|
|
|
 Re: يوميات andquot;جدو جالدونقandquot; في زمن الكتمة (Re: زهير ابو الزهراء)
|
يوميات جدو جالدونق: فقه سحب الرخص من لجنة "تسيير نفسها بنفسها"
كان جدو جالدونق قاعد في عنقريبو الهبّاب، مادد ضهرو في نص "الحوش"، شايل راديو الترانزستور أبو بطارية نص ميتة ومربوط بـ "استك"، ومولّع قناته على أخبار بورتسودان
فجأة الراديو بصوت مشوش قال: “قررت لجنة قبول المحامين في بورتسودان سحب رخص عدد من المحامين بتهمة مخالفة أخلاقيات المهنة وانتماءاتهم السياسية...”
لسه جدو ما كمل يبلع ريقو، إلا ودخلوا عليه جماعة من "قانونيين الغفلة"، لابسين بدلات مكوية زيادة عن اللزوم (رغم الرطوبة)، شايلين ملفات منفوخة ورق، ومكشرين كأنهم "فتحوا الخرطوم" بـ "المساطير"، وقالوا ليه بصوت واحد:
يا جدو، نحن سحبنا الرخص، وشطبنا الأسماء، واستندنا على المواد (25) و(66) و(شلوخ) القانون... رأيك شنو في هيبة الدولة دي؟
جدو جالدونق نزل النظارة لي نص خشمو، قلب المحطة في الراديو يمين وشمال، رجّعها تاني، وبعدين عاين ليهم من فوق لتحت بنظرة "فاحصة وناقدة"...
وفجأة فجّر ضحكة مجلدنة! ضحكة خلت العنقريب يطق، والسبحة تقع، والدجاجة في الحوش تجري مفزوعة قايلة "الكتمة" حصلت
قال وهو بيمسح في دموع الضحك: – أجي يا بري! والله شر البلية ما يضحك... إنتو قايلين القانون ده «ملاح شرموط»؟ أي زول يمد قدحتو، يكب من طرف، ويجري؟
الجماعة وقفوا متلخبطين، واحد فيهم قال: "يا جدي ده قانون وسيادة!" لكن فجأة، الضحك وقف. ملامح جدو اتغيرت... عيونو دمعت... وبقى يبكي بكاء وجيع يقطع القلب
قالوا بخوف: – يا جدو مالك؟ هيبة القرار أثرت فيك ولا خفت من سحب الرخص؟
مسح دموعو بـ "عراقيو" المخرّم، وقال بصوت مخلوط بين وجع وسخرية: – ببكي على بلد بقى فيها «المنتحل» قاضي، و«المحلول» لجنة، و«المعلّق» صاحب قرار...
يا جنابو، إنتو لا عندكم شرعية، لا عندكم اختصاص، لا حتى “ختم أصلي”! القانون ده مهنة الفرسان، ما مهنة "البيانات المضروبة"
وأضاف وهو يلوّح بالعكاز في الهوا: – نطيتوا فوق "مجلس التأديب" زي القرد في شجرة مانجو، ونشرتوا الأسماء في "قروبات الواتساب" قبل ما تخطروا أصحابها.. ده قانون؟ ولا حجز كراسي في حفلة فنان صف خامس؟ ولا تصفية حسابات بـ "القطاعي"؟
واحد من الجماعة حاول يتفلسف: "بس ديل خالفوا الأخلاقيات يا جدو!" جدو قاطعه بحدة: – الأخلاقيات دي "توب" كامل، ما بيلبسوها "مقدودة"! المحامين ديل ما ناس ساكت، ديل حِريفين، وعندهم طعون ولجان تسيير شرعية وذاكرة قانونية طويلة
والأستاذة نفيسة حجر والشباب ديل، ما بخلّوا حقهم، لا في محكمة بورتسودان ولا في محكمة التاريخ
قام جدو وقف، عدّل عمامته، وركّز العكاز في الأرض بقوة: – أما إنتو يا ناس بورتسودان، القايلين الحرب دي "غابة" تصفوا فيها حساباتكم المهنية والسياسية، نهايتكم حتكون زي... نهاية ديك القيامة!
قالوا باستغراب: – وديك القيامة نهايتو كيف يا جدو؟
ركب جدو حمارو، لف الحبل حول إيدو، وقال وهو ماشي ومغبر وراه: – ديك القيامة ده، لا أذّن في الدنيا، ولا لحق الصلاة في الآخرة... لا قِبلوا قراراتو، ولا اعترفوا بشرعيتو، وضاع بين "الكاكي" و"الروب الأسود"
وأضاف وهو يلوّح بيدو من بعيد: – وقانونكم ده بكرة يبقى ورق "تسلية" في سوق السمك... وبما إنو بورتسودان فيها بحر، أمشوا بلّوا قراراتكم دي واشربوا مويتها، لعلّها تروي عطشكم للسلطة قبل ما يغرقكم الموج.. والموج الجايي "قانوني" ما بلعب!
