عرض مغرى جدا للمقيمين فى أمريكا وكندا والخليج وأوروبا

انتهى موسم الحج بخيره وشره وأوفى الحجاج بنذورهم وأدوا مناسكهم وذرفوا العبرات وانابوا الى خالقهم وعادوا كيوم ولدتهم أمهاتهم بعمل مقبول وذنب مغفور بوعد منه عز وجل بفاكهة كثيرة لا ممنوعة ولا مقطوعة فى جنة عرضها كعرض السموات والأرض

كل ده كوم
وناس جدة كوم تانى

صدقونى يا أخوة أن كل بيت فى جدة الآن به كميات معتبرة من حجاج بيت الله الحرام ملأوا كل الغرف واستخدموا كل المراتب والألحفة وأفرغوا الجيوب من أصحاب هذه المنازل وجلبوا معهم الجراثيم لأطفالنا بأشكالها وأنواعها من تلكم النزلات لم ينزل الله بها من سلطان بعضها يابانى الأصل وأخرى تايوانية ونيجيرية وحبشية وروسية وكميرونية وغيرها وغيرها من أنواع الفيروسات الخبيثة التى جعلت كل من فى جدة يكح ويكح ويكح

هذا غير مشاوير باب شريف التى نذهب اليها قهرا ومعك العجزة من الحجاج الذى يحلم كل منهم بشنطة معتبرة ملأى بجميع أنواع الثياب والصندل والبن والجلاليب والعمم وفلير دمور والعراريق من الباعة الذين يشبهون تماما باعة السوق العربى فى السبعينات والثمانينات

صدقونى يا أخوة باب شريف هو السوق الرئيسى فى جدة ولكنه أصبح هذه الأيام سوق سودانى مائة بالمائة يمكن أن تشترى منه حتى الكسرة بملاح الشرموط والتمباك العمارى المعتبر ولنا فيه مآرب أخرى

ولذلك أحببت أن أتقدم اليكم بعرض مغرى جدا
أن يبدلنى أحد الأخوة المغتربين الذين يعيشون النغنغنة فى الخليج أو أمريكا وكندا وأوروبا أعطيه بيتى فى جدة وعملى وسيارتى وأولادى ومبلغ كبير من المال كحافز له على أن يعطينى القرين كارد الذى حصل عليه عبر اللوترى أو اللجوء أو الإقامة

والشرط الوحيد فى هذا العرض

أن يتحمل حجاج بيت الله الحرام
الذين سوف ينسونه الحلال والحرام

فهل من متقدم بطلبه؟؟؟؟

I Agree Ya Azwaq Zoal!!! And For Free
))

الحق يا قرشو صاحبنا قال الرووووووووووووووووب

الأخ رومانسى

والله مش الروب واحدة بس
دى الروبين

والله العظيم بيوتنا بقت زى التكية
حالة لا يعلم بيها الا الله

وكلنا خلى بالك مسردبين
والحكاية دى متكررة سنويا
وماليها حد
بس نطلبكم الدعاء لقبول الحج ورفع البلاء عنا

طيب ياست تغريد الحجاج وبجوا في السنة فرد شهر، أولاد يازول ديل حقوا ابوهم يطلعهم من فوق البيعة..مش؟

افتينا يا الالفة في جرس الجماعة ديل

تعرف يا بناديها حكاية دخول الأولاد فى العرض
عشان نكون واضحين ما نعمل زى البزوغوا من بيوتهم وأولادهم هكذا بدون مبررات وبدون مقدمات

وقد تكررت هذه الحكاية فى جدة كثيرا حتى أصبحت موضة

تصدق حكاية زى دى؟؟؟؟؟

ياتغريد الظريفونة

لم أتوقع منك شخصيا أن تقبلى العرض

يا بت الناس ديل ما بنقدروا
تصورى أن الغداء يمكن أن يتكون من ثلاثة أربعة صوانى فى أوقات مختلفة ولأعمار مختلفة وبمواصفات أعجب من العجيبة فهذا لا يأكل لحم البقر وآخر يرغب فى الكسرة يوميا وأخرى عجوز شمطاء لابد من موافاتها بالمديدة وعجوز آخر يرغب فى الخوخ والبرقوق والكيوى ليعوض شبابا ولى وآخر يطلب كوارع أو كمونية

