حكومة وقيادات و بلد بتبكي بالرسمي والعمم والميت زعيم طائفة وسياسي ، والمواطن بيبكي على حق الرغيفة

الدولة السودانية نجاح التأسيس وفشل التنفيذ كتاب جديد موجود بامزون
مرحبا Guest
اخر زيارك لك: 11-19-2026, 06:46 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
المنبر العام
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
11-16-2026, 11:28 PM

زهير ابو الزهراء
<aزهير ابو الزهراء
تاريخ التسجيل: 08-23-2021
مجموع المشاركات: 13913

للتواصل معنا

FaceBook
تويتر Twitter
YouTube

20 عاما من العطاء و الصمود
سودانيز اوون لاين ..منبر الحق والحقيقة
مكتبة سودانيزاونلاين
حكومة وقيادات و بلد بتبكي بالرسمي والعمم والميت زعيم طائفة وسياسي ، والمواطن بيبكي على حق الرغيفة

    11:28 PM November, 16 2026

    سودانيز اون لاين
    زهير ابو الزهراء-السودان
    مكتبتى
    رابط مختصر




    يا زول.. حكومة وقيادات.. بلد بتبكي الرسمي العمم والميت زعيم طائفة وسياسي ، والمواطن بيبكي على حق الرغيفة معقولة بس !

    نسأل الله الرحمة والمغفرة لمولانا السيد محمد عثمان الميرغني، وأن يتقبله قبولاً حسناً، ويجعل ما قدمه في ميزان حسناته، ويلهم أهله ومحبيه ومريديه الصبر والسلوان فقد كان واحداً من الوجوه السياسية والدينية الحاضرة في تاريخ السودان لعقود طويلة، ورحيله مناسبة تستحق الاحترام والترحم.. إن شاء الله ربنا يجعله من أهل اليمين

    لكن يا جماعة، والله البحصل في البلد دي بخلّي الزول يقيف محتار.. يبكي على الراحل، ولا يبكي على البلد البقت حالتها تصعّب على الكافر!

    الخرطوم اليوم في حالة استنفار رسمي وشعبي لاستقبال وتشييع جثمان مولانا الميرغني. الطيارات جابت الجثمان من القاهرة، والمسؤولين في المطار، والقيادات السياسية والدينية حاضرة، والموكب ماشي من بحري لحدي الضريح، والحكومة بكل أجهزتها واقفة على الترتيبات
    حتى رئيس الوزراء، العم كامل إدريس، حضر بنفسه، ومعاهو مالك عقار وكباشي وناس الدولة، وكل المراسم ماشّة بصورة تليق برحيل زعيم كبير.

    والحقيقة، ما عندنا اعتراض على احترام الموتى، ولا على تكريم الرموز الوطنية، ولا على إنو البلد تودّع واحداً من أبنائها الكبار لكين السؤال البوجع: يا ربي، المواطن السوداني الحيّ دا منو البستقبله؟ ومنو البعمل ليهو موكب عشان يطلّعو من حفرة المعيشة الواقعة فيها البلد؟

    يا زول، نحنا بقينا عايشين في بلد الأخبار الكبيرة فيها كلها عن الموت والسياسة والمواكب، لكن أخبار المعيشة ذاتها بقت ما بتسرّ القلب! الدولار قرب من الاتناشر ألف جنيه، والرغيفة بقت عاملة حسابها بالدولار، والواحد لو دخل المخبز ومعاهو ألف جنيه، ممكن يطلع منها وهو حاسس إنو كان داخل يشتري عقار في وسط الخرطوم، ما رغيف عيش!