ومشى جدو جالدونق... وخلى وراه لجنة واقفة تتلفت، والقانون ضاحك من المهزلة، والديك لسه محتار... يأذن للفجر، ولا يستنى القيامة تقوم؟
| |
  
|
|
|
|
|
|
|
 Re: يوميات andquot;جدو جالدونقandquot; في زمن الكتمة (Re: Arif Nashed)
|
شكر خاص وعميق لصديقي عارف ناشد
على هذه الرسومات البديعة التي منحت بوستات جدو جالدنق روحًا إضافية، وحوّلت الفكرة من نص مكتوب إلى مشهد حيّ نابض بالسخرية الذكية والوجع السوداني
عارف لم يرسم شخصيات، بل التقط مزاجًا عامًا وجوه الناس، ثقل العيش، خفة الدعابة في قلب القسوة، والضحك الذي يُقاوم الانكسار
هذه الرسومات ليست زينة بصرية، بل موقف، وامتداد صادق للفكرة التي يحاول جدو جالدنق قولها بطريقته
ممتن لعينك الحساسة، ولريشتك التي تعرف أين تضحك وأين توجع يا صديقي كل الاجلال
دمت سندًا للجمال وسط هذا الخراب العظيم في بلدنا لمزاج الاغلبية من اهلنا
زهير عثمان
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: زهير ابو الزهراء)
|
جدو جالدونق يردم الطرف الثالث في جامعة الخرطوم
أسمع يا ولدي… أسمع يا مبروك…
جامعة الخرطوم؟ الجميلة؟ أمـال؟
الليلة بقت (تزوير ومستحيل)!
يا حليل أيام المنارة، هسع بقت زي صينية السوق العربي- عايز شهادة؟ خش من الباب الخلفي، غرزتك جاهزة، والسجل فاتح صدره!
قال ليك شنو؟ طرف ثالث!
يا بروف رباح، إنت زول قامة وقُرضة،
لكن الطرف الثالث ده في السودان معناهو العفريت الما بنمسكوا:
هو البيقطع الكهربا وقت المغرب،
وهو البيشفط الرغيف من الصاج ويقول ليك الفرن طفى،
وهو ذاتو الليلة بقى يدخل الجامعة من غير بطاقة ويقعد في الصف الأول!
طرف ثالث شنو يا جماعة؟
ده طرف عندو مفاتيح كل الأبواب- الوزارة، الجامعة، السجل، وحتى درج العميد!
بقى يزاحم الطلبة في الكراسي عشان يطلع
دكتوراه في علوم الكرتون المضغوط!
والله جماعة،
التحول الرقمي ده عامل ليهم حساسية أشد من الفول!
ناس بتموت في:
📄 الورق الأصفر
🖊️ التوقيع المشلخ
🔴 الختم الممسوح
تقول ليهم باركود؟
يقولوا ليك أعوذ بالله… دي ما مؤامرة كونية!
التزوير عندهم ما لعب،
ده فن تشكيلي سوداني أصيل - شيل السين تخليها صاد،
تشيل الرسوب تخليه امتياز،
وتطلع ليك شهادة
“بتقدير: فوق الممتاز مع مرتبة القرف الأعلى”.
يا جامعة الخرطوم…
الما شافك زمان منارة، يشوفك الليلة ستارة،
ستارة تقيلة مخبية
“طرف ثالث” و”طرف رابع” و”طرف خامس”…
بقى الواحد يخاف يمشي الجامعة
يطلع ليهو زول من ورا شجرة المانجو يقول:
يا دفعة… ما عندك دكتوراه في علوم الدجل؟ نضبطها ليك في أسبوع!
استقالة بروف رباح دي ما استقالة ساكت، دي شهادة وفاة للنزاهة مختومة بختم الغُبن
الراجل شاف السجل الأكاديمي
بقى زي دفتر دكان اليماني:
أي زول يجي، يشطب اسمو، يكتب خالص، ويمشي مبسوط
يا طرف يا تالت…
يا سجل يا ضايع…
يا شهادة ما معروف أبوها منو…
والله الجامعة لو اتكلمت
كان طالبت بـ اللجوء السياسي
في أي جامعة لسه الورق فيها بيعرق من الخجل!
يا ولد…
شيل الموبايل من قدامي.
الجامعة بقت سوق ليبيا،
البروفات بقوا دلالين،
والشهادة بقت كرتونة بسكويت فاضية
قوم جيب لي جبنة مُرّة…
أمرّ من حال شهادة جامعة الخرطوم المزوره
ما معروف أمها الكلية ولا أبوها السجل! #
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: Arif Nashed)
|
درويش الكدرو.. وحكومة الامل (الضاااايع ساي)
يا كتمة!
في مشهد كدة تحسّو طالع من مسلسل تركي "ماسخ"، ناقصو بس موسيقى "طننن… طنااان"، ظهر لينا فجأة السيد كميل إدريس في بحري. الزول ده ما جاينا كرئيس وزراء لبلد مكسر حنكه وضايع حق أهله، لا لا…
ده جاي كأنه "الناصر صلاح الدين" داخل يحرر الكدرو من "حنفية الموية"!
دخل المدينة والناس واقفة مستغربة، والغبشة والفقر الصادي في الوشوش يحكي حال "الصابرين" الحقيقيين، والناس بتتساءل: – يا زول ده جاي يوزع لينا "رغيف" ولا جاي يوزع لينا "هوا"؟\
بحري يا كميل، بقت ما بتعرف الكهرباء إلا من حكاوي الجدات، والموية بقت "ضيفة شرف" تقيلة، تجي مرة في الأسبوع "زيارة عابرة"، ولو جات بنعرض ليها بـ "الجرادل" ونعمل ليها استقبال رسمي!
خطاب النصر من ميدان «الثبات» (ثبات العتمة)
وقف سيادتو وسط الجمع، وبدل ما يقول لينا: – المخبز ده ح يفتح متين؟ – "الماسورة" دي ح تنبض متين؟ – الدواء ده ح يرخص متين؟
أبداً.. الزول لبس "خوذة الكلام" وتقمّص دور "قائد العمليات". نصر قريب… جهاد… وطنية… ثبات…! الناس بقت تلف شمال ويمين، وتفرك في عيونها من الغبار: – يا جدو، الدبابات وين؟ الطيارات وين؟
المدافع القالها دي وين؟ طلع كل السلاح الموجود "طق حنك" وكلام ملفوف بورق سلوفان حكومي، يلمع من بعيد ويطلع من جوة "هواء بارد" في عز هجير الكتمة!