هم يشتهون ونحن المتبشتنون

فهل تقدرى على كل هذا؟؟؟؟؟

لا أظن غير جداوى يقدر على فعل الذى نفعل

Salam yazoal
والله ما قلت الا الحق وربنا يكون في عونكم ويلزمكم الصبر ويجعل لمعاناتكم الاجر الجزيل ان شاء الله
لكن انت ما شايف انك بعدت احتمال قبول العرض وقللت اغراؤ بعد الشرح المفصل للحالة التعبانة الانتو فيها يا ناس جدة؟

والله يا رمانة ما قلتى الا الحق

أكثر فئة مغتربين مشلهتة وتعبانة
هم ناس جدة

بس الجماعة ديل يفهموا الحكاية دى كيف؟؟؟؟

LOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOL
ياخال يعسل انت وحاتك دي جية كنت مشغول وحمد الله علي السلامة
بالله دي عملتها كيف دي مابالغت عديييييييييييييييل كدا فيها
ويا الغريدة البركة في الشوفة وعقبال الباقين

Ya Zoal and his Awlado,, i'll keep them in my Eyes
and if Al Wa6ah ma shalatum I'll Ashelhum in my head

Salam Suna I'm Happy you are around Stay CoOoOoL

تغريد أحى أنا منك

خففتى على المأساة
رأيك شنو تجينا الشهر الجاى نعمل ليك حج براك؟

ههههههههههههاى

سونا يا بت أختى انتى زاتك العسل البنقط

بس والله ناس خالك خلاص قرفوا من الحالة دى
الله يسفر الباقين

فترنا من نوم الكنبة

هههههههههههههاى

يا زول سونا دا والله راجل ما مراة والله شنبو يربط بيهو تور
لووووووووووووووووووووووووووووووووووووووول

اسمع الحجاج ديل الظاهر اثروا عليهو بقي يمسح خالنا
الله يديك العافية والقرين كارد قول امين

يارومانسى
عليك الله بتتكلم جد

كان كدة سجم خشمنا

هههههههههههههاى

يا زول .. إنت ما سمعت بالقدم إقتراح قبل كده .. وإقتراحه موضع التنفيذ بحسب آخر إحصائية لإنجازات اللجان المنبثقة من .. خلينا من ده كلو ،، المهم الراجل إقتراحه قابل إستحسان كبير من سكان مدينة جدة لأنه أنصفهم فعلاً .. قال ناس الرياض والدمام والجنوب وغيرها من مدن المملكة يدفعوا الضريبة كاملة ، وناس مكة والمدينة يدفعوا نص لأنه الناس بجوهم عابرين .. بس الناس البكسروا ركبة عندهم ديل يدفعوهم الربع ولا أحسن يعفوهم .. وأظنه كلام عين العقل ولا رأيك شنو ؟؟

على فكرة أنا مستعد أبادلك .. بي كل حاجة .. بس ما بديك أولادي بلمهم (ما شاء الله) كلهم مع بعض وإنت شوف ليك صرفة .. (بغران والله يا زول بغران)
لك التحية وعاطر المودة

أها ياصلاح ضرار
كلامك عن الأولاد دا يا هو نحن القاصدينو لكن الجعلنة بتاعت تغريد دي برضها محمودة ما دام مجيرة للعمدة سيد البلد

يا زول يا زول
سلامات

كل سنة وانت طيب والاسرة الكريمة بالف خير

أقتراحك ده انا موافقة عليه مليون المية ....
عارف انا بجي جده وانت تجي هنا – لكن انا متاكده بكرة حاتجي تقول لي يا بت الهنا انا نطيت من الاتفاق وغيرت رائي

انتو في نعمة اقلاه ساعة أو ساعة ونص وتكون في الخرطوم – ونحنا نسافر يوم وليلة عشان نصل
وبعد ده كله برد و جليد وناس مشاعرهم زي وجوهم ونظرتهم كمان ، كل حاجة محسوبة هنا.

أنا قضيت أيام في الرياض و جدة وبالرغم من انها كانت ظروف صعبة ومستشفى وعمليات وتعب نفسي لكن كانت ايام ما بتتنسي كفاية وقفة الناس معانا واحساسك بانك وسط أهلك وناسك وعزوتك مافي احساس زيه.

