منبر الحوار فى بنى مالك بقيادة العمدة الحكيم قرشو

كل أهل جده المعتقين لا بد أنهم يعرفون ذلك الشارع السودانى الهام ، المعروف لديهم ب (شارع الخرطوم) فى (بنى مالك) ، حيث المطاعم السودانية مطعم البحر الأحمر ومطعم السوده وهو أشهر المطاعم هناك ومطعم السمك (البلطى) وغيرها من المطاعم والمخابز ، وحيث قهوة الكتيابى ومحل الفلكلور السودانى حيث تباع (البنابر) و (المقاشيش) و (الخُمره) بضم الخاء ، وأيضا يباع نفس الشىء فى الشارع ذاته (بفتحها) وكذلك التمباك ، وحيث يقبع فى الشارع ذاته عشرات من (ستات الكسره) ، فللشارع وقع خاص عند السودانيين الذين يملأون جنباته يوميا من بعد صلاة المغرب وحتى منتصف الليل ، ويكون تواجدهم بشكل خاص بعد صلاة الجمعة ، حيث يأتون الى الشارع أفواجا وفرادى لشراء الكسرة وأخذ تموينهم الأسبوعى من الصعود العمارى ، والسجائر (البرنجى) الذى لا يوجد الا فى هذا الشارع وشراء اللحمة السودانية السواكنى من الشارع ذاته

ما دعانى للحديث عن هذا الشارع ، هو الركن القصى للعمدة الحكيم قرشو ، فقد تعود عمدتنا على التواجد فى هذا الشارع يوميا ، واختار له ركنا قصيا ، صار معروفا (بركن قرشو) ، وهو مقابل مطعم البحر الأحمر ، يأتيه العمدة من بعد صلاة المغرب ، يتناول فيه قهوته المعتادة ، وما أن يصل العمدة الى هناك حتى يتوافد صحبه الكرام ، ويبدأون بصوت عالى سودانى جهورى يجنح الى (الغلاط) ويبدو هذا المنظر لغير السودانيين (وكأنه مشروع شكله) ويتناقشون فى كل شىء ، فهو (منبر للحوار) بحق وحقيقة ، وتجد بين الحضور كل ألوان الطيف من السودان والسودانيين ، فتجد بينهم (الجزار) و (الخضرجى) والميكانيكى وتجد (المفلهمين) و (المسقفاتيه) وتجد (المعارضة) و (المؤيدين) وتجد حزب الأمة وحزب البعث وتجد الغنى والفقير وتجد الجنوبى وتجد أدروب وتجد هيثم ، وتجد النساء أيضا فى ركن قرشو القصى ، ولكن فى شكل بائعة شاى تستنفع بالركن ، أو ست كسره تأتى بالكسرة لزبونها أو امرأة فقيرة تزور الركن تطلب حسنة من العباد ، أو معوقة تحبو تحت أرجل قرشو ، فحى بنى مالك عموما يعتبر من أحياء جدة الفقيرة

قال لى العمدة ذات يوم ونحن نتسامر فى ركنه المحبب ، تعرف يازول هذا هو منبر الحوار بحق وحقيقة ، حتى الأخبار تأتيك (مباشرة) على الهواء فيزور المنبر أحيانا أشخاص من المطار أو من الميناء الى ركن قرشو القصى رأسا قبل الذهاب الى بيوتهم ، وذلك ليتبادلوا الأخبار وليوصلوا الأمانات الى أهلها الذين غالبا ما يتواجدون فى ركن قرشو القصى ، فقلت له ، وما هى شروط عضويتكم يا عمدة فقال لى العضويه مفتوحة للجميع ، وكل الألفاظ التى تتسبب فى لفت النظر ، مسموح بها هنا (والقوى ياكل الضعيف) ، هنا مافى قيود يازول ، هنا السودان هنا امدرمان وهنا ننسى الغربة وسنين الغربة ونقول ما نشاء وقتما نشاء دونما رقيب ولا حسيب ، وبينما نحن نتسامر اذا بسيارة تمر من أمامنا وصاحبها السودانى مشغل الكاسيت بأعلى صوت ، جاياك جاياك يا أبشرى جاياك وجايا افتو معاك ، وبعد قليل مرت سيارة أخرى بها شباب وصوت المسجل عزيز وعزيز غنايا وده العكر صفايا ، ثم تأتى أخرى بها عجائز وصوت أولاد البرعى ينفذ الى الروح بمديحه العذب ، مذكرا الجمع بيوم القيامة فيهدأ النقاش ويقوى الضعيف ويضعف القوى أمام هذا الجمال الإلهى