وعود الرفاهية في زمن «يا ساتر»
أما الوعود… دي بقى دخلت في "الخيال العلمي" عديل
الصحة والتعليم والله يا جماعة اللزول دا وناس قال ح نوفرها.. كأنو المستشفيات قاعدة في "الويتنج ليست" وبتقول "والله نحن جاهزين، ناقصنا بس كميل يمرّ والعيان يطيب بـ "بركاته" برااااه"!
الكهرباء والموية كمان قال التحسين جااااي.. والزول واقف يخاطب فينا في ظلام يخليك تشوف "الجن" في عز الضهر، والموية لو جات بنقول: "دي موية ولا معجزة إلهية؟".
الجامعات و قال ح ترجع.. يمكن عشان الطلبة يدرسوا مادة جديدة اسمها: «فقه التخدير الحكومي في زمن المواسير الناشفة».
يا كميل.. الكتمة واصلة حدها!
الوعود دي بقت "العملة" الوحيدة الما سقطت قيمتها عند الحكومة، بيطبعوها ويوزعوها بـ "الكوم" من غير رقيب ولا حسيب.
الغريب إنو الزول بتكلم عن "شغله" الأساسي— الأمن، المعيشة، الخدمات— كأنو "منّة" منه، ولا "صدقة جارية" بيوزع فيها للمساكين في ميدان الكدرو، ولا مكرمة بمناسبة "العودة الميمونة" من زمن الغيبوبة!
يا سيّد كميل… ناس بحري ما دايرين "تعبئة كلام"، دايرين "كهرباء" تمشي في السلك، و"موية" تبل الريق في المواسير، و"حقيقة" واحدة تمشي بين الناس الغلابة.
لكن واضح إنو حكومة الأمل دي… أمِلَت في كل شي.. إلا إنها "تخت الكورة واطة" وتشوف الحاصل فينا شنو!
يا حليلك يا بلد.. ودرويشك لسة بـ "يدور"!
| |
|
|
|
|
|
|
|
|
 Re: يوميات andquot;جدو جالدونقandquot; في زمن الكتمة (Re: زهير ابو الزهراء)
|
الحكومة تدعو للعودة إلى الخرطوم… وجحر الضب جاهز
حكاية الضب.. والعودة إلى جحر الخرطوم
قال ليكم السيد رئيس الوزراء كامل داريس – يا حليلو – طلع يخاطبنا بخطاب كله طمأنينة، زي شيخ جامع طيب النية، قال لينا
«ارجعوا الخرطوم… الأمور بقت باسطة»
أنا، غايتو، لما سمعت الكلام ده، اتذكرت قصة الشيخ البخطب في ناس الحاج يوسف عن جحر الضب. الشيخ قال: «أخرجه الطبراني»، والناس سألتو ببراءة قاتلة
— يعني الطبراني ده طلع الضب من الجحر؟
الشيخ حاول يشرح إنو «أخرجه» يعني «رواه»، لكن الناس كانت دايرة إجابة بسيطة
— الضب حي ولا ميت؟
ومن يومها، بقى أي كلام كبير بلا مضمون اسمو: ضب في جحر
أهو ده بالضبط حال دعوة الحكومة للعودة إلى الخرطوم
تقول لينا ادخلوا العاصمة، ونحن نسأل سؤال بسيط والحاجات الفوق راسنا دي شنو؟
المسيرات بتحوم، والأصوات ما فارقت الأذن. يردوا عليك بلغة رسمية ناعمة، من نوع الطمأنات والبيانات. لكن في الواقع، ممكن تدخل الخرطوم مواطن، وتطلع منها… خبر عاجل
قالوا التحرير تم، وبقى في «أبخرة» في الجو. المواطن يرجع يشم بقايا النصر ده، وما يلقى نفسو بيسبح بحمد الإنجاز، بل بيدور أقرب مستشفى — لو لقى
هنا بتدخل اللغة الرمزية، ويقولو ليك: ما تفهم الكلام حرفيًا. لكن الكحة، والاختناق، والحريق في الصدر… دي حاجات ما بتقرأ البيانات الرسمية
وإذا نجوت من كل ده، في استقبال تاني مستنيك: البعوض
حُمى الضنك فاتحة مكتب دائم في الخرطوم
تدخل المدينة نازح، تطلع منها زول بيعد الأيام مع الحقن والمحاليل. بعوضة صغيرة بتعمل الشغل العجزت عنو كل خطط الدولة، ولا لاقت زول يرشها، لا ديتول ولا غيره
تجي تسأل السؤال المنطقي — طيب الأكل؟ الدواء؟
يردوا عليك بنفس لهجة الشيخ القديمة «أخرجناه»
تفتش في السوق، تكتشف إنو «أخرجناه» دي معناها دخل السوق الأسود. كل حاجة موجودة… لكن بس للزول القادر يدفع، أو القادر يضحّي بالضب ذاته
في القصة القديمة، الشيخ حلق دقنه، هرب من الإحراج، ومشى مدني اشتغل في محل فلافل. أما حكومتنا، فدايرة مننا حاجة أصعب
دايرة نحلّق عقولنا، ونرجع لجحر الضب، والخرطوم لسه فيها المسيرات فوق، والضنك تحت، والهواء ذاته محل شك
وفي الآخر، زي ما قال أدروب للشيخ في مدني «إنت بتشبه زول كان عنده ضب وإداه للطبراني»،
التاريخ بكرة حيقول كان في شعب عنده بلد… وجات حكومة سلّمتها للحرب، وقالت للناس: ارجعوا، وأتعايشوا مع الضب في الجحر
عجبي.
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: زهير ابو الزهراء)
|
يوميات الجد جالدنوق: مَناوي والدموع التماسيحية!
