أنا ما تَبَع زول.. أنا تبع فكرة الدولة قالوا عليّ "دعامي"، وزادوا عليها "ما وطني".. والواحد يسألهم بسؤال بسيط هو من متين بقى رفض الموت قلة وطنية؟ الوطنية دي ما "نمرة" بنلبسها عشان نغيظ بيها الخصوم، ولا هي "كلاش" بنصوبوا في صدور بعض. الوطنية الحقيقية هي إنك تقيف مع "بقاء البلد"، مش مع "استمرار الحريقة" أنا ما شلت سلاح ضد زولي لا قاتلت مع مليشيا، لا حرشت على دم، ولا طبطبت على ظهر مجرم من أي طرف. أنا قمت بالواجب الطوعي، وعملت مدرسة إلكترونية لأطفالنا الشاردين من نيران الحرب لأني مؤمن إنو بنيء البني آدم هو جوهر الوطنية، مش الكواريك في زمن الفتنة. يبقى كيف بقيت "خاين" عشان رفضت بلدي تبقى "سلخانة" مفتوحة؟ رفض الحرب ما خيانة في الجو المسموم ده، الناس قسمونا فُسطاطين : يا تبقى مع السلاح ده، يا مع السلاح داك ولو قلت لا للاثنين، بتبقى في نظرهم بايع القضية لكن ده منطق الغابة ، ما منطق الدولة الدولة اللي بنعرفها وبندرسها، هي المؤسسات والقانون اللي بيحتكر القوة بشرعية لما القوة دي تتفرتق وتبقى مليشيات ومراكز قوى، الوطنية الحقيقية هي إنك تطالب بوقف النزيف، مش إنك تصفق لواحد من أمراء الحرب رفض الحرب ده انحياز للمستقبل، مش انحياز لجهة بين الوطنية والزار الحاصل الوطنية ما مزاد علني ؛ لا بتتقاس بـ طول لسانك، ولا بكمية الناس اللي وصفتهم بالخيانة الوطنية موقف أخلاقي إنك ترفض سوداني يكتل سوداني إنك ترفض القبيلة تتحول لـ"بندقية إنك ترفض تختصر البلد كلها في شخص أو مؤسسة أو مليشيا الوطن ده أكبر من الجيش، وأكبر من الدعم السريع، وأكبر من أي زول لابس بدلة سياسية. الوطن هو نحن، الأرض، وذكرياتنا المشتتة ليه بقول لا للحرب؟ لأنو الحرب عمرها ما بتبني دولة؛ هي بس بتعمق الحفرة، وبتعمل سوق مواسير كبير للدم والعنف، وبتبني مجتمع قايم على الخوف بدل القانون التاريخ في أفريقيا وجيرانا بيقول إنو الحل العسكري في الخلافات الداخلية هو مجرد تأجيل للموت السلام ما ضعف.. السلام شجاعة. هو اعتراف إنو مافي زول حيمحي التاني، وإلا حنمحي السودان ذات نفسه عن الجواز و الوصمة لما يتحرم مواطن من ورقة بتثبت هويته عشان بس قال دايرين سلام، فالمشكلة هنا ما في رأيه، المشكلة في ضيق نفس اللي ماسك القلم منو الوطنية ما بيديها ليك زول بـ جواز سفر، ولا بيسحبها منك بـ قرار إداري الوطنية دي عِشرة والتزام أخلاقي تجاه ناسك، ما ورقة مختومة بختم حكومة من الآخر كدا أنا ما بدافع عن مليشيا، ولا ببرر جرايم أي طرف، ولا بساوم في وحدة السودان أنا بدافع عن فكرة واحدة السودان ده ما حيمرق لبر الأمان إلا بتسوية سياسية شاملة بتبني دولة مواطنة ، مش دولة غلبة وقوة لو الموقف ده بيوجع تجار الحرب ، خليهم يتوجعوا التاريخ هو اللي حيحكم بينا، ما لحظة الغضب والتحريض دي وفي النهاية.. الوطن ما بيتبني بالسلاح براهو، بيتبني بـ إرادتنا إننا نوقف السلاح ده.
02-22-2026, 05:01 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 8449
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
Hafiz Bashir
صديق مهدى على
فيس بوك
تويتر
انستقرام
يوتيوب
بنتيريست