كانت لحظات قضيتها مع العمدة ، من أمتع اللحظات ، كنت حينها فعلا فى بارا والجنينة والقضارف وكسلا ورمبيك ودنقلا وتراءت لى كل الأماكن فى ركنه القصى المحبب الينا جميعا

هذه دعوة مفتوحة لبورداب جدة وما جاورها لزيارة العمده قرشو فى ركنه القصى والاستمتاع برحلة مجانية فى ربوع السودان دون أن يغادروا بلاد المهجر ، فقد أحضر لنا عمدتنا السودان وبلوره لنا فى ركن قصى ببنى مالك

لله درك يا عمده

قرشو ذلك الرجل
هيبة ووقار
هشام يا زول
طيبة ومحبة
....
جدة غير

حمزاوى:

ذوق وفهم وحلا (من الحلاوه) عديل كده

بنى مالك ... خير

على وزن جده غير

الأخ الحبيب الريس يازول


لك التحية وانت تنقل لمحة من حياة الغربة فى جدة بكل صدق وامانة رغم ان هنالك من الاحباب من يرى ان تلك الشريحة "أقل من المستوى" لما فيها من الفئات التى ذكرت بينما تلك الفئات البسيطة لها فهم كبير ولهم افكار بصراحة رائعة وفوق ذلك تجد فيهم من يحفظ من الشعر الكثير ومن يغنى بصوت رخيم جميل ..

اشكرك سيدى على السياحة واننى اكرر الدعوة للاحباب لشرب القهوة معنا فى بنى مالك والتعرف على بانوراما المغتربين السودانيين والاستماع الى حلو الحديث ( لن يخلو الحديث من مهرج يأتى بنكات سخيفة ) والاستمتاع بما يأتى من ذكريات عن الوطن رائعة لن تجدها فى الكتب او الدوريات ..

مرورك سيدى شرفنا كثيرا واضاف مسحة اناقة للمجلس ...

لك تحياتى

الحبيب حمزاوى


شكرا لمرورك سيدى وشكرا لكلماتك الرقيقة فى حقى وانه الاخاء الصادق سيدى والذى ارجو ان يدوم بلا انتهاء بيننا ..

لك الود كله

((** ما دعانى للحديث عن هذا الشارع ، هو الركن القصى للعمدة الحكيم قرشو ، فقد تعود عمدتنا على التواجد فى هذا الشارع يوميا ، واختار له ركنا قصيا ، صار معروفا (بركن قرشو) ، وهو مقابل مطعم البحر الأحمر ، يأتيه العمدة من بعد صلاة **)) .
********************************

أحبتي الأفاضل :

شارعن فيهو عمدتنا قرشو العظيم .. رفيق العمر والروح والسنين ..
أنا في طريقو ليهو الان .. يا مرحبا بيكم كلكم مقدما ..
ويا مرحبا بعمدتنا ..

فما أجمل اللقاء بك بعد مرور السنين يا سيدي .