الجد جالدنوق حكّ راسو لامن القرعة لمّعت، وقال -يا ولدي، الزول الببكي في نص العرس، يا عارف العروس ما حقته، يا عارف الكشف خلّوه للوزير!
الليلة مني أركو مناوي بكى…
وبكاهو حرّق قلبنا!
لكن ما بكى عشان المواطن الاتشوى في نيران الحرب،
ولا عشان التكل الفضي والبيوت الاتهدّت،
ولا عشان الفارين من الموت الما لاقين حتى ضُل ضُحى.
مناوي بكى لسبب واحد -سمع كلام سر في أضانو إنو الجماعة — الجيش —
دايرين يقطعوا تذكرة قطر السلام براهم،
ويخلّوه واقف في المحطة
يشيل ويرمي في التلج.
الجد جالدنوق قال - يا جماعة، الحرب دي بقت شركة مساهمة خاصة ولا شنو؟
يعني السلام دا لازم يمر بختم المشتركة؟
ولا الحكاية بقت عطّار حرب، خايف سوق السلام يكسِد وبضاعته تبور؟
يا مني، يا ولدي…
إنت ما قلت لينا الحرب دي كرامة وطن؟
الليلة الوطن بقى عندو كروكي
وتوقيع محفوظ في جيبك؟
من متين بقى السلام خيانة
لو ما كنت إنت العريس؟
وبعدين الحتة الجدّعتنا بالضحك - تقول المساعدات الإنسانية متاحة في كل السودان!
يا سلام!
والجد جالدنوق بسألك وهو متمطق في الشاي:
يا فصيح…
لو المساعدات واصلة،
والمنظمات داخلة ومارقة،
والناس شبعانة (دعامة وجيش)،
الحرب دي لزومها شنو؟
بنلعب سيجة بالرصاص يعني؟
وتقول كمان: الاتفاق مع حكومة أخرى خطر!
والجد جالدنوق يسألك بهدوء قاتل- يا جنابو…
هي وينها الحكومة أصلاً؟
البتقتل الناس دي حكومة؟
ولا البتشردهم في الفيافي دي شرعية؟
يا ولدي…
البكاء دا ما بكاء وجع قلب على السودان،
دا بكاء وجع كراسي.
بكاء زول حسّ إنو السجادة الحمرا
اتسحبت من تحت بوتو،
وإنو الجماعة دايرين يقسموا الكيكة
وهو لسه بغسل في صحون الحرب.
الجد جالدنوق نفض توبو، وختم الحكاية وقال الزول البخاف من السلام
غالباً بكون باني عمارة من طوب الحرب.
والزول البخاف من الاتفاق
بكون عارف إنو في السِّلم وزنو وزن ريشة،
وفي الحرب بيبقى حجر زاوية.
تصبحوا على وطن…
لو الجماعة ديل خلّوا فيهو حيطة
نرفع فيها العلم.
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: Arif Nashed)
|
سودانير.. سيادة على الله، راكبة تكتك!
يا أولادي، سودانير دي زمان كانت لما تطلع السما، السحاب يقوم يحلّ ليها الطريق بنفسه. هسع بقت زي حمار المك المربوط في النص، أي زول يجي يركب فيها شوية، ويخلّع حديدة ويمشي
الطيارة اليتيمة والشغل المفضوح
الطيارة الوحيدة، إيرباص A320، المفروض تشيلنا فوق، تخدم الغلابة. الجماعة قالوا: “لا يا ولدي، خلينا نأجرها في جدة والقاهرة بـ2500 دولار في الساعة!”
يا زول ده إيجار ركشة في سوق ليبيا أغلى من كده. الطيارة قعدت هناك، وعمولة وفلوس أصحاب الشركات ماشية، وسودانير هنا قاعدة تعدّ الأيام
لعبة التأمين وقلع العين
المالية قالت: شيكان ما ينفع، نمشي الشرق الأوسط
الشرق الأوسط؟ مديرها أبوشعيرة، ونفس الزول عندو أسهم في الشركات المنافسة (بدر وتاركو).
يعني يا أولادي، حاميها حراميها، ودي شهادة جدكم جالدقون
سودانير تدفع 150 ألف دولار تأمين للسفرية، والشركات التانية 70 ألف بس! ده تأمين ولا خلو رجل؟
الوزارة ولا سمسرة؟
جبريل وأبوسن وأبوشعيرة ديل شغالين حكومة ولا تجار شنطة؟
الحرب مشتعلة والناس بتموت، وهم قاعدين يفككوا سودانير قطعة قطعة، زي الحرامي البسرق الشبابيك وهو مولع البيت
على لسان الجد جالدقون
يا ولدي، سودانير هي ما طيارة ساي، دي هيبة دولة
لما يكسروا جناحاتها عشان يملوا جيوبهم، ما بيسرقوا قروش ساي، بيسرقوا عزّة وعرق جباه الشعب
الفساد هسي بقى نهاري، والمسؤول بقى مهندس هدم، يهدم في الدولة ويبيع الطوب لصحابو
زمان سودانير كانت بتشيلنا فوق السحاب…
هسع بقت تشيلنا فوق السكين
ولو فضلنا ساكتين، بكرة القصر الجمهوري ذاته حيأجروهو كقاعة أفراح، ويقولو لينا دي الظروف الاستثنائية!
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: Arif Nashed)
|
كيمياء الكيزان: التمرة القلبت خمرة! 🧪
يا جماعة، الكيزان ديل وصلوا مرحلة من "الفهلوة" بتخلي بروفيسور كيمياء يقطع هدومو ويجاري الخلا! آخر نكتة طلعت من قناة «طيبة» قالت ليك
"الدعم السريع ده كان تمرة زرعوها الكيزان، وقاموا القحاتة خمّروها وعملوها عرق وسكروا بيها البلد!"
