكي و يقيف معاهو لحدي ما يخلصها .. و يرجعها ليك فرحانة ( لو دقو ليها ترقص ) .. و بياخد حقو و ما بيبالغ .. حيوا معي ساتي ..
| |
|
|
|
|
|
|
Re: أوع تودى عربيتك لميكانيكى سودانى خصوصا اذا كان معرفة (Re: يازولyazoalيازول)
|
الأعزاء الكرام
سلام
استميحكم عزرا بالتداخل معكم فى هذا الموضوع.. لانو اولا راس السوط هبشنى, وتانيا اغلبكم جايين تتفاصحوا هنا فى اعتقادكم انكم بلا رقيب وممكن تتقولوا على فئه بدون ماترد على ترهاتكم العجيبه دى ...وطبعا لازم تستحملونى انا متهم ..كان عندى ورشه (كهرباء عربات..وكهرباء عامه) فى المنطقه الصناعيه الجديده امدرمان(زقلونا) فى الفتره من1992الى 1995وعشان مافى زول يغالطنى بالتحديد كانت جوار ورشة المكنيكى المشهور (تنقو)وبتاع الإسبيرات الخرده المشهور برضو (صلاح جلد) ولمزيد من التأكد يوجد شهود هنا....الشاهد.. انتو أول حاجه العرفكم شنو بالعربات الجاى من حفير مشو واللفظتو المدينه لاطرافها مشى السعوديه جاب ليه جنيهين تلاته واشترا ليه عربيه(سيارتى) وداير يقدل بيها, وماعارف هى ذاتها شنو! وبتشتغل كيف كان لمبة (المقنيته) ولعت تلقاه يعمل نايم, والله عداد الزيت فى الزيرو مايجيب خبر لغاية ما المكنه تلحق (الزينين) ويجى للمكنيكى دايرها تكون حاجه بسيطه ودايرو..فى نفس الوقت يصلحها ليه سريع, وكان قال ليه العطل كبير يزعل ويعتبروا داير يغشه.. واهم حاجه مابكون عندو قروش كافيه للتصليح وحكاية التبسيط دى عندها علاقه بعقلنا الجماعى (المهبب) -الى حين إشعار أخر- تبسيط مخل فى اى حاجه سعادتو راكب العربيه لايصينها ولايهتم بيها لو باظت يعتبر الموضوع بسيط يمشى لى صاحبو عشان يصلحهاليه ويركب تانى( يتفوجج) والله الواحد لو مازعلان يحكى ليكم حكاوى يشيب لها الولدان عن (إستنكاح)اصحاب العربات وحقارتهم للعمل اليدوى إستهبالهم فى أكل عرق المكنيكيه والكهربجيه ودايرين اى حاجه ملح بدون فهم او تقدير لقيمة العمل الفنى وتعقيداته..انت كان ما مستهبل تمشى لى صاحبك ليه ؟ ماتشوف السوق وتجمع معلومات كافيه؟ وتكون فكره بسيطه عن الأسعار والاسبيرات قبل ماتقرر تصلحها بعدين هى ماكارو حصان وعجلات وسوط العربيه حاجه مكلفه كان فى السودان والله فى اى حته تانيه ...أذكر فى زمن الصادق المهدى الأخير أحضرت محافطة الخرطوم- والله ناس المرور ما عارف- بيت خبره يابانى لتقييم اوضاع المرور الخانقه وقتها اهم حاجه قالوها الناس ديل ان أكثرمن 50% من أصحاب العربات لايمتلكون القدره الماديه !!الضروريه لتسيرها.. والقصه ما جالونين بنزين (وعر)..وكمان قالوا ان جميع شوراع العاصمه لاتصلح لمرور ذلك العدد الكبير من العربات الصغيره وأوصوا بارجاع (الترماج) الى الخدمه, وزيادة البصات الكبيره فى النقل العام, وحتى التاكسى قالوا من الأفضل إدخاله فى نظام استثمار للشركات الكبيره تستجلب عربات جديده بمواصفات ممتازه يعمل بها السائقون كملاك مع هذه الشركات بدل (الكركعوبات )الماشه فى الطريق دى فى ذلك الوقت واظنها حتى الأن ..ومع ذلك هاك يانبذ فى المكنيكيه ههههههههههه.. ووصيه طريفه قالوها نقولها ليكم ان شاء الله ماتنفعكم1- ماتشترى عربيه مستعمله مطلقا الا اذا كنت قادرفعلا على إصلاح الاعطال البسيطه فيها بنفسك2-لازم تشترى معاها معدات أساسيه للصيانه,3- إنتبه وبشده للعلامات الموجوده فى الطبلون أمامك وتابع الصيانه, غيار الزيوت والمصافى فى مواعيدها(تقول لى مين والله مين ياعمر) ..... المهم ياساده فى العاصمه السودانيه هناك ثلاثه مناطق صناعيه الخرطوم وهى الاقدم وبحرى وامدرمان...وهذه لو تعلمون مناطق صناعيه للابداع والفن تجسدعظمة الحرفى السودانى وابداعه المشهود له حتى على مستوى العالم ..ولو ماقنعان من خيرا فيكم كنت اجتهد واجيب ليكم مايثبت ذلك ....المهم لكل قاعده شواذ كما يقولون قد تكون بعض الروايات هنا صحيحه مع الشك فيها...طبعا
مع تحياتى
وكتر خيرك وبارك الله فيك ياود شيخ الدين
| |
|
|
|
|
|
|
|