خضر عطا المنان

Quote: وتجد حزب الأمة وحزب البعث وتجد الغنى والفقير وتجد الجنوبى وتجد أدروب وتجد هيثم ، وتجد النساء أيضا فى ركن قرشو القصى ، ولكن فى شكل بائعة شاى تستنفع بالركن ، أو ست كسره تأتى بالكسرة لزبونها أو امرأة فقيرة تزور الركن تطلب حسنة من العباد ، أو معوقة تحبو تحت أرجل قرشو ، فحى بنى مالك عموما يعتبر من أحياء جدة الفقيرة

طيب ما تقول دا حى اسمه السودان ....طيب انا اعرف قرشو دا كيف..ماهو كل الناس قرشو
كان كدا انا رايحة لى حاجة على الطلاق جايكم افتش ليها فى شارعم دا ولما القها بقلك لقيتها
لكن خايفها تكون من ناس سوق الندى او رواد الكرنيش...دا المخوفنى منها لكن لو لقيتها زى ناس حيكم دا يانى القابضها....وانا اقول من زمان ...هيشو وقرشو( ثنائ حلو مش) ديل مظولين كدا ليه تراكم لاقين ضالكم...هنا
دحين عندكم سوق حمير...تصدق ياهشو انا مرة رحت فى سوق الجداد بتاع ابقوتة ..وانا ابكى فجاءة كوركت باعلى صوتى لقينها لقيتها...هى تراها جداتى التى سرقها الحرامى وجاء ببعها فى سوق الجداد..وحصلت الشكلة...وتلملم الناس....الى لمحنى خالى ...الذى تعب من البحث من اجلى
انت كنت وين يامجنون.. قلت ليه كنت بفتش لجداتى المسرقه..اسى لقيتها...قال لى ارجو ليك دقة من امك الليلة...ومن يومها ما شفت السوق ..الا وانا كبير.....

هشام... عندنا..اولاد صغار متخصصين فى سرقة محافظ ستات السمن...عندهم طريقة جميلة لاصطياد الفرائس ديل واحد بكون شايل ضقلة كبيرة وساكى اخوه...اها النسوان ديل بقومن يدسن المسكوك تحت توبن وينهرن صاحب الضقلة...وذاك بحرفنة يقطع المحفظة...والحاجة تروح فيها...اها انا لما جيت ابكى نسوان السمن ديل ما هببن لى ..واحدة فيهن قالت دى حركة جديدة للسرقة...شفع الزمن دا شوطن ...الله يلعنهم...
اها ودعتك الله...خلو لى تركين...
انا جايكم من شارع الستين...
هشو وقرشو ياحلوين...
وين الشين...
لو ما عارفين..
اساسى الشين...
برى يايمة اساسى
مو شين...
انا مالى ووزنة القافية
البتودينى فى سنين...

قرشو وهشام ، جاينكم في الركن ده لكن خلوها بعد جلسة المطار القديم

صديق


ياخوى انت تعال لينا بالاول فى المطار وبعدين نتفق

هو نحن شايفنك هنا ولا هنا ياخى

Quote: اها ودعتكم الله...خلو لى تركين... انا جايكم من شارع الستين... هشو وقرشو ياحلوين... وين الشين... لو ما عارفين.. اساسى الشين... برى يايمة اساسى مو شين... انا مالى ووزنة القافية البتودينى فى سنين...

الحبيب ابوقوته


ما ان تمر على ساحة حتى تتركها فرحة تقهقه سرورا وحبورا وبهجة وصفاء ..

يعنى من يومك بتاع محن وبتاع امور ..

خارج النص :
واحد سأل حبوبته بعد عودته من السفر .. حبوبه كيف امورك ... قال ليه : يا ولد هووووووووووووووى انا كمان عندى امور ؟؟؟؟


ياخوى انت تعال لينا وحرم التركين فى ليه ناس متخصصين بقى ( ناس كبوتا) وشارع الستين بالمناسبة ما بعيد .. اما القافية وحبيبنا اساسى فهو مقاطع بنى مالك وعنده فيها راي كبير ..

شكرا على النظم الجميل والف مرحب بيك هنا او وصى على اقل الفروض على ما تريد وسيصلك اينما تكون ...