عليكم الله في استهبال أكتر من كده؟ يعني يا جماعة، طول السنين الفاتت والدعامة ديل حارسين العرش وبيجلدوا فينا، كانوا "تمرة سكري" مغسولة باللبن؟
ولما مشوا اليمن يلقطوا الدولارات، كانوا "تمر بركاوي" أصلي؟ ولما فتحوا ليهم مناجم الدهب، كانت "عجوة بالسمن"؟
حتى الجنجويد الأوائل أيام موسى هلال، كانوا "تمر بالزبدة" رغم حرق القرى والاغتصابات.. وقتها الانتهاكات كانت مجرد "شربوت" بيساعدهم يهضموا بيهو ثرواتنا!
السؤال المهم: التمرة دي بقت "خمرة" متين؟ بقت حرام بس لما حميدتي رفض يبقى "عكاز" يضربوا بيهو الناس.. هنا طوالي الكوزة تذكرت إنو الخمر حرام، وإنو الدعم السريع "مليشيا"!
ونجي لـ "كيمياء كيكل" العجيبة: إذا القحاتة حولوا التمر لخمر، طيب "كيكل" القائد الدعامي المسؤول عن بلاوي الجزيرة، لما انضم للجيش رجع "تمرة" كيف؟
دخل "مغسلة الكيزان" طلع لواء وبطل قومي؟ واضح إنو في معمل سري بيحول "العرقي" لـ "عصير تبلدي" بمجرد ما تبوس يد الجماعة!
* قمة المسخرة - القائد السلّم مدني "تسليم مفتاح" اتحكم بـ 5 سنين (يعني نوم وراحة)، و"ست الشاي" المسكينة اللي صبت كباية شاي لدعامي اتحكمت بالإعدام!
الحكاية لا تمر ولا خمر.. الحكاية إنو الجماعة ديل بيسقونا في "شربوت أكاذيب" عشان يغطوا على ريحة طبختهم اللي حرقت البلد!
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: Arif Nashed)
|
جالدقون واللاجئين في "المحروسة": يا جيتو في زمن الجوع.. يا رحتو في زمن الكشة!
الحد جالدقون اتوكّل على عصاته، وبصّ لبعيد وهو بيشاور على اللواري المشحونة بالناس والكلابشات، وقال بصوت فيه "سودانية مُرّة"
"والله يا عالم، إحنا شعب محيّر! هربنا من 'الدعامة' و'الجنجويد' عشان نقع في يد 'الكشة' و'الكرت الأصفر' اللي ما بفك مأسور!
السوداني ده بقى زي 'الكرة المقرورة' في الميدان؛ هنا تضربك 'دانة'، وهناك تلمك 'دفار الترحيل'. الواحد يهرب من الموت بـ'التدوين' عشان يرجعوهو للموت بـ'التنسيق الأمني'؟ دي ما مؤامرة، دي 'مؤامرة الموت المتبادل' يا ناس!
بيقولوك: 'إحنا إخوات والبيوت مفتوحة'.. أيوة مفتوحة، بس عشان يدخلوا يفتشوا الإقامات تحت العناقريب، ويطلعوا لك كرت مفوضية زي الورقة العادية، يمكن يستخدموه في اللعب بالطرمبة بدل ما يحميك من لوري أسوان!
القصة بقت 'عينة'.. الزول يهرب من الخرطوم لاجيء، يوصل القاهرة يبقى 'مخالف'، يركبوه اللوري يرجع بورتسودان يبقى 'نازح مرتين'.. ده ما لجوء، ده ماراثون أولمبي في بلد مقطوعة فيها الأنفاس، والبطولات دي ما فيها ميداليات
بس فيها كلابشات وأصفاد!
وبورتسودان تقول: 'البلد آمنة، أرجعوا عمرّوها'.. أيوة، نرجع في المعسكرات؟ ولا نستنّى الدانة الجاية؟ والناحية التانية تقول: 'القانون فوق الجميع'.. والله القانون ده بيعرف 'الفوق' بس في رقاب المساكين، أما العسكر، فهم فوق كل حاجة
فوق القانون، فوق الإنسانية، فوق المنطق، وفوق دماغك لما تحاول تفهم شنو اللي حاصل!
المفوضية السامية نايمة نوم التقابة، بتطلع كرت 'لاجئ'.. بس أول ما العسكري يهبشك، الكرت ده بيبقى زي ورقة طعمية: ممكن تغلي بيها فول، بس ما بتحميك من الكشة! والشباب اللي بيحاولوا يسجّلوا يلقوا النظام الإداري زي 'لعبة مصيدة الفئران'
كل ما تحاول تدخّل خطوة، يطلع ليك حاجز جديد، وختم جديد، وتوقيع ما مخصك!
أما الأطفال، يا ناس، فيتجزّأوا عن أهاليهم كأنهم قطع غيار سيارات، والقُصّر يرحّلوا براهم، ومرضى ومعاقين يتساقوا من غير رحمة
يا حليلك، الكبار في السن كأنهم شاي في كيس ورقي: ما لهم طعم ولا قيمة في معادلات الكشة!
يا حليلك يا سوداني، بقيت لا لاقي أمان في بلدك، ولا كرامة في الغربة.. بقيت زي 'الراديو الشغال ببطارية واحدة' لا بيغني، لا بيخلصك من الوشوشة، ولا حتى من الخبيات بالعصا
والأدهى، الإجراءات الرسمية بقت مهرجان كوميدي: استمارة هنا، ختم هناك، تصريح للترحيل باللون الأحمر، تصريح للكرت الأصفر في جيبك، بس في النهاية، الكل بيضحك عليك، والعصا واللوري دايمًا مقابلك!"