    وأنبوبة الغاز بقت بـ169 ألف جنيه! يعني الزول قبل ما يطبخ العدس، لازم يعمل اجتماع أسري لمناقشة جدوى العملية الاقتصادية، ويحسب تكلفة تسخين الموية ذاتها. والناس البقت تعتمد على الفحم والحطب، ديل ما رجعوا للتراث الشعبي حباً في الماضي، لكن لأن جيبهم أعلن الإفلاس، والغاز بقى سلعة من سلع الرفاهية، حق كبارات ما بتاع صغار الأفندية و الناس الكشامشي ديل
    أما المدارس، فدي حكاية تانية؛ مدارس فاتحة بالاسم، لكن المدرسين وين؟ والطلاب مستقبلهم شنو؟ والمستشفيات البتلقى فيها طبيب امتياز شغال فوق طاقتو، بينما أعداد كبيرة من الأطباء الاختصاصيين غادروا البلد أو نزحوا بحثاً عن لقمة العيش والأمان. والمريض المسكين لو قدر يلقى سرير، ما ضامن يلقى الدواء، ولو لقى الدواء ما ضامن يلقى القروش البتشتريهو! (ألف سلام على مدنية العم كامل إدريس.. شفته أمس في أبو روف في سوق الطلح والله!)

    البلد اتنهبت، واتهدّت، واتقطعت أوصالها، والناس اتشردت بين المدن والدول ومراكز النزوح و المرتبات ما بتلحق الأسعار، والأسعار ما بتلحق الدولار، والدولار ذاتو بقى محتاج زول يلحقو! والواحد بقى يصحى الصباح ما بسأل الحاصل في السياسة شنو، بسأل نأكل شنو الليلة؟ والموية حتجي متين؟ والكهرباء حتستقر ولا حتعمل لينا مفاجأة جديدة؟

    والغريبة إنو في وسط الجحيم دا، لسه عندنا دولة بتعرف ترتب المراسم الرسمية، وتجهّز المواكب، وتستقبل الشخصيات، وتعمل البيانات الرنانة عن العطاء والتاريخ والوفاء
    لكين المواطن البسيط دا لو مرض، أو جاع، أو فقد شغلو، أو ما قدر يوفّر قروش المواصلات، ما عندو موكب ولا لجنة استقبال ولا بيان تعزية في حالتو!

    يا جماعة الخير، احترام الرموز ما معناهو نغض الطرف عن حال الناس.. والله الطلبة في المدارس في حالة جوع، وتكريم الراحلين ما مفروض ينسينا الأحياء البقوا محتاجين تكريم من نوع تاني وهو بس رغيفة بسعر معقول، مستشفى فيه علاج، مدرسة فيها مدرس، وبيت فيه كهرباء وغاز وأمان أختشوا يا ناس.. خلاص بقينا ما قادرين نعمل أي شيء، حتى الصبر زهج مننا!

    والسياسيين ديل، مهما طال بيهم المقام معنا ، في النهاية كل زول عندو يوم بمشي فيهو، ودي سنة الحياة (وما تزعلوا مني ، والله ما دعيت عليكم).. لكن المشكلة إنو البلد ذاتها بقت كأنها ماشّة في مراسم جنازة طويلة، والناس الأحياء فيها قاعدين يصابروا في بعض
    وكل صباح بيسألو يا رب، باقي لينا شنو تاني ما ح نفقدوا او ما موجود او في السوق السودة او الحكومة ح تقلع مننا شنو؟

    نحنا ما دايرين مواكب تشييع كل يوم، ولا بيانات نعي بالجملة.. دايرين نشوف موكب للحياة، موكب لرجعة المدارس، والمستشفيات، والأسواق المعقولة، والخدمات، وموكب للسلام البيرجع الناس لبيوتها.

    ربنا يرحم مولانا محمد عثمان الميرغني، ويرحم كل موتى السودان، ويفك أسر البلد من الحرب والخراب، ويلطف بالناس الباقين فيها الميت ربنا أكرمه بأن مشي مننا ورحل خلاص، لكين الحيّين ديل منو البكرمهم ويريّحهم من جحيم العيشة دي؟

    ما تزعل يا عمنا كامل إدريس، لكين قالوا لي النسوان في البيوت كلموا الزول الله بسألوا مننا.. اللهم أنا بلّغتك، وأنت حر؛ يا تقعد معنا كدا زي الناس، يا بالله تفارقنا بسرعة عشان نفسياتنا..والله تعبت جداً!






                  


[رد على الموضوع] صفحة 1 „‰ 1:   <<  1  >>




احدث المقالات بسودانيزاونلاين اليوم
فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to bakriabubakr@cox.net

© 2014 SudaneseOnline.com

Software Version 1.3.0 © 2N-com.de