وبمناسبة رمضان سيكون هنالك الابرى الاحمر (الحلو مر) والابرى الابيض وكل انواع البليلة والقضيم ( بتعرف القضيم) والرقاق والبلح البركاوى الاصلى الناشف على شرط رغم رطوبة جدة والسر انه كل يومين بتصل رسالة من الوطن وكل ما تشتهى الانفس يا سيدى ...
لك التحية والاحترام

Quote: شارعن فيهو عمدتنا قرشو العظيم .. رفيق العمر والروح والسنين .. أنا في طريقو ليهو الان .. يا مرحبا بيكم كلكم مقدما .. ويا مرحبا بعمدتنا .. فما أجمل اللقاء بك بعد مرور السنين يا سيدي .

الحبيب ورفيق الصبا الناضر الجميل خضر

حديثك يوحى بانك هنا معنا فى جدة او فى زيارة لها ...

هل أصدق ذلك ؟؟؟؟

أكاد لا اصدق .....

ان كنت هنا فالويل لنا ان لم نحتفى بك ونستقبلك ونفرح بك ونهلل بمقدمك ونفرش الارض زهور وحب وحبور..

الف اهلا بك حبيبنا الغالى فكلنا شوق لرؤياك ولقياك..

ارجوك افصح لنا وبين اين انت الان ....

[حديثك يوحى بانك هنا معنا فى جدة او فى زيارة لها ...

هل أصدق ذلك ؟؟؟؟

أكاد لا اصدق .....

ان كنت هنا فالويل لنا ان لم نحتفى بك ونستقبلك ونفرح بك ونهلل بمقدمك ونفرش الارض زهور وحب وحبور..

الف اهلا بك حبيبنا الغالى فكلنا شوق لرؤياك ولقياك..

ارجوك افصح لنا وبين اين انت الان .
]






عمدة منبرنا : قرشو

أنا بالفعل هناك حيث أنت .. فالمسافات الجغرافية لم تحل يوما
بين التواصل بين القلوب حتى لو كانت مسافات بحار وأنهر ومحيطات ..

ولاحساسي بأن لا مسافات في هذا الكون بقادرة على صنع الحواجز
بيننا.. أقول لك أنا هنا في هذا البلد الاسنكندنافي الصقيع
( الدنمارك ) ولكني معكم أنت وتلك الكوكبة السمحة الوضاءة
من كافة أحبتي بورداب جدة المتشاطئة مع وطني الحبيب .
فالله وحده يعلم كم بي من شوق اليك يا سيدي وكل حبيب هناك
من أهلي في جدة .. وما يضاعف من عزائي أن صديق عمر آخر
من مدينتكم في اتصال شبه يومي معي عبر المسنجر ..
أنه رفيق الحرف والكلم أبدا الشاعر الشفيف : عبد العال السيد.
فله أيضا التحية عبركم يا عمدة الناس لاحدها .

خضر عطا المنان

Quote: هذه دعوة مفتوحة لبورداب جدة وما جاورها لزيارة العمده قرشو فى ركنه القصى والاستمتاع برحلة مجانية فى ربوع السودان دون أن يغادروا بلاد المهجر ، فقد أحضر لنا عمدتنا السودان وبلوره لنا فى ركن قصى ببنى مالك

يا زول يازول
لك التحيه والاحترام
دعوتك يا اخوي مقبوله لكن كدي حلها لي حا اجي بني مالك كيف

ياخ ما عزمتوني
دة شنودة هسة
طوالي خاتننا في الرف
أس ياخ

حبيب نوره

ياخوى انت مدعو ومدعو مدعو

يازول الركن ركنك وحرم تجى وتجيب البيعز عليك كمان

بس ما يبقى كلام ساكت

الاعزاء
هشام
خالد قرشو
وكل بورداب جدة

سلام

جدة فعلا عروس البحر الأحمر .. سميت جدة تيمنا بأمنا حواء ... يرجع الفضل في جعلها عروس البحر الأحمر للمهندس الفارسي .. وخير دليل على ذلك الكورنيش أيحر
جدة باب شريف
باب مكة
شارع قابل
سوق البلد
عمارة الملكة
الهنداوية
الميناء
سوق اليمنة
طريق مكة
كيلو 6
كيلو 10
الجامعة
المطار القديم
الشرفية
شارع الستين
شارع التوبة
طريق المدينة
غليل
حي مشرفة
الكرنتينة
سوق الصواريخ
سوق الخيمة