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: زهير ابو الزهراء)
|
الجد قالدقون يرد علي الجنرال اللي قال ما ح يرجعوا تاني #
الجد جالدقون لَفّ شاربه لفة فيها صبر القرون، ركّب نظارته التقيلة كأنو داخل محكمة التاريخ، أخد نتشة سعوط حرّكت الدماغ قبل اللسان، وقال وهو يبتسم ابتسامة الزول العارف النهاية من البداية
"يا برهان… البحر ده نحن ما بس شربنا ميتو، ده غسّلونا بيهو سبع مرات، والتامنة بالتراب ذاتو. والبشير قبلك قال العرضة برة، وقعد يرقص بالعصاية كأنو الزمن واقف ليهو تحية!"
وقف شوية، زي زول بيفتش في ذاكرة البلد، وضحك ضحكة قصيرة فيها مغص سنين وقال -"الذاكرة يا جنرال نعمة، لكن الظاهر عند القيادة العليا الذاكرة بقت زي شبكة كهرباء الخرطوم: تقطع وقت الجد، وتشتغل بس وقت الخطابات"
سمعنا كلامك عن الناس البرة، وإنهم (ما حيرجعوا). الكلام ده ما جديد، محفوظ زي نشيد الصباح. زول قبلك قالو، وقعد تلاتين سنة يقول المعارضة دي إلا تغتسل بماء البحر سبع مرات، والتامنة بالتراب، عشان تفكر ترجع. أها… غسلت؟
البحر تعب؟ ولا التراب خلص؟ البشير اللي كان ماسك البحر بيدو وينو هسع؟ وقصر الرمم ده ساكنو منو؟
الحكم العضود بقى ذكرى، والمفاتيح ضاعت، والبحر ذاتو زهج
إنت يا برهان، ماشي في نفس الدرب، حذو البرطوش بالبرطوش بس البرطوش حقك سفنجه قديمة ومتآكلة وانت انقلبت على إرادة الناس، دم الشباب لسه ما نشف في الشوارع، رجعتنا لليل الكان مفروض نصحى منو وقاعد فوق تلة خراب
تحلم بكرسي قاعد يتكسر تحتك حتة حتة و الكرسي ده يا ولدي لو بدوم، ما كان وصل ليك، لكن الظاهر عدوى الديكتاتورية أخطر من السل بتفقد الذاكرة وبتخلي الزول يقرا التاريخ بالمقلوب
نحن يا جنرال، ما شاغلنا شيلتكم ولا قعدتكم في السلطة شاغلنا دم الناس دم العساكر، دم الأطفال، شاغلنا بلد بتتفكك قطعة قطعة وإنتو لسه بتقيسوا في الولاءات وبتعيينوا المقربيين نحن شاغلنا مخرج يوقف الحرب دي، يرجّع الناس الشردتوهم
اللاجئين والمنفيين، يرجعوا لبيوتهم المسروقة و دا حق، مش صدقة
أما حكاية (ما حترجعوا) دي… فدي كبيرة منك كا معروف الموت لمنو فينا وواسعة زيادة عن اللزوم , السودان ده ما حواشة ورثتها، ولا ويلة بتطلع فيها تصاريح دخول وخروج. السودان بلد بناسو، وناس السودان راجعين، راجعين بدون إذن
بدون ختم، بدون ما يسألوا زول قاعد على كرسي مهلهل
يا برهان، نصيحة من جالدقون -- خفف المنقة شوية… التاريخ ما عندو مجاملة، والمحرش ما بيقاتل و البحر الغسل فيهو البشير يدينو لسه مويتو مالحة، والدوام — كالعادة — لله وحده.
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: زهير ابو الزهراء)
|
هضربة الجد جالدوقون: سناء وفلتر المرحلة الانتقالية
قال لي الجد جالدوقون
يا زهير يا ولدي…
قعدت قدام التلفزيون، قلت نشوف السياسة الليلة عاملة كيف
لقيت سناء طالعة في قناة الجزيرة، الكلام مرتب، الجُمل موزونة، والصوت هادي كأنو البلد داخلة مؤتمر سلام في جنيف، ما داخلة سنة كاملة حرب
اللقاء ما كان ارتجال
كان واضح إنو في إعداد محكم، ورسائل محسوبة، وكلمات مختارة بعناية
مدرسة إعلامية تعرف كيف تقدم “نسخة محدثة” من خطاب قديم… من غير ما تكسر الإطار الأساسي
"لا للحرب"… عبارة كبيرة بحروف صغيرة
قالت “لا للحرب وفق اتفاق عادل”
الكلمة المفتاح هنا ما “لا للحرب”…
الكلمة المفتاح “عادل”
العدالة دي هل معناها محاسبة واضحة؟
ولا معناها تسوية سياسية فيها قدر من التنازلات؟
ولا معناها تأجيل الأسئلة الثقيلة إلى “مرحلة لاحقة”؟
في السياسة، أحياناً العبارة تكون واسعة لدرجة إنها تستوعب كل شيء…
وفي نفس الوقت لا تُلزم صاحبها بشيء محدد
وده الفرق بين الشعار والموقف
"الدولة مسؤولة عن التفاوض"
جميل
لكن السؤال البسيط: أي دولة؟
الدولة كمؤسسات قائمة الآن؟
ولا دولة انتقالية جديدة تُبنى على توافق مدني؟
ولا دولة تُعاد صياغتها بعد نهاية الحرب؟
المصطلح هنا واسع، ومفتوح على أكثر من تفسير
والسياسة بطبيعتها تستفيد من المساحات الرمادية
"نحن تيار متجدد"
التجديد كلمة محبوبة جداً في فترات الأزمات
لكن الفرق بين التجديد والتجميل بسيط… وخطير
التجديد يعني مراجعة صريحة
اعتراف واضح
تحديد أخطاء محددة
أما الاكتفاء بنقد “طريقة الإدارة” دون المساس بالمنهج نفسه، فده أقرب لتعديل في الأسلوب، لا في الأساس
التاريخ السوداني خلال الثلاثين سنة الماضية ما كان مجرد “سوء إدارة”…
كان مشروع كامل، بكل نجاحاته وإخفاقاته ومسؤولياته.