وبعد د كله أجركم عند ربنا كبير خالص .. بخدمتكم لي الحجيج

والزيكم منو ؟؟؟

يا زول انا بجيكم قريب انشاء الله

والله يا العمده الله يكون في عونك
انا واحد من الناس طشيت من السعوديه من سنه 92 ولو ما فيها الحرمين والله ذي ما بقولو : فراق الطريفي لي جملو ..والله البلد دي انا مكجنه ومكجن اهلا
(مع احترامي للكل )
ونحنا بنرحب بيك والاسره وسطنا علا ما تودينا هنوك
اها شن قلتا

الاخ يازوول يا زوول
السلام عليكم يأخي
و الله مشتاقين و ليك وحشة
ما تطول الغيبة يا اديبنا

لكن خلعتني بالعنوان
انا افتكرتا عندك تزاكر
سفر للسودان بأسعار
مغريه , اصلي شايل
البلد في 12 الجاي
انشاء الله

انتا عارف يازوول
و الله الله يديك الاجر
انتا بضيف في ضيوف الرحمن
اتخيل دا عليك النبي
قف

يا زول يا رائع عرفنا سبب غيابك و الله يعظم أجرك و الريس ما عارف تغريد لو جات يوم واحد و حضرت الغداء ح تقول ليك شوف لي أول سفرية قبل العشاء ديل ماعارفين جدة لكن قبول تغريد للعرض يبين أنها من بيت كرم و جود و قبل كده عزمت الجميع للفطور في الضحية و ربنا يعين

والله يازول يا زول
انا خايفة دا كله يكون هروب
من المرة والاولاد
بس تكون المسئولية حرقتك
كدى قول الجد

الله يعين ناس جدة وانا عشت في جدة كتير ولمن نقلونا منها كانت اكبر فرحة لينا

البيت مليان وانحنا لابسات التياب اليوم كلوا واخر خدمة وغسيل

وربنا يكون في عونكم ناس جدة ومفروض السفارة تعينهم شوية يعني اي اسرة تديها اعانة شهرية تحت مسمى

اعانة خدمة

hajhamad شكرا يا
ده من أصلك وطيب كرمك بس والله

بعدين يا زول تعال هنا .. إنت ناسي انه نحن برضو عندنا
حج كل سنه في شهر تلاته
DSF... Dubai Shopping Festival
والحجاج كلهم من السعودية
يعني هنا ألم وهناك ألمين
اها قلت شنو .. تبدل ؟؟

بس يا تغريد ما تنسي حاجة ناس السعودية يجو بريالاتهم و يازول مشكلتو الاستضافة و دخول اليد في الجيب لاستخراج الريالات العزيزة يعني خراب جيب و خراب ديار و ربنا يعظم الاجر

يا زول يا زول
حقيقة موضوعك جعلني اتوقف عنده اكثر من مرات ، لأنني اعلم الظروف التي تعايشونها جيدا ، لكن وكما قال احد الأخوان عليك بالصبر لأنهم ضيوف الرحمن ولا شك أن ما تقوم به هو في حساب حسناتك ، مع العلم بأنك تقوم بدور كان يجب أن تقوم به بعثة الحج ووزارة الشئون الدينية ، والمسألة ما محتاجة منهم كبير جهد فقط تنظيم ونظام ، والذي يرى النظام المتبع منن قبل بعثة الحج الماليزية يوقن تماما إن المسألة بسيطة غاية البساطة ، هل تعلم أن الماليزي لا يدفع مليما واحدا مقابل هذه الخدمات حتى أن تكاليف الحج تستقطع من مرتبه كل شهر وتذهب إلى صندوق الحج طبعا لمن اراد ذلك وصندوق الحج له مباني في كل المدن الماليزية يتجمع فيها الحجيج قبل 15 يوم من السفر إلى الآراضي المقدسة ويقوم بعمل بروفة وهناك نماذج لأماكن الشعائر حتى أن الكعبة لها مجسد ، ثم يتحرك الحجيج إلى المطار من مبنى صندوق الحج وأظن أن حجيج ماليزيا واندونيسيا قد لفت نظر كل من ذهب إلى الحج
وربنا يكون في عونك أخوي يا زول