بني مالك ........قرشو


ولي عودة

قرشو:
تسلم يا قرشو ، وسنعيد الكرّه ونأتيكم نستشف وننهل من مجالسكم العامرة بالخير باذن الله

خضر عطا المنان:
هل أنت معنا فى جده ؟ اذن نريدك فى أكثر من مكان ، نريدك فى لقاء البورداب الأسبوعى كل خميس ونريدك فى بيوتنا ونريدك فى الركن القصى لعمدتنا قرشو فى بنى مالك

تسلم على مرورك من هنا

أبقوته:
انت زاتك كده على بعضك ، شبه بنى مالك ، وبينى وبينك كان الحى ده مفروض يسموه (بنى قوته) ، بعدين ضالتك صدقنى حاتجدها فى بنى مالك هنالك حيث توجد الضالات و (الضالين)

والله من جد أتمنى أشوفك فى جده يا ابقوته ، بس انت تعال

صديق رحمه النور:
شكرا يا صديق على مرورك من هنا ، بس حكاية نجى بعد لقاء البورداب الأسبوعى للركن دى صعبة شديد ، عارف الناس ديل فى اللقاء الأسبوعى بيخلصوا قريب صلاة الصبح ، يعنى كل بنى مالك نائمة من الخارج ، ودلاليكها ضاربه من (الداخل) انت تعال الركن أى يوم غير الخميس ، لأن الخميس برامج بنى مالك غير

مهاعبدالله:
المشكله يا مها مافى ركن للعوائل ، الا تجى راكبه مع زوجك فى العربية وتتفرجى علينا من جوه العربية ، وبرضو حا تنبسطى وممكن تنزلى تشترى مقشاشة ولا قرقريبه

شكرا يا مها على تشريفك البوست ، ولو جيتى جده ، بتستقبلك العوائل يا بت الكرام

حبيب نوره:
هو نحن لامين فيك وأبيناك ، انت غاتس وين ما معروف ، انت زاتك يا حبيب نوره أسطورة زى اسطورة بنى مالك فمافى داعى تجى عشان ما تختلط علينا أساطير الأولين

رضا:
ياخ انت جداوى مية فى الميه ، عشت هنا فى جده يا رضا ولا شنو؟؟؟

أفصح بالله ، وشكرا على المرور هنا

الأخ الكريم يا زول يا زول
تحية واحتراما
أضحكني قولك كثيراً

Quote: المشكله يا مها مافى ركن للعوائل ، الا تجى راكبه مع زوجك فى العربية وتتفرجى علينا من جوه العربية ، وبرضو حا تنبسطى وممكن تنزلى تشترى مقشاشة ولا قرقريبه شكرا يا مها على تشريفك البوست ، ولو جيتى جده ، بتستقبلك العوائل يا بت الكرام

طيب حنجي وحنحضر من السيارة لكن حكاية المقشاشة والقرقريبة قدييييييييييمة نسينا حتى بستعملوها كيف
تقبل مجدد التحية والاحترام يا ابن الكرام

رضا

ياخوى انت فى جده معانا ولا شنو


كلامك ده يبرهن انك بتعرف جده ركن ركن حتى الفارسى معناها قديم فى جدة ...