والتجديد الحقيقي يبدأ من مواجهة ذلك الإرث، لا تجاوزه
التحذير من الطامعين في السلطة
التحذير من استغلال الحرب للوصول إلى السلطة كلام مفهوم
لكن السياسة لا تعمل بذاكرة قصيرة
أي خطاب ينتقد الطموح السلطوي اليوم، سيُسأل تلقائياً عن علاقته بالسلطة بالأمس
والمقارنة هنا ليست هجومية… بل منطقية
المصداقية في السياسة تُبنى على الاتساق، لا على اللحظة
الغائب الأخلاقي
الاستديو كان منضبطاً
اللغة هادئة
لكن في زمن الحرب، أهم كلمة هي “الإدانة”
عندما لا تُذكر الجرائم صراحة،
وعندما لا يُحدد المسؤول،
يتحوّل الخطاب إلى مساحة آمنة… أكثر من كونه موقفاً أخلاقياً
وفي زمن الدم، الحياد ليس دائماً حكمة
أحياناً يكون مجرد حسابات
كلامي ليك يا زهير
اللقاء لم يكن إعلان انسحاب من السياسة
بل كان أقرب إلى إعلان تموضع جديد
الرسالة الضمنية واضحة ونحن موجودون في المشهد وسنكون جزءاً من أي تسوية قادمة
هذا حق سياسي مشروع لأي تيار
لكن الشرعية الأخلاقية لا تُكتسب عبر جودة الإخراج، ولا عبر تحديث المفردات، بل عبر وضوح الموقف من الماضي والحاضر معاً
السودان اليوم لا يحتاج نسخة أكثر أناقة من الخطاب…
بل يحتاج وضوحاً أكثر شجاعة من الجميع
يا بنتي سناء… الاستديو ممكن يغسل الوِش، لكن الذاكرة السودانية ما صالون تجميل ولا بتمحاها إضاءة، ولا بتنظفها عبارات منقّحة
الدم ريحتو نفّاذة… وما بتختفي بـ«فلتر المرحلة»
وما بين إضاءة الاستديو وواقع الميدان، الحقيقة دايماً أتقل من أي صياغة محسوبة
وعوووك يا بلد.
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: زهير ابو الزهراء)
|
على لسان الجد جالدقون حكاية السودان والمثقفاتية القاشرين بالكلام الكبار كبار
يا ولدي، السودان ده بلد عجيب.. فيهو صنف من الناس اسمهم المثقفاتية ديل يا ولدي بيفكروا بالشوكة والسكينة، والبلد بتتاكل بالإيد! البلد غرقانة في الحفر والمطرة، والمثقف واقف هناك في نص الكافيه، لابس نظاراتو
شايل كتاب سميك لواحد خواجة اسمو 'هابرماس' ولا 'فوكوياما'، وبيحلل فينا كأننا كائنات فضائية!
يقول ليك 'يا جالدقون، نحن بنعاني من أزمة بنيوية في المشروع النهضوي!'.. أها، مشروعك ده وين يا بروف؟ في جيبك؟ ولا في شنطة لابتوبك؟ أنا شايفو بس في البوستات الطويلة على الفيسبوك، اللي بتبدأ بكلمة 'بيد أنَّ' وتنتهي بـ 'في سياق متصل'
وأنت تقرأ وتزيد، ولما تخلص تلقى نفسك ما فاهم أي حاجة، زي الزول الشرب موية مالحة!
شايف يا ولدي، المثقفين ديل لما يتزنقوا بيضحكوا علينا، يقولوا ليك: 'يا عمنا، المسألة أيديولوجيا معقدة، والحل في التفكيك الفلسفي يا سلام على التفكيك! فلسفتكم دي بتنزل سعر الويكة في السوق؟ ولا بتخلي 'ماسورة الموية' تطلع لبن؟
تحليلهم دايماً زي القهوة المغلية زيادة ريحة قوية، وطعم مر، وما فيها سكر.. والناس الغبش اللي ماشيين في الشارع ما بيبلعوا الكلام ده إلا لو شربوا وراهو 'كواريك' من القهر
أما النخب السياسية؟ ديل براها.. بيتكلموا عن 'الدولة والمؤسسات' كأن السودان بورد شطرنج في نادي الموظفين
كل يوم جايبين لينا 'وثيقة دستورية' جديدة، يكتبوها بالليل، ويمسحوها بالصباح بـ 'ليفة' المحاصصة
يخطبوا عن الحرية والمواطنة لغاية ما لسانهم ينشف، ولما تسأل المواطن المسكين 'أها، رايك شنو في المواطنة؟' يقول 'والله كلامهم سمح.. بس المواطنة دي بتتاكل بملاح شرموط ولا بدمعة؟ لأن بطني بتغني ظلموني الناس!'
أها، ودي حكاية جماعة الإنقاذ.. ديل عملوا خلطة دين وسياسة زي الشاي باللبن المقطع.. لا تقدر تشربه، ولا تقدر تدفقه! والنكتة الكبيرة كل يوم يقولوا 'نحن في محور المقاومة!'.. ولما الدنيا تقوم، السودان يقول ليهم
'يا جماعة، أنا جيت بالغلط، أنا بس داير أتم نومتي بسلام!'
