لا أدانى أوسكار لا رفع بوستى

تحية صباحية من جدة

كم تعلمت اليوم درساً مفيداً لعل الإخوة هنا يستفيدون منه ، ودرس اليوم عن (الإنتهازية) ، فجأة وقفت مع نفسى وقفة صدق فعلمت أن بداخلى إنسان إنتهازى يستغل الفرص والظروف لمصلحته ، وكما نقول بالعربى (مصلحجى) ، أى لا يفعل الزول شىء إلا إذا كان يصب فى مصلحته ، ثم تأملت فى الأمر تارة أخرى ، فعلمت أن هذا (مرض) ، وأن هذا المرض قد إنتشر بسرعة إنتشار (إنفلونزا الطيور) ، ولندلف إلى لب القصة

إتصلت البارحة على صديقى (أساسى) ، ورغينا فى التلفون ودردشنا ، ثم إكتملت المكالمة ، ولم يبق إلا أن أودعه ، وأقفل الخط ، ولكن مرض الإنتهازية ظهر بأعراضه الشديدة قبل إنهاء المكالمة ، فهمست فى أذن صديقى ، ياخ أدينا معاك أوسكار ، وقد قلت ذلك بسبب فتحه لبوست يمنح فيه أوسكارات ساخرة لعضوية المنبر ، فشحدته أوسكارا لرفع أسهمى بينكم كنوع من المصلحة ونوع من الإنتهازية والمباهاة والعجب (يا لطيف) ، ويا ليتنى إكتفيت بذلك ، بل قلت له أن يعرج على البوست الذى كتبته البارحة بخصوص توجد لدىّ مشكلة أريد أن أطرحها عليكم ليرفعه ويضيف إليه أى كلام (خارم بارم) ليعلم الجميع أن اساسى يدخل بوستاتى ويشارك فيها كنوع من (الفشخرة) المصاحبة للإنتهازية ، وودعته وقفلت الخط بإعتبار أننى قد حققت إنتصاراً كبيراً ،

ثم جئت صباح اليوم فرحانا أجرى نحو المنبر ، لأرى رد فعل صديقى و (أمخمخ) له الردود ، فاسقط فى يدى

لقد كان اساسى (صحيحاً) (معافى) وليس (مبتلى) مثلى ، وكان عاقلاً بما فيه الكفاية لتجاهلى تماماً وعدم منحى أوسكارا لا أستحقه ، أو رداً على كلام فارغ لا يشبه قلم اساسى ورقيه وثقافته ، فحزنت كثيرا على نفسى ، وعلمت أن بداخلى مرض خطير لا يعالج إلا بمواجهته بمثل هذا البوست ، فقررت تأديب نفسى ، إذ أن الناس الذين يؤدبونى قد إرتحلوا عنا فلم يبق إلا مواجهة النفس ، والنفس كالطفل إن ترضعه شب على حب الرضاع ، وإن تفطمه ينفطم ، فقررت فطامها ومواجهتها بكل الحقائق ، بل وعقابها إن دعى الأمر حتى لا تعود لمثل هذه الخصال السيئة وتنقطع عن (الإنتهازية) و (المصلحة) ، وبداخلى إنسان يكره كل مصلحجى وكل إنتهازى وكل فشخرجى

فساعدونى بالدعاء لتجاوز المحنة وليعذرنى أساسى عن اللقافة والعبط

وشكراً

اللهم اشفى اخونا هشام يازول
من مرض ( الانتهازيه ) ومن مرض ( المصلحجيه )

ىميييييييييين يارب العالمين

أشكرك يا راجل طيب

(والله العظيم من غير مصلحة)

أشكرك فقط لقيامك بالواجب تجاهى

اللهم آمين

هشام اللذيذ

ياخ صباحك ورد

وقفتك جميلة

لكن صدقني اساسي ما حيسيبك

ليس من باب المجاملة ، بل لانك تستحقها
وكان ما كتبك معاهم بشن عليو حملة ( ضد كيزان المنبر ) تاني