زورنا لو مريت بى هنا

هشام أخوى الحبيب

زماااااااااان كان فى محل ستيريو سودانى برضو ، والظريف فى الموضوع كانوا بيستلفوا الأشرطة منّى ، لسه موجود ولا مع السنين إتغير الحال ؟؟


التحيّة ليك ولى العمدة قرشو

ـــــــــــــــــــــــــــــــــــــــــــ
[email protected]

شقيقى لؤى:

أيوه موجود ، واسمو (استريو الواحه) ، وما زال يقدم أجمل الشرايط السودانية ، وياما اشترينا من شرايطك الزمان ، بس يا ريت لو كنا عارفينك من زمان ، كنا (نفّعناك)

والاستريو موجود فى نفس محلو منذ أكثر من 25 سنة وهو ومن أقدم الاستريوهات فى جده ، بعده جاء استريو كسلا فى الكرنتينة وضرب باقى المحلات ،

(أهلا بكم فى تسجيلات الواحة خلف مركز الشرق الأوسط)

والجملة دى بوظت معظم شرايطنا

وعلى فكره ليس بعيدا من ركن قرشو القصى

انت ركنك فى السويد كيف بالله يا لؤى؟

ولاّ ركن الوافر فى مدريد

لؤى

ياخوى ناس الاستريوهات كانوا بشيلوا منك الاشرطة ؟؟؟؟


طيب ياخى نحن ما الاقربون والاقربون اولى بالاشرطة ....

طيب ما تسمعنا من القديم الجميل ياخى داك الكانوا بشيلوه منك؟؟

اها انت لسع فى جده ولا كيف ؟؟؟؟

بالله نزل لينا حاجة كده من بيت الكلاوى فى البوست ده ولا سيما لو كانت من ابو سريع الفنان الرائع محمد حسنين

بصراحة انت عاوز ليك قعدة خاصة..

زورنا مرة ..

انا مشيت هناك ..
قالوا العمدة مشا يشيل فاتحة ..
وساق السوق كلو معاهو ..


البركة في كيس الصعوط دا ..
تاني ما بجيكم كدر ..

Quote: والاستريو موجود فى نفس محلو منذ أكثر من 25 سنة

دا كلام شنو يا زول يا زول ...
بالطريقة دي يا هشام حتخلينا نشك في عموديتك ...

يا قرشو؛ ركنك دا وين لركن الفاضل سانتو ...
الوصف دا ياهو ذاتو وصف ركن سانتو.

ملاسي مقابل ليهوا تماما يفرق بينهم الشارع
لكم عبرت وسلمت علي العمدة ومشيت ولم احظي بالجلوس معهم
اتمني المكوث معكم عمدتنا قريبا انشاء الله

حميدة:
انت البجيبك كدر شنو؟؟؟ تانى تعال مع اساسى (البودى قارد بتاعك)

حسين ملاسى:
ما فهمت قصدك (فى نفس محلو من 25 سنة)
بعدين شكلك قاعد تجى هناك كتير ، أرجوك أغشانا المرة الجاية ، العمدة قرشو بجيبك لينا

مهاجر:
انت غاتس وين يا مهاجر ، أظهر وبان عليك الأمان

هشام

لكن الناس دي كلها كان جات

الشارع ما بيقفل




اديك كدة

عامل راسك الكبير ده

يا جماعة والله العظيم قرجه يعد أهم رواد هذا الشارع ، وكلما التقيته هنالك ينفقع من الضحك ، أتدرون لماذا؟؟؟

لأن له فى الشارع (مآرب أخرى) ، بقراءة ورش

Quote: انت البجيبك كدر شنو؟؟؟ تانى تعال مع اساسى (البودى قارد بتاعك)

خير من تختار .. القوي الأمين ..
وبالمناسبة ..
الزول دا الايام دي قاعد يعضي ..

حميده:

جيب ليه لحمه (سواكنى) كتيرة ، عشان يتفشى

بالله بلغه عنى السلام

جاء في الاثر ان يازول اشترى كسرة من بني مالك وذهب بها للبيت وعندما قامت المدام حفظها الله بفرتقة الكسرة اكتشفت انها كسرة بايتة وناشفة زي جلد تور مضبوح قبل اسبوع

- يازول الكسرة دي ما كعبة وبايتة

ورد يازول

- لكن ما شديدة خلاس

- يا راجل انا بقول ليك الكسرة بايتة تقول لي شديدة

- هي لكن انتي ما شفتيها ....ما شديدة خلاس

واتغدت المدام وهي تضرب كفا بكف متعجبة من هشومة العاقل شين حصلو



تعود صاحبنا ان يشتري من بتاعة الكسرة التي تنقط زيت وعسل وحاجات تانية كتيرة ...فلقد فلحت في تظبيط نفسها لجر يازول ولم تفلح في تظبيط كسرتها فهي دائما بايتة .