المثقفين يقعدوا يمنطقوا ليك يا جالدقون، الدولة اختُطفت!'. يا راجل! السودان ده ما شنطة حديد عشان يخطفوها وشوف من عبود لنميري للإنقاذ.. المسرحية هي هي، والمثقف قاعد في الكنبة الأولى بيحلل في 'الدراما' ويكتب 'نقد سينمائي'
وهو مفتكر نفسو ناقد عالمي، والجماهير المسكينة هي اللي بتدفع تمن التذكرة من دم قلبها!
والأحلى من ده؟ المناهج، والبحوث، والمؤتمرات في الفنادق.. دي كلها للناس اللي عندها وقت فراغ. أما المواطن اللي الشمس حرقت نفوخه، يقول ليك 'يا بروف، الفلسفة دي بتجيب لي حق الدواء؟
الجد جالدقون بيقول ليكم: يا 'أفندية'، السودان محتاج 'عقل صافي' و'قلب نضيف'، مش كتاب ألف صفحة ولا 'منتدى' في الزووم. محتاج دولة تحمي الزول الغلبان، وما تخلي الدين والسياسة يرقصوا عرضة فوق ضهر المواطن
أما الكلام الكبير عن الأيديولوجيا والمحاور؟ خلوه للناس القلوبها من ورق كربون، لأنو الجوع حقيقي، والبطن الجيعانة ما بتسمع صوت أفلاطون!
وأخيراً يا ولدي، حكمة مني إسقاط الرأس ما بيحل عاهة لو الجسم كله مشلول.. لازم نصلح العضم ذاته
أما المثقفاتية؟ خليهم قاعدين في قهاويهم بيحللوا في تفل القهوة.. بس ما ينسوا إن الشعب شغال 'طلابة' في بنى التحية، والجوع
ما بيستنى النظرية لغاية ما تكتمل!"
| |
|
|
|
|
|
|
|
|
|
Re: يوميات andquot;جدو جالدونقandquot; في زمن الكتمة (Re: Arif Nashed)
|
https://top4top.io/
يا حليلنا وحليل زمننا، ويا حليل "الخرطوم" البقت زي "التكية" المفتوحة… لكن تكية زمان كانت بتأكل الجيعان، والخرطوم هسة فاتحة بوفيه فاخر… لأكل عرق الشقيان مع صوص الجبايات!
الجد جالدقون مسح نضاراتو في جلابيتو، ركبها بالمقلوب، عدّلها، وهزّ عكازو وقال:
أسمع يا والي الخرطوم… "السن بقى بالضريبة… والضحكة ذاتها داخلة في بلاغ!"
والله يا ولدي، قصة الدكتورة سوزان دي ما بس "غولة ومسافر"، دي غولة فاتحة شركة استثمار:
تقول ليك: "موية؟ حاضر… لكن أول ادفع رسوم العطش، وبعدها نشوف موضوع الشرب!"
يا سعادة الوالي، المرة دي دكتورة…
لا رفعت سلاح، لا مشت غابة، لا دخلت في مزاد الضمائر.
دي شالت مشرطها—المسكين—وجابت معاها حنينها للكلاكلة، وقالت: "نرجّع الضحكة للناس بدل الكشّة."
رجعت لقت العيادة مفكوكة زي لعبة أطفال،
الكهرباء مسروقة، المواسير مختفية، وحتى الحيطة شكلها دايرة لجوء سياسي!
قالت: ما مشكلة… رمّت قروشها زي إسعاف أولي للخراب، وقالت نبدأ من الصفر.
بدل ما يستقبلوها بباقة ورد، ولا حتى "جزاكِ الله خير"،
رسلوا ليها كتيبة كاملة من "الدفاتر الرسمية" مدججة بالأختام!
لكن يا والي، الكتيبة دي ما بتضرب رصاص…
دي بتضرب مباشرة في القلب:
"سند قبض… إشعار سداد… وأمر حضور عاجل!"
يقولوا ليها:
"يا دكتورة، إنتي كنتي نازحة؟ كويس… ادفعي لينا ضريبة الغياب!"
يا جماعة الخير، دي ضريبة شنو؟
ضريبة نزوح؟ ولا رسوم اشتراك في المعاناة؟!
العجيبة لما قالت: "هاتوا الورق"،
ما جابوا ليها مستند…
جابوا ليها نيابة جاهزة بالإطار الكامل—كأنها باقة خدمة شاملة!
يا والينا، إنتو فاكرين "العودة الطوعية" دي إعلان في التلفزيون؟
العودة دي ما بتحصل بخطاب رسمي…
بتحصل لما الزول يلقى دكتور، رغيفة، وموية…
ما يلقى بلاغ مفتوح باسمو عشان رجع!
يعني الزول يرجع، يصلّح، يشتغل…
وبعدين تقولوا ليهو: "مبروك، إنت الآن متهم رسمي بالاجتهاد!"
والله يا سعادة الوالي، لو القصة بقت كدا،
أحسن تعلنوا الخرطوم رسمياً:
"جمهورية الجبايات المتحدة"
وتكتبوا في بوابة الكلاكلة:
(الدخول مجاناً… الخروج برسوم، والوجع شامل الضريبة!)
ولا أحسن كمان:
(الابتسامة بـ10 جنيه… والضرس بـ أمر قبض!)
أرحموا من في العيادات،
قبل ما المواطن يقرر إنو الوجع أرحم من العلاج… والعلاج أرحم من الحكومة!
لأنو ببساطة…
لو الدكاترة خافوا من النيابة،
الناس حتتعالج وين؟
في دفاتر التحصيل؟!
| |
|
|
|
|
|
|
احدث المقالات بسودانيزاونلاين اليوم
| |
زهير ابو الزهراء
Arif Nashed
فيس بوك
تويتر
انستقرام
يوتيوب
بنتيريست