يا فيصل (أساسى) خذلنى كعادة الكيزان مع غير الموالين لهم


يضحكوا قدامك وبى وراك يحفروا ليك

Quote: يضحكوا قدامك وبى وراك يحفروا ليك

بس دي ما عادة اساسي

اساسي زول حبوب

تعرف يا هشام بقرأ في بوستك دا اتذكرت قصيدة محمد عز الدين ..البيقول فيها
غشاني عباس بالمساء واستهبل الاحساس علي جيت لقيت كل الدكاكين قفلت
بالاضافة يا هشام لي موضوع الانتهازية نسيت مشكلة الشفة ... اها مشكلة الشفقة دي زاتها الجهجهت باتا وقطعت الشباطا
تعرف في اكتر من ستة بوستات فتحتها وما قادر اتابعها وفي كم بوست مفتوحات لي علاقة بيهم ما لاقي وقت اضيف فيهم
الايام دي من كترة الشغل القراية زاتها في تولا ... بس شيل الصبر وشيل شباشبك الشول البيض

سلام يا زول

اليوم اكتشفنا الفيلسوف بداخلك ... لا تغرنّكم ايها الناس القفشات و الابتسامات التي تجلبها بوستات يازول...كله فلسفه في فلسفه ..وان برع في اخفائها ...

لا بالجد يا زول..اذا تصرفك ده يعتبر انتهازيه و مصلحه..راس السوط حيوصل للغالبيه العظمى من نجوم و كواكب سودانيزاونلاين ...

و بما انه (مرّات) موت الجماعه بيكون عرس... اتمنى الا تقسو على نفسك و تلومها... بل يجب ان تهنّيها على الطموح الاتموسفيري الفّذ ... والاوسكار تستاهلو و يستاهلك لاجل كل هذه الشفافيه وكشف اوراق النفس دون مكابره او تردد

يا زول , علي .......... ولا يهمك! مني ليك 10 اوسكارات "ايووووووووووي"

وبوستاتك دى انا حرستها ليك , اصلها ما بتقع واطة!!!

كلو والا المرض يا هشام, تبرى يا ود امي الدنيا دي فيها شنو يعني؟؟؟

كلام تحت تحت

نوبي ما تشوف لينا واسطة لهشام دة

يا رشا ، نعرفى الزغريدة حقتك دى ، وصلت اضانى زغريدة عديل كده

أول مرة اشوف زغريدة (مكتوبة) (بتّسمع)

شكرا يا رشا وكتر خيرك على دعواتك الصادقة وربنا يكفينا شر (الفشخرة)

تحياتى

يا نجوان

دابت على الصدق مع نفسى ومع الآخرين ، وهنا تكمن أعراض ما سميتيه (فلسفة)

يا نجوان ، الصدق (منجاة) وربنا يقدرنا وكتر خيرك على الإطراء (حاجة تعجب)

تحياتى

Quote: غشاني عباس بالمساء واستهبل الاحساس علي جيت لقيت كل الدكاكين قفلت

حلاوتك يا اساسى (عباس) أخوى

بالظبط يا اساسى ياهو ده حالى لمن جيت لقيت كل (البوستات) طرشقت

وأحر شىء للعضو هنا ، تطنيش الباقين لى بوستاتو

زى (المقاطعة) كده ، حاااااااااااااااااااارة

تسلم يا اساسى وربنا كمان يعالجنا من (الشفقة)

بس صدقنى (إنشغالك الشديد) كان سبب فى علاجنا من مرض (المصالح)

إخى على مرض المصالح

وشوف تانى كان أقول ليك (حبيبى ارفع لى وأنا أرفع ليك) دى حذرتنا منها بيان زماااااااااااان

إزيك يا زول يا زول يا زول؟؟

وكيفنك؟

أنا غايتوا رفعت البوست بتاعك ده لأني حسيت بيك.

الله يشفينا ..ما براك.

يعني شنو يعني البوست يغطس في أعماق المحيط!! ..ولا حاجة


كعب يغطس في حتة تانية ..الله ما يغطس ليك بوست فيها.
قول آمين


أخوك عصأم

Quote: أول مرة اشوف زغريدة (مكتوبة) (بتّسمع)

اها ايه رأيك ان اول مره اسمع زغرودة بتنشاف...

بس لأنك (خطير) يا نزار