وهذا هو سر ضحكتي الكبيرة عندما التقي صاحبي في سوق الكسرة

فكسرتي اشتريها من امراة عجوز انقطع عنها ارب الرجال ولم تنقطع هي عن عواسة الكسرة الطازجة اللذيذة.

بينما تعود صاحبنا شراءها من الشدييييدة

العمدة قرشو

تعرف انا عندي برنامج صغير بي هناك بشتري فول من السودة وبغشى الكتياي بشرب لى كورية جوافة وعلى البيت عدل
بمناسبة الأصوات الجميلة عبد الوهاب بتاع السمك صونه من أجمل الأصوات إنت دردقو بي بيتين وتسمع العجب العجاب,
أخوك جني

أخي / قرشو
بحكم عملي في ( ولي العهد ) و سكناي في ( النسيم ) أصبحت ( غشوة ) بني مالك جزءاً من برنامجي اليومي فحينما أحضر ظهراً أقوم بشراء الكسرة من ( حجة هدية ) و الرغيف السوداني ( الحار و لذيذ ) من الفرن السوداني ، وفي الليل لشراء سيد المائدة ( الفول ) وقريبته ( الطعمية ) و أحياناً السمك من عبد الوهاب الرجل الفنان المبدع الذي أسمعني مرة بصوته أغنية ( ينوحن لي حماماتن )فأدهشني حتى علمت لاحقاً أنه كان في يوم من الأيام من فناني دار فلاح لفن الغناء الشعبي وقد أسر لي بتلك المعلومة رفيقه ( عبود ) الرجل الطيب ، و أذكر أن صاحبي الشاعر الطيب / برير سبق و أن شرفني بالسلام على شخصكم الكريم و كنا يومها في طريقنا لقهوة الكتيابي بعد أن أغراني بعصير ليمونها ( الصاااااااااقط ) و يا له من عصير ,, و يا لها من مديدة تلك التي أخذتها طازجة معي إلى منزلي حتى أقدمها لصغيرتي ـ يارا ـ التي ما إن تذوقتها حتى صاحت مبتهجة( بابا ... سكليم حاااال ـ أيسكريم حار !! ـ ) و كم من مضحك مبكي ؟؟
في بني مالك أحس بأنني أتسكع في وسط سوق شعبي في أي من مدينة سودانية بما فيه من ألفة و حميمية سودانية صرفة و لعلك قد شاهدت ذلك العامل البنغالي الذي تنقل في العمل بين المطاعم السودانية و أصبح يجيد اللهجة السودانية بفصاحة غريبة حتى تم إستضافته في الفضائية السودانية ليتحدث عن السودان الذي أحبه عبر بني مالك و أهلها .
في محل الخضار و الجزارة ( بلولة و كباشي ) تتجسد فيهم سماحة السودان و أهله و ( ضكرنتهم ) و كذلك الحال عند أبو وائل بتاع الفول و عباس بتاع السمك و ناس مطعم السودة و ليالي الخرطوم و البحر الأحمر والشاب الظريف بتاع المنتجات السودانية ( العديل و الزين ) و حتى الخياط و العطار و بتاع القهوة في مطعم ليالي الخرطوم ،، و لا أنسى ( كابتن سانتو ) و حتى ( حمام ) و ( كبويتا ) ..
بني مالك هي السودان الصغير الحاضر في زمن الإرتحال ، و ركنكم يا أخ قرشو واحة في هجير و ليكم ( جية ) و عودة فالونسة ( كتيرة ) و( دقاقة ) .ييي