من أخوك الى أبوك يا تماضر

أخوك يا تماضر زولن كلس بالحيل
يقوم الهجعة يتنفل نصايص الليل
ويستغفر صباح ومساء فى ضو قنديل
يحرم يطوف ويسعى يخم فى الأجر بالكيل
يزور حرم الرسول سيدى الكريم ونبيل
يقيف عند سيد الشهداء ويبكى عديل
ويتصدق بكل ما عندو ما هو بخيل
يصوم رمضان وعاشوراء وقيام الليل
وما بيدخل فى بيتو حرام وعندو دليل
أبوى أغرى السلام منى ده ود جبريل
ده زولن مابجود متلو الزمن بالحيل
كريم سمح الخصال أجواد وماهو بخيل
اما حكاية الأنيشا وكلام بنهار محاه الليل
مع حبشية فنانة ووشيشا يضوى زى قنديل
دى كانت حاجة زى لوحة وشالها السيل
برسم فيها بالوجدان وحاجة كده كفن تشكيل
أوعى تكلمى أبوى ويهيج فينى وأضوق الويل
ده كفو بيرمى أتخن زول شرب من نيل
ونهرتو ترعب الفرسان قفا ما تشيل
وحدرتو الله لا وراكى من نوع ديل
حليلو الفارس الأبلج حليل ناظرنا ود جبريل
كبير العائلة دخرينا الكلامو جميل
يمين ما شفت زى خلقو وماجاب فى زمانو مثيل
بلغى منى السلام زفرات تجيه عديل
تلاقيه فى أحسن حال وسط كتبو ولجام الخيل
اروى وفيحاء بالخدمة يساهروا الليل
عشان ارجل رجال ام در ولاد النيل
ابوى الفارس المغوار وماهو الديل
ابوى مقنع بنات ام در فى نص الليل
ابوك يا تماضر العاشق كلام الله ورسولو عديل
ابوك ما بجيب زمانو شبه وحتى بديل
ابوك ركازة للعاطل ابوك بيصلى طول الليل
ابوك بيربى فى الأيتام ابوك صنديد وجمل الشيل
ابوك الشاف رجال كررى وكواسر الليل
تماضر ابوك يجف قلمى الكلامو هطيل
ومهما قلت فى وصفو بعجز فى ثناه عديل
نسيتى القالو لينا زمان نسيتى كلامو لينا قبيل
ربنا يحفظو يخليهو شيخ الدين ود جبريل

هشام
ربنا يديه الصحة والعمر المديد
ويجمعكم في لحظات طيبات في زمن معافي يا رب

أخى العزيز خالد الحاج

شكرا يا أخى على هذا الدعاء المبارك وصدقنى يا خالد ده كلو منك ومن تماضر خليتونا نتطفل على موائد الشعراء وأنا أبعد ما أكون منهم

لك التحية والتجلة

مالك يا هشام اجريت دموعى بوصفو

طبعا هو النضيف كل الخلوق بتعرفو

ومافى اتنين تلاتة...الخير بقيف فى صفو

وانا ماشاكة فى انو النخل..من جرفو

وجواى كل يقين...من عفتو...ومختلفو

وانت البذرة طيبة...من معينو وحرفو

عارفةالحبش والكاس...خيالك وظرفو

بس بدعو الاله...يزيد فى خيرو ولطفو


ويتضارف عليك...ما ضقت حرة كفو

نكهة البرتقال
اليكم جميعا

ربنا يحفظه يارب
ويحفظ جميع اهل في السودان
ويرد غربتنا وغربتكم ياتماضر
وياهشاااام

أها ...قام على جنو

الجن ما بعيد من جتة نحلان سيدا
أكان غلبوا الصبر فى غربة قاسية عنيدة
فرقت العيال فى كل بلدة بعيدة
يوم تجمعنا تانى الروح يكون يوم عيدا

جميلة والله المجادعه دي

ربنا يحفظو ليكم

سلامات
سلمتم وسلم الوالد شيخ الدين
ونسال الله ان يكون الوالدشيخ الدين نبعكم الذي ترشفون منه المحنة والطيبة والخلق الحميد
ونساله سبحانه ان يمد في ايامه ويجعله نبراس لكم تستضيؤن بنوره كلما اشتدت بكما ظلامات الغربة او لفحكم فحيح الشوق
وغاية امنياتي ان يكتمل شملكم وتنعمون جميعا بالخير والمحبة
مع خالص حبي واحترامي

اقيف بى أدب واحيى ود رملية
وبعتذر ان تأخر ردى ليه شوية
كلمتو سيف عديل نجيضة ماها النية
فرحانات بيوتنا وكل وليد وبنية
عشان دعواتو لكبيرنا البناهز المية
ربنا يقبلها ويديهو قدر النية

mohdy

تسلم يا غالى وبارك الله فيك

هشام يا حنين

تماضر يا اميره

اول شي ياخي وعليك الله خاف من الله علي



وتاني شي

شايلكم معاي واتدفي بي طيبة العيون

وكتين اسير مشوار براي

واتاتي زي رمشا حزين بكي الصباح

واتمسي بي حزنوا المسا

وابقي الوحيد زي بلبلا فقد الجناح

هاجر جناه علي الصقيع كاس لي بوادي مشمسة

يا الحبان مالكم علي

ما انا كت كويس

عليكم الله سلموا لي عليهم

في ام درمان نفر نفر

ربنا يا رحمن يا رحيم يا حنان يا منان

تلم الحبان ناس هشام وتماضر وكل الباقين

القريبين والبعيدين من الاهل والخلان

في ساعة خير طيبة مباركة يا ارحم الراحمين

وتاني عليك الله خاف من الله علي

وهسي انا اسوي شنو ارحل

ولا اركب الهوي انت عارفني حنين ما بستحمل

يديكم العافية وطولة العمر ورضا النفس عن النفس يا حنين

المنبر فرح من طلتك يا الزين
حبيب الناس الإسمو نصرالدين
من يوم ما ظهر صبحنا فرحانين
بجبر خواطرنا وبيمحو دمع العين
هاك منى ابيات ترضيك سنين وسنين
فى حب وردى تاهوا معاك واحدين
لهلبت المشاعر وسكبت فيها معين
يا دكتور نشيلك جوه رمش العين
يا ود القبايل مابجينا منك شين
ما أصلك سمح ودناس كمان سمحين
يحفظك الله لينا يغتيكا من العين
يرد لى غربتك منصور وناصر الدين
ما انت البروف حبيبنا نصر الدين

بسم الله الرحمن الرحيم

المحبوب هشام يازول
سلااااااااااااام بحجم بروعة الوالد

عاد ياخواني أنا شئ شفتو بي عيني وماشيتاً قالوهوا لي
أكتر من أسرة عايشين في بيت واحد كبير كان جدعت ليك نكتة بتحوم بيناتهن وبترجع ليك عمل متكامل ممكن تعرضه في أرقى المسارح
في كمية من الود بيناتهن الواحد لا يملك إلاّ أن يقول ما شاء الله وعيني باردة في تقوى في ورع في حميمية في شفافية في الق في وازع ديني في خلوة في ثقافة في أبوَّة في صلاح كل هذه الصفات تتحرك أعضاءها وترتسم معالمها في هذا الشامخ العم شيخ الدين جبريل
ربنا يحفظوا ويخليهو ويحفظ أباء الجميع

تشكر اخوى بدرالدين
على الوصف الجميل ورزين
وقاصد بيه شيخ الدين
كبير العائلة بحر الدين

أب
هشام
وتماضر


يعنى
up